བདག་གིས་ཤེས་རབ་བརྡར་ནས་བལྟས་པ་ན།
ཤེས་རབ་བརྡར་ནས་བལྟས་པ་ན།།
ཕྱོགས་ཀྱི་དགྲ་བོ་བྱ་མ་རྟ།།
རྗེས་མེད་རླུང་བུས་བདས་པ་བཞིན།།
གར་ལ་ཡལ་བ་མ་ཚོར་བས།།
སྤོབས་པའི་གཙུག་ཏོར་གྱེན་དུ་འབར།།
བློ་གྲོས་ཟད་པའི་སྐྱེས་པོ་འགའ།།
ཚིག་གི་བར་དོའི་དྲ་ལམ་ན །།
ཕན་ཚུན་འཁྱུད་དེ་འོ་ཡང་སྦྱོར།།
ཡ་མ་བརླ་ཡི་བོད་ཡུལ་ན།།
ཟད་ཅིང་ཟད་པའི་ཟ་མ་ཏོག།
ཁ་རྐུབ་རྟིབ་ནས་སྣོད་ལྡན་མ།།
ཆུ་ལ་འགྲོ་ཚེ་ལག་སྟོང་ཉིད།།
ཚོར་བའི་རྩེ་མོ་རང་མོས་མ།།
གཅེར་བུར་ལུས་པའི་ངང་ཚུལ་འདི།།
བོད་པའི་ནམ་ཟླ་མ་ཤར་བས།།
གདང་ལ་རི་བོའི་རྫ་དུག་གིས།།
མནར་བ་འདི་གོ་རང་སྐྱོན་ཡིན།།
བཀའ་དང་གདམས་པས་མ་མནོད་པའི།།
ན་ཆུང་གྲོགས་པོ་སྤོ་ཁ་ཚ།།
ཚིག་ལུད་ཕོད་པའི་ནད་སྒྱོ་མ།།
གར་ལ་བཏགས་ཀྱང་རྫོབ་ཏོ་ཉིད།།
སློབ་རའི་ནང་གི་ར་སྐྱེས་རྣམས།།
རེ་བའི་མེ་སོན་གཟིལ་བ་ན།།
གར་ལ་བཞུད་དེ་རང་ཁ་གསོ།།
སེམས་ཁྲལ་འདི་དག་མི་གོ་ན།།
བཤེས་ཀྱི་དྲུང་ལ་འདྲི་རུ་སོང་།།
དྲིན་ཅན་ཕ་མའི་བཞིན་རས་ན།།
གསང་བའི་ལོ་ཟླ་རབ་རིབ་ཡོད།།
ཤེས་ན་ལོ་རྒྱུས་རློན་པ་ཡིན།།
འདི་ལས་བཟང་པའི་གཤིན་པ་མེད།།
ཡ་བཏགས་ར་བཏགས་འཁྲུག་པའི་རྩོམ།།
ད་དུང་མ་འབྲི་ངོ་རེ་ཚ།།
༢༠༡༠ ༡༢ ༣༡གི་མཚན་མོ་ཤར་རྒྱུག་བྱས་པ་ཨེ་མ་ཧོ།
རྩོམ་ཁུངས། རྨ་ཆུའི་བསམ་གཏན་གྱི་ཟིན་བྲིས།