《སྦྲང་ཆར》གྱི་བར་བཅུག་རི་མོ《སློབ་གྲྭར་བསྐྱོད་པའི་ལམ་དུ》ཞེས་པ་མཐོང་རྗེས་ཐོལ་བྱུང་དུ་བྲིས་པ།
ཞོསག་པ་དེར།
ཁ་བ་མ་བབས།
གྲང་རླུང་ཡང་མ་ལྡང༌།
རྒྱང་རིང་གི་གནམ་མཐའ་ནས།
ཉི་མ་སེར་པོ་ཞིག་ག་ལེར་འཛུམ་ཞིང༌།
སྤྲིན་པ་དཀར་པོ་ཞིག་ཀྱང་དལ་བུར་གཡོ།

ཞོགས་པ་དེར།
ཐོ་རེངས་སྐར་ཆེན་དང་ཁྱོད་གཉིས།
གཡག་རྒན་ཁྲ་ཐོའི་འཕོངས་ན་སྙིང་དུ་སྡུག
ཉི་འོད་ཀྱི་སྔ་རོལ་ནས་བཟུང༌།
སྐྱ་རེངས་ཀྱི་བསུ་མ་ཇི་བཞིན།
ངས་ཡུན་རིང་ལ་རེ་ཞིང་སྒུག་པ་ནང་བཞིན།
ངའི་སྙན་ངག་གི་མེ་ཏོག་ཚལ་ན་ཡིད་དུ་འོང༌།

ཞོགས་པ་དེར།
ཁུ་བྱུག་གི་གསུང་སྙན་ཁྲོད་དུ།
རྩྭ་ལྗང་དང་མེ་ཏོག་གི་བྲོ་གར་ཁྲོད་དུ།
ཕྱེ་ལེབ་ཀྱི་གར་སྟབས་ཁྲོད་དུ།
གཡང་དཀར་གྱི་འབའ་གཞས་དང་རྟ་ཕོའི་རྨིག་སྒྲའི་ཁྲོད་དུ།
འབྲི་མོའི་བཞོ་དབྱངས་ཁྲོད་དུ།
ཁྱོད་ཀྱི་སྐེ་དཀྲིས་དམར་པོ་ལྷབ་ལྷུབ་ཏུ་སྐྱོད།
ཁྱོད་ཀྱི་ལན་བུ་ཕྲ་བོ་ཡུག་ཡུག་གཡོ།
ཁྱོད་ཀྱི་བྱིས་བློ་གཉོམ་པོ་ལྷུག་ལྷུག་འཛུམ།

ཞོསག་པ་དེར།
གསང་བ་མང་བོའི་ཁྲོད།
ད་དུང་གསང་བས་བཞད་པའི་མེ་ཏོག་དམར་ཆུང་མ།
སླར་ཡང༌།  གསང་བ་ག་ཚོད་ཁྲོད་བཞད་ཡོང༌།

ཞེན་ཆགས་ཡོད་ཚད་རེ་ཞིག་རྒྱབ་ཏུ་བཞག་ནས།
བདག་ཀྱང་ཁྱོད་དང་མཉམ་དུ་སློབ་གྲྭར་བསྐྱོད་འདོད།
ངའི།  གཡག་རྒྱབ་ཀྱི་བུ་མོ་ཆུང་ཆུང༌།
མེ་ཏོག་དམར་པོའི་ཚུལ་གྱིས།
ཡིད་དུ་འོང་བའི་འཛུམ་ཆུང་སྦོས་རོགས་ཞུ།
རི་ཞིག   སྦོས་རོགས་ཞུ།

རྩོམ་ཁུངས། ༢༠༠༩ལོའིི་སྦྲང་ཆར་དེབ་དང་པོ།