མཛེས་སྡུག་དར་གྱི་ཤམ་བུ་ལྷབ་ལྷུབ་ཏུ་གཡོ་བཞིན།
ལྕུག་ཕྲན་ལུས་ཀྱི་ཟློས་གར་ནམ་མཁའ་ན་སྒྱུར་བ།
ཨེ་མ་མཁའ་ལ་རྒྱུ་བའི་འཆི་མེད་ཀྱི་བུ་མོ།
མཛེས་སྡུག་གི་བཞིན་དཔལ།
ཉ་གང་གི་ཟླ་དཀྱིལ།
དཀྱུས་རིང་གི་ཟུར་མིག
མེ་ཏོག་གི་མདའ་གཞུ།
འཁྲིལ་བག་གི་སྐེད་སྐབས།
ཤེལ་དཀར་གྱི་བུམ་མགུལ།
མཁྲང་རྒྱས་ཀྱི་འོ་འཛིན།
སྨིན་ལེགས་ཀྱི་ཨ་མྲ།
ད་དུང༌།
རིན་ཆེན་དོ་ཤལ།
གསེར་གྱི་གདུབ་ཀོར།
ནོར་བུའི་མེ་ལོང… …
ཨ་ལ་ལ་མཛེས་སྡུག་གི་དྭངས་མ།
མཉེན་ཞིང་ལྕུག་པ།
དཔུང་བའི་འཁྲི་ཤིང༌།
ཕྲ་ཞིང་ལྡེམ་པ།
སོར་མོའི་པད་རྩ།
མཛེས་ཤིང་འཛུམ་པ།
བིམ་པའི་མཆུ་སྒྲོས།
ཟབ་ཅིང་དམའ་བ།
ལྟེ་བའི་པད་མ།
ད་དུང༌། ཕྲ་ཞིང་དྲང་བའི་སྨྱུག་རིས།
བཀྲ་ཞིང་བཀྲག་པའི་ཚོན་མདངས།
གྲུང་ཞིང་འགྱུ་བའི་གསོན་ཉམས… …
ཨ་ཧོ་ཧོ་སྒྱུ་རྩལ་གྱི་ཡང་རྩེ།
ལྷ་ཡི་མཛེས་ཆོས་དེ་རྫོགས་ཀྱང་ཆོག་གི
མི་ཡི་འགྱུར་བག་དེ་ག་ནས་རྙེད་དམ།
མཁའ་འགྲོའི་ཆ་བྱད་ནི་མཛེས་ཀྱང་ཡིན་གྱི།
དྲི་ཟའི་འཇོ་སྒེག་འདི་སུ་ཡིས་གནང་བྱུང༌།
མཛེས་སྡུག་སྣ་གཅིག་གི་ཡང་རྩེར་འཕགས་ཀྱང༌།
ཀུན་གྱི་ཉིང་བཅུད་འདི་ཇི་ལྟར་བསྡུས་སམ།
ཨོ—ལེགས་སོ—ཡིན་ནོ—བདེན་ཏོ།
ལྷ་ཡི་བཀའ་ལུང༌།
མི་ཡི་ངལ་རྩོལ།
མི་མིན་གྱི་རྫུ་འཕྲུལ།
རྒྱ་ཡི་བཟོ་བཀོད།
བོད་ཀྱི་སྒྱུ་རྩལ།
མི་ཉག་གི་མཛེས་འདོན… …
ད་གཟོད་ཁྱོད་ཁྱོད་དུ་གྲུབ་པོ།
ཀྱེ་ཀྱེ་མཚར་སྡུག་ཡེ་ཤེས་ཀྱི་མཁའ་འགྲོ
ཁྱོད་ཀྱི་ཐུགས་ཀྱང་ཁྱོད་ལུས་དང་འདྲ་བར།
མི་སྡུག་ར་རིའི་དྲི་མ་དང་བྲལ་སྙམ།
མི་ཤིགས་གདེང་ཞིག་ཁོ་བོ་ཡིས་རྙེད་དེ།
བདེན་པ—བྱམས་པ—མཛེས་པ།
རྣམ་གསུམ་ལྷན་སྐྱེས་ཉིད་ནས།
གཉེན་དུ་སྡེབ་པ་འདིས་སོ།
དེས་ན་ཁྱོད་ཀྱི་སྙན་དུ།
ཞུ་བྱ་འདི་ཙམ་མཆིས་ཏེ—
ནམ་ཞིག་གདོང་བ་བཞི་ལྡན་ཚངས་པའི་བུ།
ཁེངས་པའི་ཉམས་ཀྱིས་ཁྱོད་ཀྱི་མདུན་དག་ཏུ།
འཇིག་རྟེན་བྱེད་པོ་ཁོ་བོ་འབའ་ཞིག་ཅེས།
རྒྱགས་པའི་གཏམ་གྱིས་སྲིད་པ་འགས་བྱེད་ཚེ།
མཆུ་སྒྲོས་ཀྱི་བུམ་བཟང་ནས།
བདེན་གཏམ་གྱི་བདུད་རྩིའི་རྒྱུན།
ཤར་མ་རུ་འཇོ་བྱེད་ན།
ངེས་དོན་གྱིམཁའ་འགྲོ་ཉིད།
 

རྩོམ་ཁུངས།