ཀ་བ་གདུང་ལྕམ་མེད་པའི་ཁང་བཟང་གི་ནང་དུ།།
ཁ་ཁུ་སུམ་མེར་ཆེད་ལས་རིག་ཚན་ལ་ཞུགས་དུས།།
ག་ནས་འོང་བ་མ་ཤེས་ཁོ་མོ་ཡི་མཛེས་སྡུག།
ང་ཡི་སེམས་སུ་ཝ་ལེར་ཝ་ལེར་ངང་འཆར་བྱུང་།།
ཅ་ཅོ་འུར་ཟིང་དབེན་པའི་སློབ་ཁང་གི་གྲུ་གར།།
ཆ་རྒྱུས་ཡོད་ཀྱང་མེད་པའི་དཔེ་དེབ་ལ་ཅེར་དུས།།
ཇ་ལོ་ལྟར་གཡེང་ཁོ་མོའི་མཛེས་སྡུག་གི་བཞིན་རས།།
ཉ་མོ་ཆུ་ལ་ཞུགས་བཞིན་རང་ཤུགས་ཀྱིས་དྲན་འོང་།།
ཏ་རིན་འབྱོར་ལྡན་དུས་རྒྱུན་རོལ་རྒྱུ་ལ་དགའ་བ།།
ཐ་མ་ཁ་དང་མཚུངས་བའི་གཟུགས་མཛེས་མའི་འཁྲུག་སྦྱོར།།
ད་ནི་ཁོ་བོའི་དྲན་པར་རང་ཤུགས་ཀྱིས་འཁོར་བ།།
ན་ཆུང་ཁོ་མོའི་རང་བྱུང་མཛེས་སྡུག་དེ་ཡིན་སོང་།།
པ་ཏྲའི་རི་མོར་བཀོད་འདྲའི་འུ་གཉིས་ཀྱི་བརྩེ་དུངས།།
ཕ་ས་གང་དུ་ཕྱིན་ཡང་འགྱུར་བ་ནི་མེད་པས།།
བ་དྲུས་མས་ཀྱང་དུས་རྒྱུན་དོ་ཟླ་རུ་བྲལ་བ།།
མ་གདན་མཐུག་པའི་འུ་གཉིས་བརྩེ་དུང་གི་བཞུར་རྒྱུན།།
ཙ་གེ་ཙིག་གེའི་ཁ་རྩོད་སུ་ལའང་ཡོད་ལ།།
ཚ་གེ་ཚེག་གེའི་ལས་རྒྱུ་སུ་ལའང་ཡོད་ངེས།།
ཛ་ཡིག་ཀློག་བཞིན་མཛའ་མོའི་བཞིན་རས་དེ་གླེང་མཁན།།
ཝ་དཀར་ཡུལ་གྱི་སྨྱོན་པ་འབའ་ཚེ་ནི་ཡིན་སོང་།།
ཞྭ་མོ་ས་རུ་བཞག་སྟེ་ཞིབ་འདང་ཞིག་རྒྱབ་ན།།
ཟ་མ་ཟ་བའི་སྐབས་སུ་དྲན་གཞུང་དུ་འཁོར་བ།།
འ་ལེ་འོ་ལེ་ཁོ་མོའི་བཞིན་རས་ལས་ལྷག་པ།།
ཡ་ཆུང་སེམས་སུ་འཆར་རྒྱུ་ཅི་ཡང་ནི་མི་འདུག།
ར་མགོ་ལུག་གཟུགས་སྦྱོར་བའི་དེ་རིང་དུས་ལ།།
ལ་ལས་རྒྱུ་ནོར་མིང་གྲགས་ཁོ་ན་ནི་སེམས་མོད།།
ཤ་རེ་ཤོ་རེས་འཚོས་བའི་བུ་ཆུང་ངས་སེམས་པ།།
ས་ཕྱོགས་མང་རྫོང་ཡུལ་གྱི་ཁོ་མོ་ལས་སུ་ཞིག།
ཧ་ལེ་ཧོ་ལེ་བརྩེ་བའི་དུང་བ་ཡིས་གཟིར་བས།།
ཨ་ཨ་ཟེར་ཞོར་ངག་ལས་འདི་སྐད་དུ་ཤོར་རོ།།
ཧ་ཧ་ཧོ་ཧོའི་སྒོ་ནས་ཀ་རྩོམ་འདི་ཀློག་ཞོར།།
ཨ་ཧ་ཧོ་ཧོ་ཟེར་བཞིན་འཕྱ་སྨོད་ནི་མ་བྱེད།།
 

རྩོམ་ཁུངས། ངེད་དྲ་བ།