༢༠༠༩ལོ་བསུ་བ།
ནངས་མོ་དེར།
ཉི་འོད་ནི་ཁྲག་དྲོན་གྱིས་བསྒྲོན་པའི་མཆོད་མེ་ཞིག་དང་འདྲ་བར།
ང་ཚོའི་ཉིན་གཅིག་གི་སྟོང་བསམ་གྱི་བར་སྣང་དང༌།
སུ་ཞིག་གི་སྤོབས་པ་དང་འདྲ་བའི་རི་རབ་ཀྱི་རྩེ་མོ་འདྲེས་མཚམས་ན།
ལོ་གཅིག་གི་ཉི་མ་སུམ་བརྒྱ་དྲུག་ཅུའི།
བསམ་ཡུལ་ལས་འདས་པའི། ལྐོག་གྱུར་མང་བོ་ཞིག་གི
སྒེ་ཆེན་ཡང༌།
འཁྱག་རླུང་གིས་ཅུང་ཙམ་འདར་བཞིན་པའི།
སྨུག་སྤྲིན་སྲབ་མོ་ཞིག་གི་སྐེ་དཀྲིས་ཡང་མོར་བཏེགས་པའི།
༢༠༠༩ལོའི་ཉི་འོད་སྨྲ་དཀའ་བ་དེས་ཕྱེ་བྱུང༌།
ལྔ་ལམ་དུ་ཕྱིན་པའི།
ཤོ་བོ་ཞིག་ལྟར་ཕྱིར་ཡོང་མེད་པའི།
རང་ཅག་གིས་ཉི་མ་སུམ་བརྒྱ་དྲུག་ཅུར་བཀོལ་པའི།
ཁ་སང་དེ་ཡང༌།
དྲོད་ཆེན་པོ་མེད་པའི་ཉི་འོད་དེས་ཁ་གདངས་ཙམ་གྱིས་མིད་སོང༌།
ཁྱོད་ཀྱིས། མཆོང་ལྡིང་གི་གར་ལ་རོལ་བའི།
མེ་ལྕེ་དམར་པོ་ཞིག་དང་འདྲ་བའི་རང་གི་ཁྲག་དྲོན་འཁྱག་ཏུ་མ་འཇུག་དང༌།
ཁྱོད་ཀྱིས། ཨར་འདམ་དང་བྲག་གི་སྲ་མཁྲེགས་རྟོལ་གྱིན་ཡོད་པའི།
འབྱུང་བ་གང་གིས་ཀྱང་མ་གྲུབ་པའི།
རང་གི་སྤོབས་པ་དེ་མདུང་རིང་ཞིག་ལྟར་མཐོ་རུ་ཐོགས་དང༌།
གསང་བའི་དེབ་ཆུང་ཞིག་གི་རྒྱབ་ཤོག་སྔོན་པོ་དང་འདྲ་བའི།
ནམ་མཁའ་འདིའི་འོག་ནས།
ང་ཚོས་འཚོལ་མི་ཐུབ་པ་ཞིག་དང༌། བཙལ་ན་མི་རྙེད་པ་ཅི་ཞིག་ཡོད།
སེམས་ཀྱི་པར་ལ་བཏབ་པའི་རི་ཁ་བ་ཅན།
ལྷ་སྒྲུང་གི་བསླུ་བྲིད་དང་འདྲ་བར།
མཛེས་སྡུག་གི་རྒྱབ་ཤོག་སྔོན་པོ་རྙིང་མི་སྲིད་པའི་ནམ་མཁའ།
དེའི་ཁ་གཏད་ཀྱི།
མ་ཡུམ་གྱི་བརྩེ་བ་དང་འདྲ་བའི།
གཤོང་ས་རེ་རེའི་སྙིང་གར་འཁྱིལ་བའི་མཚེའུ་དང་ལྟེང་ག
ལོ་རྒྱུས་ཀྱི་ཤ་ཁྲག་རླུང་དང་དུས་ཚོད་ཀྱིས་བལྡགས་རྗེས་ཀྱི།
རུས་པ་དཀར་སིང་ངེའི་གངས་རི།
དེ་མིན། ནམ་མཁའི་སྐར་མ་བརྩི་སའི་གཞོང་བ་ལྟ་བུའི་སྤང་ལྗོངས།
ངས། རང་ཉིད་ཀྱི་སེམས་ཁམས་རྒྱུད་ཀྱིན།
ཚེ་ཕྱེད་ཀྱི་མ་ཟིན་པའི་སྒྱུ་འཕྲུལ་ལྟ་བུའི་རྩེ་ར་ནི་དེ་ཡིན་ལ།
ངས། ཐག་རིང་ནས་ཀྱང༌།
རང་གི་སྙིང་ཆུང་གི་འཕར་སྒྲ་ལས་གསལ་བོར་ཐོས་པའང་དེ་ཡིན།
བ་ཆུང་གི་འཛུམ་ཀོང་དང༌།
ཆུང་མའི་མིག་མདངས་ཀྱི་ཟབ་ས་ནས་ཀྱང་རྙེད་དཀའ་བའི།
རི་ཁ་བ་ཅན་ལགས།
ངས་ལྕགས་ཀྱིས་མ་བརྡུངས་ལ།
ཕ་བོང་གིས་མ་བརྩིགས་པའི་ཁྱོད་ཀྱི་སྒོ་གླེགས་འབྱེད་རྒྱུ་ནི།
ལུས་ངག་ཡིད་གསུམ་གཏའ་མར་བཞག་རུང༌།
ཅི་འདྲའི་དཀའ་ཨང༌།
སེམས་ཀྱི་པར་ལ་བཏབ་པའི་རི་ཁ་བ་ཅན་ལགས།
རྩོམ་ཁུངས། ༢༠༠༩ལོའིི་སྦྲང་ཆར་དེབ་གཉིས་པ།