བཤེར་འཚོལ།
ཁྱོད་ཀྱིས་སྔོན་ཆད་ལྟར་ངའི་མིང་ནས་འབོད་རོགས།
---གྲོགསHBལགས་རྐྱེན་ལམ་དུ་ཤོར་བར་བྲིས།
དུས་ཚོད་ཀྱི་མལ་ཁྲི
ཁྱོད་ཀྱི་ཨ་མའི་སྙིང་ཆུང་བཞིན
བར་སྣང་ནས་ཡོམ་ཡོམ་འདར་དུས
ཚེ་སྲོག་ནི་ཅི་འདྲའི་ཡང་བ་ལ
སང་ཉིན་ལ་མུན་པ་འཐིབ་པའི་མཚན་མོ་འདིར
མལ་ཁྲི་འདིའི་མ་ཐེག་པ་ཁྱོད་རང་མ་ཡིན་ཏེ
ཁྱོད་ཀྱི་རྨི་ལམ་རབ་ཏུ་ལྕི་བས་སོ
ཁྲག་ནི བྱིས་དུས་ཀྱི་དགོད་སྒྲ་རེ་རེ་བཞིན
ཆེས་མཇུག་མཐའི་ནད་ཁྲིར་ག་ལེར་འཛག་དུས
མི་ཚེ་ནི་ཅི་འདྲའི་ཐུང་བ་ལ
ཨེམ་ཆི་ཞིག་གིས་ལག་པ་གཡུག་གཡུག་བྱེད་པའི་ངང་ཚུལ་གྱིས
ང་རང་ཁྱིམ་ལ་མ་ཡོང་ཟེར་བ་བཞིན
ཕྱི་དྲོ་གཅིག་ལ་རབ་ཁ་ཞིག་ནས་ཧྲེང་ངེར་སྡོད་དུ་བཅུག
གྲོགས་པོ འདི་ནི་སྐྱེ་འཆིའི་རབ་ཁ་ཡིན་པའི་དབང་དུ་བྱས་ན
འུ་གཉིས་ད་དུང་འདི་ནས་ཐེངས་ཤིག་འཕྲད་ཡོང
དེ་དུས ཁྱོད་ཀྱིས་སྔོན་ཆད་ལྟར
ངའི་མིང་ནས་འབོད་རོགས
༢.༦.༢༠༢༡མཚན་མོར།
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།