ཟུར་དང་ལེབ་ཀྱིས་མཐོང་བའི་ང་ཚོ།
ལེབ་ཀྱིས་མཐོང་བའི་ང་།
ལི་ཐོའི་སྟེང་གི་ཚེས་གྲངས་དེ་མ་གཤགས་ན
དུས་ཚོད་རེས་མོས་སུ་མི་འཁོར་བ་ཡིན་ན
ངས ལི་ཐོའི་ངོས་ཀྱི་ཚེས་གྲངས
དུས་གཏན་དུ་ཉ་ར་བྱེད་ངེས
ཡིན་ཡང ལི་ཐོའི་ངོས་ཀྱི་ཚེས་གྲངས་དེ
བསམ་གཞིག་གིས་གཤགས་པ་ནི
དུས་ཚོད་ཕར་ལ་བཞུར་གྱིན་པ་འདི་རྟིང་གནོན་བྱས་པ་ཡིན་ལ
ལས་ཀ་ཙམ་ཙིག་སྒྲུབ་པ་འདི་ཡང
དུས་ཚོད་དོན་མེད་དུ་ཡལ་གྱིན་པ་འདིར་འཇུངས་སེམས་སྐྱེས་པས་ཡིན
རླབས་ཆེན་དང་ཉམ་ཆུང་།
གློག་ཀླད་འདི་ཁ་ཕྱེས་མ་ཐག
ལྷུ་ཐག་དེ་དག་གི་ནུས་སྟོབས་ཀྱིས ང་ལ
མིའི་རིགས་ཇི་འདྲའི་རླབས་ཆེན་ཞིག་རེད་ཨང་སྙམ་པའི་འདུ་ཤེས་སྐྱེས་སུ་བཅུག
གློག་ཀླད་གྱི་སྒོ་མོ་རེ་རེ་རྡུང་གིན
བསམ་གཞིག་ནན་གྱིས་གཏོང་དུས
སེམས་ལ་མིའི་རིགས་འདི་ཇི་འདྲའི་ཉམ་ཆུང་ཞིག་རེད་ཨང་སྙམ་བྱུང
ཟུར་གྱིས་མཐོང་བའི་ཁྱོད།
རྒྱ་ཡིག་གི་སྐད་དོད་དུ་བྲིས་པའི་ཡིག་ཆ་ནི
ཁྱོད་ཀྱིས་དེ་རིང་སྒྱུར་དགོས་པའི་བྱ་བ་ཞིག་ཡིན་འདུག
འོན་ཀྱང མི་སེར་གྱི་བདེ་སྡུག་ལ་དཀྲིས་ཤིང
བབ་ལྕི་བའི་ཐ་སྙད་དག
སེ་གོལ་གཏོགས་ཡུན་ཙམ་ལ་བསྒྱུར་ཚར་སོང
གལ་སྲིད ཁྱོད་ཀྱིས
སློབ་དཔོན་ཐོན་མིས་དེ་སྔ་བོད་ཡིག་གསར་བཟོ་མཛད་དགོས་པའི
ཐུགས་དགོངས་དང་དམིགས་ཡུལ་ལ
གོ་བ་བག་རེ་ཞིག་ལོན་ཡོད་ན
མི་སེར་གྱི་བདེ་སྡུག་དང་བརྒྱུས་པའི་ཡིག་ཆའི་ཐ་སྙད་ཚོགས
ད་དུང་ཡང་བསྒྱུར་ཚར་ཡོད་མི་སྲིད
ངོས་ལེན་ཡི་གེ།
ཁྱོད་ཀྱིས་ཞུ་འབུལ་བྱེད་ས་ཁོ་ཡིན་ནའང
བདག་གི་འགྲོ་འདུག་ལ་ཆོག་མཆན་གནང་མཁན་ཁོ་ཡིན་ནའང
ངེད་གཉིས་ཀྱི་དབུ་ཐོད་དུ་ཉི་མ་སྔར་བཞིན་གནས་པར་རྐྱེན་བྱས་ཏེ
རིགས་མཐུན་ཚོར ད་དུང་ཡང
ངེད་གཉིས་རང་དབང་ཡིན་ཞེས་གཤོབ་ཅིག་ལབ་དགོས་སམ
དེ་རིང་ཡང སྣོད་དང་བཅུད་ལ་འཁོན་འཛིང་ཅི་ཡང་བྱས་མེད་ཀྱང
འུ་གཉིས་ཀྱིས་འུ་ཐུག་ཐབས་ཟད་ངང
ངེད་གཉིས་འཕྱུག་སོང་ཞེས་འགོ་ཁྲིད་ལ
ངོས་ལེན་ཡི་གེ་འབྲི་བཞིན་པ་མ་ཡིན་ནམ
ནར་སོན་པ་ཡིན་ནམ།
ཡིད་འགུལ་བའི་གཏམ་རྒྱུད་དེས་ང་ལ་མིག་ཆུང་སློང་གིན་འདུག
གཉེར་མས་ཁེབས་པའི་ངོ་གདོང་དེས་ཀྱང་ང་ལ་མིག་ཆུ་སློང་གིན་འདུག
རྐང་རྗེས་ལ་བརྐོས་པའི་མཛེས་སྡུག་གི་ཐིག་ལེ་དེས་ཀྱང
ང་ལ་མིག་ཆུ་ཡང་ཡང་སློང་གིན་འདུག
འོན་ཏེ དགོངས་པ་མ་ཚོམ་ལགས
ང་ལ་མིག་ཆུ་མི་འདུག
དངོས་ཡོད་འདིའི་འཕོངས་ལ་བཅིབས་པ་ནས་བཟུང
ང་ལ་མིག་ཆུ་མི་འདུག
ད་ལྟ དེ་བས་ཀྱང་འཇིགས་ཡེར་བ་ཞིག་ནི
ནག་ནོག་གི་ལྷད་མ་བསྲེས་པའི་གཞན་དག་གི་མིག་ཆུ་མཐོང་དུས
ང་ལ་དགོད་རྒྱུ་ཞིག་གཏིང་ནས་འཕྱུར་བཞིན་འདུག་ཅིང
ཕྱིར་དྲན་གྱི་མེ་ཏོག་ལ་བྲན་པའི
རང་ཉིད་ཀྱི་མིག་ཆུ་དག་དྲན་དུས་སུའང
ཡིད་མི་ཆེས་པའི་ཁྲེལ་དགོད་ཅིག་གཏིང་ནས་འཕྱུར་སོང
2009/5/18མཚན་མོར།
རྩོམ་ཁུངས། ༢༠༠༩ལོའི་གངས་རྒྱན་མེ་ཏོག