ང་ཕ་ཡུལ་དང་ཁ་བྲལ་ནས་ལོ་ངོ་བཅུ་བཞི་ལྷག་འགྲོ་གི་འདུག  ལོ་ངོ་བཅུ་གྲངས་འདིའི་རིང་ལ་རྒྱུན་དུ་སེམས་ལ་དྲན་པ་དང་འཁོར་བ་ནི།  རང་གི་ཕ་མ་དང་སྤུན་མཆེད། ཆུང་དུས་ཀྱི་རྩེད་གྲོགས་བཅས་རེད། ང་ཚོར་ཡིག་ཐོག་གི་འབྲེལ་བ་མ་གཏོགས་ཐུག་འཕྲད་ཀྱི་གོ་སྐབས་མེད། ཐུག་འཕྲད་ཀྱི་གོ་སྐབས་ཤིག་ཡོང་ན་བསམ་པ་དེ་ངའི་རྨི་ལམ་ཡིན། རྨི་ལམ་དེ་ལ་སྣེ་གཉིས་ཡོད་ཅིང་སྣེ་གཅིག་ཏུ་ངའི་ནང་མི་དང་སྣེ་གཞན་དུ་ང་ཡོད་། ངའི་རྨི་ལམ་དེ་དུས་ནམ་ཞིག་ལ་མངོན་འགྱུར་ཐུབ་མིན་ངས་ཀྱང་བཤད་དཀའ།
   བོད་ཀྱི་སྐུ་གཤེགས་རྩོམ་པ་པོ་མདའ་ཚན་པ་མགོན་པོ་ཚེ་རིང་གིས་ལོ་ངོ་གསུམ་ཙམ་གྱི་གོང་དུ་། ངའི་ཕ་རྒན་སུ་ཡིན་ཞེས་ང་ལ་སྐད་ཆ་དྲིས་མྱོང་། རྒྱུ་མཚན། ངའི་ཕ་རྒན་གྱིས་དགེ་རྒན་བྱས་མྱོང་སའི་བྲག་དམར་སློབ་ཆུང་དུ་འདས་པོ་ཁོང་གིས་ཀྱང་དེ་སྔོན་དགེ་རྒན་བྱས་མྱོང་འདུག ཡིན་ན་ཡང་། ངའི་ཕ་རྒན་དང་ཁོང་གཉིས་དགེ་གྲོགས་རེད་མི་འདུག   ལོ་ངོ་བཅོ་ལྔ་འདིའི་ནང་དུ་། ངའི་ཕ་རྒན་ནི་བོད་ཡིག་དགེ་རྒན་ཞིག་ནས་སློབ་གྲྭའི་སློབ་སྤྱི། སློབ་སྤྱི་ནས་ལས་འཁྱུར་ངལ་གསོ་བ། ལས་འཁྱུར་ངལ་གསོ་བ་ནས་ལག་ཏུ་ཕྲེང་བ་འཛིན་མཁན་གྱི་རྒད་པོ་ཞིག་ཆགས་ནས་འདུག ཕ་རྒན་དང་མཉམ་དུ་ག་དུས་གླེང་མོལ་བྱས་ན་ཡང་། རྟག་དུ་ང་ལ་འདྲི་བ་ནི་ "ཁྱོད་ག་དུས་ཕ་ཡུལ་དུ་ཡོང་ཐུབ་རྒྱུ་རེད་དམ། ཁྱིམ་མི་ཚང་མས་ཁྱོད་ལ་སྒུག་ནས་ཡོད་ནི་རེད་།" ཟེར་བ་འདི་རེད་། ངས་ཕ་ཡུལ་དུ་ཁ་པར་གཏོང་ཐེངས་རེར། ངའི་སེམས་སུ་ཡང་ཕ་རྒན་གྱིས་སྐད་ཆ་དེ་བསྐྱར་དུ་འདྲི་གི་རེད་བསམ་པ་དྲན་གི་ཡོད་།
   ངའི་ཕ་རྒན་ནི་བྱིས་བ་ཚོའི་མིག་ལམ་དུ་སྨྲ་བ་ཉུང་ཞིང་གདོང་ལ་འཛུམས་མདངས་མང་པོ་མེད་མཁན་ཞིག་ཡིན། ད་དུང་ཁོང་ཁྲོ་ལངས་སླ་བ་དང་བསམ་གཞིགས་མང་པོ་གཏོང་མཁན་ཞིག་ཀྱང་ཡིན། ང་ཚོའི་ཁྱིམ་དུ་སྤུན་སྲིང་དྲུག་ཡོད་ཅིང་གལ་སྲིད་ང་ཚོ་གཅིག་གིས་ནོར་འཁྲུལ་འདྲ་ཤོར་ཚེ། ཕ་རྒན་གྱིས་བཀའ་བཀྱོན་གཏོང་གི་རེད་། ཡང་མིན་ན་ཅི་ཡང་མི་སྨྲ་བར་ངོ་གདོང་གནག་ནས་འདུག་གི་རེད་། ཁོང་གིས་ཁྱིམ་ཚང་གི་གནད་དོན་རྐྱང་རྐྱང་བཀའ་མོལ་གནང་བ་མ་གཏོགས་ང་ཚོ་སྒེར་གྱི་མཉམ་དུ་ལྷོད་ལྷོད་བྱས་ནས་བཀའ་མོལ་གནང་སྲོལ་མེད་། དཔེར་ན།  ང་བོད་དུ་ཡོད་དུས་ངས་ཕ་རྒན་དང་ལྷན་དུ་གླེང་མོལ་དུས་ཚོད་གཅིག་ལྷག་བྱས་པའང་དྲན་གི་མི་འདུག ཡིན་ན་ཡང་། ང་ཕྱི་ལ་ཐོན་རྗེས། ངེད་གཉིས་ཀྱི་བར་ལ་གླེང་མོལ་བྱེད་རྒྱུ་མང་དུ་ཕྱིན། གལ་སྲིད་ངས་ཟླ་གཅིག་ལྷག་རིང་ཕ་ཡུལ་དུ་ཁ་པར་མ་བཏང་ཚེ། ཁོང་གིས་ཕུ་བོ་གཉིས་ཀྱི་གང་རུང་ལ་སྐད་བཞག་ནས་ཕ་ཡུལ་དུ་ཁ་པར་ཐོངས་ཟེར་གི་རེད་། ཕལ་ཆེར་ང་ཚོ་ཆུང་ཆུང་ཡིན་དུས་ཁོང་གིས་གླེང་མོལ་མང་པོ་མི་བྱེད་པ་ནི། ང་ཚོ་གཅུན་པའི་སླད་དུ་ཡིན་པ་འདྲ།
   ང་རང་ཆུང་ཆུང་ཡིན་དུས་ཕ་རྒན་གྱི་འདས་དོན་དག་ལ་ཉན་པར་སྤྲོ། ཁོང་གིས་སོ་སོའི་འདས་དོན་རྣམས་མང་པོ་མི་གླེང་མོད་། རེ་གཉིས་གླེང་བ་དེ་ཚོ་ད་ལྟ་ཡང་ངའི་སེམས་སུ་གསལ་ལྷེང་ངེར་འདུག ཁོང་གིས་ང་ཚོ་སྤུན་སྲིང་རྣམས་ལ་བསླབ་བྱ་རྒྱག་དུས་ཁོང་གི་འདས་དོན་དག་གླེང་གི་རེད་། "ང་ཁྱེད་ཚོ་ནང་བཞིན་སློབ་གྲྭར་འགྲོ་བའི་གོ་སྐབས་ཡག་པོ་ཞིག་འཐོབ་ཡོད་ཚེ། ང་མཁས་པ་ཞིག་ཆགས་ཡོད་། ཁྱེད་ཚོར་ཁྱིམ་གྱི་བཀག་འགོག་སོགས་སྣ་གཅིག་མེད་པར་སློབ་གྲྭར་སྐྱེལ། ད་དུང་སློབ་སྦྱོང་མ་གཏོགས་ཅི་ཡང་བྱེད་མི་དགོས་ཞེས་ཕ་མ་གཉིས་ཀྱིས་རེ་བ་བྱེད་བཞིན་པ་འདི་ཁྱེད་ཚོའི་བསོད་ནམས་རེད་།" ཁོང་གིས་བསླབ་བྱ་འདི་ང་ཚོར་ཐེངས་མང་ལ་བརྒྱབ་མྱོང་།
   ངའི་ཕ་རྒན་སློབ་གྲྭར་འགྲོ་བའི་གོ་སྐབས་ཡག་པོ་ཐོབ་མེད་། ཁོང་གིས་གང་ཤེས་བ་དེ་གཙོ་བོ་རང་སྦྱོང་ལ་བརྟེན་པ་རེད་། ཁོང་ལོ་ན་བཅོ་བརྒྱད་ལ་སླེབས་དུས་ཁོང་ལ་ངའི་ཨ་མ་མནའ་མར་བླངས་འདུག དེ་དུས་ངའི་ཨ་མ་ལོ་ན་བཅུ་གསུམ་རེད་ཟེར། ཁོང་གིས་ཁྱིམ་མི་སུ་གང་ལ་ཡང་མ་ལབ་པར་རྨ་ལྷོ་ཟློས་གར་ཚོགས་པར་རྒྱུགས་སྤྲད་འདུག རྒྱུགས་ཀྱང་འཕྲོད་འདུག ཡིན་ན་ཡང་། ཨ་མྱེས་དང་ཨ་ཡེ་གཉིས་ཀྱིས་ཁོང་བཏང་མི་འདུག ཨ་མྱེས་ཀྱིས་ཁོང་ཁྱིམ་ལ་ཉར་ནས་མགར་བསླབས་འདུག ངའི་ཨ་མྱེས་མགར་བ་ཞིག་ཡིན། རེབ་གོང་ཁུལ་གྱི་ཡུལ་མི་དག་གིས་ཁོང་ལ་དོར་ཉིན་མགར་བ་ཟེར་ནས་འབོད་། ངའི་ཕ་རྒན་གྱིས་མགར་ལས་སྦྱང་ཞོར་དུ་། ཐོན་སྐྱེད་རུ་ཁག་གི་ར་རྫི་དང་ལུག་རྫི་བྱས་འདུག བསྐྱར་དུ་། ཁོང་གིས་རྨ་ལྷོ་མི་རིགས་དགེ་ཐོན་སློབ་གྲྭར་རྒྱུགས་སྤྲད་འདུག རྒྱུགས་འཕྲོད་འདུག སློབ་གྲྭས་ཁོང་ལ་སློབ་ཞུགས་མ་བྱས་སྔོན་ལ་གཟུགས་པོའི་འཕྲོད་བསྟེན་ལ་བརྟག་དཔྱད་བྱེད་དུ་ཡོང་དགོས་བའི་བརྡ་འབྱོར་བཏང་འདུག ཨ་མྱེས་ཀྱིས་དེ་ཤེས་འདུག སློབ་གྲྭར་སོང་ནས་ "ང་ཚོའི་ཁྱིམ་དུ་བུ་གཅིག་མ་གཏོགས་མེད་། ཁོང་ལ་མནའ་མ་ཡང་བླངས་ཚར་ཡོད་། ཁོང་སློབ་ཞུགས་བྱེད་རྒྱུའི་འདོད་པ་ང་ཚོར་མེད་" ཟེར་ནས་སློབ་གྲྭའི་འགོ་འཁྲིད་ལ་ཞུས་འདུག ཕ་རྒན་གྱིས་སེམས་སུ་ཡང་མི་ཚེ་འདིར་སློབ་གྲྭར་འགྲོ་བའི་རེ་ཐག་ཆད་སོང་བསམ་ནས་གྲོང་གསེབ་ཀྱི་དམངས་སྒྲུབ་དགེ་རྒན་བྱས་འདུག དམངས་སྒྲུབ་དགེ་རྒན་གྱི་ཞོར་ནས། ཁོང་ལ་ཉ་ལུང་གོང་ཧྲེ་ཟེར་བ་དེའི་ཚོང་ཁང་དང་རྒྱང་བསྒྲགས་ཀྱི་ལས་ཀ་རག་འདུག ལོ་འགའི་རྗེས་སུ་དམངས་ཁྲོད་ནས་ལས་བྱེད་བསྡུ་བའི་བརྡ་ཐོ་ཞིག་འབྱོར་འདུག  ཁོང་སྡོད་མ་ཚུགས་ནས་དེ་ལ་ཚོད་ལྟ་བྱས་འདུག དེ་ལ་ཚུད་འདུག སྟབས་ཡག་ནས་ཨ་མྱེས་དང་ཨ་ཡེ་གཉིས་ཀྱིས་ཀྱང་ཁོང་བཀག་མི་འདུག
   ང་ཚོ་བུ་སྤུན་གསུམ་ཆུང་ངུའི་དུས་ནས་ཕ་རྒན་གྱིས་འཁྲིད་དེ་མ་ལྷོ་སོག་རྫོང་ན་ཡོད་པའི་བྲག་དམར་སློབ་ཆུང་དུ་ཕྱིན། ངའི་ཕ་རྒན་གྱིས་དེ་རུ་བོད་ཡིག་གི་དགེ་རྒན་བྱས། ང་ཚོ་སྤུན་གསུམ་གྱིས་ཀྱང་དེ་རུ་སློབ་སྦྱོང་བྱས། ངའི་སྤུན་ཆེ་བ་གཉིས་ཀྱིས་སློབ་ཆུང་དང་སློབ་འབྲིང་གཉིས་ཀ་དེ་མ་ལྷོ་སོག་རྫོང་དུ་འགྲིམས། ངས་ཀྱང་སློབ་ཆུང་དེ་རུ་འགྲིམས། ང་ཚོར་ཟ་མ་སྐོལ་བ་དང་ང་ཚོའི་གོན་པ་བཀྲུ་བ། ཁྱིམ་ལ་གཙང་སྦྲ་བྱེད་པ། ང་ཚོའི་རང་སྦྱོང་ལ་བལྟ་བ་སོགས་ཀྱི་འགན་འཁྲི་ཚང་མ་ཕ་རྒན་གྱི་ཕྲག་ལ་ལྷུང་། ང་ཚོ་སྐྱེས་སའི་རེབ་གོང་གི་གྲོང་གསེབ་དུ་ཁྱིམ་གྱི་ཟོག་ལུག་ལ་བལྟ་སྐྱོང་དང་ཞིང་ལས་ཀྱི་འགན་འཁྲི་ཚང་མ་ཨ་མས་འཁུར་དགོས་བྱུང་། ང་ཚོ་བྱིས་བ་རྣམས་ཀྱི་སློབ་སྦྱོང་དང་མདུན་ལམ་གྱི་ཆེད་དུ་།  ངའི་ཕ་མ་གཉིས་ལོ་ངོ་མང་པོར་དབྱར་གནང་དང་དགུན་གནང་ལ་མ་གཏོགས་མཉམ་དུ་སྡོད་ཁོམ་བྱུང་མི་འདུག རྗེས་སུ་ཕ་རྒན་ལས་འཁྱུར་ངལ་གསོ་བྱས་རྗེས་ད་གཟོད་ཕ་མ་གཉིས་གཞི་ནས་ལྷིང་འཇགས་ངང་མཉམ་དུ་བསྡད་འདུག ད་ལྟ་བསམ་ན་དེ་ནི་ལོ་ངོ་མང་པོའི་རྗེས་སུ་རེད་།
   ངའི་སློབ་ཆུང་ལོ་རིམ་དང་པོ་ནས་ལྔ་བ་དབར་གྱི་བོད་ཡིག་གི་དགེ་རྒན་ཡང་ངའི་ཕ་རྒན་ཡིན། ངའི་ཕ་རྒན་གྱིས་སློབ་འཁྲིད་བྱེད་དུས་སྐད་གདངས་མཐོ། སྐད་གངས་མཐོ་བ་དེས། གཅིག་ནས་ང་ཚོས་ཁོང་གིས་གང་གསུངས་བ་གསལ་བོར་གོ་ཐུབ་པ་དང་གཉིས་ནས་དེ་ང་ཚོའི་དོ་སྣང་གཞན་ལ་མ་གཡེངས་བའི་སླད་དུ་ཡིན་པ་འདྲ།  ཁོང་གིས་སློབ་མ་སུ་ཞིག་གིས་མིང་ཚིག་གི་གོ་དོན་ཚགས་མེད་དུ་འགྲེལ་ཐུབ་པ་དང་སློབ་ཚན་གྱི་བརྗོད་སྙིང་བློ་ལ་ངེས་ཐུབ་ན་དེ་ལ་གཟེངས་བསྟོད་བྱེད་པ་མ་ཟད་། རྒྱུན་དུ་སློབ་ཕྲུག་རེ་གཉིས་གྲལ་འགོར་སྐད་བཏང་ནས་སློབ་ཚན་ཁྲོད་ཀྱི་དུམ་མཚམས་རེ་གཉིས་སློབ་ཕྲུག་གཞན་དག་ལ་འགྲེལ་བཤད་བྱེད་དུ་འཇུག གལ་སྲིད་སློབ་ཕྲུག་དེས་འགྲེལ་བཤད་ཡག་པོ་མ་འཁྱོངས་ཚེ། ཁོང་གིས་བསྐྱར་དུ་སློབ་ཚན་དེ་ཀློག་ནས་འགྲེལ་བཤད་བྱེད་། སློབ་ཕྲུག་ཚོ་མིང་ཚིག་་གང་རུང་གི་ནང་དོན་ལ་བློ་དོགས་བྱུང་ཚེ། ཁོང་གིས་མིང་ཚིག་དེའི་མཆན་འགྲེལ་ནག་པང་དུ་འབྲི་བ་མ་ཟད་། མིང་ཚིག་དེ་ལ་དཔེ་བརྗོད་བཞག་ནས་གོ་དོན་དེ་སློབ་ཕྲུག་ཚོའི་བློ་ལ་ངེས་པར་བྱེད་།  ཁོང་གིས་མིང་ཚིག་བློར་འཛིན་དེ་གཙོ་བོར་མི་འཛིན། མིང་ཚིག་གི་གོ་དོན་དེ་སེམས་ལ་ངེས་རྒྱུ་གཙོ་བོར་འཛིན། ལྷག་པར་དུ་སློབ་ཚན་གྱི་བརྗོད་སྙིང་སེམས་ལ་ངེས་རྒྱུ་དེ་གལ་ཆེ་ཤོས་སུ་བརྩི། འདི་ནི་ཁོང་གི་སློབ་ཁྲིད་བྱེད་ཐབས་གཙོ་བོ་དེ་ཡང་ཡིན།  
   ད་དུང་། ཁོང་གི་ཡིག་གཟུགས་ཧ་ཅང་ཡག དེའི་རྒྱུ་མཚན་གྱིས། བྲག་དམར་སློབ་ཆུང་གི་དུས་ཆེན་དང་མཛད་སྒོ་ཁག་གི་ཡིག་གཟུགས་འབྲི་མཁན་ཁོང་ཡིན།  ཁོང་གི་ཡིག་གཟུགས་དེས་ཀྱང་སློབ་ཕྲུག་ཚོར་བོད་ཡིག་སྦྱངས་འདོད་ཀྱི་སྐུལ་མ་ཐེབས་ཡོད་། སྐབས་དེར་ང་ཚོའི་འཛིན་གྲྭ་དེར་སློབ་གྲྭ་ཁྱོན་ཡོངས་ནས་ཡིག་གཟུགས་ཡག་ཤོས་ཀྱི་སློབ་བུ་གསུམ་བྱུང་ཡོད་། ངས་ཁོང་གིས་ཡིག་གཟུགས་དེ་སུའི་རྩ་ནས་སྦྱངས་བ་ཡིན་ནམ་ཞེས་སྐད་ཆ་དྲིས་མྱོང་། ཁོང་གིས་ལན་དུ་། "ངས་ཡིག་གཟུགས་དེ་དགེ་རྒན་དང་མཁས་བ་དེ་འདྲའི་རྩ་ནས་སྦྱངས་བ་ཅང་མ་རེད་། སྔོན་ཆད་གྲོང་གསེབ་དུ་ཨ་མྱེས་ལ་མགར་ལས་རོགས་བྱེད་དུས་། ཟོར་བ་དང་གྲི་ཤུབས་སོགས་རྡུང་གི་ཡོང་མཁན་ཚོ་རེབ་གོང་གི་གྲོང་གསེབ་འདྲ་མིན་ནས་རེད་། ཁོང་ཚོའི་ཁྲོད་ན་སློབ་གྲྭར་འགྲོ་མྱོང་མཁན་དེ་འདྲ་འདུག  དེ་ཚོར་ཡིག་གཟུགས་སྐོར་ཕར་སྐད་ཆ་དྲིས། ཁོང་ཚོས་གང་ཤེས་བ་དེ་ང་ལ་བྲིས།  ངས་དེ་ཚོད་ལྟ་མང་པོ་བྱས། རིམ་བཞིན་རིམ་བཞིན་ཡག་པོ་ཆགས་པ་དེ་འདྲ་རེད་།" ཞེས་གསུངས། ཁོང་གི་ཡིག་གཟུགས་དང་བོད་ཡིག་འཁྲིད་ཐབས་གཉིས་ལེགས་པའི་རྐྱེན་གྱིས། བྲག་དམར་སློབ་ཆུང་གི་བོད་ཡིག་ཡག་པོ་དང་ཡིག་གཟུགས་ལེགས་པའི་སློབ་བུ་རྣམས་ཁོང་གི་འཛིན་གྲྭ་ནས་ཐོན་ཡོད་། ང་ཡང་དེའི་ཁྲོད་ཀྱི་གཅིག་ཡིན། ཁོང་གིས་ང་ཚོར་། "བོད་ཡིག་སྦྱངས་དུས་དྲེད་མོང་གིས་བྱི་བ་འཛིན་སྟངས་ལྟར་བྱེད་མི་ཉན། ད་ལྟ་གང་སྦྱངས་བ་དེ་མ་འོངས་པར་འཁྱེར་ནས་འགྲོ་རྒྱུ་ཡོད་པ་ཞིག་གལ་ཆེ་" ཞེས་ཡང་ནས་ཡང་དུ་གསུངས་མྱོང་།  
   དེ་ཡང་། ང་སློབ་ཆུང་འཛིན་རིམ་ལྔ་བ་ཡིན་པའི་ཞོགས་པ་ཞིག་ལ།  ཁ་བ་བབས་ནས་སློབ་གྲའི་ཁོར་ཡུག་ཀུན་དཀར་ཐིང་ངེར་བཟོས་འདུག འཛིན་ཁང་གི་ཕྱི་རོལ་ན་ཁ་བ་ལེབ་མོ་ལེབ་མོ་བྱས་ནས་རླུང་གིས་འཁྱེར་བཞིན་འདུག ཞོགས་པའི་རང་སྦྱོང་གི་དྲིལ་བརྡ་བཏང་བ་དང་སློབ་གྲོགས་ཚོ་འཛིན་ཁང་ཏུ་འཛོམས། ང་ཚོ་རང་གི་འདུག་སྟེགས་སུ་བསྡད། ང་ཚོས་རང་སྦྱོང་དགེ་རྒན་ཡོང་བར་སྒུག་བཞིན་ཡོད། སྐར་མ་ལྔ་ལ་སྒུག སྐར་མ་བཅུ་ལ་སྒུག རང་སྦྱོང་དགེ་རྒན་སླེབས་མ་སོང་། སློབ་གྲོགས་འགས་ངའི་གདོང་ལ་བལྟས།  རང་སྦྱོང་དགེ་རྒན་ངའི་ཕ་རྒན་ཡིན། ཞོགས་པ་དེར་ངའི་ཕ་རྒན་གྱིས་ཁྱིམ་ན་ཞོགས་ཟས་ཤིག་སྐོལ་བཞིན་ཡོད། ངས་ཕ་རྒན་རང་སྦྱོར་བལྟ་བར་མི་ཡོང་བ་ཤེས། འོན་ཀྱང་། ངས་འཛིན་གྲྭའི་པན་ཀྲང་དང་སློབ་གྲོགས་ཚོར་མ་ལབ། ངའི་སེམས་སུ་དགའ་སྣང་དང་འཚེར་སྣང་གཉིས་ཀ་སྐྱེས། དགའ་སྣང་ནི་ཕ་རྒན་གྱིས་ཁྱིམ་དུ་ང་ལ་ཞོགས་ཟས་སྐོལ་གི་ཡོད་པས་ཡིན། འཚེར་སྣང་ནི་སློབ་གྲོགས་རྣམས་ལ་ཕ་རྒན་རང་སྦྱོང་ལ་བལྟ་གི་ཡོང་གི་མིན་པ་དེ་ལབ་མ་སྤོབས་པས་ཡིན།
   འཛིན་ཁང་དཀྱིལ་གྱི་ལྕགས་ཐབ་དེའི་ནང་ན་མེ་ལྕེ་དམར་ལྷོག་ལྷོག་ཏུ་འབར་བཞིན་འདུག ཕལ་ཆེར་ལྕགས་ཐབ་ནང་དུ་རིལ་མ་བླུགས་ཡོད་པ་འདྲ། རྒྱུ་མཚན། ཨོང་བ་ལས་རིལ་མ་འབར་ཤུགས་ཆེ། དགུན་ཁར། ང་ཚོའི་འཛིན་ཁང་གི་གསུམ་ཆ་གཅིག་དེར་ཨོང་བ་དང་རིལ་མས་ཁེངས་ནས་ཡོད། ཨོང་བ་རྣམས་བརྩིགས་ནས་ཡོད། རིལ་མ་རྣམས་སྒྱེ་ཁུག་ནང་ལ་བསྡམས་ནས་ཡོད། ལྷག་མ་གསུམ་ཆ་གཉིས་དེ་སློབ་མ་རྣམས་སྡོད་སའི་སྒྲོགས་ཙེ་དང་རྐུབ་སྟེགས་ཡིན། ཅུང་ཙམ་ནས། འཛིན་གྲའི་པན་ཀྲང་གིས། “ན་ར་ལ་ས་དྲག་མཐར་ཏེ།། ད་དེ་ག་ང་བ་མ་འ།།” ཞེས་ཀློག་འདོན་འགོ་བཙུགས་སོང་། ང་ཚོས་ཀྱང་། “ན་ར་ལ་ས་དྲག་མཐར་ཏེ།། ད་དེ་ག་ང་བ་མ་འ།།” ཞེས་པན་ཀྲང་གི་རྗེས་སུ་འབྲངས། སྐར་མ་བཅུ་ཕྱིན། ཉི་ཤུ་ཕྱིན། པན་ཀྲང་གི་སྐད་མགོ་དམའ་རུ་ཕྱིན་སོང་། ང་ཚོའི་སྐད་མགོ་ཡང་དམའ་རུ་ཕྱིན། འཛིན་ཁང་ཁུ་སིམ་མེར་གྱུར། ཕྱི་རོལ་ན་སྔར་བཞིན་ཁ་བ་འབབ་བཞིན་འདུག  ག་ལེར། པན་ཀྲང་རང་གི་འདུག་སྟེགས་ནས་ལངས་སོང་། པན་ཀྲང་འཛིན་ཁང་དཀྱིལ་གྱི་ལྕགས་ཐབ་རྩ་ལ་ཕྱིན་ནས་རང་གི་ལག་པ་མེ་ལ་དྲོ་འགོ་ཚུགས་སོང་། སློབ་གྲོགས་རྣམས་ཀྱང་། གཅིག་རེ་གཉིས་རེ་བྱས་ནས་ལྕགས་ཐབ་རྩ་ལ་བཅར། ང་ཚོས་ལྕགས་ཐབ་ཀྱི་མཐའ་ནས་བསྐོར། ལྕགས་ཐབ་ནང་གི་མེ་ལྕེ་དེའི་འབར་ཤུགས་ལ་བལྟས། སློབ་གྲོགས་གཅིག་གིས། ལྕགས་ཐབ་ཀྱི་ཁ་གཅོད་སྒང་ལ་མར་རྡོག་རྡོག་ཅིག་གཡུགས། སློབ་གྲོགས་གཞན་ཚོས་སོ་སོའི་རུམ་གྱི་ཅོང་རྡོག་བླངས་ནས་མར་ལ་བསྣུན། གཅིག་གིས་བསྣུན། གཉིས་ཀྱིས་བསྣུན། གསུམ་གིས་བསྣུན། མར་རྫོགས་། མར་རྫོགས་ཤུལ་ན་ཅོང་རྡོག་ལྕགས་ཐབ་ངོས་སུ་འབྱར་བ་རྣམས་ཚིགས་བཞིན་འདུག  ཞོགས་པའི་རང་སྦྱོང་གྲོལ་བའི་དྲིལ་བརྡ་བཏང་། སློབ་གྲོགས་ཚོ་ཕྱི་ལོགས་སུ་རྒྱུགས། ཁ་བའི་ནང་དུ་རྩེད་མོ་རྩེ་བར་རྒྱུགས། ང་ཡང་ཕྱི་ལོགས་སུ་རྒྱུགས། རང་གི་ཁྱིམ་ལ་ཞོགས་ཇ་འཐུང་བར་རྒྱུགས། ཕ་རྒན་གྱིས་ཁྱིམ་དུ་ང་ལ་སྒུག་ནས་ཡོད་།
   ངས་མཁས་པ་དང་བླ་མ། དགེ་བའི་བཤེས་གཉེན་ཆེན་མོ་དེ་འདྲའི་ཞབས་ལ་གཏུགས་ནས་བོད་ཡིག་སྦྱངས་མ་མྱོང་། ངས་བོད་ཡིག་འབྲི་ཀློག་རང་རྐྱ་འཕེར་བ་འདི་ཕ་རྒན་གྱི་བཀའ་དྲིན་ལ་བརྟེན་ནས་ཡིན། ཁོང་གིས་ངེད་ཀྱི་རྒྱུད་ལ་བོད་ཡིག་གི་རྨང་གཞི་ཧ་ཅང་ཡག་པོ་ཞིག་བཏིངས་འདུག་སྙམ།  ཚོར་བ་འདི་དེ་རིང་སང་ཉིན་ངའི་སེམས་སུ་ཡང་ནས་ཡང་དུ་སླེབས། ཁོང་གིས་ངའི་བོད་ཡིག་གཙུགས་ཆེན་ལ་འཛིན། གལ་སྲིད་འཛིན་གྲྭའི་ནང་གི་སློབ་བུ་གཅིག་གིས་བོད་ཡིག་རྒྱུགས་འབྲས་ང་ལས་མཐོ་བ་བླངས་ཚེ། ཁོང་གིས་ངེད་ཀྱི་བོད་ཡིག་ཡག་པོ་མི་འདུག་ཟེར་ནས་སྐྱོན་བརྗོད་ཀྱང་བྱེད་། ང་སློབ་ཆུང་འཛིན་རིམ་བཞི་པ་ཡིན་དུས་ང་ཚོས་ལེགས་བཤད་ལྗོན་བཟང་བློར་འཛིན་རྒྱུ་འགོ་ཚུགས། ལོ་རིམ་ལྔ་པའི་དབྱར་གནང་གི་སྐབས་སུ། ཕ་རྒན་གྱིས་ང་ལ་དཀའ་གནད་གསལ་བའི་མེ་ལོང་ཡང་བློར་འཛིན་དུ་བཅུག སྤྱིར་བཏང་བྱས་ན་དཀའ་གནད་གསལ་བའི་མེ་ལོང་དེ་འཛིན་རིམ་དྲུག་པའི་སློབ་ཕྲུག་ཚོས་བློར་འཛིན་གི་ཡོད་།
   ངས་ཆུང་ངུའི་སྐབས་སུ་རང་གི་ཕ་རྒན་མཁས་བ་ཞིག་རེད་ཡང་བསམ་མྱོང་། རྒྱུ་མཚན། ངེད་ཚང་ན་བོད་ཡིག་གི་དཔེ་སྒྲོམ་གཉིས་ཡོད་། དེ་གཉིས་ཀར་སྒོ་ལྕགས་བརྒྱབ་ནས་ཡོད་། ངའི་སེམས་སུ་ཕ་རྒན་གྱིས་དཔེ་སྒྲོམ་དུ་ཡོད་པའི་དེབ་ཆ་ཚང་བཀླགས་པའམ་བྱང་ཆུབ་ཡོད་རེད་དྲན། ཕ་རྒན་གྱིས་ངེད་ཀྱི་ཕུ་བོ་གཉིས་ལ་ཡང་དཔེ་སྒྲོམ་ནང་གི་དཔེ་ཆ་དག་ལ་བལྟ་ཀློག་བྱེད་བཅུག་པ་ངས་མཐོང་མ་མྱོང་། ཡིན་ན་ཡང་། ང་འཛིན་རིམ་ལྔ་བ་ཡིན་དུས་ཕ་རྒན་གྱིས་དཔེ་སྒྲོམ་གྱི་ཁ་ཕྱེས་ནས་ངས་བལྟ་འདོད་པའི་དཔེ་ཆ་ལག་ཏུ་འཇོག་གི་རེད་། ཕ་རྒན་གྱི་བྱེད་སྟངས་དེས་ངའི་སེམས་སུ་དགའ་བ་ཚད་མེད་བསྐྲུན་མྱོང་། ངས་བོད་ཡིག་ལ་བཟུང་བའི་སྤྲོ་སྣང་དེ་ཡང་ཤུགས་ཆེ་རུ་ཕྱིན། དཔེ་སྒྲོམ་ནང་དུ་ཡོད་པའི་དཔེ་ཆ་ཁག་ནས་ངེད་ཀྱི་དྲན་ངོར་ཡོད་པ་དག་ནི། ཆུ་ངོགས་གཏམ་རྒྱུད་དང་གེ་སར་སྒྲུང་གླུ ཐོག་ཁང་དམར་པོའི་རྨི་ལམ། མཚོ་སྔོན་མང་ཚོགས་སྒྱུ་རྩལ། ཐང་སན་བླ་མའི་རྣམ་ཐར། མི་ལ་རས་པའི་རྣམ་ཐར་་སོགས་རེད་། ངའི་ཕ་རྒན་གྱིས་དེབ་དེ་ཚོའི་སྐོར་ལ་འདི་འདྲ་ཞིག་གསུངས། "ང་ཆུང་ཆུང་ཡིན་དུས་ནས་དཔེ་ཆ་ལ་ཧ་ཅང་དགའ། དཔེ་ཆ་ཀློག་མ་ཐུབ་རུང་ལག་ཏུ་བཟུང་ན་ཡང་སེམས་དེ་སྐྱིད་། ང་བྲག་དམར་སློབ་ཆུང་དུ་དགེ་རྒན་ཡིན་དུས་། རྫོང་ཐོག་ན་བོད་ཡིག་གི་དཔེ་ཁང་གཅིག་མ་གཏོགས་མེད་། དཔེ་ཁང་དེ་ལ་ཟླ་བ་བཞི་ལྔ་རེའི་བར་མཚམས་སུ། བོད་ཡིག་གི་དཔེ་ཆ་གསར་བ་གཅིག་རེ་བཙོང་རྒྱུ་ཡོད་། དཔེ་གོང་ཡང་མི་ཆེ། ངས་ཀྱང་དཔེ་ཆ་གསར་བ་ག་དུས་སླེབས་ན་ཉོས། ཉོས་བ་དེ་ཚོ་བོར་བརླགས་སུ་མ་བཏང་བར་དཔེ་སྒྲོམ་ནང་ཉར་བ་ཡིན།"
   ལས་གནས་ཀྱི་ངོ་བོའི་ཐོག་ནས་ངའི་ཕ་རྒན་བོད་ཡིག་དགེ་རྒན་ཞིག་ཡིན་པ་མ་གཏོགས། ཁོང་ལ་ཡོད་པའི་ལྷན་སྐྱེས་ཀྱི་འཇོན་ཐང་དང་རྣམ་དཔྱོད་གཉིས་དེ་ལས་བརྒལ་ནས་ཡོད་། ཁོང་ལ་ཤིང་བཟོ་བ་དང་འཇིམ་བཟོ་བྱེད་པ། འཚེམ་བཟོ་བཅས་ཀྱི་ལག་རྩལ་ཡང་ཡག་པོ་ཡོད་། ང་ཚོ་སྤུན་སྲིང་དྲུག་གི་བོད་ལྭ་དག་ཁོང་གིས་བཙེམས་པ་མ་ཟད་ཨ་ཅེར་མག་པ་ལེན་དུས་ཀྱང་། ཨ་ཅེར་ཡོད་པའི་ཚར་ལྭ་དང་གོས་ལྭ། རས་ལྭ། ཕྲུག་ལྭ་བཅས་ཚང་མ་ཁོང་གིས་འཚེམས་པ་རེད་། ཁོང་གིས་དབྱར་གནང་དགུན་གནང་གི་དུས་ཚོད་དག་བེད་སྤྱོད་བཏང་ནས་ལྭ་བ་དག་བཙེམས་པ་རེད་། དཔེར་ན། ད་ལོའི་དབྱར་གནང་གི་སྐབས་སུ་བཙེམས་མ་ཚར་ན། དེའི་འཕྲོ་དགུན་གནང་གི་སྐབས་སུ་བཙེམ་གི་རེད་།
   ངེད་ཀྱི་ཕ་རྒན་ལས་འཁྱེར་ངལ་གསོ་བྱས་ནས་ཡུན་རིང་སོང་ཞིང་། ཁོང་ལ་ཡོད་པའི་དུས་ཚོད་དག་ཁ་བཏོན་དགེ་སྦྱོར་གྱི་སྒང་ལ་གཏོང་གི་ཡོད་ཟེར། ངས་དྲན་ཐོ་ཐུང་ཐུང་འདིའི་འགོ་མ་བསླངས་སྔོན་དུ་ཕ་རྒན་ལ་ཁ་པར་བཏང་བ་ཡིན། དེ་དུས་། ངའི་ཕ་རྒན་དང་ཨ་མ་གཉིས་ཕུ་བོ་འབྲིང་བ་དང་ལྷན་དུ་ནག་ཆུ་ན་མེ་འཁོར་ལ་བསྡད་དེ་ལྷ་སར་ཟླ་གཉིས་རིང་གི་མཆོད་མཇལ་ལ་འགྲོ་གི་ཡོད་ཟེར། ཁོང་གིས་བསྐྱར་དུ་། "ཁྱོད་ཕ་ཡུལ་དུ་ག་དུས་ལོག་ཐུབ་གི་རེད་དམ་"ཞེས་དྲིས་བྱུང་།

ཟུར་མཆན།
གོང་ཧྲེ། སྤྱི་ཁང་།
པན་ཀྲང་། འཛིན་གྲྭའི་རྒན་བདག
སྤྱི་ལོ་༢༠༡༤ལོའི་ཟླ་གཉིས་པའི་ཚེས་གཉིས་ཉིན་ཨ་རིའི་ནེའུ་ཡོག་ཏུ་མཇུག་གྲུབ།

  (མཆོད་མེ་དྲ་བའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།