སྐད་དང་ཡི་གེ་ནི་མི་རིགས་ཤིག་གི་སྲོག་རྩ་དང་།སྐད་དང་ཡི་གེ་འཇིགས་ཡོང་ན་མི་རིགས་ཟེར་བ་མིང་གི་ལྷག་མར་འགྱུར་འགྲོ་བ།སྐད་དང་ཡི་གེ་ནི་མི་རིགས་རིག་གནས་ཀྱི་རྩ་བ་བརྟན་ཞིང་རྩེ་མོ་རྒྱས་པའི་བླ་མེད་ཀྱི་ཆ་རྐྱེན་ཨང་དང་བོ་ཡིན་ཟེར་བ་དང་། མི་རིགས་ཞིག་ཡིན་པ་ལ་ཐུན་མོང་མ་ཡིན་པའི་ཁྱད་ཆོས་དེ་དགོས་པ་དང་།གལ་ཏེ་ཁྱད་ཆོས་དེ་མེད་སོང་ན་མི་རིགས་ཟེར་བ་དེའང་ངོས་འཛིན་ཐབས་མེད་ཅེས་རིག་གཞུང་རང་བཞིན་གྱི་སྐད་ཆ་རེ་བཤད་ན་འགྱིང་འདུག་པའི་བོད་ཀྱི་སློབ་གྲྭ་ཆེན་མོའི་དགེ་རྒན་དག་དང་།བོད་རིག་པའི་ཟབ་ས་ནས་འཚོ་ཞིང་གནས་པའི་ཆེད་མཁས་ཚོས་བོད་ཀྱི་སྐད་དང་ཡི་གེ་ལ་བླ་བཙོངས་པ་འདྲ། མི་སུས་ཀྱང་བཙོངས་པ་མེད། ཁོ་ཚོས་ཅི་ཞིག་ལ་དམིགས་པ་ཉམ་ཆུང་བའི་ང་ཚོས་ཧ་གོ་ཐབས་མེད་པ་ནི་ཁོ་ཚོར་སྐད་ཆ་བཤད་པའི་གོ་སྐབས་ཅི་ཡོད་ལ་བརྟེན་ནས་བོད་ཀྱི་སྐད་དང་ཡི་གེའི་གལ་ཆེའི་རང་བཞིན་བཤད་དེ་སློབ་མ་དང་། ལྷན་སྐྱེས་ཀྱི་རང་རྒྱུད་དྲང་བའི་སྐྱེས་བོ་རྣམས་ལ་སྐད་ཅིག་ཏུ་ལ་རྒྱའི་སེམས་སྟོབས་སྐྱེ་རུ་བཅུག་ཀྱང་རང་ཉིད་ཕམ་ཁ་དང་མི་ཁའི་སྡུག་བསྔལ་དང་བཙན་འཛུལ་ལ་སྐྲག་ནས་སྐད་ཡིག་རིག་གནས་དེ་དགོས་དབང་གི་ཆེད་མི་ལ་མགོ་སྐོར་གཏོང་བྱེད་དང་རང་ཉིད་གཅིག་བུའི་འཚོ་བ་སྣུམ་པོ་འོང་བྱེད་ཀྱི་ཐབས་ལས་ཅི་ཡང་མེད།
    དེ་ལས་ང་ཚོས་བོད་ཀྱི་སློབ་གྲྭ་ཆེན་མོའི་དགེ་རྒན་དང་། བོད་ཀྱི་མཁས་པ་ཚོའི་ལས་ཀ་ལས་སྟངས་དང་བྱ་བ་སྒྲུབ་ཚུལ་ལ་བལྟས་ན་ཁོ་ཚོས་ནང་མི་རིགས་ཤིག་གིས་རང་གི་སྐད་དང་ཡི་གེ་བསླབ་པ་ནི་ཀུན་གྱི་གཙོ་བོ་དང་ཐོག་མར་ཡིན་པ་བཤད་མོད།ལྐོག་ཏུ་རང་ཉིད་ཀྱི་ཤ་ལས་སྐྱེས་པའི་བུ་དང་བུ་མོ་མ་ཟད་ཐ་ན་ཉེ་དུ་ཚོའི་བྱིས་པ་དག་ཀྱང་རྒྱ་ཁོག་གི་སློབ་གྲྭ་བཟང་བོ་དག་ལ་བསྐྱལ་དང་སྐྱེལ་བཞིན་ཡོད་པ་རེད།
ཆུ་འགོ་ནས་སྙོག་ན་མཇུག་ནས་དྭངས་མི་སྲིད་ཟེར་བའི་དཔེ་ལྟར་བོད་སྐད་ཡིག་གིས་སློབ་ཁྲིད་གནང་ཁམས་རྣམས་དང་། བོད་ཡིག་གིས་བརྩམས་ཆོས་རྩོམ་པའི་མཁས་པ་ཚོ།  ལོ་མང་ལ་བོད་ཡིག་གི་ལ་རྒྱ་བཤད་མཁན། ཐ་ན་བོད་ཡིག་གི་ཞིབ་འཇུག་སློབ་མའི་ཐོབ་ཐང་ཡོད་ལ་བོད་སྐད་ཡིག་གིས་ཟ་མ་ཟ་བའི་ལས་བྱེད་མི་ཉུང་བ་ཞིག་གིས་རང་གི་བུ་ཕྲུག་དག་ལ་ཆུང་དུས་ནས་རྒྱ་སྐད་བསླབས་པ་དང་སྒོར་མང་བོས་འགྲོ་སོང་བཏང་སྟེ་ཆ་རྐྱེན་ཆེས་བཟང་བའི་རྒྱ་ཡིག་སློབ་གྲྭར་འགྲོ་ཐུབ་པའི་རེ་བ་ཆེན་པོ་བཅངས་ཡོད་པ་མ་ཟད། ཁོ་ཚོས་ངོས་འཛིན་དུ་བྱིས་པར་བོད་ཡིག་བསླབ་ཏུ་འཇུག་པ་ནི་བྱིས་པའི་འོད་སྟོང་ལྡན་པའི་མདུན་ལམ་ལ་གནོད་པ་ཚབས་ཆེན་དུ་བརྩིས་ཡོད། ངོས་འཛིན་འདི་ལྟ་བུ་རྒྱ་ཆེའི་དམངས་ཚོགས་ཀྱི་ཁྲོད་དུའང་ཁྱབ་ནས་ཡོད།ངོས་འཛིན་འདི་འགོ་པ་ཚོས་འཚོགས་ཐོག་ནས་སྐད་བཤད་བྱེད་དང་།འོག་གི་དམངས་ཕལ་བ་ཚོ་ལ་བོད་སྐད་ཡིག་བསླབ་ན་མདུན་ལམ་མེད་པའི་སྒྲུབ་བྱེད་དུ་འདྲེན་གྱིན་ཡོད།
      ད་ལྟ་ང་ཚོས་དངོས་སུ་ཁས་ལེན་དགོས་པ་ཞིག་ནི་མིག་སྔར་ཕྱི་རྐྱེན་མང་བོ་ཞིག་གིས་བོད་ཡིག་བསླབ་ན་མདུན་ལམ་མེད་པ་འདྲ་བ་བཟོས་འདུག་མོད། ཕྱི་རྐྱེན་དེ་གདུག་རྩུབ་ཆེ་ལ་སྤོབས་སྟོབས་ལྡན་པ་ནི་ང་ཚོ་རང་ཉིད་ཀྱི་ངོས་ནས་ཡོང་གིས་མེད་པས་རེད། སྔོན་ཆད་དགེ་རྒན་ཞིག་གིས་ང་ལ་ང་ཚོ་ཧ་ཅང་སྐྲག་ས་ནི་ཕྱི་ནད་མ་ཡིན་པར་ཁོག་ནད་ཡིན་ཟེར་བ་དེས་ད་ལྟ་ང་ཚོས་བོད་ཡིག་ལ་བཟུང་བའི་གནས་བབ་དེ་མཚོན་མེད་དམ།  གནས་བབ་འདི་ལོ་རྒྱུས་ཀྱི་ངོས་ནས་བཤད་ན་ཧ་ཅང་ངོ་ཚ་ཞིག་ཡིན་མོད། དེ་ལྟའི་བོད་མི་ཚོ་ལ་ཐ་ན་ངོ་ཚ་བའི་སྙིང་སྟོབས་ཀྱང་མེད་པ་འདྲ། འཚོ་གནས་གནས་ལུགས་ཀྱི་ཆོས་ཉིད་གོ་ལྡོག་པའི་ང་ཚོ་མུ་མཐུད་དུ་ནོར་འཁྲུལ་གྱི་ལམ་ནས་ཕྱིར་ལོག་མ་ཤེས་ན་སའི་གོ་ལའི་རྩེ་མོའི་བོད་ཅེས་པའི་མི་རིགས་འདི་ལ་མཇུག་མཐའི་རྫོགས་ཚིག་འབྲི་མཁན་ཕྱི་ནས་ཡོང་བའི་དུག་འབུ་ཞིག་མ་ཡིན་པར་ནང་གི་ནད་འབུ་ཞིག་ཡིན་པ་ངོས་འཛིན་ཤེས་པ་གལ་ཆེའོ།།

རྩོམ་ཁུངས། མི་གསལ།