སྡུག་གུ་མ།
སྡུག་གུ་མ
གློག་ཞུ་ཆུང་བའི་འོད་སྣང་རྒུམ་ཞོར་
རང་ཉིད་ཀྱིས་རང་ཉིད་འཚོལ་བཞིན་
མཐའ་འཁོར་གྱི་དྲོད་གྲངས་ཉེར་ལྔར་སླེབས་ཀྱང་
བརྩེ་དུང་གི་ལྗང་མྱུག་མ་འབུས་བ་ཅི་
བརྩེ་བ་ཡི་བརླན་གཤེར་མེད་པ་ཡིན་ནམ་
དུངས་བ་ཡི་ས་ཞིང་མི་གཤིན་པས་ལན་
ཡང་ན གཞན་ཅི་ཞིག་
སྡུག་གུ་མ
སྟེས་དབང་མིན་པའི་ལས་དབང་ཞིག་གིས་
རང་ཉིད་ལས་ལྕི་བའི་སེམས་པ་ཁུར་ཏེ་
གདུང་བ་རུམ་གང་གི་དྲན་ཤིང་དང་
མིག་ཆུ་ཁྱོར་བ་གང་གི་སེམས་གཞས་བསྐྱུར་ནས་
ལམ་ལ་ཆས་དགོས་བྱུང་
ལམ་ལ་ཆས་པའི་ཉིན་མོ་དེ་ནས་བཟུང་
མི་ཡུལ་ལ་ཚ་གདུགས་བབས་
བབས་དྲགས་པའི་དབང་གིས་
འུ་གཉིས་ཀྱི་བརྩེ་དུང་གི་ས་བོན་དེ་ཡང་
འཚིག་ལ་ཉེ་
སྡུག་གུ་མ
རི་ཆུ་སྟོང་ཕྲག་གི་ཕ་མཐའ་བདས་བ་ནས་བཟུང་
ངས་ལས་མཐུན་གྲོགས་པོ་ཚོ་དང་མཉམ་དུ་
ཝུ་ཆང་དམ་བེ་གང་ལ་འཐམས་ཤིང་
དུ་བ་རྐང་གཅིག་ལ་འཇུས་ཏེ་
སྐྱུག་བྲོ་བའི་ཆོས་ཉིད་ཅིག་གླེང་བཞིན་
བསམ་གཞིགས་ཀྱི་ཁོང་གསེང་རེ་རེའི་བར་ནས་
སྙན་ངག་གི་མཆོད་པ་བཤམས་ཏེ་
མ་འོངས་བའི་ལྷན་འཛོམས་ལ་གསོལ་བ་འདེབས་བཞིན་ཡོད་
སྡུག་གུ་མ
བརྩེ་བ་མ་རྙིང་གོང་
དུངས་བ་མ་བོར་གོང་
ཁྱིམ་གཞི་མ་རླག་པའི་སྔ་རོལ་ལ་
ཕྱིར་ལོག་ཤོག་
སུས་ཀྱང་རེག་མ་མྱོང་བའི་དམར་ཆུང་སེམས་པ་
ཁྱེད་ཀྱིས་ཅི་དགར་སྤྱད་ཆོག
༢༠༠༩ ༤ ༢༣
རྩོམ་ཁུངས། ངེད་དྲ་བ།