སྤང་ཐང་ཡང་བོའི་རྩྭ་ལོའི་ཁུག་ནས།།
སྦྲ་་ནག་གྲུ་བཞིའི་ཆོན་ཐག་ཆད་ནས།།
རྫ་ཡམ་སྐྱ་བོའི་ཁང་གསར་མཛེས་ཀྱང།།
འབྲོག་ཁྱིམ་སྨུག་པོའི་བྲོ་བ་ཡལ་འདུག།

 

ཀྱག་ཀྱོག་རྐང་ལམ་ཕྲ་མོའི་ནང་ནས།།
ཅང་ཤེས་རྟ་ཕོའི་བང་ཁ་ཡལ་ཏེ།།
འཕྲུལ་རྟ་སྐྱི་སེར་རླུང་ལ་འགྲན་ཀྱང་།།
དམར་པོའི་སྲོག་གི་བསུ་མ་ཡིན་འདུག།

 

བདུད་རྩི་སྨན་གྱི་སྙིང་ཁུ་བཞེས་བའི།།
ཐུལ་དཀར་འབྲི་མོ་རྒོད་ལ་ཤོར་ནས།།
ཤོག་ཐུམ་འོ་མའི་ཚོང་ཁ་ཡག་ཀྱང་།།
ནད་རིགས་སྟོང་གི་གཡབ་མོ་ཡིན་འདུག།

 

དབུ་སྐྱེས་ནགས་ཚལ་སྟུག་པོའི་ནང་དུ།།
སྟ་རེ་སོ་ལེ་འདུར་རྒྱུག་མང་བས།།
རླུང་ནག་འཚུབ་མའི་རྡུལ་ཆེན་འཕྱུར་ཏེ།།
བདེ་སྐྱིད་འཚོ་བའི་མངར་ཁ་ཡལ་འདུག།
 
ས་འཛིན་དགའ་མའི་མངལ་ཁ་ཕྱེ་སྟེ།།
གཏེར་ཁའི་གཅེས་ཕྲུག་ཕྱུང་རྒྱུ་མང་བས།།
འདར་འགུལ་བང་ནད་གཅོང་གིས་མནར་ཏེ།།
དམར་པོའི་སྲོག་གི་འཚོ་རྟེན་ཡལ་འདུག།

 

བུན་ཁྲན་སྐྱེ་རྒུ་ཉི་མར་བསྐམས་ཐལ།།
འབྲུག་དཀར་གཙང་པོས་ལྕེ་ཞགས་འཕང་ཐལ།།
ཞི་བདེ་རྒྱ་མཚོས་ཁྱུར་མིད་བྱས་ཐལ།།
ཡལ་བ་ཁོ་ནས་སྙིང་རྩ་འདར་རོ།།