མཛེས་པའི་ལུས་ལ་མཛའ་བའི་གོས།།
དཀར་བའི་བཞིན་ལ་དུངས་པའི་ཉམས།།
ཤར་བ་མཐོང་བས་ལྷ་མོ་འགའ།།
སྐྱེངས་ཏེ་མ་ནུས་བྲོས་པར་བཤད།།

ཁྱོད་ཞལ་པདྨོ་འཛུམ་པ་ལ།།        
བདག་ཡིད་བུང་བ་བག་མེད་རྩེན།།
འདོད་པའི་ཟེའུ་འབྲུ་ཕྱིར་དབྱུང་ན།།
སྲེད་ལྡན་འགའ་ནི་སྨྱོ་ཡང་སྲིད།།

ཡིད་གར་འོང་བའི་བྲང་གཞུང་དུ།།
རབ་ཏུ་སྨིན་པའི་མྱོས་བུམ་ཟུང༌།།
གར་གྱི་སྦྱོར་བར་བྲེལ་བ་ནི།།
གནག་ནས་མནར་གཅོད་བྱེད་དང་མཚུངས།།

དར་གོས་རླུང་གིས་བསྐྱོད་འདྲ་བའི།།
མཉེན་ལྕུག་འཛོམས་པའི་ལུས་པོ་ལ།།
ཆ་ལུགས་གཙང་མའི་རྒྱན་བཏགས་པས།།
རྨ་བྱའི་ཚོགས་ཀྱང་ཧད་དེ་ལུས།།

སྤྱན་མཐའ་མཆི་མས་བརླན་ན་ཡང༌།།
ཆུ་ཡི་ཟེགས་མས་བཟུང་བ་ཡི།།
མེ་ཏོག་རྣམས་ནི་མཚར་བ་ལྟར།།
ལྷག་ཏུ་སྒེག་པའི་སྣང་བ་སྦྱིན།།

རང་བཞིན་འཇམ་པོ་བལ་གྱི་གཤིས།།
གཡོ་ཟོལ་བྲལ་བ་བྱིས་པའི་བློ།།
བདག་གཞན་ཀུན་ལ་དབྱེར་མེད་བརྩེ།།
དྲན་པའི་མོད་ལ་ཐམས་ཅད་རྩོད།།

ཞེན་པའི་གཞུ་མོ་བཀུགས་པ་ནས།།
ཤོར་བའི་ཟུར་མིག་ཉག་ཕྲན་མདའ།།
སུ་ཡི་སྙིང་ལ་ཕོག་གྱུར་ཚེ།།
སྤྲོ་དགའི་ཟློས་གར་ཅི་ཡང་བསྒྱུར།།

ཡིད་འཕྲོག་བཟོ་ལྟ་མ་ལུས་པ།།
འཁྲེང་བའི་སེམས་ཀྱིས་བསྐྱར་བ་ཡིས།།
རྨི་ལམ་མངར་མོའི་གཞིས་ཁྱིམ་དུ།།
ཡང་ནས་ཡང་དུ་འདྲེན་པར་རྩོམ།།

རྩོམ་ཁུངས། ངེད་དྲ་བ།