རྒོད་པོས་ནམ་འཕང་བསྟད་སོང༌།

རྒོད་པོས་ནམ་འཕང་སྟོད་བཞིན་འདུག ངའི་ཚོ་ཁག་གི་བར་སྣང་དུ།
རྒོད་པོས་ས་ཆེན་གྱི་རུས་རྐང་བསྐྱུར་ཏེ། ནམ་འཕང་གཏད་སོང༌།
ཁོའི་གཤོག་ཟུང་ནི་མཁའ་དབྱིངས་ཀྱི་མེ་ཕུང་བཞིན།
དམངས་གླུ་ཞིག་གི་རྒྱུ་ཕྱོགས་དང་བསྟུན་ནས།
བྲག་ཐེམ་དང་ནགས་ཚལ་གྱི་བར་སྣང་དུ། ཁེར་སྐྱང་གིས་འབར།

རྒོད་པོ་ནི་བར་སྣང་གི་འོད་སྟོང་རེད།
རྒོད་པོས་ནམ་འཕང་སྟོད་དུས། ས་ཆེན་ལ་བསམ་བློ་མང༌།
བྲག་ཐེམ་གྱི་འཇམ་ཐིང་ངོས་ན། ས་སྲོད་མང༌།
རྒོད་པོ་ནི་ཉི་མའི་བུ་ཆུང་རེད།
རྒྱུ་སྐར་གྱི་གྲོང་ཚོ་ནས་འདི་ལྟར་འབར།
རྒོད་པོ་ནི་མཁའ་དབྱིངས་ཀྱི་གཉེན་ཉེ་བཞིན།
མིའི་རིགས་ཀྱི་མིག་ཟུང་ཁྲོད་བྱམས་བརྩེ་བཞིན་འཁོལ།
རྒོད་པོས་འདི་ལྟར་ནམ་འཕང་བསྟད་ནའང༌། མཚར་སྡུགགི་གཤོག་ཟུང༌།
ངའི་ཟུངས་ཁྲག་དང་རྒྱང་ཐག་ཉེ།

ས་ཆེན་གྱི་ཉིན་མོའི་ཁྲོད། ང་དབེན་སྟོང་གིས་བསྡད་དེ།
བྱ་ཚོགས་ཀྱི་གྲགས་འགུལ་ལ་འགྲེལ་སྟངས་ཁ་ཤས་བཙལ།
དུས་དེར། སྐྱོ་གདུང་གི་རླུང་ཡན་ཁྲོད།
ཁྱོད་བདེན་ལུགས་བཞིན་ལྡིང་འཁོར་བརྒྱབ་སྟེ།
ངའི་སེམས་ཁོང་ལ་རི་ཆུ་བྲིས།
རྒོད་པོ་ལགས། ཁྱོས་ངའི་བར་སྣང་ནས་ལྡིང་འཁོར་རྒྱོབས།
ངའི་ལྕམ་སྲིང་དག་གི་ཞི་དུལ་གྱི་དམངས་གཞས་གཉོམ་པོ།
ནམ་ཡང་བདེ་སྐྱིད་དང་སྐྱོ་སྣང་ངང༌། ཁྱོད་ལ་ལེན།
ཁྱོད་འཚོ་ཞིང་གཞེས་པས། ང་ལ་རླབས་ཆེ་བའི་ནམ་མཁའ་ཡོད།

སྙིང་ཉེ་བའི་རྒོད་པོ། ཟིང་ཟིང་གི་ས་ཆེན་ན་ཁྱོའི་བྲག་ཐེམ་ཡོད།
ནམ་མཁའ་ནི་ལྷ་ཚོགས་ཀྱི་ཕ་ཡུལ་ཡིན།
ཁྱོད་ནི་བྲག་ཐེམ་གྱི་མངའ་ཐང་ཡིན།

ཁྱོད་ཁུ་སིམ་མེར་བྲག་ཐེམ་དུ་བབས་བྱུང༌།
ཁྱོད་ཀྱིས་གསེར་མདོག་གིས་ས་སྲོད་འཁུར་ཏེ། བྲག་ཐེམ་དུ་བབས་བྱུང༌།
བྲག་ཐེམ་གྱི་དགོང་དྲོ། ས་སྲོད་ཀྱི་གནས་ཚང་བཞིན་བརྗིད།
བྲག་ཐེམ་གྱི་དགོང་དྲོ། ས་སྲོད་ཀྱི་ཕུགས་བསམ་བཞིན་དམར།
ཁྱོད་ཀྱི་ཞི་དུལ་གྱི་མིག་ཟུང༌། དགོང་དྲོ་འདིའི་བསམ་བློ་ལྟར།
རི་བོང་གང་ཞིག་གི་མྱ་ངན་ཁྲོད་འཁོར།

རྒོད་པོ། ང་ཁྱོད་དང་བྲག་ཐེམ་གྱི་ཁ་གཏད་དུ་བསྡད་ནས།
ས་སྲོད་སྟོང་ཕྲག་གི་ཟབ་ཚད་ལ་མྱོང་ཚོར་ལེན་དུས།
ང་དང་ངའི་གཉེན་ཉེའི་ཚོགས། ནམ་མཁའི་ཁ་གཏད་དུ།
དུས་ཚིགས་སྟོང་ཕྲག་ལ་བསྡད་པ་རྟོགས།
རྒོད་པོ། ང་ཁྱོད་ཀྱི་ཁ་གཏད་དུ་འགྲེང་བ་ནི།
ནམ་མཁའི་ཁ་གཏད་དུ་འགྲེང་བ་རེད།
ཁྱོད་ནི་ཇི་འདྲའི་མཐའ་ཡས་པ་ཞིག་རེད་ཨང༌།

དུས་ཚིགས་གང་མང་གི་རྗེས་ཤུལ་དུ།
བྲག་ཐེམ་ན་འཇམ་ཐིང་མེད། འདོད་བློ་མེད།
ད་རུང་ཞབས་བྲོ་བཞིན་གཙང་བའི་བསམ་བློ་མེད།
དེ་དུས། ངས་ཡུལ་ལྗོངས་ཟབ་མོ་ཞིག་གི་བརྗོད་བྱང་བཟུང་སྟེ།
གཙང་ངོགས་ཀྱི་སྒྲོན་མེ་ཁྲི་ཕྲག་ལ། ས་ཆེན་གྱི་འཇོན་ཐང་སློང་སྲིད་ལ།
བྲག་ཐེམ་གྱི་དབྱར་ཀ་དག་ལ་གཏིང་ཟབ་པའི་དམངས་གཞས་ཤིག་ལེན་ངེས།
རྒོད་པོ། དེ་དུས། ཁྱོད་ལྷ་ཚོགས་ཀྱི་ཕ་ཡུལ་ནས་བསྡད་དེ།
ལྒང་ཞུ་དང་རོལ་མོའི་དཀྱིལ་དབུས་ནས་རྒྱལ་སྲས་བཞིན།
རྒྱལ་ཆེན་སུ་ཞིག་གི་་དྲག་ཉམས་མྱོང་ངེས།
རྒོད་པོ། ད་ནི་ངའི་ཡུལ་ལྗོངས་ལ་སེམས་མ་ཤོར།
ཁྱོད་ནི་འོད་སྟོང་གི་ཕ་ཡུལ་འཚོལ་མཁན་རེད།
ཁྱོད་ཀྱི་ཤེས་སྟོབས་ཀྱི་བྲང་ཁོང་མཁའ་དབྱིངས་ན་འཕྱོ་དུས།
ང་ས་ཆེན་གྱི་དཀྱིལ་ན་ངུས།
ང་ས་ཆེན་གྱི་རྨ་ཁའི་ཁྲོད་བྱེའུ་ཆུང་བཞིན་ངུ།
རྒོད་པོ་ལགས། ངའི་མིག་ཆུ་ནམ་མཁའ་ནས་འཛད་ནའང༌།
ཁྱོད་ལ་ད་རུང་ས་ཆེན་དང་གཙང་ཆུ་ཡོད།

རྒོད་པོ། མིག་ཆུ་ལས་ཀྱང་རྔམ་བརྗིད་ལྡན་པ་ཞིག
ད་ནི། གནས་ཚང་འདིར་རྙེད་མི་སྲིད།
ལྷགས་རླུང་དང་རྒྱུ་སྐར་ཐར་ཐོར། བྲག་ཐེམ་ན་བན་བུན་རྒྱུ་དུས།
ངས་སྲོག་ལྡན་དུང་ཕྱུར་གྱི་རྨེག་མེད་ཁྲོད།
སྙན་ངག་དང་དབུལ་ཕོངས་སྲུང༌། རྒོད་པོ།
ཐམས་ཅད་ངའི་ཆེད་དུ་འབར་ནའང༌། ང་ནི་ཇི་འདྲའི་གྲང་ཨང༌།

དུས་ཚིགས་འདིའི་དགོང་དྲོར། བྱ་ཁྱུ་འཕུར་སོང་་
རྒོད་པོ་ནི་ཇི་འདྲའི་སྟོང་ཞིང༌། བྲག་ཐེམ་གྱི་རུས་རྐང་ནི་ཇི་འདྲའི་འཁྱག
བྲག་ཐེམ་གྱི་འཕེལ་འགྲིབ་ཁྲོད། རྒོད་པོར་བསམ་བློ་མང༌།
ཁྱོད་ཀྱིས་བྱ་ཁྱུ་འཕུར་ཤུལ་གྱི་སྙན་གྲགས་དེ།
བྱ་ཆེན་སུ་ཞིག་གི་ཡུལ་ལྗོངས་སུ། བག་ཡངས་ཀྱི་རྒྱུ་བ་དྲན།
རྒོད་པོ། ཟིང་ཟིང་གི་ས་ཆེན་འདི། བྱ་ཆེན་སུ་ཞིག་གི་ལས་སྐལ་ལམ།
ཡང་ན། ངའི་མི་ཚེ་ཧྲིལ་བོའི་གཟི་བརྗིད་དང་རེ་སྒུག་ཨེ་ཡིན།
ནགས་ཚལ་གང་མང་གི་ཉམས་དམས་ལ།
ངས་ཕ་ཡུལ་ནས་འཕྲེད་གླིང་མ་བཏང༌།
བྱ་ཚོགས་གང་ཞིག་གི་བཟོ་ལྟ་ལ། ངས་དམངས་གླུ་དེ་དབེན་སྟོང་གིས་བླངས།

རྒོད་པོ། ས་ཆེན་ཟིང་ཟིང་གིས་འཚོ་དུས། ཁྱོད་ཀྱང་ཟིང་ཟིང་གིས་འཚོ།
ཁྱོད་དང་ས་ཆེན་ནི་རྒྱུ་སྐར་གཅིག་གི་མིག་ཆུ་རེད།
ཁྱོད་ཀྱི་རྣོ་དབལ་གྱི་འདོད་བློ་ནི་ས་ཆེན་གྱི་འདོད་བློ་རེད།

རྒོད་པོ། དོ་ནུབ་ཁྱོད་མེ་ཏོག་ཇི་བཞིན།
ང་དང་ས་ཆེན་གྱི་རྨ་ཁའི་ཁྲོད་ཐེངས་ཤིག་ཉལ་རོགས།
ངའི་མཛེས་སྡུག་གི་ཟུངས་ཁྲག
ཞོགས་པའི་འོད་སྟོང་ཁྲོད། རྒོད་པོའི་ཕུགས་བསམ་ལ་འཁོལ།

              སྐུ་དྲག་ཚོའི་ཉི་ནུབ།
                  —གུ་གེ་རྒྱལ་རབས་ཀྱི་ཉམས་དམས་ལ།

དེའི་རྐྱེན་གྱིས། རི་བོ་དེ་སྔར་བཞིན་འདུག་ལ།
གནའ་མཁར་དེ་སྔ་མོ་ནས་ཡལ་སོང༌།
སྐུ་དྲག་ཚོའི་ཁེངས་དྲེགས། དུས་སྐལ་གང་ཞིག་གི་ཕམ་ཁ་བཞིན།
དབུལ་ཕོངས་ཀྱི་དུས་ཚིགས་ནང༌། ཉམས་ཞན་གྱིས་ཆས།

སྐུ་དྲག་ཚོ་གཤར་རྗེས།
གནའ་མཁར་གྱི་བར་སྣང་དུ། ཉི་མ་སྔར་བཞིན་ཤར།
རྒོད་པོ་ཁ་ཤས་ཁེངས་སྐྱུང་གིས་འཁོར།
ད་དུང༌། སྟོན་རླུང་འབྱོར་ཕྱུག་གིས་གཡུག་ཀྱང༌།
ལོ་ཏོག་དང་ལྷ་རྔའི་སྣང་ཚུལ་ཅི་ཡང་མ་མཐོང༌།

དེའི་རྐྱེན་གྱིས། རི་བོ་དེའི་ཁ་གཏད་ནི། ཟླ་བ་ལྟར་འཁྱག
ནང་རྩོད། ནད་ཡམས། ཡང་ན་ལྐོག་ཤོམ་ཞིག་གི་ནོར་འཁྲུལ་གྱིས།
སྐུ་དྲག་ཚོའི་ཞོགས་པ་ནི་ཇི་འདྲའི་སྟོང་ཞིང་སྐྱོ།

ད་ནི། ཕོ་བྲང་གི་སྒྲོན་མེའི་ངོགས་ན། བྲན་མོའི་ཆང་གཞས་མེད།
སྐུ་དྲག་ཚོའི་ཧབ་ཆ། འཐོར་རླུང་གི་བྲན་ལྟར་འཁྱམས།
སྐར་ཚོམ་ཉི་ཤུའི་དར་རྒུད་དང་མན་ངག་ཟབ་མོ།
རི་བོ་དེས་དབེན་ཐིང་གིས་ཉར་ཡང༌།
དུས་འདིར། རྒྱལ་ཆེན་སུ་ཞིག་གིས་ང་ཚོར་ར་སྤྲོད་བྱེད་ཐུབ།

གནའ་མཁར་གྱི་དགོང་དྲོར། མཚམས་སྤྲིན་ཧ་ཅང་དམར།
བྱ་ཚོགས་དག་གིས་ཡིད་ཚིམ་པའི་སྐད་སྒྲ་སྣ་ཚོགས་འབྱིན།
དུས་འདིར། དབང་སྒྱུར་ཚོའི་འཇོན་ཐང་ནི་ཇི་འདྲའི་སྐྱི་གཡའ་ཞིང༌།
ཁོ་ཚོའི་གཞུང་དྲང་གི་བང་སོ་ཇི་བཞིན་སྟོང༌།
དེའི་རྐྱེན་གྱིས། རི་བོ་དེ་སྔར་བཞིན་གནས་ལ།
སྐུ་དྲག་ཚོའི་ཉི་ནུབ་དམར་པོ།
ས་ཆེན་འདིའི་ངལ་གསོ་ཇི་བཞིན།
རིགས་རྒྱུད་གང་ཞིག་གི བྲང་ངོས་ན་འབར།

             སྙན་ངག་པའི་མཚན་མོ།

མཚན་མོ་འདིར། རུས་རྐང་གི་དཀྱིལ་ན་མཆེད་པའི་མེ་ཕུང༌།
ངའི་རི་བོ་འདིའི་རླབས་ཆེ་བའི་སྐྱོ་གདུང་རེད།
མཚན་མོ་འདིར། མེ་ཕུང་དེ་རྒྱལ་སྲས་དག་གི་དཔལ་འབར་ལྟར།
ཁྱིམ་གཞིས་གང་མང་གི་སྔས་མགོར་ཚ་དྲོད་ཀྱིས་བབས།
ཁ་བའི་ལྷག་མ་ཁྱེར་བའི་རྒྱུ་སྐར་ཚོགས།
བྲག་རིའི་ཁ་གཏད་དུ་ཤར་ནས། མེ་ཕུང་གི་བཟོ་ལྟར་བསམ་བློ་ཁ་ཤས་བསྣན།

མཚན་མོ་འདིར། ཟླ་འོད་དཀར་པོ་འཁྱིལ་བའི་བྲག་རྡོའི་ཕང་དུ།
གནའ་བོའི་སྐྱུག་ལྡད་འཕྲོག་པའི་རྔོན་པ་ཡོང་མི་སྲིད།
མུན་ནག་ལས་ཀྱང་འཇགས་པའི་རི་ཚོགས།
ངའི་བརྩེ་མདངས་དང་རྦད་སེམས་ཀྱི་གནས་མལ་ཡིན།

མཚན་མོ་འདིར། ཐབས་ཅད་ཞི་བདེ་ཡི་ཆེད་དུ་འཚོ།
ངའི་དབུགས་རྒྱུ་ནི། རི་བོ་འདིའི་གྲགསའགུལ་ཉག་གཅིག་རེད།
དོ་ནུབ། ང་བསམ་བློ་ཁ་ཤས་ལ་གྱེས་བྲལ་བྱེད་འོས།
ཁྱེད་ཅག་ཀྱང༌། ངའི་རྗེས་སུ་དཔལ་འབར་ལེན་དུ་ཤོག

ང་ཚོས་རླུང་བུ་ཞིག་གི་འཇོན་ཐང་ལ་མགོ་བོ་བསྙེས་ནས།
ཟུངས་ཁྲག་གི་འོད་སྟོང་རྙེད་མི་སྲིད།
རི་ཚོགས་གང་མང་གི་འབྱོར་ཕྱུག་ནི།
ཉི་མ་དང་བྱ་རྒོད་ཀྱི་དགོས་མཁོ་རེད།

མཚན་མོ་འདི་དག ངའི་མདུན་ན་འཇགས།
ས་ཆེན་གྱི་ཕུགས་འདུན་ཁྱེར་བའི་སྐར་ཚོམ་དེ།
ལམ་ཆེན་གྱི་བར་སྣང་དུ་དཔུང་ཆེན་ལྟར་བཞུར་དུས།
ང་ཚོའི་འདོད་བློ་ནི་ལུ་གུ་ཇི་བཞིན་འཇམ་པ།
སུ་ཞིག་གིས་བདེན་ལུགས་ངང་གསེད་བཀྲོལ་བྱེད་མྱོང༌།

མཚན་མོ་འདིར། ང་ལ་རི་རབ་དང་སྐར་ཚོགས།
ད་དུང༌། འདོད་མོའི་ལུག་ཁྱུ་དཀར་པོ་ཡོད།
མཚན་མོ་འདིར། ང་ནི་ཞི་བདེ་ཇི་བཞིན་འཇམ།
ལྷ་ཆེན་གྱི་འོད་སྟོང་ཁྲོད་འཚོ་བའི་རྒྱལ་སྲས་ཚོགས།
མྱུ་གུ་དང་ཐ་སྙད་ཕྱར་ནས། ང་ལ་ཟུངས་ཁྲག་གླེང་བར་ཡོང༌།
ང་ཚོ་ཕན་ཚུན་ཁ་གཏད་དུ་བསྡད་དེ།
སྒྲོན་མེ་རྐང་གཅིག་སྦར་ནས། རང་རང་གི་རྨ་ཁ་བཙལ།
སྐྱོ་གདུང་ཁྱོར་གང་བཟུང་ནས། འཇིག་རྟེན་ལ་གནས་ཚང་གླེང༌།

མཚན་མོ་འདིར། སྙན་ངག་པར་བསམ་བློ་མང༌།
མཚན་རླུང་ཁྲོད་ཞུམ་པའི་མར་མེ་ཚོགས་ཀྱང༌།
ངའི་སྙན་ངག་ཁྲོད། དགུང་ལྗོངས་ཀྱི་སྐར་ཚོགས་བཞིན་འདར།

དོ་ནུབ། ངའི་ནམ་མཁའ་དང་རྒོད་པོའི་ཚོགས་ནི།
ང་དང་སྒྲོན་འོད་ལ་རྒྱང་ཐག་ཅི་འདྲའི་ཉེ།
 

རྩོམ་ཁུངས།