གནམ་འོག་ཆེན་པོ་འདིར                               
འདྲ་མཉམ་གྱི་ཁེ་དབང་ཅི་ཙམ་ཡོད་ཆོག་པ           
རང་སེམས་དམར་པོ་ལས  གཞན་སུ་ཞིག་གིས་གླེང་མྱོང
 
ས་རྡུལ་ཆགས་པའི་ལོ་རྒྱུས་ཀྱི་ངོ་གདོང  
ཁ་རོག་གེར  མེས་པོའི་བང་སོར་བརྩིགས་ཤིང         
སླར  སྔར་སོང་གི་ལོ་ཟླའི་རྐང་རྗེས་འཐུ་བཞིན           
བོར་ཟིན་པའི་ཁ་སང་གི་རེ་འདུན་ཁྲི་ཕྲག                
དེ་རིང་གི་དྲན་པའི་གཏིང་རིམ་ལ་བྲིས་ཚེ               
བར་སྟོང་དེ  ཁྱེད་དང་ང་ཡི་མཛའ་སེམས་ཀྱི་ཕྱི་ཐག་རེད  
 
བླ་སྲོག་གི་མཛུབ་རྩེ  རང་དབང་གི་ནམ་མཁར་ཀེར་ན
ཕྲག་དོག་གི་མིག་རྩ་དམར་པོ  
ཤ་འཁོན་གྱི་ཁྲག་ལ་རྔམ་ཞིང
རང་དབང་གི་གཡུལ་སར  ཡོད་ཚད་འཇིག་ཡེར་ཡེར
རང་ཉིད་མ་ཚོར་བའི་ཁེར་རྐྱང་གི་རྡོག་སྒྲས             
དཔྲལ་བའི་སྟེང་བཀོད་པའི  ལས་དབང་གི་ལམ་ཡིག་ཀློག་གིན  
ལྷ་སྒྲུང་རུམ་པའི་སྦྲ་ནག་གི་སྨ་རར་བྱིལ་བྱིལ་གནང
                                           
དོ་དགོང   ཕྱི་སྐམ་ནང་འཁྱག་གི་དོ་དགོང                
ངའི་ཡོད་ཚད་ཀྱི་ཐམས་ཅད
སོར་མོའི་རྩེ་ནས་བཞུར་བའི་དྲན་གདུང་གི་རོལ་དབྱངས་དཀྲོལ
                  24/8/2012   

རྩོམ་ཁུངས། ངེད་དྲ་བ།