གཟའ་སྤེན་པའི་མཚན་མོར་ཁྱོད་ཀྱིས་གློ་བུར་དུ་ང་རང་དྲན

ངས་ཅི་ནས་ཀྱང་ཁྱོད་རང་དྲན་ཐབས་མ་བྱུང  སྐབས་ལ་ལར

ངས་འཇིག་རྟེན་གྱི་ཕྱི་ནང་ཡོད་ཚད་ལ་བསམ་བློ་གཏོང་བཞིན་ཡོད

ངས་རི་རབ་ཀྱི་དབུ་འཕང་ཡོད་དགུ་ལ་རྒྱང་བལྟ་བྱེད་བཞིན་ཡོད

ངས་འདས་སོང་བའི་སྤྲང་བོ་གང་ཞིག་ཡིད་ནས་སྒོམ་གྱིན

ས་གཞི་འདིའི་ཕང་བར་གཉིད་ཟིན་པའི    བུ་ཕྲུག་ཚོ

ཡང་ཡང་དྲན་བཞིན   དྲན་པའི་ཕྱི་རོལ་ཏུ

ལོ་ཟླའི་གྲུ་ཟུར་ནས་གཏན་དུ་བོར་ཟིན་པའི

ས་ཆེན་གྱི་རྨ་ཁ་དང་མ་འོངས་པའི་ཚ་བོ་དག

ཡིད་ཀྱིས་མྱངས་ནས་སེམས་ཀྱིས་སྒྲིག་གིན་ཡོད

མཚམས་ལན་རེར   ང་གཉིད་ཟིན་པའི་བྱིས་པ་ནང་བཞིན

ལོ་ཟླའི་ཧྲག་བར་ནས་རང་ཉིད་དང་རིང་དུ་གྱེས་པའི

རང་ཉིད་ཀྱི་བསམ་བློའི་ནང་རོལ་ན་འཚོ་བཞིན་ཡོད

ང་ལ་སེམས་པ་ཕྱེས་ཤིང   སེམས་པའི་སྒོ་ར་བསྒྲིགས་ཟིན་པའི

དུས་གསུམ་གྱི་ལམ་པ་ཚོ་ལགས   ས་ཆེན་གྱི་རྨ་ཁ་ཁྱོད་ཀྱིས་ཕྱེས་ཆོག་ལ

རྨ་ཁའི་ནང་རོལ་གྱི་བཞུད་ལམ་རིང་མོའི་དཀའ་སྡུག་ཀྱང

ཁྱོད་ཀྱིས་སེལ་ཆོག་ཆོག་གི་དུས་སྐབས་གང་རུང་ལ

ཁྱོད་ཀྱིས་ཤེས་མེད་ཚོར་མེད་དུ

ཁོ་བོའི་བྲང་གཞུང་ལ་ཁད་ཀྱིས་ནག་ནོག་གི་རོལ་དབྱངས་འབྲི་བཞིན

ཉམ་ཐག་པའི་མི་ཚོ་བསྐྱུར་ནས་སོང

ཀྱེ  ཐག་རིང་ཐག་རིང་ནས་ང་རང་དྲན་ཡང་མ་དྲན

ང་དྲན་ཚེ་ཕ་ཡུལ་གྱི་ལྗོན་ཤིང་སྐམ་འགྲོ་ལ

ང་དྲན་ཚེ  ལོ་ཟླ་འདིའི་ཆུ་རྒྱུན་ཆད་འགྲོ

ད་དུང   ང་དྲན་ཚེ་ཁོར་ཡུག་གི་མི་ཚོགས་འདི་ཚོ

ཉེན་ཟོན་དང་བྲལ་ནས་ས་གཞི་འདིའི་ཕང་བར་གཉིད་འགྲོ

ལོ་དུས་འདི་འདྲ་ལ  ང་རང་དྲན་མཁན་ཚོ་ལོ་ཟླ་འདིའི་ལྷག་མར་གྱུར་ནས་ཡོད་ལ

ལོ་དུས་འདི་འདྲ་ལ   ང་རང་གླེང་མཁན་ཚོ་སྙིང་ཉེ་བའི་ཨ་མ་འཚོལ་མཁན་ཡིན

ཨ་མ་དྲན་ཚེ་ཁྱོད་ཀྱིས་ང་རང་དྲན་སྲིད་ཅིང

ང་རང་དྲན་ཚེ་ཁྱོད་ཀྱིས་ཅི་ཡང་བསམ་མི་སྲིད

ཁྱོད་ཀྱིས་བཤད་ན་རླུང་ནང་དུ་ང་རང་ཧ་ཅང་དྲན་སླ་ཟེར

ང་ཡི་སྣང་ངོར་མེ་ནང་ནས་ཁྱོད་རང་ཧ་ཅང་འཚོལ་དཀའ

དྲང་མོར་བཤད་ན་སྤུ་གྲི་ལྟ་བུའི་ལ་ཁ་འཚོལ་ཞོར

མེ་རི་ལྟ་བུའི་བཞུད་ལམ་སྙེག་མཁན་ང་གཅིག་པུ་ཡིན

ལོ་འདི་ཚོར་ང་ཚོར་ཧམ་སེམས་དང་འགུལ་བསྐྱོད་འཐོར་གྱིན་འདུག

མིག་ཆུ་དང་རྔུལ་ཆུ་སྐམ་བཞིན་འདུག

ཉམས་ཉེ་བའི་ལས་དབང་གི་གྲོང་ཚོ་མང་པོ་རྨང་ནས་འགྱེལ་རྗེས

མེས་པོ་ཚོའི་ཞལ་གདམས་ཁ་ཤས་བསྐྱོར་ནས  མི་རབས་འདིས

དབྱར་དགུན་མེད་པའི་ལྗང་མདོག་གི་ཕ་ས་ཞིག་ནམ་ཡང་དྲན་བཞིན་འདུག

ལོ་འདི་ཚོར   ང་ཚོའི་ཁོར་ཡུག་གི་རི་ཆུ་རྒས་ཏེ

སྐྱ་ཤུར་ཤུར་གྱི་གདོང་པགས་ཐལ་བཞིན་འདུག་ལ

གཉེན་ཉེ་དང་གྲོགས་པོ་ཚོའི་ཡོང་འབབ་སྡུག་ཏུ་ཕྱིན་ཏེ

རང་ཁྱིམ་གྱི་གོ་ར་ཡངས་པོའང་སྲུང་ཐུབ་ཀྱིན་མི་འདུག

དེས་ན་ཁྱོད་ཀྱང་ཐག་རིང་གི་ལ་མོ་བརྒལ་ཏེ

འུ་ཅག་ཐུན་མོང་གི་ཕ་ས་གྲུ་བཞི་བསྙེག་གིན་ཤོག་དང

འདས་པའི་རི་རབ་ཀྱི་ཁོང་གསེང་ཉུལ་བཞིན་ཤོག་དང

ངས་ནམ་ཡང་འུ་ཅག་ཐུན་མོང་གི་མཚེར་ས་བཟུང་ཡོད་ལགས

རྩོམ་ཁུངས། ༢༠༠༧ལོའི་གངས་རྒྱན་མེ་ཏོག