ངའི་སྟོང་ཁམས་ཀྱི་དབྱིངས་རིམ་ན་རྒྱུ་བའི་ལྷ་ཚོགས་རྣམས
ངའི་བསང་དུད་ཀྱི་ཁོང་གསེང་ན་བགྲོད་པའི་ལྷ་མོའི་ཚོགས
རང་ཉིད་ཀྱི་ལག་པ་ཕྱི་ལ་སྲིང་བར་ལོབས་ཡོད་པ་ལས
རང་ཉིད་ཀྱི་ལག་པ་ནང་དུ་བསྡུ་མི་ཤེས་པའི་གོམས་སྲོལ
ང་ལ་གོམས་སྲོལ་དུ་མ་ཆགས་པའི་གོམས་སྲོལ
བདེན་པར་འཐད་པའི་གཞུང་ལུགས་ཆེན་མོ
བདེན་པ་ལས་ལོག་པའི་གཞུང་ལུགས་མིན་པའི་གཞུང་ལུགས
ང་ལ་དགོས་དོན་མི་འདུག
བཏུང་འདོད་པའི་ཡུན་རིང་གི་བདུད་རྩི
ཨ་མས་ལྷ་ལ་འབུལ་དགོས་ཟེར
གནམ་ལ་མཆོད་ཅིང་སར་ཐིམ་པའི་བདུད་རྩི་ཞིམ་པོ
ཨ་མར་ཆུད་ཟོས་མིན་པའི་ངའི་ཆུད་ཟོས
སེམས་ལ་ན་ཟུག་ཅིག་ཐོལ་གྱིས་འཕྱུར
ངའི་རྩྭ་ཐང  ངའི་ནོར་ལུག  ཁྱེད་ལ་སྟེར་དགོས་དོན་མི་འདུག
ངའི་ས་ཞིང  ངའི་ལོ་ཏོག  ཁྱེད་ལ་སྦྱིན་དགོས་དོན་མེད
རང་ཉིད་ཀྱི་ཕྱག་རང་ཉིད་ཀྱི་ཆེད་དུ་མི་འགུལ
རང་ཉིད་ལ་རང་ཉིད་ཀྱི་ཕྱག་སྟོང་གིས་ཅི་བྱ
སྤྱན་སྟོང་ཡང་དགོས་དོན་མེད་པ་འདྲ
མཆོད་མཆོད་པའི་མཐའ་མ
འབད་འབད་པའི་རྗེས་མ
ཐོབ་བྱ་མེད་པའི་ཐོབ་བྱ་ལྗིད་པོ
འབྲས་བུ་མི་ཐོགས་པའི་ས་བོན་དངོས་མ
འཕུར་རྒྱུ་ལས་འབབ་རྒྱུ་མེད་པའི་ཚད་མ

རྩོམ་ཁུངས། ངེད་དྲ་བ།