སྤྱིར་ཤེས་རྨོངས་ཀྱི་གྲོང་རོང་དུ་བགྲོད་པར་ལུས་ངལ་དང་སེམས་ངལ་ཡོད་པ་ནི་སྨོས་མ་དགོས་ལ། དེ་བཞིན་བོད་ཀྱི་བསམ་བློ་པ་གྲགས་ཅན་སྒོ་ཤེར་ལགས་ཀྱང་ཤེས་རྨོངས་ཀྱི་གྲོག་རོང་དུ་ཁེར་རྐྱང་ངང་བགྲོད་མཁན་ཞིག་ཡིན་པའི་ཆ་ནས་ཁོང་ལ་ཡང་དེ་འབྲེལ་གྱི་དཀའ་ངལ་མང་པོ་ཞིག་ཡོད་རྒྱུ་རེད། ཉིན་ཁ་ཤས་ཀྱི་སྔོན་ལ་དྲ་ལམ་ཁག་ཏུ་རྔ་བ་ཀིརྟི་དགོན་གྱི་༼སྤྱི་ཁྱབ་ནང་བསྟན་ཤེས་ཡོན་འགན་འཛིན་ལྷན་ཚོགས་༽ཟེར་བ་ཞིག་གིས་གྱོད་ཉལ་བྱས་ཏེ་སྒོ་ཤེས་རབ་ལགས་གནས་དབྱུང་ངམ་དགོན་པ་ལས་ཕུད་ཟིན་པའི་ཕྱོགས་ནས་གསར་འགྱུར་མང་པོ་སྤེལ་བཞིན་ཡོད་པ་དང་། དེ་འབྲེལ་སྒོ་ཤེར་ལགས་ཀྱིས་བྲིས་པའི་ཤོག་ལྷེ་བརྒྱད་ཅན་གྱི་རྩོམ་ཡིག་དེ་དང་བསྒྲགས་གཏམ་དེ་གཉིས་ཀྱང་མཉམ་པོར་མཐོང་སོང་། དེའི་སྐབས་སུ་བདག་ལ་སྐྱེས་པའི་ཚོར་བའམ་ཀུན་སློང་ནི། དགོན་པ་དེར་ཡང་ཨུ་ཚུགས་མཁྲེགས་འཛིན་བྱེད་མཁན་ལས་གནས་ལུགས་རྩལ་འདོན་བྱེད་མཁན་ཉུང་ངུ་ཙམ་རེད་བསམ་པའི་ཚོར་བ་ཞིག་ཡིད་ཀྱི་ངོས་ལ་སིམ་སིམ་དུ་འཐིམས་སོང་། དྲན་པའི་ཀློང་ལ་སོབ་སོབ་ཏུ་བྲན་སོང་།དེ་ག་རེ་རེད་ཟེར་ན། སྤྱིར་རྩོམ་ཡིག་གཅིག་སྤེལ་རྒྱུ་དང་། སྐད་ཆ་གཅིག་བཤད་རྒྱུ་སོགས་ལ་དེ་འདྲའི་ཚད་བཀག་དང་། སྡོམ་འཐེན་རང་བཞིན་གྱི་ཁྲིམས་ཤིག་འཇོག་རྒྱུ་ནི་ཤེས་མེད་ཅོལ་ཆུང་གི་ལས་ཀ་ལས་གཞན་ཞིག་ལ་ཁ་གདེངས་རྒྱུ་དང་ལྕེ་བསྲིངས་རྒྱུ་མེད་དོ།།གལ་སྲིད་ཡོད་ཀྱང་། དེ་དག་ལ་རྩོམ་ཡིག་འདི་ནི་ལེགས་སོ།།འདི་ནི་ཉེས་སོ་ཞེས་གདམ་གསེས་བྱ་རྒྱུའི་བློ་གྲོས་ཡོད་པ་སུས་ཤེས་ནུས།སྤྱིར་མཐོ་དམན་དྲག་ཞན་གྱི་མི་སུ་དང་གང་ཡིན་རུང་གནས་ལུགས་དང་། ཆོས་ཀྱི་བདེན་རྩ་ལས་འགལ་བའམ། དེ་དང་མི་མཐུན་པའི་སྐད་ཆ་བཤད་རྒྱུ་དང་། རྩོམ་ཡིག་བྲི་རྒྱུ་སོགས་ནི་རང་ཅག་ཀུན་ཀྱིས་དགག་པ་བྱ་སའི་གནས་དང་དོགས་སློང་རྒྱགས་སའི་ཡུལ་ཡིན་ཡང་། སྒོ་ཤེར་ནི་དེ་ལྟ་མ་ཡིན་ཏེ། ཁོང་གིས་གནས་ལུགས་དང་བདེན་པ་ཡི་དོན་དུ་ནམ་ཡང་གཞན་ལ་བདེན་ཁ་སྟེར་མ་མྱོང་ཞིང་། རྒྱུ་འབྲས་དང་བདེན་ལུགས་ཀྱི་སླད་དུ་ནམ་ཞར་གཞན་ལ་གུ་ཡངས་གཏོང་མ་མྱོང་། ཁོང་ལ་དེ་འདྲའི་རང་ཚུགས་དང་། དེ་འདྲའི་བློ་སྟོབས་མངའ་བའི་རྐྱེན་གྱིས་ཤེས་མེད་མགོ་མཁྲེགས་འགའ་ཡིས་ཁོང་ལ་ཕྲག་དོག་གི་ར་རི་བསྟན་པ་རེད་ལ། མི་འདོད་པའི་རྣམ་འགྱུར་བཟུང་བ་རེད། སྒོ་ཤེར་ལགས་ནང་བའི་ཆོས་ལ་དད་མི་དད་དང་། ཆོས་ཀྱི་བདེན་ལུགས་ལ་ཡིད་ཆེས་མི་ཆེས་སོགས་ནི་སུས་ཀྱང་བཤད་དགོས་པ་མ་རེད་དེ། ཁོང་གིས་བརྩམས་པའི་༼ང་ཚོ་སད་རན་དང་༽༼རྒྱུན་ཤེས་དང་ལམ༽༼དེའི་ནང་གསེས་ཀྱི་དོན་ཚན་དཔལ་ན་ལེནྡྲའི་རིག་གནས་སྙིང་སྟོབས་༽ཁག་ལས་གསལ་བོར་ཤེས་གི་རེད།སྤྱིར་བོད་ཀྱི་དགོན་སྡེའི་ཁྲོད་ཀྱི་མི་མང་པོ་ཞིག་གིས་སྒོ་ཤེར་གྱི་སྟེང་ལ་མ་རངས་བ་དང་།མི་དགའ་བའི་རྣམ་འགྱུར་སྟོན་བཞིན་ཡོད་དེ། དེ་ཡང་མཐར་དེད་ན་དེ་དག་གིས་སྒོ་ཤེར་གྱི་ཤེས་རབ་དང་། སྨྲ་ལྕེ། བདེན་དོན་བརྗོད་པའི་ཞལ་ལྕེ་སོགས་ལ་མ་དོ་བའམ་མ་ནུས་པའི་གནད་ཡིན་འདུག དཔེར་ན། ༼རྫ་ཚེ་རིང་བཀྲ་ཤིས་ཟེར་བ་ཞིག་གིས་དྲ་ངོས་སུ་སྒོ་ཤེས་རབ་དང་སྒྲིག་འཛུགས་ཀྱི་བར་འདུམ་པ་༽ཞེས་པའི་ཁ་བྱང་བརྗིད་པོ་ཅན་ཞིག་བཏགས་ཏེ་ཡིན་ཡིན་ཅོག་ཅོག་ཏུ་བཤད་ཡོད་ཀྱང་། མཐར་དེད་ཚེ་ཁོ་རང་སྒོ་ཤེར་གྱི་སྟེང་དུ་མི་དགའ་བའམ་མི་འཐད་པའི་བཟོ་ལྟ་ལས་སྒོ་ཤེར་དང་སྒྲིག་འཛུགས་བར་ལ་འདུམ་པ་ཞིག་གཞི་ནས་བྱས་མེད་ལ། བྱེད་ཀྱང་ཤེས་མི་འདུག  གལ་སྲིད་བྱེད་ཤེས་ཀྱང་ཚེ་བཀྲ་ཟེར་བ་དེར་མགོ་མི་ཚུད་སར་ལུས་བཙང་བ་ལས་མ་འདས་སོ།།ཚེ་བཀྲ་ལྟ་བུའི་མི་བརྒྱས་ཀྱང་སྒོ་ཤེར་གྱི་ཚིག་གཅིག་གི་ཚད་ལའང་ནུས་པ་མ་རེད་ལ། དེ་ལས་གཞན་བཤད་མ་དགོས་པ་རེད།འདིས་མཚོན་པའི་མི་མང་པོ་ཞིག་གིས་སྒོ་ཤེར་ལ་མི་དགའ་བའི་བཟོ་ངོམ་བཞིན་འདུག་ཀྱང་དེ་ནི་སྐབས་དོན་མ་ཡིན་པས་བཤད་པར་མི་བྱའོ།། འདིར་བདག་གིས་བཤད་འདོད་པ་ནི་སྒོ་ཤེར་དང་དགོན་པའི་བར་གྱི་གནད་དོན་དེ་ཡིན་ཏེ། བདག་གིས་གནད་དོན་དེ་དོན་ཚན་གཅིག་གི་སྟེང་བཤད་རྒྱུ་ཡིན།
  ༼གཅིག སྒོ་ཤེར་ལ་བསམ་འཆར་འདོན་རྒྱུའི་རང་དབང་སྤྲད་ན་འགྲིག༽
   སྤྱིར་མི་སུས་ཀྱང་མི་སྒེར་གྱི་རང་དབང་དང་། ཐོབ་ཐང་། རྩིས་ཐང་སོགས་ལ་ཁྱད་གསོད་དང་སྨད་འབེབ་བྱས་ཆོག་མི་ཆོག་དེ་ནི་མི་གཅིག་གིས་ཐག་གཅད་རྒྱུ་དང་། ཡིན་ཟེར་བ་ཙམ་གྱིས་ཡིན་འགྲོ་བ་ཞིག་མ་ཡིན་ཏེ།དེ་ནི་འགྲོ་བ་མིའི་ཡོངས་ཁྱབ་རིན་ཐང་སོགས་ལ་འབྲེལ་བ་ཡོད་པ་ཤ་སྟག་རེད། དེ་བས་ད་ལན་གྱི་སྒོ་ཤེར་གྱི་གནད་དོན་ནམ་དོན་དག་དེ་ཡང་དགོན་པ་དེའི་ལས་སྣེ་པ་ཁ་ཅིག་གིས་མི་འདོད་པའི་ལངས་ཕྱོགས་བཟུང་བ་དང་།དེ་དག་གིས་གྱོད་ཉལ་བྱས་པ་ཙམ་གྱིས་སྒོ་ཤེར་གྱིས་བཤད་པའི་གནས་ལུགས་སམ་རྒྱུ་མཚན་དེ་ནུས་མེད་དུ་བུད་འགྲོ་བ་ཞིག་མ་རེད།དེ་ག་ཡིན་ཙང་། སྒོ་ཤེར་ལ་རང་གི་བསམ་ཚུལ་གདོན་རྒྱུའི་རང་དབང་དང་ཐོབ་ཐང་ཙམ་ཡང་མེད་ཚེ། སྒོ་ཤེར་ཡང་ཉེས་མེད་ཀྱི་བཙོན་མ་ཞིག་མིན་འགྲོ དེ་མ་ཡིན་པར་སྒོ་ཤེར་གྱིས་བཤད་པ་བཞིན་༼སྤྱིར་ངས་སློབ་གྲྭའི་རིག་གནས་ཀྱི་ཁོར་ཡུག་དེ་ཡག་པོ་ཞིག་ཡོང་སླད་༽ཅེས་པ་ནས་བཟུང་རྩོམ་ཡིག་དེའི་དབུ་ནས་མཇུག་བར་ཡོད་ཚད་ཀྱི་ཡོད་ཚད་ནི་དུས་རབས་ཉེར་གཅིག་པའི་ནང་པའི་སློབ་མ་ཞིག་ལ་དགོས་པའི་ཆ་རྐྱེན་སོགས་ལ་དམིགས་ཏེ་བཤད་ཡོད་པ་དང་། སྒོ་ཤེར་གྱིས་ངས་བཤད་པའི་སྐད་ཆ་དག་ལ་བདེན་པའི་གནས་ལུགས་ཡོད་ཀྱང་རུང་ལ་མེད་ཀྱང་རུང་།གང་ལྟར་འདི་ལྟར་བྱེད་དགོས་ཞེས་ཁ་ཚོན་མཐོན་པོ་དང་སྒེར་གཅོད་ཀྱི་སྐད་ཆ་དེ་དག་བཤད་མེད་དེ། ཁོས་ཀྱང་དེ་དག་གྲོས་གཞི་ཙམ་གྱི་ཆེད་དུ་བྲིས་པ་རེད།དེའི་ཕྱིར། ཡིན་མིན་གྱི་གྲོས་གཞི་ཙམ་ཡང་གདོན་རྒྱུའི་རང་དབང་མེད་པ་ནི་ཇི་འདྲའི་ཡ་ང་ཞིང་སྐྱི་གཡའ་བའི་གནས་སྟངས་ཤིག་མ་རེད་དམ།
དེ་འདྲའི་རང་དབང་སྤྲད་མི་འདོད་མཁན་དེ་དག་ཀྱང་ཇི་འདྲའི་སྒེར་གཅོད་ཀྱི་ནད་ཀྱིས་མནར་ཡོད་པ་ཤ་སྟག་མ་རེད་དམ།
སྤྱིར་འུ་ཅག་གིས་ཕྲག་དོག་གི་དར་ཆ་སྒྲེང་སྐབས་ཤིག་མ་ཡིན་ཏེ། མཐུན་སྦྲེལ་གྱི་ཟམ་ཆེན་འཛུགས་པའི་སྐབས་ཤིག་རེད་འདུག གནས་བབས་འདི་འདྲ་ཞིག་གི་སྒང་དུ་ཕན་ཚུན་ལ་དགའ་མི་དགའ་དང་། འཐད་མི་འཐད་ཀྱི་ལངས་ཕྱོགས་བཟུང་སྟེ་མཐུན་སྦྲེལ་གྱི་བ་སོན་བརླགས་པ་ནི་བཟོད་ཐབས་བྲལ་བའི་ཕམ་ཁ་ཉག་གཅིག་རེད། ང་ཚོའི་སྐྱ་ཆད་སྔོ་སྡུག་གི་གནས་བབས་དེའི་ངོ་གདོང་མ་བཤད་ཀྱང་ཡོངས་ཀྱིས་མཁྱེན་གི་རེད། དེ་བས་སྒོ་ཤེར་ལགས་ཀྱིས་དགོན་པའི་རིག་གནས་མཁའ་དབུགས་འཛུགས་བསྐྲུན་གྱི་ཐད་ལ་གྲོས་གཞིའམ་བསམ་འཆར་ཞིག་བཏོན་པ་ཙམ་ལ་བརྟེན་ཏེ་ལས་སྣེ་པ་དག་གིས་གྱོད་ཉལ་བྱས་པ་ནི་ལས་སྣེ་པ་དེ་དག་ཀྱང་ཕྲག་དོག་གིས་ཚོས་ཞིང་། སྒེར་སེམས་ཀྱི་བཟི་ཡོད་པ་ཤ་སྟག་ཡིན་པ་ཤེས་ཐུབ། ག་རེ་རེད་ཟེར་ན། ཁོ་ཚོས་གྲོས་གཞི་བཏོན་པ་དེ་ལ་ལྟ་ཚུལ་བཏོན་མི་ཆོག་ཚེ་ཁོ་ཚོས་བཏོན་པའི་གྲོས་གཞི་དེ་ཡང་སྒེར་གཅོག་ཡིན་འགྲོ བསམ་འཆར་གདོན་རྒྱུའི་རང་དབང་ཡོད་ཀྱང་བསམ་འཆར་འདོན་མཁན་དག་ལ་མི་དགའ་བའི་རྣམ་འགྱུར་སྟོན་དགོས་ཚེ་དེ་དག་གི་ཡོན་ཚད་དང་། མཐོང་རྒྱ། སྒམ་དཀྱེལ་ཡང་དེ་ནས་མངོན་འགྲོ  གང་ལྟར། ལས་ཀ་གང་དང་གང་བྱེད་ཀྱང་དེ་ལ་མང་པོས་གྲོས་ཁ་དང་། བློ་མོས་ཀྱི་ལྟ་ཚུལ་འདོན་དགོས་ཏེ། དེ་འདོན་མཁན་དང་དེ་བཤད་མཁན་དག་མ་རུང་བ་དང་ལྟས་ངན་ཉིད་དུ་བརྩི་དགོས་ཚེ་དེ་འཇོག་མཁན་ཡང་གང་འདྲ་ཞིག་ཡིན་པ་ཧ་གོ་འགྲོ དེ་བས་སྒོ་ཤེར་ལགས་ན་རང་གི་ལྟ་ཚུལ་གདོན་རྒྱུའི་རང་དབང་སྤྲད་དགོས་ལ་སྤྲད་ན་འགྲིག་ཀྱང་འགྲིག མཐར་བཤད་འདོད་པའི་སྐད་ཆ་ནི།  
རྔ་བ་ནས་སྒོ་ཤེར་མར་ལ་བདའ་བ་ནི་རྔ་བའི་རིག་གནས་ཀྱི་སྒོ་ཆེན་བརྒྱབ་པ་རེད་ལ།
རྔ་བའི་རིག་གནས་ཀྱི་ཅོང་ཆེན་བཅགས་པ་རེད།
རྔ་བའི་རིག་གནས་ཀྱི་ཉིང་མ་རུལ་བ་རེད།
རྔ་བའི་རིག་གནས་ཀྱི་མཁའ་དབུགས་ཞན་སོང་བ་རེད་དོ།།

རྩོམ་ཁུངས། ངེད་དྲ་བ།