ཁོ་མོ།   རྒྱ་མཚོ་ཞིག་གི་ཕ་རོལ་ན་བག་ལ་ཉལ།

ཁོ་བོར། ཆུ་ཕྲན་ཞིག་གི་ཀུ་ཅོས་སུན་སྣང་སྐྱེལ།

ཁོ་དང་ཁོ་མོ།   ད་དུང་གཟིགས་མོ་བ།

ཚང་མ་རང་གནས་སུ་སྨྲ་ལྕེ་དྲག་ཏུ་འབར་བས།

ཚུལ་འཆོས་ཀྱི་བཞིན་མདངས་ཀྱང་འགྱུར།

སྦས་སྐུང་གི་དུང་སོ་ཡང་ཐོར།

ཁོ་དང་ཁོ་མོ།  ད་དུང་བྱིས་པ་དག

ཧ་ཅང་དགོད་སྤྲོ་བའི་གནས་སུ་ལྷུང༌།

མཚོ་གྲུ་ཆུང་ཆུང་དེས་ཁོ་མོར་ཆུ་ཆེན་གྱི་མངའ་ཐང་གླེང༌།

ཆུ་ཕྲན་གྱ་གྱུ་ཡིས་ཁོ་བོར་བརྩེ་དུང་གི་མཆེད་རྒྱུན་ལབ།

ཁོ་དང་ཁོ་མོ།  ད་དུང་རང་བྱུང་གི་ཡུལ་ལྗོངས་འདི།

ཚང་མས་རང་གནས་སུ་དབྱར་དགུན་སྟོན་དཔྱིད་ལ་ཉན་བཞིན།

ཐོབ་ཤོར་ལ་ངོས་ཟིན་ཉུང་ཞིང༌།

སྐྱ་རེངས་ལ་དུང་ཞེན་དབུལ།

ཁོ་དང་ཁོ་མོ། ད་དུང་མདུན་ཕྱོགས་ཀྱི་ལམ་བུ་དེ།

ཧ་ཅང་རིང་ཡང་རིང་ལ།  ཐུང་ཡང་ཐུང༌།

༢༠༠༢ལོའི་ཟླ༩པའི་ཚེས༢ལ་རྨ་ཆུ་ནས།

རྩོམ་ཁུངས། རྨ་ཆུའི་སྙན་ངག