བྲེལ་འཚུབ་བྱ་བའི་བར་མཚམས་ཤིག་ནས།།
རེ་བའི་མིག་ཞགས་རྒྱང་ལ་བསྲིངས་དུས།།
གངས་དཀར་སེམས་ཀྱི་བར་སྲུབ་ཞིག་ནས།།
མཛའ་མོ་དྲན་པའི་ཆུ་མིག་བརྡོལ་སོང་།།

བརྩེ་སེམས་མེ་ཏོག་ཨུ་དུམ་བ་ར།།
དཀར་ནག་ཉི་ཟླའི་ལྟེབ་བསུབ་བར་ནས།།
བཞད་པའི་དུས་ཚོད་ཐུང་ངུ་ཞིག་ལ།།
སོ་སོར་ཐོར་བའི་ལས་ལ་བབས་སོང་།།

ས་མཐར་ཁྱམ་པའི་རྡོག་པའི་སྣེ་མོ་།།
དགུན་ཟླ་རྩུབ་མོའི་ཐང་ལ་དཔར་དུས།།
གསོ་རིག་ཤེས་བྱའི་དྲོད་ཐིག་ཅིག་གིས།།
རྐང་རྗེས་སྨན་པའི་ལས་འདི་ཐོབ་བྱུང་།།

ཆུང་དུས་ལུག་ཁྱུ་འཚོ་བའི་དུས་སུ།།
སེར་ཆེན་མེ་ཏོག་ལག་རྟགས་སྟེར་སའི།།
དུང་དུང་སེམས་ཀྱི་མཛའ་མོ་གཅིག་པུ།།
རི་ལུང་སྟོང་གི་ཕག་ན་ལུས་འདུག།

ཞལ་རས་བཅོ་ལྔའི་དུང་ཟླ་དཀར་པོ།།
ལོ་ཟླའི་གྲིབ་མས་ནག་པོར་བསྒྱུར་རུང་།།
དུང་སེམས་སོ་དཀར་ཕྱི་ལ་མངོན་པའི།།
ཚུལ་དེ་དྲན་ན་སྙིང་རེ་རྗེ་གི།

དྲན་པའི་དྲན་པ་ཆུ་བཞིན་བརྡོལ་རུང་།།
རང་སེམས་སྐྱོ་བའི་རྒྱུ་ལས་མི་འདུག།
སྤང་ཁའི་མེ་ཏོག་སེར་ཆེན་རིག་ན།།
མཛའ་མོའི་ཞལ་རས་སྙིང་ལ་འཆར་གི།

མཛའ་མོར་འཕྲད་པའི་རྨི་ལམ་ནང་ནས།།
དྲོད་སྐྱེད་བུམ་པ་དམ་དུ་བསྡམ་རུང་།།
བེན་པོའི་གཟུགས་ཀྱི་འཇིཌ་སྙིང་ཤར་ནས།།
དབུགས་ཀྱི་རྒྱུ་བས་གཉིད་ལས་སད་བྱུང་།།

རྫ་གཡམ་དམར་པོའི་ཁང་ཆུང་གཡར་མར།།
ཞག་གཅིག་འདུག་ན་སུན་སྣང་སྐྱེས་གི།
སྦྲ་ནག་གྲུ་བཞིའི་ཐབ་ཀའི་འགྲམ་ནས
ཚེ་གཅིག་ཟད་རུང་སྐྱིད་སྣང་འཆར་གི།
             
                       ༢༠༡༡．༣．༢༥

རྩོམ་ཁུངས། ངེད་དྲ་བ།