སྣང་བ་ཁེར་རྐྱང་གི་མཚན་མོའི་ལྗོངས་སུ།།
རྨི་ལམ་ཟ་ཟི་ཡི་རོལ་བར་འཐིམས་དུས།།
སྡེ་ཆེན་རྩེ་ར་ཡི་ལ་སྐད་ཅིག་གིས།།
འཁོར་བའི་ནང་རྫོང་གི་རོ་མངར་ཚོར་བྱུང་།།
 
སྡེ་ཆེན་རྩེད་ར་ཡི་ཚོམས་སུ་སྤུངས་བ།།
ལང་ཚོའི་དབྱར་གཞུང་གི་ན་མཉམ་འདི་ཚོས།།
འཇིག་རྟེན་སྣང་བ་ཡི་ལ་གཞས་ལེན་ས།།
མཚན་སྨག་ཀླད་འཁོར་གྱི་དུས་ཚིགས་འདི་ཡིན།།
 
ཕྱི་མའི་ལམ་ཁ་ཡི་བདེ་བ་འཚོལ་ན།།
གཡོ་མེད་ཏིང་འཛིན་གྱི་གཟུང་ཐག་ཡོད་དགོས།།
ཅང་མེད་ཁེར་རྐྱང་གིས་ཆོས་ལམ་སྙེགས་ན།།
རང་མགོ་རང་ཐོན་ཞིག་ཡོང་བ་དཀའོ།།
 
དབེན་པའི་འབྲོག་དགོན་ན་འདུ་འཛི་མེད་ཀྱང་།།
རང་གི་སེམས་ནང་ན་འཁོར་བ་ཡོད་པས།།
ལུས་པོ་ཐག་རིང་གི་རི་ལ་བསྐྱལ་ཡང་།།
སེམས་པ་འདིར་སྣང་གི་འཁོར་བས་བཟི་སོང་།།
 
འཇིག་རྟེན་སྒྱུ་མ་ཡི་རོལ་བར་དཔེ་བླངས།།
ལང་ཚོ་འཇའ་ཚོན་གྱི་གཟུགས་སུ་བལྟས་ན།།
གོས་མེད་གཅེར་རྗེན་གྱི་མི་ལ་རས་པའི།།
མི་ཚེ་དོན་མེད་དུ་ཚར་བ་ཨེ་ཡིན།།
 
ཕོ་མོ་དགའ་འགུ་ཡི་དཔལ་གྱིས་འཚོ་ཞིང་།།
བུ་ཕྲུག་འཁོར་བ་ཡི་སྙིང་བོར་བསམ་ཞོར།།
ད་དུང་ལོངས་སྤྱོད་ཀྱི་རོལ་བའི་གསེབ་ནས།།
སུ་ཡིས་འཁོར་བ་ཡི་སྡུག་བསྔལ་ཚོར་ཡོང་།།
 
སྟོང་བ་བདག་མེད་ཀྱི་ཐ་སྙད་ཚོན་པོ།།
ཆོས་བ་ཡིན་མིན་གྱིས་ཁ་ཁྱེར་བྱེད་དུས།།
བག་མེད་བདེ་སྟོང་གི་སྦྱོར་བ་འདི་ཡང་།།
ཞེན་ལོག་ཐེངས་གཅིག་གིས་ཆོད་ས་མ་ཡིན།།
 
སྒོ་ཁྱིའི་རྨི་ལམ་དེ་གཞས་ཀྱིས་དཀྲོག་ཤིང་།།
བྱམས་པའི་མལ་ས་ཡང་འདོད་པས་དྲོས་ན།།
འཁོར་བ་སྡུག་བསྔལ་གྱི་ཁབ་རྩེ་དེ་རུ།།
བདེ་བའི་མལ་ས་ཞིག་བཅས་ནས་མེད་དམ།།
 
མི་ངོའི་རྫུ་བག་གི་བ་སྤུའི་གསེབ་ནས།།
སེམས་ཀྱི་ཞེན་ས་དག་གཟེངས་སུ་སྐྱེས་ཀྱང་།།
ད་དུང་ཨུ་ཚུགས་ཀྱིས་བགྲོད་པ་འདི་ཚོར།།
ཆོས་པ་རྣམ་དག་གི་ཆོ་ལོ་ཐོབ་བམ།།
 
ཕྱི་དབུལ་ནང་དབུལ་གྱི་གྲྭ་ཤག་འདི་ཉིད།།
མི་ཚེ་སྐྱོ་གྲོགས་ཀྱི་རོགས་དན་བྱས་ནས།
ཆུང་འདྲིས་བྱམས་པ་ཡི་བརྩེ་བའི་གདན་སར།།
མ་མཇལ་ལོ་ཟླ་ཞིག་སོང་བས་ནོངས་པ།།

རྩོམ་ཁུངས། ངེད་དྲ་བ།