ཕ་ཡུལ།
ང་ནི། ཕ་ཡུལ་དེར།
ལས་དབང་གིས་ཁྲིད་པར་ཡིད་ཆེས་ཤིང་།
རྩྭ་ཐང་དང་གངས་རི།
ད་དུང་འཛད་མེད་ཀྱི་ཆུ་ཀླུང་སྟེ།
དེ་དག་གིས་དཔལ་གྱིས་མྱོས་པས།
ངས་ད་གཟོད། ངའི་མགོ་ཐོག་གི་ནམ་མཁའ་དེར།
དྲི་མ་མེད་པ་ཚོར།
འོ་ཇས་གཏམས་པའི་དཀར་ཡོལ་འབྲུག་རིས་མ།
གྲང་འཁྱག་དང་ཚི་དྲེག་གིས་སིམ་པའི་པགས་ལྭ་རིང་བོ།
ད་དུང་། གནག་ཕྱུགས་རྗེས་ཀྱི་བརྐོས་རིས་ལྟ་བུའི་གཟུགས་གཞི་དེ་དག
རང་སེམས་སྒུལ་བྱེད་ཀྱི་དམངས་སྲོལ་ལམ།
སྙིང་དུ་འཆང་བའི་བློ་སྟོབས་ཤིག་གམ།
གང་ལྟར། རླུང་ནི་ལྷད་མེད་དུ་ལྡང་བཞིན།
དྲན་སྣང་རིགས་ཤིག་གི་གསེད་འགྲོལ་དུ་གྱུར་ལ།
ཉི་འོད་དེ་ལྟར་རིས་མེད་དུ་འཕྲོ་བཞིན།
རེ་བ་ཕྲན་ཚེགས་ཀྱི་དྲན་པ་གསོ།
རྟོག་སྣང་ཁྲོད་རྐྱོང་བཞིན་པའི་རྩྭ་ཐང་གི་རྒྱ་ཁྱོན།
འབྲོག་གླུ་ཁེར་རྐྱང་ཞིག་གིས་ཀྱང་སྟོང་ཆ་བསྐངས།
ངའི་ཕ་ཁྱིམ་གྱི་སྦྲ་སྒོར་ཉལ་བའི་འབྲོག་ཁྱི་དེས།
ད་དུང་ང་ངོ་ཤེས་སམ།
ཕ་ཡུལ་ནི། དེ་ལྟར་སྡང་སེམས་དང་ཡིད་ཆེས་ཁྲོད།
བསྐྲད་ཀྱང་འབྲལ་ཐབས་མེད་པའི་དྲན་གཞིར་གྱུར།
རྩོམ་ཁུངས། ༢༠༠༥ལོའི་སྦྲང་ཆར།