༡
    སྙན་ངག་ནི་དྭངས་ཤིང་གཙང་བའི་རྫ་ཆབ་བསིལ་མ་ཞིག་སྟེ་ནེའུ་གསིང་གི་མེ་ཏོག་ཚལ་དུ་ལྷུང་ལྷུང་གིས་བཞུར་ཞིང་།ར་རིའི་དྲི་མ་མཐའ་དག་སེལ་བར་བྱེད།སྙན་ངག་ནི་ཨ་མའི་ལྷག་བསམ་ལས་འཁྲུངས་པའི་མར་ལོ་སྟེ།དུང་ལྟར་དཀར་བའི་འོ་མའི་ཉིང་བཅུད་ལས་ཉམས་པ་མེད་པའི་འཚོ་བའི་རོ་བཅུད་ཅིག་ཇི་དགར་མྱང་།སྙན་ངག་ནི་གཞོམས་གཞིག་བྲལ་བའི་ཚེ་སྲོག་གི་སྒྲ་དབྱངས་ཏེ་དུས་རབས་ཀྱི་འགྱུར་ཁུགས་དང་ལོ་རྒྱུས་ཀྱི་དབྱངས་རྟ་འབུས་པའི་ཞོགས་པའི་ཅོང་སྒྲ་སྟེ་ལྷིང་ལྷིང་གིས་རྒྱུ་བར་བྱེད།སྙན་ངག་ནི་རྟོགས་སད་ཀྱི་ཉི་གཞོན་སྟེ་གསེར་གྱི་འོད་ཞགས་ཀྱིས་མིའི་རིགས་ཀྱི་མདུན་ལམ་གསལ་བར་བྱེད་ཅིང་།རྨོངས་མུན་གྱི་འཇིག་རྟེན་གཞོམ་པར་བྱེད།སྙན་ངག་གི་སླད་དུ་འཚོ་བའི་མི་ཞིག་ལ་མཚོན་ན་འཚོ་བའི་འབྲི་མར་གྱི་བསུང་ཞིམ་འཐུལ་ཞིང་ཚེ་སྲོག་གི་གསོན་ཤུགས་རྒྱས་པའི་སྙན་ངག་གཅིག་འཐོབ་ཚེ་ཁོའི་འཇིག་རྟེན་ལ་དྲོད་ཁོལ་རྒྱས་ཤིང་ཁོའི་མདུན་ལམ་ལ་དྲགས་ཤུགས་རྒྱས་སྲིད།དེ་ནི་སྙན་ངག་ལས་འཕྲོས་པའི་ཡུལ་ལྗོངས་ཤིག་གི་དྭངས་ཤ་ལ་རོལ་བས་ཡིན།དེ་བས།སྙན་ངག་གི་ཞིང་ཁམས་འདིར་སྟག་ཤར་ཚོ་གཡུལ་དུ་ཆས་པའི་དཔའ་སྙིང་གི་ངར་སྐད་བཞིན་ཕ་རོལ་ཟིལ་གྱིས་ནིན་པའི་རྔམ་ཤུགས་ལྡན་ལ།སྨན་ཤར་ཚོ་གནས་ལ་འགྲོ་བའི་སྨྲེང་ཤ་བཞིན་ཕ་རོལ་བའི་སེམས་པ་བརླན་པའི་མིག་ཆུའང་འདྲེན།སྙན་ངག་ནི་དཔྱིད་ཀྱི་འགྱུར་ཁུགས་འཁྱེར་བའི་ཁུ་བྱུག་སྟེ་དུས་ཚིགས་ནེམ་མོ་ཞིག་གི་བཞུར་སྒྲ་ལས་མེ་ཏོག་གི་འཇིག་རྟེན་བསུ་ཞིང་དྭངས་ཤ་འབུས་པའི་ཆུ་ཕྲན་ཞིག་གི་བརྩེ་བ་ཐོས།སྙན་ངག་ནི་རྒྱལ་ཁམས་འགྲིམས་པའི་སྦྲང་པོ་ཞིག་གི་མྱོང་བ་སྟེ་མྱང་མི་ཚར་བའི་འཇིག་རྟེན་ཞིག་གི་མངར་སྐྱུར་ཁ་བའི་བྲོ་བ་ཡིན་ལ་རོལ་བཞིན་པའི་ཟད་དུ་མེད་པའི་ཞིང་ཁམས་ཤིག་གི་རང་མདངས་མཐོང་ཐུབ།
                                   ༢
      འཚོ་བའི་རྫ་རི་ནི་སྙན་ངག་གི་མཆོད་ཡོན་འབྱུང་སའི་གཞི་སྟེ་དེ་ལས་སྒྱུ་འཕྲུལ་གྱི་སྨུག་སྤྲིན་ལྷོད་ཀྱིས་འཕུར་ཞིང་ཚེ་སྲོག་གི་བསིལ་རླུང་དལ་གྱིས་ལྡིང་།སྙན་ངག་ནི་འཚོ་བའི་གཅེས་ཕྲུག་སྟེ་ཨ་མའི་བྱམས་བརྩེའི་འཛུམ་ཆུང་ལས་སྙན་ངག་གི་རྣམ་ཤེས་ཐོག་མར་འབུས་ཤིང་བྱམས་དང་བརྩེ་བའི་གཞས་ཆུང་ངང་གིས་རྒྱས།སྙན་ངག་གི་ཁྱེའུ་ལ་དེ་ལྟར་མེ་ཏོག་གི་ལང་ཚོ་རྒྱས་དུས་འཇིག་རྟེན་འདི་དོ་མི་མཉམ་པའི་བདེ་སྡུག་དང་སྐྱོ་གདུང་།ཐ་ན་སྙེག་མ་བཞིན་བཞུར་བའི་ནད་ཡམས་འདིས་སྙན་ངག་ནི་རྒྱལ་སྲས་ཡིན་ལ་ཁོས་དྲང་བདེན་གྱི་ཆེད་དུ་ཁྲག་དམར་བསུ་བ་ནི་རལ་གྲི་ཡི་འཕྲུལ་འཁོར་བསྐོར་ནུས་ལ་ཁོས་ཕུགས་འདུན་གྱི་སླད་དུ་མི་ཡི་ཡིད་དབང་བསྒྱུར་བའི་མིག་ཆུ་ཡི་རོལ་དབྱངས་སྦྲེངས་ནུས།མིའི་རིགས་ཀྱི་རང་བྱུང་འཚོ་བའི་ཚ་རླབས་མེད་ན་སྙན་ངག་གི་དབྱར་གཞུང་ལ་ལྟ་ན་སྡུག་པའི་གསོན་ཤུགས་ཇི་ལྟར་རྒྱས།མིའི་རིགས་ཀྱི་རང་བྱུང་འཚོ་བའི་གཟུགས་རིས་མེད་ན་སྙན་ངག་གི་འཚོལ་ཞིབ་དང་གསར་གཏོད་ཀྱི་པར་གཞི་གང་ནས་རྙེད།དེ་བས།སྙན་ངག་ནི་འཚོ་བའི་འཛུམ་རས་ལས་མངོན་པའི་ཚོན་མདངས་ཡིན་པས།འཚོ་བས་སྙན་ངག་ལ་མཛེས་ཤིང་ཡིད་དུ་འོང་བའི་སྣུམ་ཚོན་སྤྲས་ཡོད།རྒྱ་ཆེ་བའི་འཚོ་བ་འདིའི་སྣང་བརྙན་དང་འགུལ་བསྐྱོད་མེད་ན་རྩ་ཆེ་བའི་སྙན་ངག་གི་རྟོག་འཆར་དང་རིན་ཐང་གང་ནས་འཚོལ།དེ་བས།སྙན་ངག་ནི་འཚོ་བའི་འཛུམ་མདངས་སྟེ་སྙན་ངག་གི་སྒྱུ་འཕྲུལ་གྱི་ཉ་མོ་འཚོ་བའི་ཆབ་ལས་ལས་རྩེན་ཞིང་སྙན་ང་གི་རིན་ཐང་ཆེ་བའི་ནོར་བུ་ཡང་འཚོ་བའི་གླིང་ནས་ལེན་དགོས།ཀྱེ་སྙན་ངག་པ་ལགས།ཁྱེད་ཀྱི་སྙན་ངག་གི་ཆུ་རྒྱུན་དྲགས་པོ་ཡུར་བར་འདྲེན་ན་ཐོག་མར་འཚོ་བའི་ལ་ལུང་ནས་འབབ་པའི་སླད་མེད་པའི་སྐད་ཆའི་དྭངས་གཙང་གི་ཆུ་ཕྲན་མང་པོ་སྣེ་ཁྲིད་བྱེད་དགོས་ལ།འཆར་ཡན་གྱི་ལམ་ནས་བརྩེ་དུང་དང་སྒྱུ་རྩལ་གྱི་འབབ་རྒྱུན་རྐ་རུ་འདྲེན་དགོས།དེ་ལྟར་བྱས་ན་སྙན་ངག་གསར་གཏོད་ཀྱི་ས་བོན་རྡོག་པོ་ལ་འཚོ་བའི་དྲི་བསུང་འཐུལ་བའི་རོ་མངར་སྔོན་མོ་ནས་བཞིན་སྨིན་ཞིང་།སྒྱུ་རྩལ་དང་བརྩེ་དུང་གིས་ཕྱུག་པའི་སྙེ་མ་ཆུ་བོའི་རླབས་བཞིན་འཕྱུར་ལ།ད་དུང་ཟོལ་མེད་བདེན་ཚིག་གི་འབྲས་བུ་ལ་རྩ་བ་བརྟན་པོ་ཚུགས་ཐུབ།དེ་བས།འཚོ་བ་ནི་སྙན་ངག་ལ་རིན་ཐང་སྩོལ་བའི་བང་མཛོད་མོད་པོ་ཡིན་པས།ང་ཚོས་སྙན་ངག་ལ་མེད་དུ་མི་རུང་བའི་སྲོག་རྩ་འཚོ་བ་ཡིན་ཞེས་བཤད་ཆོག་ལ།རང་བྱུང་གི་འཚོ་བ་མེད་ན་སྙན་ངག་ལ་བླ་སྲོག་མེད་ཅེས་བཤད་ཀྱང་ཆོག
                                          ༣
             སྙན་ངག་གི་བརྩེ་སེམས་ནི་ལྷད་ཀྱིས་མ་གོས་པའི་ཨ་མའི་སྙིང་ཁོང་ནས་བུ་ལ་གྱེར་བའི་དུང་སྣང་གི་གླུ་ཆུང་ཡིན་ལ།དགའ་སྐྱོའི་སྣང་བ་འདྲེན་པའི་དབྱངས་ཅན་མའི་ཕྱག་སོར་གཡོ་བའི་རོལ་མོ་ཡིན།སྙན་ངག་གི་ནེའུ་གསེང་ནེམ་མོ་ལ་དུང་སེམས་མེ་ཏོག་གི་འཛུམ་མདངས་མེད་ན་གཡུ་སྦྲང་གིས་གླུ་ཆུང་ལེན་ཞིང་ཕྱེ་ལབ་ཀྱི་བྲོ་གར་རྩེན་པའི་མཛེས་རིས་གསོན་པོ་དེ་ཇི་ལྟར་མངོན།སྙན་ངག་གི་ཆུ་ཕྲན་དྭངས་མོར་བརྩེ་སེམས་བཞུར་བའི་རོལ་བ་མེད་ན་ལྷུང་ལྷུང་གི་གླུ་ཆུང་ལེན་པའི་སྙན་ཆ་དང་རླབས་ཀྱི་མེ་ཏོག་འཛུམ་པའི་སྣང་བརྙན་སྐྱིད་པོ་དེ་གང་ནས་འོང་།བརྩེ་སེམས་ནི་སྙན་ངག་པ་སྐྱིད་སྡུག་རྒུན་ཆང་གིས་བཟི་བའི་གླུ་ཆུང་གི་མིག་ཆུ་ཡིན།  ཆགས་སྡང་གི་ངར་ཁ་འཕེལ་བའི་སེམས་ཁམས་ལས་བཞུར་བའི་དྭངས་བསལ་གྱི་གཙང་བོ་ཡིན།སྙན་ངག་ལ་དུངས་སེམས་སྦར་བའི་དྲོད་སྣང་མེད་ན་མི་ཡུལ་འདིར་དཔྱིད་ཀྱི་དཔའ་ཡོན་འདྲེན་མི་ནུས་ལ།  སྙན་ངག་ལ་མེ་ལྟར་འཕྱོ་བའི་བརྩེ་སེམས་མེད་ན་གཤིས་ངན་བརླང་བོར་བསྐྱོད་པའི་དུག་ཚེར་གྱི་ཚང་ཚིང་ཇི་ལྟར་བསྲེགས།དེ་བས་སྙན་ངག་ནི་སྙན་ངག་པའི་དུང་སེམས་ལས་ནམ་ཡང་མནོན་མི་ཐུབ་པའི་འགུལ་ཤུགས་ཡིན་ལ།སྙན་ངག་པའི་ཚེ་སྲོག་ལས་ནམ་ཡང་བཞུར་མི་ཚར་བའི་ཁྲག་དྲོན་ཡིན།སྙན་ངག་པ་ནི་བརྩེ་སེམས་ཀྱིས་དུལ་ཞིང་དུང་སྣང་གིས་དགོད་དགོས་ལ།དུངས་སྣང་གི་ཀློང་ནས་མདུན་བསྐྱོད་ཀྱི་སྒོ་མོ་སིལ་བུར་གཏོར་བའི་སྤོབས་པ་ཡི་གོ་ཆ་ལུས་ལ་གྱོན་དགོས།བརྩེ་དུང་ནི་སྙན་ངག་གི་འཆི་མེད་ཚེ་ཡི་རིལ་བུ་ཡིན་ལ།མཁའ་རུ་འཕུར་བའི་གཤོག་ཟུང་དང་།གཟིམ་པར་བྲལ་བའི་འོད་སྣང་།ད་དུང་དགའ་སྐྱོའི་སྣང་བ་ཁད་ཀྱིས་འདྲེན་པའི་སྙིང་དབུས་ཀྱི་ཟུངས་ཁྲག་གི་གསང་བའང་ཡིན།
                                         ༤
            བསམ་གཞིགས་ནི་ཟད་མཐའ་མེད་པའི་ནམ་མཁའ་ཞིག་སྟེ་སྙན་ངག་གི་མཁའ་དབྱིངས་འདིར་ཀློག་པ་པོ་ནི་གཤོག་ཟུང་ཐོགས་པའི་འདབ་ཆགས་བཞིན་རང་དབང་གི་མཐའ་དབྱིངས་དེར་འཕུར་ཞིང་རང་མོས་ཀྱི་འཇིག་རྟེན་དེར་དགྱེ་དགར་རོལ་དགོས་ན།དེ་རུ་ཚིག་སྦྱོར་གྱི་སྤྲིན་དཀར་ལྷོད་ཀྱིས་འཕྱོ་ཞིང་སྒྱུ་རྩལ་གྱི་འཇའ་ཚོན་གུར་དུ་ཕུབ་ན།སྙན་ངག་ནི་ལྟ་ན་སྡུག་པའི་རང་བྱུང་གི་མཚར་སྡུག་སྟེ་མི་ཡི་ཚོར་སྣང་གི་ཞིང་བཀོད་དྭངས་མ་ཡིན།གལ་ཏེ་སྙན་ངག་ནི་ཡི་གར་ཡོང་བའི་མེ་ཏོག་ཞིག་ཡིན་ཚེ།དེ་ལ་གཞན་ལས་ལྷག་པའི་ཚོར་སྣང་གི་བསུང་ཞིམ་དང་སྒྱུ་རྩལ་གྱི་ཁ་དོག་ཅིག་ཅིས་ཀྱང་དགོས།དེ་ལྟར་མིན་ཚེ་ཀློག་པ་པོ་མང་པོ་ཞིག་གི་འདུ་ཤེས་ཀྱི་བུང་བ་འཁོར་མི་སྲིད།གལ་ཏེ་ཁྱེད་ཀྱི་སྙན་ངག་ནི་ཕུགས་བསམ་གྱི་མཁའ་དབྱིངས་འཚོལ་བའི་བྱ་རྒོད་ཅིག་ཡིན་ཚེ།ཆར་རླུང་ཐོད་ལ་ལེན་པའི་སྙིང་སྟོབས་དང་ཨ་སྔོན་གོས་སུ་གྱོན་པའི་སྤོབས་པ།ད་དུང་ཚ་གྲང་ཞལ་དུ་འགམ་པའི་ངར་ཤུགས་ཅིག་ཅིས་ཀྱང་དགོས།དེ་ལྟར་མིན་ཚེ་ས་ཆེན་འདིའི་རྒྱ་ཁྱོན་རེ་རེ་ཇི་ལྟར་འཇལ།དེ་བས་སྙན་ངག་པས་རང་ཉིད་ཀྱི་འབར་བཞིན་པའི་སྙན་ངག་གི་མེ་ལྕེ་ལ་ཚོར་འདུའི་རླུང་ཤུགས་ཀྱིས་རབ་བཏེགས་བྱས་ན་སྙན་ངག་ནི་སྙན་ངག་པའི་ནང་སེམས་ནས་འཕྱུར་པའི་མེ་རླབས་དམར་པོ་ཞིག་ཡིན་སྲིད།ཡང་ཞིག་བཤད་ན་སྙན་ངག་ནི་སྙན་ངག་པའི་བློ་གྲོས་ལས་ལྟེམས་པའི་ཁྱེའུ་སྟེ་དེ་ལ་ལྷད་ཀྱིས་གོས་པའི་རྫ་རྫུའི་ཡ་ཡོག་ཡོད་མི་རུང་ལ།སྙན་ངག་ནི་ཀློག་པ་པོའི་སྤྲོ་སེམས་གསོ་བའི་བདུད་རྩི་སྟེ་དེ་ལ་གཞན་ཡིད་འགུག་པའི་རོ་མཆོག་གི་མངར་ཁ་དགོས།མདོར་ན་སྙན་ངག་ནི་སྙན་ངག་པའི་བཅོས་མ་མིན་པའི་སྙིང་ཁོང་ནས་འཕྱོ་བའི་ཟུངས་ཁྲག་གི་ཁ་དོག་དམར་པོ་དེ་ཡིན་སྲིད།
                                        ༥
          སྙན་ངག་གི་ཚོར་འདུའི་རླུང་བུ་ཇི་ལྟར་ཤུགས་ཆེ་ན་ཀློག་པ་པོའི་ཡིད་མྱོང་གི་ལྗོན་པར་དེ་ལྟར་་གཡོ་འགུལ་ཐེབས་སྲིད།ཚོར་འདུའི་དབང་གིས་སྙན་ངག་ལས་དགོད་པའི་མིག་ཆུ་འབྱུང་ཐུབ་ལ་ངུ་བའི་གད་མོའང་འདྲེན་ཐུབ།དེ་བས་ཚོར་འདུ་ནི་ཀློག་པ་པོའི་སེམས་ཁམས་དབང་དུ་བསྒྱུར་བའི་རྨི་ལམ་གྱི་ཞིང་བཀོད་ཡིན།སྙན་ངག་པ་ཞིག་ལ་མཚོན་ན་མི་ཚེའི་སྐྱོ་གྲོགས་སྙན་ངག་ལ་བཅོལ་བའི་ཕྱི་ཐག་དང་ཆགས་སྡང་གི་མེ་ལྕེ་ཤུགས་ཀྱིས་སྦར་བའི་འཚོལ་སྙེག་ཅིག་དགོས།འདི་ལྟར་སྙན་ངག་གི་རོལ་དབྱངས་སམ་འོད་སྣང་ནམ་ཡང་ཀློག་པ་པོའི་མཁའ་དབྱིངས་ནས་འབར་དགོས་ལ།ད་དུང་ཚོར་འདུའི་ཆར་སྤྲིན་སྟུག་པོ་སྙན་ངག་གི་མཁའ་མཐར་འཁྲིགས་ན།གྱ་གྱུར་འཁྱུགས་པའི་གློག་ཞགས་ཀྱི་ཡིད་འགྱུར་དང་།  ལྡིར་ལྡིར་གྲགས་པའི་གཡུ་འབྲུག་གི་ངར་སྐད།ཤག་ཤག་བྱོ་བའི་སྦྲང་ཆར་གྱི་འཕྲིན་ལས་སོགས་ཅིས་ཀྱང་དགོས།དེ་ལས་རྒྱ་ཆེ་བའི་ཀློག་མཁན་དག་གིས་དུས་ཚིགས་ཤིག་གི་མགོ་ཐོག་ན་སྨིན་པའི་དཔྱིད་ཀྱི་འབོད་པ་ཐོས་སྲིད་ལ་འཚོ་བའི་འཁྱགས་རླུང་ལས་ཀྱང་ཚེ་སྲོག་གི་སྨྱུ་གུ་འབུས་ཏེ་གཡུ་ཡི་མཛེས་ལྗོངས་སུ་འགྱུར་སྲིད།དེ་བས་སྙན་ངག་ནི་དགའ་སྐྱིད་ཀྱི་ཆང་ཁ་ནས་འཕུར་བའི་འགྱུར་ཁུགས་བཞིན་ན་ཟླ་ཚོའི་བཟི་སྣང་ན་འཕྱོ་བའི་བརྩེ་སེམས་ཀྱི་འགྱུར་ཁུགས་ཡིན།
སྙན་ངག་ནི་རང་སེམས་གསོ་བའི་གླུ་ཆུང་བཞིན་སྐྱོ་སྨྲེང་ལམ་ལམ་དུ་བཞུར་བའི་མིག་ཆུས་མེ་ལྕེ་དམར་པོའི་དྲོད་སྣང་ཞིག་བསྐྲུན་དགོས།སྙན་ངག་ནི་སྙན་ངག་པས་ཡང་ཡང་བརྡར་བའི་དཔའ་སྙིང་གི་རལ་གྲི་ཡིན་ལ།ཀློག་པ་པོས་ཡང་ཡང་བསྟེན་དགོས་པའི་འཆི་མེད་ཚེ་ཡི་རིལ་བུ་ཡིབན།གལ་ཏེ་ནམ་མཁའ་དྭངས་ཤ་འབུས་པའི་བར་སྣང་སྙན་ངག་ཡིན་ཚེ་ས་གཞིའི་འབྱོར་ཕྱུག་གཙང་མའི་འཕེལ་ཁ་ཡང་སྙན་ངག་ཡིན།སྙན་ངག་པས་སྣང་སྲིད་འཁོར་འདུས་ཀྱི་མཐོང་སྣང་ཁྱད་པར་བའི་འཇིག་རྟེན་ལ་ཚོར་སྣང་གི་ཚོན་མདངས་ཕུལ་ཏེ་སྙན་ངག་གི་ཞིང་བཀོད་བཟོ་དགོས།
                                                   ༦
             གལ་ཏེ།སྙན་ངག་ནི་བག་གསར་ཞིག་ཡིན་ཚེ་དེ་ལ་རིན་ཆེན་གསེར་ལས་གྲུབ་པའི་མི་རིགས་དེའི་སྐད་ཆའི་མགུལ་རྒྱུན་དང་།གོམས་གཤིས་གཙང་བའི་དྲོད་འཇམ་གྱི་ཚར་གོས་དང་།འཚོ་བའི་སྣང་བརྙན་གྱི་ཉིང་བཅུད་སྡོམ་པའི་སྐ་རགས་སོགས་ཅིས་ཀྱང་དགོས།འདི་ལྟར་སྙན་ངག་གི་སྲས་མོར་ཕོ་བརྒྱའི་སྣང་བ་འཁྲུལ་བའི་ཟུར་མིག་གི་ཆོ་འཕྲུལ་དང་འཇིག་རྟེན་གཞོམས་པར་བྱེད་པའི་ཉམས་འགྱུར་གྱི་སྒེག་པ་ཞིག་ངེས་པར་དུ་ཡོད་དགོས།མི་རིགས་ཀྱི་སྙན་ངག་ཞིག་ཡིན་ན་མི་རིགས་དེ་ཉིད་ཀྱི་ཤ་རུས་སུ་འཐིམས་པའི་འདུ་ཤེས་ཁྱེར་སྟངས་དང་གོམས་གཤིས་རེ་རེ་ཀློག་པ་པོར་རྩིས་སྤྲོད་བྱེད་དགོས།ད་དུང་མི་རིགས་དེའི་གཅེས་ལང་ལ་ཤོར་བའི་བསམ་བློའི་འཁྱེར་ཕྱོགས་ལ་གཉོར་སྐྱོང་གང་ལེགས་བྱེད་དགོས་ལ།  རིགས་མཐུན་ཚོར་བཅིངས་པའི་བརྩེ་སེམས་ཀྱི་གདངས་དབྱངས་རེ་རེ་ཡང་མི་རིགས་དེའི་བདེ་སྡུག་འཚོལ་བའི་འབོད་པ་ཡིན་དགོས།སྙན་ངག་ནི་མི་རིགས་ཤིག་གི་ཤེས་རིགས་ལས་བལྟམས་པའི་གཅེས་ཕྲུག་ཡིན་པས་འདི་ལ་ཤ་རུས་གཙང་མའི་བརྩེ་དུང་དང་རང་རིགས་དྭངས་མོའི་སྤྱོད་ལམ་ངེས་པར་སྲུང་དགོས་ལ།མི་རིགས་འདིའི་སྲོལ་རྒྱུན་གྱི་རྩེད་ཆས་རེ་རེ་ལ་བག་ཆགས་ཟབ་མོ་འཇོག་དགོས།དེ་ལྟར་མིན་ཚེ་ནམ་ཞིག་ཁྱེད་ཀྱི་སྙན་ངག་ནི་རང་གི་མི་རིགས་འདིའི་ནང་སེམས་ཀྱི་མཛེས་དཔྱོད་ལས་རིང་དུ་གྱེས་ཏེ་མཐར་རང་གི་མི་རིགས་ལ་བཅིངས་པའི་དུངས་སེམས་ཀྱི་ཆུ་རྒྱུན་རང་ཤུགས་ཀྱིས་སྐམ་འགྲོ།གྲོགས་པོ་ལགས།   ཁྱེད་ཀྱིས་འོ་མའི་དྭངས་གཙང་ཤེས་སམ།    ཆུ་དང་ཁྲག་འདྲེས་ཚེ་དེ་ལ་ཁ ་དོག་དང་བྲོ་བ་གང་འདྲ་ཞིག་བྱུང་ངམ།  དེ་བས་སྙན་ངག་གི་འོ་མ་དྭངས་མོ་ཉམས་སུ་བཞེས་ན་འོ་མ་ནི་ནམ་ཡང་འོ་མ་ཡིན་པའི་གནས་ལུགས་དེ་ཤེས་དགོས།
                                                     ༧
                 སྐད་ཆ་ནི་མི་རེ་རེའི་མགྲིན་པའི་སྐྱེད་ཚལ་ན་རྩེན་པའི་འདབ་ཆགས་ཀྱི་དབྱངས་སྙན་གསོན་པོ་ཞིག་ཡིན།འོན་ཀྱང་སྙན་ངག་ནི་དབྱངས་སྙན་གསོན་པོའི་ཁྲོད་ཀྱི་དྲོད་ཀྱིས་འཁྱིལ་བའི་ཟུངས་ཁྲག་ཡིན།སྙན་ངག་གི་འབྱུང་ཁུངས་ནི་དབྱངས་ཀྱི་འཁྱུད་པའི་བརྩེ་བ་ཡིན་པས་ང་ཚོ་སུ་ལ་ཡང་དབྱངས་ཀྱི་འབྱོར་བར་རོལ་བའི་སྙན་ངག་རེ་ཡོད་ཆོག རྫི་མོའི་མིག་ཟུང་གིས་སྐད་ཆ་བཤད་པའང་སྙན་ངག་ཡིན།ཨ་མའི་གྱེར་བའི་ཡིག་དྲུག་གི་དབྱངས་རྟ་ཡང་སྙན་ངག་ཡིན།
བྱིས་པའི་ངུ་སྔངས་ཀྱི་བརྩེ་དུང་ཡང་སྙན་ངག་ཡིན།དེ་བས་ཡངས་པའི་འཇིག་རྟེན་འདི་སྙན་ངག་གི་ཞིང་བཀོད་ཅིག་ཡིན་པས་ཇི་འདྲའི་སྤྲོ་ཨང་།ཡང་ན་ཇི་འདྲའི་སྡུག་ཨང་།སྙན་ངག་གི་ཞིང་བཀོད་འདིར་སྙན་ངག་གི་ཆེས་དཀོན་པའི་སྐད་ཆའི་གསེར་གྱི་གའུ་ཞིག་འདི་ལྟར་སྐད་ཆའི་ས་རྡོ་བརྡར་བ་ལས་ཐོན་ཞིང་བརྩེ་དུང་དང་ཡིད་འགྱུར་གྱི་སྲེག་སྦྱང་ལས་འཁྲུངས།གལ་ཏེ་སྙན་ངག་གི་སྐད་ཆ་ནི་སྨྲ་ཤེས་པའི་དུང་གི་ནེ་ཙོ་ཞིག་ཡིན་ཚེ།དེར་རྡུལ་ཕྲན་རེ་རེ་ལྷོད་ཀྱིས་འགྲིག་ཅིང་སྨྲ་སྒོ་དྭངས་མོ་ཡངས་ཤིང་གསལ་བ།བརྩེ་སེམས་དབྱངས་སྙན་ངག་གིས་ཐོན་པ་ཞིག་མིན་ན་སྒྱུ་རྩལ་གྱི་གླུ་ལེན་ག་ལ་ཐུབ།དེ་བས་སྙན་ངག་པས་ནམ་ཡང་འཚོ་བའི་རབ་གསལ་བརྒལ་ནས་སྙན་ངག་གི་ཆུ་རྒྱུན་དྭངས་མོ་འཚོལ་དགོས་ལ།སྐད་ཆའི་ནགས་ཀླུང་ཕྱུག་མོ་ནས་ཙན་དན་ལྗོན་པའི་བསུང་ཞིམ་འཐུ་དགོས།ད་དུང་སྤྱི་ཚོགས་འཚོ་བའི་ཁྱིམ་གཞི་ནས་དགའ་སྐྱོའི་དབྱངས་ཀྱི་འགྱུར་རྟ་སྙེག་དགོས།སྙན་ངག་གི་སྐད་ཆ་ནི་མི་རིགས་དེའི་མཐོང་སྣང་ན་གཟི་འོད་ལམ་ལམ་འཕྲོ་བའི་གསེར་རྡོག་ཅིག་སྟེ།དེ་ལ་ཟངས་རག་གང་རུང་གི་ལྷད་སྐྱོན་འགས་མི་རུང།དེ་བས་སྙན་ངག་དང་སྙན་ངག་གི་སྐད་ཆ་ནི་མི་རིགས་དེའི་འདུ་ཤེས་ཀྱི་རྟ་རྒོད་ལ་ཁ་ལོ་བསྒྱུར་བྱེད་ཀྱི་སྲབ་སྐྱོགས་ཡིན་པས། རླུང་གཤོག་ཐོགས་པ་ལྟ་བུའི་ཉམས་མེད་པའི་སྤོབས་སེམས་དེ་མཐའ་ཡངས་པའི་ཐང་ཆེན་གྱི་རྒྱ་ཁྱོན་ལ་སྐུལ་འོས།
                                                                      ༨
                སྙན་ངག་གི་གསར་གཏོད་ནི་དུ་ཆང་གིས་བཟི་བའི་ཁ་སྟོང་གི་འཁྲུལ་སྣང་མིན་ལ།འདོད་ལྡན་གྱི་རྨི་ལམ་འགྲིམ་པའི་ཞིང་བཀོད་ཀྱང་མིན།གཞན་གྱི་བཟོས་པའི་ལམ་བུར་འཕུར་ཡང་གསར་གཏོད་མིན་ལ།རང་མལ་དྲོད་པོ་ནས་འཕག་འཚག་གི་ང་རོ་སྒྲོག་པ་ཡང་གསར་གཏོད་མིན།རེད་དེ།གསར་གཏོད་མེད་ན་སྙན་ངག་གི་གོམ་པ་སྤོ་མི་སྲིད།སྙན་ངག་པ་ལགས།སྙན་ངག་གི་མིག་ཟུང་མགྲོན་དུ་འབོད་ན་ཐོག་མར་སེམས་ཁོང་གི་མོས་འདུན་ཕྱོགས་སུ་བཀྲམ་ནས་བརྩེ་བ་ཡི་རླབས་སྒྲའི་འགྱུར་ཁུགས་རོལ་ལ་འདྲེན་དགོས།དེ་བས་སྙན་ངག་གི་རྒྱལ་ཁམས་འདིར་རིག་པའི་བློ་གྲོས་སྦྱངས།འཚོ་བར་བྱི་དོར་བྱས་ན་སྙན་ངག་གི་སྙིང་ཁོང་ལ་རོལ་དགོས།གལ་ཏེ།ཁྱེད་ཀྱི་སེམས་ཁོང་ན་དུང་སེམས་ཀྱི་གངས་རི་མཁའ་རུ་འགྲེང་བའི་ཟིལ་ཤུགས་མེད་ན་ལྷུང་ལྷུང་གི་སྙན་པ་གྱེར་བའི་ཆུ་རྒྱུན་དྭངས་མོ་འདི་གང་ནས་བརྡོལ།གལ་ཏེ།ཁྱེད་ཀྱིས་འཚོ་བའི་དྲང་བདེན་ལ་གཟས་པའི་མཐེབ་རྩལ་གྱིས་མདའ་མོ་སྐྱེན་པོ་སྦྱང་མེད་ན།འཇིག་རྟེན་རྒྱལ་ཕམ་གྱི་ཀློང་དུ་རིས་སུ་འཛིན་པའི་ཁྲོ་ཆུའི་ཕ་བོང་དེ་ཇི་ལྟར་གཏོར།དེ་བས་དགའ་སྐྱོ་ཟུང་འབྲེལ་གྱི་འཚོ་བའི་སྣང་བརྙན་འདི་མ་ཚར་བར་དུ་སྙན་ངག་གི་ཚེ་སྲོག་འཚོ་ཐུབ་ལ། སྙན་ངག་ནི་སྙན་ངག་པའི་ཚེ་སྲོག་གིས་བཞེངས་བསྐྲུན་བགྱིས་པའི་ཁྲག་གི་ཐམ་ཀ་ཡིན་པས།སྙན་ངག་འབྲི་རྒྱུ་ནི་དེ་འདྲའི་ལས་སླ་བོ་ཞིག་མ་ཡིན།གལ་ཏེ་རང་གི་བསམ་གཞིགས་མེ་ལ་སྦར་བའི་ན་ཟུག་གི་ཚོར་བ་དང་།མིག་ཆུ་འོད་དུ་མཐོང་བའི་མཛེས་སྡུག་གི་དུངས་པ་སོགས་དོར་ཏེ་སྙན་ངག་བྲིས་ཚེ།  དེ་ནི་ནམ་ཡང་དོན་དམ་གྱི་སྙན་ངག་ཞིག་མ་ཡིན།སྙན་ངག་གི་དུས་རབས་འགྲིམ་པའི་ཀློག་པ་པོ་མེད་ན་སྙན་ངག་པའི་བསམ་བློ་གསར་བའི་རིན་ཐང་རྙེད་མི་སྲིད།དེ་བས་སྙན་ངག་པས་དུང་སྣང་གི་གསེར་ཟམ་སྟེང་ནས་ཡིད་ཀྱི་བརྩེ་དུང་ཀློག་པ་པོར་སྟོན་དགོས་ཤིང་།གསང་བའི་སྙིང་གཏམ་ཡང་ཀློག་པ་པོར་བཤད་དགོས་ལ།སྙན་ངག་གི་གཟིམས་པ་མེད་པའི་སྒྲོན་མེ་ཀློག་པ་པོའི་ཞིང་ཁམས་ལ་སྦར་དགོས།ད་དུང་སྙན་ངག་གི་གསར་གཏོད་ཀྱང་ཀློག་པ་པོའི་ཆེད་དུ་བྱེད་དགོས།ཀྱེ་སྙན་ངག་པ་ལགས།ཀློག་པ་པོའི་ཆེད་དུ་ང་ཚོས་མཚན་ཉིད་རིག་པ་བཞིན་ཡལ་བ་མེད་པའི་སྙན་ངག་གི་ཉི་མ་ཞིག་མི་ཡུལ་འདིར་འདྲེན་དགོས།

རྩོམ་ཁུངས། སེང་རྡོར་དྲ་བ།