ས་དང་ནམ་མཁའ་སྦྲེལ་བའི་བར་སྣང་འདི

ངའི་མིག་གིས་མཐོང་ཚད་ཁོ་ན་ཡིན་ནམ

ཉི་འོད་དང་དུས་ཚོད་ཀྱིས་འཇུམས་པའི་ང་རྒྱལ་ཞིག་ཡིན

ཁེར་རྐྱང་གི་གླིང་ཕྲན

ངས་མ་མཐོང་ཡང་བྱ་ཁྱུས་བསྐོར་ཡོད་ཟེར

ཉི་ནུབ་ཀྱི་སྔ་གཞུག་འདིར

ཁོ་ཚོས   དབེན་འཇགས་ཀྱི་གནས་དེ་རུ་ཅི་ཞིག་གླེང་གིན་ཡོད

ས་གཞི་ལ་ཁྲག་ལྟ་བུའི་ཕྱིར་མིག་ལྷུང་དུས

ད་དུང་ཞི་བདེའི་མཆོད་རྐོང་སྦར་མཁན་ཚོ

ས་སྲོད་ཀྱི་བྱ་ཁྱུ་དང་མཉམ་དུ་གང་ལ་འཕུར་འགྲོ་ཨང

ཁོད་ཡངས་པའི་རླབས་ངོགས་སུ

ང་རང་གྲིབ་གཟུགས་རིང་བོ་དེའི་སྣེ་རུ་འགྲེང་ཚེ

དབང་མེད་དུ་མཐེ་བོང་ལ་ལྟ་བཞིན

ལོ་ཟླའི་གཉེར་རིས་ལ་འཐིམ་པའི་གོད་ཆག་རེ་གཉིས་དྲན

སེམས་ཀྱིས་འདང་ཚད་ཅིག་དུས་ཀྱི་མགོ་རྔ་ཡིན་པས

ཨམ་ཕྲག་སྔོན་གིན་གཏེར་འབུལ་བྱེད་དོན་མི་འདུག

རོ་བསྐ་བའི་ཨ་སྔོན་ཆུང་ངུ་འདི་མེ་ལོང་ཞིག་ཡིན་ན

མཚན་ལྗོངས་གཤགས་པའི་སྐར་མདའ་རེའི་རྗེས་སུ

གནའ་སྔ་མོའི་སྐྱོ་གར་ལྟ་བུའི་བག་མེད་ལོངས་སྤྱོད་དག་འཆར་ཐུབ

དེའི་ཕྱིར    མཐིང་མདོག་གི་རྔམ་བརྗིད་འདིའི་གདོང་ནས

ང་ལ་སོམ་ཉི་ཅི་ཡང་མེད་པར་བྲང་གཞུང་བརླན་གཤེར་གྱི་ང་རྒྱལ་ལ་སྦྱར

ད་དུང  ཀོ་གྲུ་ལྟ་བུའི་ལྷམ་ཆུང་རླབས་རྩེར་བསྐྱོན་བཞིན

ཉི་འོད་འོག་རྒྱང་རིང་ནས་ལོག་ཀྱང་རྒྱང་རིང་ལ་བཞུད་སོང

རྩོམ་ཁུངས། ༢༠༠༧ལོའི་གངས་རྒྱན་མེ་ཏོག