བྲག་རིའི་སེར་ག་ལྟར་གས་པའི་ལྕགས་མཁར
དེའི་ནང་གི་འབུ་སྲིན་དང་སྐྱེ་དངོས་ཚོགས་འདར་བཞིན་ཡོམ

སེར་ག་བརྒྱུད་དེ་སེར་ག་ཇེ་ཆེར་གཏོང་མཁན་རྣམས
གཉེར་རིས་ཀྱི་ངོ་གདོང་ལ་འཛུམ་མདངས་ཀྱིས་ཁེངས་འདུག
རྔུལ་ཆུ་འཁྱིལ་ནས་འདུག

དཔྱིད་ཀ་ཞེས་པའི་ལྟ་མོ་དེ་ཕེབས་ན
ལྗང་ཐིང་ཐིང་གི་ཡུལ་ལྗོངས་ཞིག་ཏུ་བཟོ

ལྕགས་མཁར་ནང་གི་འབུ་སྲིན་འགའ
ལུས་པོ་པད་མ་བཞིན་དུ་གས་ཏེ
ཡིག་གེ་དྲུག་པོ་ཨུ་ཚུགས་ཀྱི་འདོན་བཞིན
འཆི་བ་ཞེས་པ་དེའི་ལག་གཡོབ་ལ་སྒུག་ནས་འདུག

                           མཇུག་སྡོམ་ཡིན་ལ་སྨོན་ལམ་ཡིན།

མི་རེའི་ལ་ཐོད་ལ་གཉེར་རིས་རེ་འབབ་བཞིན
སྐར་མདའ་དག་འཚུབ་ཙམ་གྱི་ཀློང་དུ
ས་གཞི་འདི་མཇུག་སྡོམ་བྱེད

རྨི་ལམ་དུ    སྐར་ཆེན་འདིའི་སྔ་རོལ་གྱི་མུན་ནག་ལ་རྡུང་ག་གཞུས་ཏེ
འོད་སྣང་གི་ཞོགས་པ་དེར་རེ་སྒུག་བྱེད

ལྕང་ལོ་དཀྲིས་པའི་མི་བུ་འགའ
ཚ་དྲོད་ལ་སྦྱར་ཏེ འོད་སྣང་ལ་འཐམས་ནས
རེ་སྨོན་ཡོད་ཚད་དེ་རིང་ནས་མགོ་རྩོམ་མོ་ཟེར

 རྨི་ལམ་དུ      བདག་གིས་ཀྱང་དེ་ལྟར་སྨོན་ལམ་འདེབས་སམ

                                                                             རྩོམ་སྒྲིག་པ། དབང་མོ།

 (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།