བློས་འགེལ་མེད་པའི་སྐྱབས་ཡུལ།
རང་སེམས་གཙང་ཆབ་རྒྱུན་གྱིས་ཁྲུས་ཀྱང༌།།
ར་རོ་ལོག་འཚོ་ལྔ་ཡིས་དབྱེན་སྦྱོར་ན།།
བདེན་དོན་ཚད་མའི་གཞལ་བའི་མཐུ་དཔྱོད་དེ།།
རྒྱུ་འབྲས་རྒྱ་མའི་སྟེང་ནས་ལྕི་ཡང་ཤོར།།
བསྐུལ་སློང་མན་ངག་བསྩལ་བའི་བཞེན་པ་དེ།།
ཐོས་མེད་ཕྱི་བཤོལ་དབང་དུ་འོབས་ཀྱིས་ལྕེབས།།
དྲང་བདེན་རྗེན་དུ་ཕུད་ཀྱང་འཆལ་གཏམ་གྱིས།།
སྒྲོ་སྐུར་གྱེན་ལ་ཀེར་བཞིན་རྨོངས་ལ་དད།།
རྡོ་རྗེ་དམ་བཅའ་ཚིག་གི་ལྡེབས་ལ་བརྐོས་ཀྱང༌།།
ཡིད་ཆེས་དམར་བོ་སྙིང་ལ་རུམ་ཐབས་དབེན།།
འཕྲལ་འགྱུར་མཛའ་གཤིས་རུལ་བའི་དྲི་ངན་དེ།།
རྩེ་མོ་བཅད་ཀྱང་རྩ་བ་འདོར་མ་བྱུང༌།།
བཙན་གྱིས་ལྟུང་བའི་མིག་ཆུའི་རྒྱུན་ཐག་ཐུང།།
འཕྱས་གདེགས་སྤངས་བླང་མཛོལ་བའི་བློ་མིག་ལྡོངས།།
དཀའ་བསགས་ནོར་བའི་རྒྱན་མཚན་དམའ་རུ་འབེབས།།
སྐལ་སྙིགས་དྲ་བས་འཛིང་བས་བསམ་གཞིགས་རྙོག།
བྱུང་རྒྱལ་སྨྲ་ལྕེ་མྱུར་བའི་སྤྲེལ་ལད་ཀྱིས།།
འདང་བརྩེ་བྲན་དུ་གཡོག་པའི་སྒྱུ་འཕྲུལ་མཁས།།
འཛུམ་གྱིས་བླུས་པའི་གཅམ་གསག་ངོ་དགའ་ཡིས།།
མུན་ནག་དོང་ཁར་འདེད་པའི་ཕུགས་བརྟན་དཀོན།།
བློ་མིག་ཁབ་རྩེ་འབིགས་པའི་ཟོལ་སྦྱོར་གྱིས།།
བློ་ལ་ཉེ་རིང་འཁྱེར་བའི་གཏད་སོ་བྲལ།།
བློ་སེམས་གཞུ་ལ་འགུགས་པའི་ཉེས་བ་དེས།།
བློ་རྩེ་གཅིག་ལ་མི་ཞོག་དཀྲུགས་ཤིང་ཡིན།།
བསམ་པའི་དྲན་ཤེས་མི་རྟག་ཆོས་ཀྱིས་ཞེན།།
མི་ཡུལ་བྱམས་པའི་དུངས་བ་འཕན་ཟེལ་སྟོར།།
དྲིན་གཟོ་བསྐྱུད་པའི་སྣང་ཡུལ་རྒྱུ་ལ་རྔམ།།
སྐྱུག་མེར་བདོག་པའི་དུས་འདིའི་མཚང་བ་བརྗོད།།
འཁྲུལ་ཤེས་མངོན་ལྐོག་འཚུད་པའི་གཡོ་ཅན་འོག།
ངེས་མེད་རང་སྲོག་ལྕེབས་པའི་བླུན་པོ་མོད།།
དྲན་པ་ཀློང་རིམ་ཉུལ་བའི་བློས་བསླང་དེས།།
ཅི་ཡིན་ངེས་ཚིག་བཟློ་བའི་ཉམས་སད་ཙམ།།
རྩོམ་ཁུངས། ངེད་དྲ་བ།