སྲིན་བུའི་མིག་ཆུ།
—སློབ་དཔོན་ཆེན་པོ་བཤད་སྒྲུབ་མཆོག་ལ་རྗེས་དྲན་དུ།
གནའ་དུས།
མི་ཡུལ།
ཚེ་སྲོག་གིས་ཁེངས་ཡོད་པར་ངེས།
འདབ་ཆགས་ཀྱི་གླུ་སྒྲ་དང༌།
རྩི་ཤིང་གི་གར་སྟབས།
ནམ་མཁའ་ན་ད་དུང་ཡལ་མེད།
འོན་ཀྱང༌།
ང་མི་ཡུལ་དུ་བསླེབས་དུས།
ངའི་འཇིག་རྟེན་ན།
གྲང་རེག་གིས་གཟིར་བའི་སྡོང་རྒན་ཞིག་མ་གཏོགས་མེད……
ཐར་ཐོར་དུ་ལུས་པའི་ཤིང་ལོ་ལས།
ངས་མེས་པོའི་གཏམ་རྒྱུད་ལ་ཉན།
ལོ་མའི་ཟིལ་དངར་ལ་ལྕེ་ལྡག་དང༌།
ལོ་མའི་འཇམ་ཤ་ལ་མཆིན་པ་གླན་ནས།
ང་འཚར་ལོངས་བྱུང༌།
ད་ནངས་ཡང༌།
དྲག་ཏུ་ལྡང་བའི་རླུང་དམར་གྱིས།
ངའི་བྱང་ཆུབ་ཤིང་གི་ལོ་མ་ཞིག
ནམ་མཁའ་ལ་ཁྱེར།
མི་མངོན་པའི་དབྱིངས་ལ་ཁྱེར།
སྙིང་ལ་མི་བཟོད་པའི་ན་ཟུག་ལངས་ནས།
ང་སྡོང་རྩེ་ནས་ས་ལ་ལྷུང༌།
སྲིན་བུ་ཞིག་གི་མིག་ཆུས།
ལྗོན་ཤིང་གི་རྩ་བ་བརླན་པར་བྱས……
རྩོམ་ཁུངས།