སྟོད་ཆ།
                             གཅིག
 དེ་རིང་ཕྱི་དྲོ་སློབ་ཁྲིད་མེད་པས།  ངས་གུང་ཟས་ཟོས་རྗེས་དགེ་གྲོགས་བླ་མ་ཚང་ལ་ཁྱིམ་ཉུལ་དུ་སོང་བ་ཡིན།
 མཐོ་སྒང་གི་ནམ་མཁའ་ནི་སྔོ་སང་ངེར་འདུག་ལ།  མདང་དགོང་གི་ཆར་བ་དེས་གྲོང་བརྡལ་ཆུང་ཆུང་འདིའི་ཁོ་ར་ཁོར་ཡུག་ཐམས་ཅད་གཙང་མ་ཞིག་བཀྲུས་ཟིན་པས།  དེ་རིང་དགེ་གྲོགས་བླ་མ་ཚང་གི་ཕྱོགས་སུ་འཐེན་པའི་ལམ་ཕྲན་འདི་ཡང་ཡིད་དུ་འོང་བ་ཞིག་རེད།
 ངས་ནང་སྒོ་ཕྱེ་མ་ཐག་བླ་མ་མྱུར་དུ་ཡར་ལངས་བཞིན༼འོ།  པད་དབང་རེད་ད།  ནང་ལ་ཤོག་ནང་ལ་ཤོག  ངས་ད་སོ་མ་གུང་ཟས་ཟོས་ཚར་བ་ཡིན།  ཕྱི་དྲོ་སློབ་ཁྲིད་མེད་དམ༽ཞེས་ཁ་རྒྱ་སྒོ་འདྲ་མོ་ནང་ནས་བཤད་ཐུབ་ཐུབ་བྱས་པ་དང་།  ང་ལ་ཤོག་དུ་རྐང་ཐུར་གཅིག་དྲངས་རྗེས༼ཙོག་ཙོག་ཙོག  ངས་ཁྱོད་ལ་ཇ་ལྡུག༽ཟེར་བཞིན་ང་ལ་འོ་ཇ་དཀར་ཡོལ་གང་དྲངས།
 བླ་མའི་ཕ་ཡུལ་ནི་རྩེ་ཁོག་ཡིན་ལ།  ན་ནིང་རྨ་ལྷོ་ཁུལ་མི་རིགས་དགེ་ཐོན་སློབ་གྲྭ་ནས་མཐར་ཕྱིན་རྗེས།  ང་ཚོའི་སློབ་གྲྭར་ལས་བགོ་བྱས་ཏེ་བོད་ཡིག་དགེ་རྒན་དུ་བསྐྱུར་བ་དང་།  ང་ཡང་བོད་ཡིག་དགེ་རྒན་ཡིན་པས།  ངེད་གཉིས་ཀྱིས་གཞུང་སྒྲུབ་ཁང་གཅིག་གི་ནང་དུ་ཕན་ཚུན་ངོ་ཤེས་ཤིང་།  རིམ་བཞིན་ཁྱོས་མི་བཟའ་ན་ངས་མི་འཐུང་ཟེར་བའི་གྲོགས་པོ་འདང་ཅན་ཞིག་ཏུ་གྱུར་སོང་།
 བླ་མ་ཁ་བརྡ་བྱེད་པར་ཧ་ཅང་དགའ་སྟེ།  ཁོས་རྒྱུན་དུ་ཁ་གོར་མོ་བཤད་སྤྱད་དང་ལྕེ་ལེབ་མོ་སྨྲ་སྤྱད་ཡིན་པས་མ་བཤད་ན་སྡུག་གྱོང་ཡིན་ཟེར་ནས།  ཁྱོད་ལ་ཐུག་ན་སྐྱ་ཀ་གྲགས་གྲགས་དང་།  ང་ལ་འཕྲད་ན་རླངས་པ་འཕྱུར་འཕྱུར་བྱས་ཏེ་བཤད་མཚམས་གཏན་ནས་མི་འཇོག་པས།  དགེ་སློབ་ཡོངས་ཀྱིས་ཁོའི་མིང་ལ༼སྐྱ་ཀ་བླ་མ༽ཞེས་པའི་མཚང་མིང་ཞིག་བཏགས་ཡོད་ལ།  དེ་ཡང་ཁོ་ལ་མཚོན་ན་དངོས་ནས་འཚམ་ཞིང་རན་པ་ཞིག་རེད།
 ངོ་མ་བཤད་ན།  དགེ་རྒན་བླ་མ་ནི་གཤིས་རྒྱུད་མདའ་ལས་དྲངས་ཤིང་ངང་རྒྱུད་བལ་ལས་འཇམ་པའི་མི་བཟང་སེམས་བཟང་ཞིག་ཡིན་པས།  བྱིས་པ་ཚོས༼སྐྱ་ཀ་བླ་མ༽ཞེས་བོས་ན་ཡང་།  ཁོས་ངག་འཇམ་པོས་ཨ་ལན་སྟེར་བ་ལས་མི་དགའ་བའི་ཉམས་དང་ཁོང་ཁྲོ་ལངས་པའི་རྟགས་ཤིག་གཏན་ནས་མི་སྟོན།
༼ཡ་སྐྱ་ཀ་བླ་མ།  དབྱར་ཁའི་ཉི་མ་འདི་ཧ་ཅང་རིང་བས་ངོ་མ་སུན་ནི་ཞིག་རེད།  དེ་རིང་ཕྱི་དྲོ་སློབ་ཁྲིད་ཀྱང་མེད་པས་ཁྱོད་སྟོང་བཤད་ཅིག་བརྒྱབ་ན་ཇི་འདྲ་རེད།༽
༼ཧ་ཧ་ཧ།  ལོས་ཆོག་ལོས་ཆོག  ང་རྩེ་གཞུང་བླ་མའི་ཡ་ཆུང་ཁོག་པ་ཚིག་དང་།  མ་ཆུང་ཁོག་པ་གཏམ་གྱིས་བཀང་ཡོད་པས།  སྟོང་བཤད་ཅིག་རྒྱག་རྒྱུ་ནི་ལས་སླ་མོ་ནང་གི་ཡང་སླ་ཞིག་རེད།༽
 ངས་རེ་བ་བཏོན་ནས་མ་ཚར་གོང་བླ་མས་དེ་ལྟར་འཕྲོག་བཤད་བྱས་པ་དང་།  མིག་ཤེལ་འོག་ཏུ་ཁྲ་རིག་རིག་བྱེད་པའི་མིག་ཟུང་ལྡེབ་ཙམ་བྱས་རྗེས།  ༼ཨུན།  དེ་རིང་ད་ངས་ཁྱོད་ལ་གཏམ་རྒྱུད་ཉན་རྒྱུ་ཅན་ཞིག་བཤད་ཡ༽ཟེར།
 འོ།  སྙིང་ཉེ་བའི་ཀློག་མཁན་རྣམ་པ།  བླ་མའི་གཏམ་རྒྱུད་ཅི་ཞིག་བྱེད་རྒྱུ་ཡིན་ནམ།  གང་ལྟར་ད་ལྟ་ངས༼སྐྱ་ཀ་བླ་མའི༽གློག་སྒོ་ཕྱེ་ཟིན་པས།  ང་ཚོས་མཇམ་དུ་ཁོས་བཤད་པའི་གཏམ་རྒྱུད་ལ་ཉན་ཨང་།
                              གཉིས།
  ༼འདི་ནི་ང་རང་རྨ་ལྷོ་ཁུལ་མི་རིགས་དགེ་ཐོན་སློབ་གྲྭ་ནས་ཡོད་དུས་བྱུང་བའི་དོན་དག་ཅིག་ཡིན༽
  བླ་མས་བསམ་བློ་ཞིག་བཏང་སྟེ་བཤད་རྒྱུར༼དེ་ཡང་སྤྱི་ལོ་ཆིག་སྟོང་དགུ་བརྒྱ་གྱ་བརྒྱད་ལོའི་སྟོན་ཟླ་བརྒྱད་པའི་ནངས་མོ་ཞིག་སྟེ།  མཐོ་བ་ཨ་སྔོན་དགུང་ནས་སྤྲིན་བྱེའུ་མགོ་ཙམ་ཡང་མེད་པར་སྔོ་སང་ངེར་འདུག་ལ།  དམའ་བ་དོག་མོ་ས་ནས་རྡུལ་ཕྲ་རབ་ཙམ་ཡང་མེད་པར་སེར་ཤག་གེར་འདུག་ཅིང་།  ཞོགས་པའི་ཁ་དབུགས་ནི་དྭངས་ཤིང་བསིལ་ལ་སྙིང་ལ་འབབ་པའི་བདུད་རྩི་དང་འདྲ།  ཁོ་བོ་རྩལ་སྦྱོང་ར་བར་སོང་ནས་ཞོགས་རྩལ་རྩེས་ཚར་རྗེས་སློབ་ཁང་དུ་སོང་བ་དང་།  རྒྱ་ཡིག་གི་ཟིན་བྲིས་དེབ་བླངས་རྗེས་སློབ་ཁང་གི་སྒོ་འགྲམ་ནས་ཕར་འགྲོ་ཚུར་འོང་བྱེད་བཞིན་མིང་འགྲེལ་བློར་བཟུང་བ་ཡིན།༽
  ངས་བློ་རྩེ་གཅིག་སྒྲིམ་གྱིས་སྐྱོར་ཀློག་བྱེད་སྐབས།  རྒྱབ་ཕྱོགས་ནས༼ཨ་མ༽ཞེས་པའི་སྐད་ངན་ཞིག་གི་ང་རང་ཧད་སེ་བཏང་བས།  ངས་མྱུར་དུ་ཁ་ཕྱིར་འཁོར་ཏེ་བལྟས་པ་ན་ང་དང་ཁད་མི་རིང་བའི་ཐེས་སྐས་ཀྱི་འགྲམ་དུ་གཞོན་ནུ་མ་ཞིག་འགྱེལ་འདུག་ལ།  ཞིབ་ཏུ་བལྟས་པ་ན་མོ་ནི་ང་དང་སློབ་ལོ་མཉམ་པའི་དབྱིན་ཡིག་འཛིན་གྲྭའི་སློབ་མ་ཞིག་ཡིན་པ་ཤེས།  སྐབས་དེར་ང་རང་འཚབ་འཚུབ་ངང་ཕར་ལ་རྒྱུགས་ཤིང་།  མྱུར་བ་མྱུར་བར་མོ་རང་ཡར་སྐྱོར་སྐབས།  མོས་ཡང་བསྐྱར༼ཨ་མ༽ཞེས་སྐད་ངན་ཞིག་བཏོན་རྗེས།  ལག་ཟུང་གིས་རྐང་པའི་ཕྱི་རྟིང་ཕུར་ཕུར་བྱེད་བཞིན་འདུག་པས།  ངས་ད་གཟོད་མོའི་རྐང་ཚིགས་སློག་འདུག་པ་ཤེས་ཤིང་།  ཟིན་བྲིས་དེབ་ཨམ་ཕྲག་ཏུ་བཅུག་རྗེས་སར་ལྷུང་བའི་མིག་ཤེལ་བླངས་ཏེ་མོའི་ལག་ཏུ་བཞག་པ་དང་།  མོ་རང་རྒྱབ་ལ་འཁུར་ཏེ་རིངས་པ་རིངས་པར་མལ་ཁང་གི་ཕྱོགས་སུ་རྒྱུག་པ་ཡིན།
 ངོ་མ་བཤད་ན།  ཉིན་གར་གར་ལ་གཞོན་ནུ་མ་ཞིག་འཁུར་ཏེ་དགེ་སློབ་གཉིས་ཀའི་མདུན་ནས་འགྲོ་བའི་སྤོབས་པ་དེ་ང་ལ་མེད་ན་ཡང་།  མོའི་རྐང་པ་ཚབས་ཆེ་བར་སྣང་བས་ངས་དེ་ལ་ཁ་ཡ་མ་བྱས་པར་མོ་རང་མལ་ཁང་ལ་སྐྱེལ་ཞིང་།  ཁོ་མོ་ཚོའི་འཛིན་གྲྭའི་བདག་པོ་བཙལ་སྟེ་དོན་རྐྱེན་གྱི་མགོ་རྔ་མ་དང་།  བར་སྐེད་པ་ཡོངས་རྫོགས་དབུགས་ཐེངས་གཅིག་གིས་བཤད་པ་མ་ཟད།  ད་དུང་ཁོ་ཚོར་རོགས་རམ་བྱས་ཏེ་གཞོན་ནུ་མ་དེ་ཁུལ་མི་དམངས་སྨན་ཁང་ལ་སྐྱེལ།
  དུས་ཚོད་ནི་རི་གཟར་གྱི་རྦབ་རྡོ་ཐུར་དུ་འདྲིལ་བའམ་ཅང་ཤེས་ཀྱི་རྟ་རྒོད་ཐུར་ལས་ཤོར་བ་ལྟར་ཇི་འདྲའི་མགྱོགས་པ་ལ་ཨང་།  ཟླ་གཅིག་ལྷག་གི་ཉིན་ཞག་རེ་རེ་ནི་མིག་ལྡེབ་དབང་ཙམ་གྱིས་ཅི་ཡིན་འདི་ཡིན་མེད་པར་ཕར་ལ་འདས་ཤིང་།  སློབ་སྐབས་གཅིག་གི་བར་རྒྱུགས་དེ་རྐུན་མ་ཞིག་དང་འདྲ་བར་རྐང་འཇབ་ལག་འཇབ་ཀྱིས་ཚུར་སླེབས་པས།  ངས་སྐབས་བབ་ཀྱི་བསླབ་དེབ་དག་འཁྱེར་ཏེ་སློབ་གྲྭའི་ཕྱི་རོལ་གྱི་དབེན་ཞིང་འཇགས་པའི་གནས་ཤིག་ཏུ་སོང་ནས་ཁྲིད་ཟིན་པའི་བསླབ་བྱ་ཁག་ལ་བསྐྱར་སྦྱོང་བྱས་པ་ཡིན།
  ཆུ་ཚོད་ཅི་ཙམ་ཞིག་འགོར་བ་དང་།  སྐར་ཆ་ག་ཙམ་ཞིག་འགོར་བ་མི་ཤེས་ན་ཡང་།  མཚམས་ཤིག་ལ་ངའི་རྣ་ལམ་དུ༼བླ་མ༽ཞེས་པའི་འབོད་སྐད་ཕྲ་ཞིང་དྭངས་ལ་སྙན་ཞིང་འཇམ་པ་ཞིག་གྲག་འོངས་པས།  ངས་ཁ་ཕྱིར་འཁོར་ཏེ་བལྟས་པ་ན།  རྒྱབ་ཕྱོགས་ཀྱི་གོམ་པ་དོ་ཙམ་གྱི་མཚམས་ན་གཞོན་ནུ་མ་ཞིག་གིས་བཞིན་མདངས་དམར་པོར་གྱུར་ཅིང་།  མགོ་བོ་བྲང་ཁར་སྨད་དེ་ང་ལ་ངོ་ཚ་བའི་རྣམ་འགྱུར་སྟོན་བཞིན་འདུག  ཡ།  པད་དབང་།  ཁྱོད་ཀྱིས་བཤད་ན་མོ་སུ་ཡིན་རྒྱུ་རེད།༽
༼ཨ།  འོ་ཕལ་ཆེར་ཟླ་གཅིག་གི་སྔོན་ལ་རྐང་ཚིགས་སློག་པའི་གཞོན་ནུ་མ་དེ་ཨེ་རེད།༽
༼ཨུན།  རེད་རེད་རེད།  གཞོན་ནུ་མ་དེ་རེད།༽
བླ་མས་དེ་སྐད་བཤད་ཞོར་དུ་མདུན་ཅོག་སྟེང་ནས་ཇ་དེམ་བླངས་ཏེ་ང་ལ་སླར་ཡང་འོ་ཇ་ཁ་སྣོན་བྱས་པ་དང་།  སྟོད་ལྭའི་ཨམ་ཕྲག་ནང་ནས་སྐྱ་ཀ་རྟགས་ཅན་གྱི་དུ་བག་ཅིག་བཏོན་པ་དང་།  ཤོག་དོར་རྐང་གཉིས་བླངས་ཏེ་གཅིག་ང་ལ་སྟེར་བཞིན༼ཇི་འདྲ་རེད་པད་དབང་།  ང་བླ་མ་སྐྱ་ཀ་ཁ་ཟེར་བ་སྐྱ་ཀ་གྲག་པའི་ཡན་ཡིན་ད།༽
༼འོ་ན་དེའི་རྗེས་ནས།༽
ངས་སྒུག་མ་ཚུགས་པར་དེ་སྐད་དྲིས་པ་ན། བླ་མས༼ཧ་ཧ་ཧ༽  ཞེས་གད་མོ་ཆེན་པོ་ཞིག་བགད་དེ༼ངའི་གཏམ་རྒྱུད་འདིས་ཁྱོད་ཀྱི་ཡོད་འཕྲོག་པ་མིན་ནམ།  དེ་ལོས་ཡིན།  ང་རྩེ་གཞུང་བླ་མ་འདི་སྤྱི་མི་ཁ་བདེ་ལྕེ་བདེ་ཞིག་མིན་ནམ༽
༼ལབ་རྐྱལ་ཁྱོད་ཀྱིས་སྐབས་སུ་བབ་པའི་གཏམ་རྒྱུད་ཤོད།  མ་བབ་པའི་ཉོག་བཤད་དེ་ཚོར་ང་སྔ་མོ་ནས་སུན་འདུག༽
ངས་མ་དགའ་བའི་ཚུལ་གྱིས་བཤད་པ་ན།  བླ་མས༼འོ་ཡ་ཡ་ཡ།  ཁྱོད་ཁོང་ཁྲོ་མ་ལངས་དང་ངས་མི་མཐུད་དུ་བཤད་ཡ༽ཟེར།
                              གསུམ།
  མོས་ང་རང་བཙལ་དོན་ཅི་ཡིན་ནམ། ངས་མོ་མཐོང་མ་ཐག་སྙིང་ལ་ཙག་ཤད་ཅིག་བརྒྱབ་པ་དང་།  སྙིང་གི་ལྡིང་ཚད་ཀྱང་ལྡབ་འགྱུར་གྱིས་ཇེ་མགྱོགས་ལ་སོང་།  
 ༼ཁྱོད་ཁྱོད།༽
 སྐབས་དེར་ངའི་ཁ་ལྕེ་བདེ་མོ་དེ་ཡང་ལྐུགས་པ་ནང་བཞིན་མགོ་སྒུར་སྒུར་དང་བཞིན་དམར་དམར་དུ་འགྱུར་བ་ལས།  འོས་འཚམ་གྱི་སྐད་ཆ་ཚིག་གཅིག་ཀྱང་བཤད་རྒྱུ་མ་རྙེད་པས།  ངེད་གཉིས་ཀྱི་རང་རང་ས་ནས་ལྐུགས་པའི་བརྟུལ་ཞུགས་བཟུང་ནས་བསྡད་པ་ཡིན།  དེ་ལྟར་ཡིན་རིང་ཞིག་འགོར་རྗེས་ངས་སེམས་ལ་རང་ཉིད་སྟག་ཤ་ར་ཞིག་ཡིན་པས་འདི་ལྟར་སྡོད་མི་འོས་སྙམ་སྟེ།  སྙིང་སྟོབས་བརྒྱ་དང་སྤོབས་པ་སྟོང་བསྐྱེད་དེ་བཙན་གྱིས་འཛུམ་ཞིག་སྟོན་བཞིན༼ཁྱོད་ཁྱོད་ཁྱོད་ཡིན་ནམ།  ཁྱོད་ཀྱི་རྐང་པ༽ཟེར་བཞིན་ཡར་ལངས་པ་ཡིན།
  ༼འོ།  བཀའ་དྲིན་ཆེ།  ངའི་རྐང་པ་སྔར་ནས་དྲགས་ཟིན།  ཉིན་དེར་ཁྱོད་ཀྱིས་ང་ལ་རོགས་རམ་མི་དམན་པ་ཞིག་བྱས་པས།  དེ་རིང་ང་ཆེད་དུ་ཁྱོད་ལ་བཀའ་དྲིན་ཞུ་རུ་ཡོང་བ་ཡིན༽
༼དེ་སྐད་མ་བཤད།༽
   མཚམས་དེར་ངས་གཞོན་ནུ་མ་དེས་ང་རང་བཙལ་དོན་གྱི་ཕུགས་རྟོགས་ཏེ།  ༼ང་ཚོས་སློབ་གྲྭ་གཅིག་གི་ནང་དུ་སློབ་སྦྱོང་བྱེད་པ་དང་།  སླ་ང་གཅིག་གི་ནང་དུ་ཟ་མ་བཟའ་བཞིན་ཡོད་པས།  ཕན་ཚུན་ལ་རོགས་རམ་འདྲ་བྱེད་རྒྱུ་ནི་མ་བཤད་ཀྱང་ཤེས་དགོས་པ་ཞིག་དང་།  མ་བཅོལ་རུང་ལས་འོས་པ་ཞིག་མིན་ནམ།  ཉིན་དེར་ཁྱོད་ཀྱི་རྐང་པ་ཡང་ཚབས་ཆེ་བར་སྣང་བས།  ངས་མ་མཐོང་ཁུལ་བྱས་ཏེ་ལྟད་མོར་བལྟས་ནས་འདུག་སྲོལ་ག་ལ་ཡོད།༽
  ངས་དེ་སྐད་བཤད་པ་ན་མོས་བཞིན་མདངས་ཇེ་དམར་དང་མགོ་བོ་ཇེ་སྒུར་དུ་འགྲོ་བ་ལས་སྐད་ཆ་ཚིག་གཅིག་ཀྱང་མ་བཤད་པས།  ངས་མུ་མཐུད་དུ༼ངའི་མིང་ལ་བླ་མ་ཟེར།  རྩེ་ཁོག་གི་ཡིན༽ཞེས་དང་།  ༼དེ་རིང་ནས་བཟུང་ང་ཚོ་ཡང་གསར་དུ་ངོ་ཤེས་པའི་གྲོགས་པོ་ཡིན་པས་རྗེས་སོར་ཕན་ཚུན་ལ་རོགས་འདྲ་བྱེད་རྒྱུ་བརྗེད་མི་ཉན༽ལ་སོགས་སྐད་ཆ་མང་པོ་ཞིག་བར་མ་ཆད་པར་བཤད་པ་ཡིན།
  གཞོན་ནུ་མ་དེར་སེང་ལྕམ་འབྲུག་མོ་ལྟ་བུའི་ཡག་མོ་སྒོ་མེད་ལ།  ཡིད་འཕྲོག་ལྷ་མོ་འདྲ་བའི་གཟུགས་སྐྱེས་ལུས་ཀྱང་མེད།  ཡིན་ན་ཡང་ཉི་དགའ་མེ་ཏོག་གི་དབྱིབས་དང་མཚུངས་པའི་གདོང་ལ་ནམ་རྒྱུན་འཛུམ་གྱིས་ཁེངས་ཤིང་།  དཀྱུས་རིང་བའི་མིག་ཟུང་ཁྲ་རིག་རིག་བྱེད་པ་དེས་མོ་རང་གཤིས་བཟང་གཞུང་དྲང་ཞིག་ཡིན་པ་ཡང་རང་བཞིན་གྱིས་ཤེས་ཐུབ།  མཉེན་ལྕུག་གི་ལུས་པོ་ཡང་རྒྱགས་རྒྱགས་ནས་རྗ་མ་ལྟ་བུ་ཞིག་མིན་ལ།  སྐམ་སྐམ་ནས་རྩི་ཏོ་ལྟ་བུ་ཞིག་ཀྱང་མ་ཡིན་པར།  མིག་ལ་ཡག་ཀྱང་སྙིང་དུ་སྡུག་པ།  བློར་འབབ་པ་ཞིག་ཡིན།
  འོ།  ཁྱོད་ཀྱིས་གཞོན་ནུ་མ་དེའི་གནས་ཚུལ་གསལ་བོར་ཤེས་འདོད་ཡོད་སྲིད་པས།  ཁ་ཁོག་པའི་མ་གསང་བ་དང་།  གློ་རྒྱུ་མས་མ་སྐུང་བར་དྲང་མོར་བཤད་ན་མོའི་མིང་ལ་བུ་མོ་མཆོག   འོ་མ་རེད་མ་རེད།  མཱ་ཞའོ་ཧྭ་ཟེར་ཞིང་གཅན་ཚ་སྣང་རའི་ཡིན།
 ༼ཨ།  མཱ་ཞའོ་ཧྭ།༽
 ༼ཧ་ཧ་ཧ༽
 བླ་མས་ངའི་ཡ་མཚར་བའི་ཚུགས་ཀ་མཐོང་སྟེ།  ༼ཁྱོད་ཧ་ལས་ཐལ།  ཡིན་ན་ཡང་མཱ་ཞའོ་ཧྭ་ནི་ཁ་ཆེ་བ་ཞིག་ཡིན་པས་ཡ་མཚན་སྤུ་ཙམ་ཡང་སྐྱེས་དོན་མེད།  དང་ཐོག་མཱ་ཞའོ་ཧྭས་ཀྱང་མོའི་མིང་ལ་བུ་མོ་མཆོག་ཟེར་བ་དང་།  ཕ་ཡུལ་གཅན་ཚ་སྣང་ར་ཡིན་ཚུལ།  ཕ་མ་གཉིས་ཀ་གཅན་ཚ་རྫོང་མི་དམངས་སྨན་ཁང་གི་སྨན་པ་ཡིན་ཚུལ།  རང་ཉིད་ལ་མིང་སྲིང་མེད་ཚུལ་སོགས་བཤད་པས།  ངས་ཀྱང་མོ་ནི་ཁ་ཆེ་བ་ཞིག་ཡིན་པ་གཏན་ནས་མ་ཤེས་པ་མ་ཟད།  ད་དུང་ངེད་གཉིས་ངོ་ཤེས་ནས་གྲོགས་པོར་གྱུར་རྗེས།  མཱ་ཞའོ་ཧྭ་ནི་ཕྱི་འཇམ་པོ་རྒྱ་དར་དཀར་པོ་དང་།  ནང་འཇམ་པོ་མར་དཀར་རིལ་བུ།  གཤིས་བཟང་པོ་དར་གྱི་སྐུད་པ་ལྟ་བུ་ཞིག་ཡིན་པ་གཞི་ནས་ཤེས་པས།  སེམས་གཏིང་ནས་མོ་ལ་ཡིད་སྨོན་ཤོར་ཏེ་ནམ་རྒྱུན་དུ་སྙིང་སྟོབས་བརྒྱ་དང་སྤོབས་པ་སྟོང་བསྐྱེད་དེ་མོར་དགའ་ཚུལ་དང་འགྲོག་འདོད་ཆེ་ཚུལ་གྱི་སྙིང་གཏམ་བཤད་པ་དང་།  སེམས་ལ་ཡང་མཱ་ཞའོ་ཧྭ་ནི་གནམ་རྒན་མས་རང་ལ་གནང་བའི་ཆུང་མ་ཡིན་ལ།  སྡུག་གི་ཁུར་བོ་འཁུར་གྲོགས་དང་སྐྱིད་ཀྱི་རྟ་ཕོར་བཞོན་གྲོགས་རེད་སྙམ་ཞིང་།  སློབ་མཐར་ཕྱིན་རྗེས་སྐེ་འཇུས་ལག་འཇུས་བྱས་ཏེ་ཕྱིར་ཕ་ཡུལ་ལ་སོང་ནས་དྲིན་ཆེན་ཕ་མ་དང་ལྷན་དུ་སྐྱིད་པའི་འཚོ་བ་རོལ་ཆོག་སྙམ་ནས་དགའ་སྤྲོ་ཚད་མེད་ཅིག་སྐྱེས་མོད།  ངས་སེམས་ཁོང་གི་རེ་བ་དང་མ་འོངས་པའི་འདུན་ན་གླེང་སྐབས་མཱ་ཞའོ་ཧྭས་ཁ་མི་གྲག་དབུགས་རིང་ནར་ནར་དང་།  ལན་མི་འདེབས་མགོ་བོ་སྒུར་སྒུར་བྱེད་པ་ལས།  འཐད་པའི་ཡ་ལན་དང་མི་འཐད་པའི་རྣམ་འགྱུར་ཅི་ཡང་མི་སྟོན་པས།  ང་ཡང་སེམས་འགུལ་བའི་ཞོར་ལ་འདང་རྒྱག་ཅིག་དང་།  བློ་མགུལ་བའི་ཞོར་དུ་ཐེ་ཚོམ་ཞིག་རང་བཞིན་གྱིས་སྐྱེས་སོང་།  
ལོ་ཟླ་ཉིན་ཞག་གི་འཁོར་འགྲོས་དང་བསྟུན་ནས་ངེད་གཉིས་ཀྱི་སླད་མེད་རྣམ་དག་གི་འབྲེལ་བ་དེ།  བྱ་ཕྲུག་ཅིག་ཡིན་ན་གཤོག་རྩལ་རྒྱས་པ་དང་།  ཉ་ཕྲུག་ཅིག་ཡིན་ན་རྐྱལ་རྩལ་རྫོགས་ཏེ་ཉིན་གཅིག་ལ་མ་མཐོང་ན་སེམས་མི་སྐྱིད་པའི་མཚམས་དེར་སླེབས་དུས།  ད་གཟོད་མོ་རང་ཁ་ཆེ་བ་ཞིག་ཡིན་པ་གཞི་ནས་ཤེས་པ་ཡིན།
                            བཞི།
  དེ་ཡང་སྤྱི་ལོ་ཆིག་སྟོང་དགུ་བརྒྱ་དགུ་ཅུའི་ལོའི་དབྱར་གནང་གཏོང་སྐབས།  ངས་མཱ་ཞའོ་ཧྭ་སྐྱེལ་ཏེ་རྨ་ལྷོ་རླངས་འཁོར་ས་ཚིགས་སུ་སོང་བ་དང་།  རླངས་འཁོར་གཏོང་གྲབས་བྱེད་སྐབས་མཱ་ཞའོ་ཧྭས་སྟོད་ལྭའི་ཨམ་ཕྲག་ནང་ནས་ཚིལ་དྲགས་ཆགས་པའི་ཡིག་ཤུབས་ལྟེབ་མ་ཞིག་བཏོན་ཏེ་ངའི་ལག་ཏུ་བཞག་པ་དང་།  ངའི་གདོང་ལ་ཅེར་ཏེ་ཡུན་རིང་ཞིག་འགོར་རྗེས༼རླངས་འཁོར་གཏོང་རན་ཐལ།  བདེ་མོ༽ཟེར་བཞིན་ལག་པ་ཚུར་བསྲིངས་བྱུང་བས།  ངས་ཀྱང་མོའི་ལག་པ་དམ་པོར་བཙིར་ཏེ༼ལམ་ནས་སེམས་ཆུང་བྱོས།  ད་བདེ་མོ༽ཞེས་བཤད་པ་ན།  མོས་མིག་མཐར་མཆི་མ་འཁྱིལ་བཞིན་ཡང་བསྐྱར༼བདེ་མོ༽ཞེས་བཤད་རྗེས་རླངས་འཁོར་ནང་དུ་རྒྱུགས་སོང་།
ངའི་ཡི་གེ་ཨམ་ཕྲག་ནང་དུ་བཅུག་རྗེས།  མྱུར་དུ་ཕར་ལ་སོང་སྟེ་མཱ་ཞའོ་ཧྭར་སེམས་གསོ་ཞིག་བྱེད་དགོས་སྙམ་ན་ཡང་།  དེ་མ་ཐག་འགྲུལ་བཞུད་རླངས་འཁོར་གྱིས་བསྟུད་མར་དུང་བརྡ་རྒྱག་བཞིན་བཞུད་འགོ་བརྩམས་ཤིང་།  རིམ་བཞིན་ཇེ་མགྱོགས་ཇེ་མྱུར་ལ་སོང་།  མཱ་ཞའོ་ཧྭས་མགོ་བོ་སྒེའུ་ཁུང་ཁར་གཏད་ཅིང་།  ལག་པ་ཕྱི་རུ་བསྲིངས་ནས་ང་ལ་བདེ་མོའི་ལག་བརྡ་ཡང་ཡང་གཏོང་བཞིན་རྒྱང་རིང་ནས་རྒྱང་རིང་དུ་སོང་ཞིང་།  ཇེ་ཆུང་ནས་རབ་རིབ་ཏུ་གྱུར་སོང་།  སྐབས་དེར་ང་ཡང་ལམ་འགྲམ་གྱི་ཅུང་མཐོ་བའི་དེའུ་འབུར་ཞིག་གི་སྟེང་དུ་རྒྱུགས་ཏེ།  ཕྱི་རྟིང་ཇེ་མཐོར་བཏང་སྟེ་མོར་བདེ་མོའི་ལག་གཡུག་ཡང་ཡང་བྱས་པ་དང་།  འགྲུལ་བཞུད་རླངས་འཁོར་མིག་ལམ་ནས་ཡལ་རག་བར་དུ་དེར་ཐོ་ལྟར་འགྲེང་ནས་བསྡད་པ་ཡིན།
  རྨ་ལྷོ་ཁུལ་ནི་གནའ་བོའི་མཁར་རྫོང་ཞིག་དང་འདྲ་བར་ཕྱོགས་བཞི་རི་ཁྱུ་མཐོན་པོས་བསྐོར་བ་དང་། དྭངས་གཙང་གི་དགུ་ཆུ་སྔོན་མོ་ནི་གཡུ་འབྲུག་ཅིག་གཡས་འཁྱོག་གཡོན་འཁྱོག་བྱས་ཏེ་གནས་འདི་ནི་གར་སྟབས་བསྒྱུར་བ་དང་མཚུངས་ལ།  ལྷུང་ལྷུང་གི་བཞུར་སྒྲ་སྙན་མོ་ལྷང་ལྷང་སྒྲོག་བཞིན་བྱང་ཕྱོགས་སུ་དལ་གྱིས་འབབ་ཅིང་།  དེའི་འགྲམ་ངོགས་སུ་དེང་རབས་ཀྱི་བཟོད་བཀོད་མི་འདྲ་བའི་ཁང་བརྩེགས་སྣ་ཚོགས་བརྗིད་ཆགས་ལྷུན་གྱིས་གྲུབ་ཅིང་།  འབུ་སྡོམ་གྱི་དྲ་རྒྱ་འཐེན་པ་ལྟ་གཞུང་ལམ་སྟེང་དུ་དབྱིབས་སྣ་ཚོགས་དང་མདོག་འདྲ་མིན་གྱི་རླངས་འཁོར་སྣ་ཚོགས་ཀྱིས་དུང་བརྡ་སྒྲོག་བཞིན་ཕྱོགས་བཞི་མཚམས་བརྒྱད་ལ་བགྲོད་བཞིན་འདུག
ང་ཡང་ཉིན་དེར་ཡུལ་ལ་འགྲོ་དགོས་པས།  མཱ་ཞའོ་ཧྭ་སྐྱེལ་རྗེས་བསམ་རྒྱུ་དྲན་རྒྱུ་མེད་པར་སློབ་གྲྭར་ལོག་ཅིང་།  ཉལ་ཐུལ་ཉལ་སྟན་གཉིས་ལེགས་པོ་ཞིག་ལྟེབ་སྟེ་སྒམ་ནང་དུ་བཞག་རྗེས།  སྒམ་ནང་གི་ལྭ་བ་གསར་བ་དེ་བླངས་ཏེ་མལ་ཁྲིའི་སྟེང་དུ་བཞག་རྗེས།  རང་གི་གོན་ཡོད་པའི་ལྭ་བ་ཕུད་རྩིས་བྱེད་སྐབས་ད་གཟོད་མཱ་ཞའོ་ཧྭས་བྱིན་པའི་ཡི་གེ་དེ་ཡིད་ལ་དྲན་པས།  ལྭ་བ་ཡང་མ་ཕུད་པར་ཡིག་ཤུབས་གཤག་སྟེ་བལྟས་པ་ན་འདི་ལྟར་བྲིས་འདུག
  ༼བླ་མ། འུ་གཉིས་ནི་སློབ་གྲྭ་གཅིག་གི་སློབ་གྲོགས་དང་།  དགེ་རྒན་གཅིག་གི་དགེ་ཕྲུག  ཕུ་ནུ་ལྟ་བུའི་བཟང་ས་བྱེད་པ་ལས།  ཁྱོད་ཀྱིས་བཤད་པ་ལྟར་ཕན་ཚུན་ལ་ཁྱོ་ག་དང་ཆུང་མ་ཟེར་བའི་ལས་དབང་མེད་དེ།  རྒྱུ་མཚན་ནི་ངའི་མིང་དངོས་ལ་མཱ་ཞའོ་ཧྭ་ཟེར་ཞིང་།  བུ་མོ་མཆོག་ནི་ངས་སློབ་ཆུང་འདོན་སྐབས་བོད་དགེ་རྒན་བཟང་པོས་བཏགས་པའི་བོད་མིང་ཡིན་པ་དང་།  ང་ནི་བོད་དགེ་རྒན་བཟང་པོའི་བྱམས་སྐྱོང་དང་བོད་རིགས་བྱིས་པའི་ཁྲོད་དུ་ནར་སོན་པའི་ཁ་ཆེ་བ་ཞིག་ཡིན་ལ།  ངའི་ཕ་མ་གཉིས་ནི་ཁ་ཆེ་བ་དངོས་ཡིན།  དེར་བརྟེན་ཁྱོད་ཀྱིས་རྒྱུན་དུ་སྤོབས་པ་ཆེར་བསྐྱེད་དེ་སེམས་ཁོང་གི་སྐད་ཆ་དང་།  མ་འོངས་པའི་འདུན་མ་གླེང་སྐབས་ངའི་མིག་མཐར་མཆི་མ་འཁྱིལ་བ་དང་།  སེམས་ནས་སྡུག་བསྔལ་བྱེད་པ་ལས།  ཁྱོད་ཀྱིས་སེམས་ལ་འཛིན་རྒྱུའི་ཚིག་དང་།  རུམ་དུ་བསྡུ་རྒྱུའི་བྲོ་ཞིག་གཏན་ནས་སྟེར་མ་ཕོད།  
བླ་མ།  ཁྱོད་ཀྱིས་ཡི་གེ་འདིར་བལྟས་རྗེས་སེམས་ཕམ་ཞིང་ཡིད་སྐྱོ་བ་ངས་ཤེས་ཡོད།  ཡིན་ན་ཡང་འུ་གཉིས་ཀྱི་འབྲེལ་བ་དེ་ཆར་རྗེས་ཀྱི་ཤ་མོ་དང་།  གསར་སྐྱེས་ཀྱི་ལྗང་མྱུག་དང་འདྲ་བར་ཉིན་རེ་བཞིན་ཇེ་སྔོ་དང་།  ཞག་རེ་བཞིན་ཇེ་རྒྱས་ཡིན་པས།  མུ་མཐུད་དུ་འདི་ལྟར་སོང་ཚེ་ནམ་ཞིག་ལ་འུ་གཉིས་ཀྱི་གངས་དཀར་སེམས་ལ་སྡུག་བསྔལ་ཁ་བ་རྩིག་རྩིག་དང་།  སེར་བ་འབབ་འབབ་བྱེད་པ་གདོན་མི་ཟ་བས།  ཆུ་མ་འོང་གོང་གི་རགས་དང་།  དགྲ་མ་འོང་གོང་གི་དོགས་ཞེས་པའི་དཔེ་ལྟར།  ངས་དེ་རིང་གི་གོ་སྐབས་འདི་དང་བསྟུན་ནས་ཟླ་གསུམ་ལ་ཨམ་ཕྲག་ནང་དུ་བཅུག་པའི་ཡི་གེ་འདི་ཁྱོད་ལ་མི་སྤྲོད་ག་མེད་བྱུང་།
  བླ་མ།  བོད་ཀྱི་ཆོས་ལུགས་སུ་སྐྱེ་བ་སྔ་ཕྱིར་ཡོད་པར་བཤད་པས།  གལ་ཏེ་དེ་བདེན་ན་སྐྱེ་བ་གཞུག་མར་འུ་གཉིས་རིགས་གཅིག་གི་རྒྱུད་དུ་སྐྱེས་ཏེ།  བགེགས་དང་བར་ཆད་མེད་པར་ཁྱིམ་གཅིག་ལ་འཛོམས་ཐུབ་པའི་སྨོན་ལམ་འདེབས།  ཁ་བྲོ།  མཱ་ཞའོ་ཧྭ་ནས་ཟླ་ཚེས་ལ༽ཞེས་བྲིས་འདུག
ངས་དབུགས་ཐེངས་གཅིག་གིས་ཡི་གེ་དེར་བལྟས་ཚར་བ་ན།  གཡའ་དྭགས་པའི་སེམས་ཀྱི་ནམ་མཁར་སྐྱོ་བའི་སྤྲིན་ནག་ལང་ལོང་དུ་འཁྲིག་པ་དང་།  ཡི་གེ་བཟུང་བའི་ལག་པ་དེ་ཡང་རླུང་གིས་བསྐྱོད་པའི་ལྗོན་ཤིང་དང་འདྲ་བར་འདར་སིག་སིག་བྱེད་ཅིང་།  མིག་མཐར་ཡང་རང་དབང་མེད་པར་མཆི་མའི་རྒྱ་མཚོ་ཞིག་འཁྱིལ་སོང་།  ཨ་ཤུ༽
བླ་མས་བཤད་མཚམས་བཞག་ཅིང་།  ཁ་ནས་བར་མེད་དུ་ཤུགས་རིང་འཐེན་པ་དང་།  ད་ཅི་ཧ་ཧ་ཧོ་ཧོ་ཟེར་བའི་ངོ་མདོག་ཀྱང་གློ་བུར་དུ་འགྱུར་ཏེ།  མིག་ཟུང་བཙུམ་བཙུམ་དང་མཆོ་ཏོ་འབུར་འབུར་བྱེད་པར་བལྟས་ན།  འདས་ཟིན་པའི་དོན་དག་དེས་ད་ལྟ་ཡང་ཁོའི་སེམས་ནས་གོ་གནས་གལ་ཆེན་ཞིག་བཟུང་ཡོད་པ་ཤེས་ཐུབ།  བླ་མ་སྔར་བཞིན་ཁ་རོག་གེར་འདུག་པས།  ངས་གོ་སྐབས་དེ་དང་བསྟུན་ནས་འོ་ཇ་ཁམ་གང་ཧུབ་འཐུང་བྱས་རྗེས་བླ་མའི་ཁ་བརྡའི་མུ་ལ་སྒུག་པ་ཡིན།
                                ལྔ།
  དེ་ལྟར་ཆུ་ཚོད་སྐར་མ་གཉིས་ཙམ་འདས་པ་ན་བླ་མས་མུ་མཐུད་དུ་བཤད་རྒྱུར།  ༼དེ་ལྟར་ངས་གཟུགས་མེད་ཀྱི་སྡུག་གི་ཁུར་བོ་ལྕི་མོ་ཞིག་འཁུར་ནས་ཡུལ་ལ་ལོག་པ་དང་།  སྡུག་བསྔལ་གྱི་དབུགས་རིང་ཁྲོད་ནས་ཉིན་མཚན་རེ་རེ་བཞིན་ཕར་ལ་བསྐྱལ་བ་དང་།  ཡིད་སྐྱོ་བའི་ཕྱིར་དྲན་དང་བསྡོངས་ནས་ཚུར་བསུས་པ་ཡིན། ཉིན་དེ་དག་གི་རིང་དུ།  ངས་བསམ་བློ་བཞི་གསུམ་བཅུ་གཉིས་བཏང་སྟེ་དཔྱད་པ་དང་།  བློ་རྩེ་ཉི་ཤུ་རྩ་བཏང་སྟེ་ཞིབ་འདང་རྒྱབ་པ་ན།  མཇུག་མཐའི་སྡོམ་ཚིག་ནི་གཉིས་ཏེ།  གཅིག་ནི་མཱ་ཞའོ་ཧྭ་དང་ལྷན་དུ་ཚེ་གཅིག་གི་འཚོ་བ་རོལ་འདོད་ན། ཕ་ཡུལ་ཟེར་ནས་ཡོང་ས་དང་།  ཕ་མ་ཟེར་ནས་འབོད་ས།  ཤ་ཉེ་ཟེར་ནས་གླེང་ས་མེད་པ་ཞིག་བཟོས་ཏེ།  ཐང་གི་སྐད་ཆ་མ་གོ་ཁུལ་དང་གླིང་གི་མྱི་ཁ་མ་ཐོས་ཚུལ་བྱས་ཏེ།  རྣ་འོན་པ་དང་མིག་ལོང་པ་བྱེད་དགོས།  ཅིག་ཤོས་ནི་ཐེངས་འདིའི་གོ་སྐབས་བེད་སྤྱད་དེ་སེམས་ཀྱི་ཁང་བཟང་ནང་དུ་གཞིས་སྡོད་བྱས་པའི་མཱ་ཞའོ་ཧྭ་ཐབས་བརྒྱ་ཇུས་སྟོང་གི་ཕྱིར་ཕུད་དགོས་པ་དེ་རེད།  པད་དབང་།  ངས་འདི་གཉིས་ལས་གང་ཞིག་གདམ་ན་འགྲིག  གནད་དོན་འདི་ལྟ་བུར་འཕྲད་ན་ངོ་མ་དཀའ་མོ་ཡིན་པས།  སྐབས་དེར་ང་དངོས་ནས་ཐབས་ཟད་འུ་ཐུག་ཏུ་བཅུག་སོང་།༽
  ཉིན་ཞིག་གི་གུང་ཇ་འཐུང་སྐབས་ཨ་ཕས་ང་ལ༼བླ་གོ  ད་ལྟ་ཁྱོད་ཀྱང་ཕོ་ལོ་ལྔ་བཞི་ཉི་ཤུར་བུད་ཟིན་པས་སློབ་གྲྭ་ནང་དུ་ཆུང་མ་ཞིག་བཙལ་ཨེ་ཡོད།  ད་ཁལ་གཅིག་གི་དོ་ཡ་དང་།  ཚེ་གང་གི་བཟའ་ཟླ་ཞེས་པའི་དཔེ་ལྟར།  སྐྱིད་ཀྱི་རྟ་ཕོར་བཞོན་རོགས་དང་།  སྡུག་གི་ཁུར་བོ་འཁུར་གྲོགས་ཤིག་མི་དགོས་སམ།  ཁྱོད་ཚོ་ལས་བྱེད་པ་ཚོ་རྩྭ་ཐང་གི་འབྲོག་མོ་ཚོར་ཞེ་མི་འཁོར་བས།  ཨ་མ་ངེད་གཉིས་ཀྱིས་ཀྱང་ཡིན་གཅིག་མིན་གཉིས་ལ་ཕྱུགས་རྫི་མ་ཞིག་ལེན་དགོས་པའི་སྐད་ཆ་མི་བཤད།  བརྒྱ་བཤད་ཚིག་གི་རྩ་བ་དང་སྟོང་བསྲུབས་འོ་མའི་མར་ལོ་ཅི་ཡིན་ཟེར་ན།  རང་གི་སེམས་ན་ཡོད་པ་དང་རང་གིས་བློར་འབབ་པ་ཞིག་ཚོལ།  གང་ལྟར་མི་རིགས་གཅིག་ཡིན་པ་དང་།  བཤད་རྒྱུ་གཏམ་རྒྱུ་མེད་ན་དེ་རེད།  ཨེ་གོ་ཐལ༽ཟེར།
  ཨ་གནམ་རྒན་མ།  ཨ་ཕའི་གཏམ་གློ་བུར་བ་དེས་ང་རང་བླ་འཁྱམས་སུ་བཅུག་སོང་།  སྐད་ཆ་དེ་དག་ནི་ངའི་སེམས་ཁོང་གི་རེ་བའི་མེ་ཏོག་འཇོམས་པའི་སེར་བ་དང་།  སྙིང་དབུས་ཀྱི་བདེ་བའི་པད་སྡོང་གཅོད་པའི་སྟ་རེ།  མ་འོངས་འདུན་མའི་མེ་ལྕེ་གསོད་པའི་ཆུ་འཁྱག་དང་འདྲ་བར།  ངའི་ལུས་ཀྱི་དོན་ལྔ་སྣོད་དྲུག་ཐམས་ཅད་ཉ་གེ་ཉོག་གེར་བཏང་བས།  ངའི་ལུས་ལ་རང་དབང་མེད་པར་ཚ་བ་རྒྱས་ཤིང་།  རྔུལ་ཆུ་ཐོན་པའི་ང་རང་འདུག་མི་བཟོད་པ་དང་།  འགྲོ་མི་ཕོད་པ།  དོགས་མི་བདེ་བ་ཞིག་ཏུ་བཏང་སོང་།
  ངས་ཅང་མ་བཤད་པས་ཨ་མས།  ༼སློབ་གྲྭ་ནང་དུ་ལ་ལུང་གི་མི་མང་པོ་ཡོད་པ་དང་།  དེའི་ཁྲོད་དུ་རྒྱ་དང་ཁ་ཆེ།  སོག་པོ་སོགས་མི་རིགས་མང་བ་མ་ཟད།  ཐེའུ་རིང་དང་བོན་པོ་སོགས་ཀྱང་ཡོད་པས་རབ་ཡིན་ན་སང་ལོ་མཐར་ཕྱིན་རྗེས་ཡུལ་ཕྱོགས་ནས་བཙལ་ན་བཟང་།  ཨ་ནེ་པད་པད་ཚང་གི་བུ་མོ་རིག་འཛིན་སྐྱིད་ཡང་སང་ལོ་མཐར་ཕྱིན་དགོས་པ་མིན་ནམ།  དེ་བུ་མོ་ཡ་རབས་དཔེ་མེད་ཅིག་ཡིན།  འུ་ཚང་གི་མནའ་མར་ལེན་ཐུབ་ན་བཟང་ལས་ངན་མེད༽ཅེས་ཨ་ཕའི་གཏམ་ལ་ཁ་སྣོན་བྱས།
སྐབས་དེར་ངས་ཀླད་པ་ཇི་ལྟར་འགུལ་རུང་།  བསམ་བློ་གང་ལྟར་བཏང་རུང་།  རང་གི་སེམས་སུ་ཡུན་རིང་སྦས་པའི་གསང་བའི་ཆུ་བོ་དེ་ཕ་མའི་རྣ་བའི་ཡུར་བ་ནང་དུ་བཞུར་རུ་འཇུག་མ་ཕོད།  རྒྱུ་མཚན་ནི་ངའི་ཕ་མ་གཉིས་ནི་རྗེས་ལུས་ཀྱི་བསམ་བློ་རྡོ་ལྟར་མཁྲེགས་པའི་འབྲོག་པ་ཡིན་པས།  གལ་ཏེ་ངས་ཁ་ཆེའི་བུ་མོ་ཞིག་ཆུང་མར་བསུ་རྒྱུའི་གཏམ་དེ་གོ་ཚེ།  ཞེ་སྡང་མཛོ་འདྲ་བ་ཞིག་ལངས་པ་དང་།  ཁོང་ཁྲོ་མེ་ལྟ་བུ་ཞིག་འབར་ཏེ་ངའི་གདོང་ལ་འཕྱ་དམོད་ཀྱི་ཁ་ཆུ་འཕེན་པ་དང་།  རྣ་བར་སྡིགས་མོའི་གྲིས་བསྣུན་པ།  སྙིང་ལ་བསྲན་དཀའི་ཐོང་འཛུགས་པ།  ལུས་ལ་བཟོད་དཀའི་ལྕག་གིས་གཞུས་ངེས་པ་མ་ཟད།  ངའི་ཨ་ཕ་ནི་ཁ་བཤད་དོན་ལ་གནས་པ་དང་།  དོན་བཤད་ལག་གིས་ལས་ཐུབ་པའི་མི་ཨུ་ཚུགས་ཅན་ཞིག་ཡིན་པས།  གལ་ཏེ་ཁ་སྤོ་ཁ་ནས་ལངས་ཤིང་། ཞེ་སྤོ་གཏིང་ནས་ལངས་ཏེ།  ཚེ་ཟད་ཟེར་ནས་བསྐོར་འདེད་དང་།  བླ་སྒུལ་ཟེར་ནས་སྒོ་ལ་ཕུད་ཚེ།  ངས་སེམས་སྨྲེང་སྨྲེང་དང་།  ཞེ་སྡུག་སྡུག་བྱེད་པ་ལས་ཐབས་བཀོད་པ་ཁབ་སྐུ་ཙམ་ཡང་མེད་པས་ཡིན།  ཨ་ཁ།  ད་ནི་བཤད་བསམ་ན་སྙིང་གིས་མི་ཚུགས།  བསྐྱུར་འདོད་ན་ཡིད་ཀྱིས་མི་ནུས་པས་ཅི་བྱ།  སྐབས་དེར་སློབ་གྲྭ་འཚོགས་རག་བར་དུ་ཉིན་གཉིས་ལས་མེད་མོད།  ངས་མཱ་ཞའོ་ཧྭ་དྲན་དྲགས་པས་ཉིན་གཉིས་ནི་ཟླ་གཉིས་ལྟར་ཕར་ལ་འགྲོ་རྒྱུ་མེད་པ་དང་།  ཚུར་ལ་ཐོན་རྒྱུ་མེད་པའི་སྣང་བ་ཞིག་བཅོས་མིན་དུ་སྐྱེས་སོང་།
                            དྲུག
  སློབ་འགོ་བརྩམས་ནས་ཉིན་ཁ་ཤས་འགོར་ཟིན།  ཡིན་ན་ཡང་ང་མཱ་ཞའོ་ཧྭ་ལ་ཐུག་མ་ཕོད།  རྒྱུ་མཚན་མེད་པ་ག་ལ་ཡིན།  དབྱར་གནང་སྐབས་ཀྱི་ཕ་མའི་སྐད་ཆ་དེ་དག་དང་།  ལྷག་པར༼མི་རིགས་གཅིག༽ཅེས་པའི་སྐད་ཆ་དེ་ནི་མེ་ལོང་ནང་གི་གཟུགས་བརྙན་དང་།  ཡོལ་རས་ངོས་ཀྱི་སྣང་བརྙན་དང་འདྲ་བར་ངའི་གངས་དཀར་སེམས་སུ་ཁྲི་ཆིལ་ལེར།  ཀླད་པ་ནང་དུ་གསལ་གྱིལ་ལེར།  འདྲེན་བྱེད་ལམ་དུ་རྗེན་ལྷང་ངེར་འདུག་པས།  ངས་གོམ་གསུམ་སྤོས་ན་ཉྭ་འདར་ཞིང་ཚིག་གསུམ་བཤད་ན་ངག་ལྐུགས་པས།  ཡིད་སེམས་སྐྱ་མོ་སྡུག་དང་།  ཁྲ་ཆུང་མིག་མཐར་མཆི་མས་ཁེངས་ཏེ་སྡོད་པ་ལས་ཐབས་ཅི་ཡོད།
༼ཡ།  ཡོན་ཏན་པ།  ཉི་མ་ནང་ནས་དཔེ་ཆར་བལྟས་ན་ཨང་གྲངས་སྟོང་ཅན་གྱི་ཤེལ་མིག་གོན་དགོས་རྒྱུ་རེད།  ༽
  ཉིན་ཞིག་གུང་ཇ་འཐུང་རྗེས་ངས་རང་སེམས་ཀྱི་སྡུག་གི་མུན་པ་དེ་སངས་ཆེད་རྩལ་སྦྱོང་ར་བར་སོང་ནས༼སྦྲང་ཆར༽ཞིག་ལ་ལྟ་བཞིན་སྡོད་སྐབས།  མཱ་ཞའོ་ཧྭའི་གྲོགས་མོ་ལྷ་མོ་འཚོ་ཡོང་ནས་ངའི་གམ་དུ་ཙོག་རྗེས།  ༼ཅི་རེད།  མི་དགའ་འམ།  འཛིན་གྲྭ་གཅིག་གི་སློབ་གྲོགས་དང་།  དགེ་རྒན་གཅིག་གི་དགེ་ཕྲུག  མིང་སྲིང་ལྟ་བུའི་བཟང་སར་ཁ་ཡ་མི་བྱེད་བསམ་པ་ཨེ་ཡིན།  ཁྱོད་ཀྱི་མགོ་ན་གནམ་དང་འོག་ན་ས་མ་གཏོགས་མེད་པས།  བདག་ལ་ཁ་ཡ་མ་བྱས་ཀྱང་གནད་དོན་ཆུང་ཆུང་རེད།  ཡིན་ན་ཡང་བུ་མོ་མཆོག  ཁྱོད་ཀྱི་ཆེད་དུ་ཡ་ཆུང་ཁོག་པ་སྡུག་དང་།  མ་ཆུང་ཁོག་པ་རྣག་གིས་ཁེངས་པའི་བུ་མོ་མཆོག་སྣང་མེད་དུ་བསྐྱུར་ཕོད་དམ།  ཨ་རོགས༽ཞེས་བཤད་རྗེས།  ང་ལ་སྡང་མིག་ཅིག་བལྟས་པ་དང་ཏག་སེ་ཡར་ལངས་ཏེ་སློབ་ཁྲིད་ཐོག་ཁང་གི་ཕྱོགས་སུ་ག་ལེར་ཆས་སོང་།
   ལྷ་མོ་འཚོ་ནི་ངའི་འདུག་གྲོགས་ཡིན་ལ།  མཱ་ཞའོ་ཧྭ་དང་ངེད་གཉིས་ཀྱི་བར་བ་ཡང་ཡིན།  སློབ་འགོ་རྩོམ་པའི་ཉིན་མོ་དེར་མོས་མཱ་ཞའོ་ཧྭ་དང་ངེད་གཉིས་ཀྱི་གནས་ཚུལ་མང་པོ་དྲིས་ན་ཡང་།  ངས་སྡུག་བསྔལ་གྱི་འགོ་གླེང་སྟེ་རང་སྡུག་རིན་གྱིས་ཉོ་མི་འདོད་པས།  མ་གོ་ཁུལ་དང་མ་ཤེས་ཚུལ་བྱས་ཏེ་མོར་ཁ་ཡ་མ་བྱས་མོད།  ཡིན་ན་ཡང་དེ་རིངཨ་ཙི་ཙི།  ད་དེ་ཚོར་བསམ་བློ་གཏོང་ཁོམ་མི་འདུག  ཉོན་དང་སློབ་ཁྲིད་ཚོགས་པའི་ཅོང་སྒྲ་སི་ལིང་ལིང་གྲགས་བྱུང་།
  ཅོང་སྒྲ་སི་ལིང་ལིང་གྲགས་བྱུང་།  བླ་མ་ཡར་ལངས་བཞིན།  ༼པད་དབང་།  མཱ་ཞའོ་ཧྭ་དང་ངེད་གཉིས་ཀྱི་གཏམ་རྒྱུད་ནི་རི་རབ་ལྟར་དཔང་མཐོ་ཞིང་།  རྒྱ་མཚོ་བཞིན་ གཏིང་ཟབ་པས་ཉིན་ཞག་གཉིས་ལ་བཤད་ཀྱང་རྫོགས་རྒྱུ་མེད།  ད་ལྟ་དགོང་མོའི་རང་སྦྱོང་གྲོལ་བ་མ་ཟད་མལ་ཁང་གི་གློག་ཀྱང་གཟིམ་ལ་ཉེ༼སློབ་ཆུང་དགོང་མོའི་དུས་ཚོད་བརྒྱད་པའི་སྟེང་གློག་གཟིམ་པ་ཡིན༽ བས།  ད་སྔ་མོ་ནས་ངལ་གསོས་ན་བཟང་།  སང་ཉིན་བདག་ལ་སློབ་ཁྲིད་ཀྱང་ཡོད།  འོ།  ཁྱོད་ཀྱིས་མཱ་ཞའོ་ཧྭ་དང་ངེད་གཉིས་ཀྱི་གཏམ་རྒྱུད་ཀྱི་མུ་ལ་ཉན་འདོད་ན་ནངས་ཁ་ཕྱི་དྲོ་ཤོག་དང་བཤད་ཆོག་ཟེར།༽
  ཀྭ་ཡེ།  སྙིང་ཉེ་བའི་ཀློག་མཁན་རྣམ་པ།  ད་ལྟ་ངེད་གཉིས་དངོས་ནས་ངལ་གསོ་རན་པ་མ་ཟད།  ངས་དེ་རིང་འོ་ཇ་འཐུང་རྒྱུ་མང་དྲགས་པས་སྒོར་ཡང་སྔར་ནས་འབུད་དགོས་འདུག་པས།  བླ་མའི་གཏམ་རྒྱུད་རེ་ཞིག་འདི་ནས་མཚམས་མི་འཇོག་ག་མེད་རེད།  ཁྱེད་རྣམ་པས་ཐུགས་དལ་དལ་དང་སེམས་ལྷོད་ལྷོད་བྱོས་དང་།  ནངས་ཁ་ཕྱི་དྲོ་ང་ཚོས་མུ་མཐུད་དུ་བླ་མའི་གཏམ་རྒྱུད་ལ་ཉན་ཆོག་ཆོག་ཡིན།
 

རྩོམ་ཁུངས། ངེད་དྲ་བ།