ལོ་ཕྱེད་ཅིག་ལ་སྙན་ངག་མ་བྲིས་ཀྱང
ཐ་སྙད་དེ་དག་གིས་ང་རང་ཡོངས་སུ་དོར་མི་འདུག
ཁྲག་རྒྱུན་དུ་གནས་བཅས་པ་དེ་དག
ཁེར་བུར་སྡོད་ཅིང་དེ་དག་གི་ང་རྒྱལ་གྱིས
སུ་ལའང་རྨ་ཁ་གཏོད་མི་སྲིད
དེ་དག་གཞན་སུ་ཡིས་ཀྱང་སྒྲུན་དུ་མེད

ཇི་སྲིད་སྨྱོ་འབོག་དང་མདེའུ་ཡིས་ཐིམ་སྒྲིལ་བྱས་ཀྱང
 “ འདུན་པ་ཚེར་མའི་རྩེ་མོ་ལྟར „

གསང་བའི་ཕོ་བྲང་རྡིབ་པའི་ལུང་བསྟན་ནི
རྟ་ཁ་བསྒགས་ཏེ་སྡོད་པའི་སེམས་བྱུང་གི་ང་རྒྱལ་ཉམས་པའོ

ཉིན་གང་གི་འཕྲོ་འདུ་རྒོད་པའི་སྟོང་བསམ་གྱིས
དུས་ཚོད་ལ་འང་སྣང་བ་མི་གཏོང
གྲངས་ཀའི་འདུ་འཕྲོད་ཀྱིས་སུན་སྣང་བསྐྱེད་པར
འགྲེལ་བཤད་སྡུག་ཅག་ཅིག་བརྒྱབ་ཀྱང
རྨོངས་པའི་རྒྱུ་རུ་མི་འགྱུར་གྲང
དེ་དག་འཇིག་པའི་གོ་རིམ་ཞེས་པའི་ནགས་ཚལ་དུ་ཡོད
དེ་དག་མངོན་སུམ་ཞེས་པའི་རྩིག་པའི་ནང་དུ་ཡོད

                                                        ༢༤་༨་༢༠༢༠

རྩོམ་ཁུངས། ངེད་དྲ་བ།