1

མ་གཞིར་ཁྱོད་ལ་བསྐུར་བའི་འཕྲིན་ཡིག་ཏུ་ལྷ་ས་ཐེངས་གཅིག་གླེང་ན་འོས། ཉམ་ཆུང་བའི་སྤྲེའུ་དེ་དང་གཏུམ་དྲག་པའི་སྲིན་མོ་དེ།  གར་སོང་ཆ་མེད་དུ་གྱུར།
        ངའི་དྲན་གདུང་དང་ངའི་མིག་ཆུ།  ཡོད་ཚད་ཀྱི་ཡོད་ཚད་ལ་ནག་ཉེས་ཆེ་ན། ངའི་མིག་ཆུས་ཁྱོད་ཉིད་གཤེར་མི་ཐུབ་ལ།  ངའི་དྲན་གདུང་གིས་ཁྱོད་ཉིད་དབྲབ་མི་སྲིད་ཀྱང་།  ཡིད་སེམས་ཀྱི་གཏིང་ས་རུ་རེ་སྒུག་ཅིག་ཡོད་ཚུལ་ཡུན་རིང་དུ་ངོམ།
         ཡུན་རིང་བོར་བཟོད་སྒོམ་གྱིས་བསྐྱལ་ན། ཁ་དོག་ཤོར་བའི་བཤད་རྒྱུན་རིང་མོ་ཞིག་ལས་བསལ་བསམ་རུང་། སྐྱོ་བའི་སྐྱོ་སྣང་གིས་དྲན་ཆོག་པའི་ཁྱོད་མ་དྲན།
 
                          2

མཆི་མས་གཡོགས་པའི་ངོ་གདོང་ལ། སྙིང་རྗེ་ཡིས་ཕྱི་མིག་གཟིགས་དང་།
        ལས་དབང་འདིར་འཛུམ་དམུལ་དམུལ་གྱིིས་སྲུང་ཆོག་ཚེ།  མི་ཚེ་འདི་སྐྱོ་ལྷང་ལྷང་གིས་འགྲོ་པ་ཅི།
        ངུ་སྟངས་ཤིག་ཡར་ལུང་གཙང་པོས་ཚོར་ཡོད་ན། གནའ་བོའི་ཚོ་ཁག་གི་སྣང་བརྙན་རབ་རིབ། བཤད་འཕྲོར་ལུས་པའི་སྙིང་གཏམ་དུ་འཇོག་འོས།
        སའི་གོ་ལའི་སྒང་དུ། ཁྱོད་ནི་ཡུལ་ཤོར་བ། ཞེ་ས་ཐེངས་གཅིག་མྱོང་བའི་སྐལ་བ་དབེན།
        སའི་གོ་ལའི་སྒང་དུ། ཁྱོད་ནི་ཡུལ་འཁྱམས་པ ། སྙན་འཇེབས་དབྱངས་སུ་བཞུར་བའི་སྐལ་བ་སྟོང་།

                           3

ཤ་དང་མཆིན་པ་བརླན་པའི་སྤྲེའུ་དང་སྲིན་མོའི་བརྩེ་དུང་གི་མཇུག་བྱང་དུ།  རེ་རེ་གནའ་སྔ་མོར་བཅོལ །
         རེ་རེ་འུར་ཟང་ཟིང་།  རེ་རེ་ལ་ངོ་མཚར་དུས ། ཡུལ་མཐའ་འཁོབ་ཡར་ལུང་ལ་ལོག་ནས།  བོད་སྐད་ཀྱི་དམངས་་གླུ་ཞིག་སྐད་གསེངས་མཐོན་པོས་བཏེག་འདོད།
         དམངས་གླུ་རུ།མཁའ་མཐའི་སྐར་མ །མཚན་མོའི་རྫི་བོ། དམངས་གླུ་རུ།ལ་ཁའི་དར་ལྕོག། རྩྭ་ཐང་གི་སོ་སྲུང་།
         རེ་རེ་ལ་ཚོར་སྣང་སྤྲོས་ན། རྨས་སྐྱོན་དུ་ཕོག་པའི་ཁྱོད་ཉིད་ནི་དྲན་ཆོག་པའི་ལྷ་ས་རེད།
 
                          4

གསོལ་འདེབས་ཤིག་སེམས་ཀྱིས་བཟླས།སྔར་འོང་སའི་ལམ་བུ་སྐྱ་ཐིང་ཐིང་།
        རེ་ལྟོས་ཤིག་མིག་གིས་ཕུལ། བར་ཆད་ཀྱི་དཀྱོག་མཚམས་ནག་ཡོར་ཡོར།
        ལྷན་འཛོམས་ཤིག་ལག་པས་གཉོར། དྲན་བཞིན་པའི་ལྷ་ས་ཁུ་སིམ་སིམ།
         ཀྱེ་ཀྱེ།  བྱེའུ་ཆུང་ཞིག་གི་ཚུལ་གྱིས་གཤོག་ཟུང་བརྐྱངས་ཏེ།   ཉི་ཟླའི་ འོད་མདངས་བཀྲ་པའི་གནམ་སྔོན་པོ།  སྲིད་པ་འདི་རུ་མེད་སོང་།
 
                           5

ཡོད་ཚད་སྟེས་དབང་དུ་གྱུར་ན། མིག་ཟུང་ཟིམ་ཟིམ་གྱིས་མ་ཚུམས། རྨི་ལམ་ཚར་གཅིག་གི་འགོ་རུ། ཁྱོད་ནི་ཆར་ཆུ་འཇོམས་པའི་ཐང་ཀ་ཞིག་གི་སྟེང་དུ་གསོན། སྤྲང་བོ་ནང་བཞིན་མཐེ་བོང་བསྒྲེངས་ཀྱང་།ཅི་ཞིག་རྙེད་ཐུབ།
         རྨི་ལམ་ཚར་གཅིག་གི་མཇུག་ཏུ།  ཁྱོད་ནི་རླུང་འཚུབ་ཀྱིས་ཁུར་བའི་སྙན་ངག་ཅིག་ཏུ་ཤི། ཡུགས་ས་ནང་བཞིན་ངུས་ངུས་ཀྱང་། གང་ཞིག་ཐོབ་སྲིད།
         ཡོད་ཚད་རང་ཉིད་ལ་བྲལ་ན། ཟུག་གཟེར་གྱི་མྱོང་བ་རང་སེམས་ལ་གསོག་དང་། གསེར་གྱི་ཕོ་བྲང་། མོན་གྱི་མགུར་གླུ་རུ་ཡོད་ཡོད་འདྲ།
 
                          6

ཁྲག་གིས་སྦགས་པའི་ངོ་གདོང་། མིག་ཅེ་རེར་ངང་རྒྱང་རིང་ལ་མ་བོར།
        རྟག་ཏུ་མགྲིན་པར་འཚང་བའི་སྐད་ཆ་སུས་ཉན་མྱོང་།
        སྨོན་ལམ་ལྟ་བུའི་གོ་རིམ་དུ། མགོན་སྐྱབས་ཤིག་གློ་བུར་དུ་འབྱོན་ཞིང་།
         ཁྱོད་ལ་བྱིལ་བྱིལ་གནངས་པ་ནི །ཁྱོད་ཀྱིས་མི་རབས་ནས་མི་རབས་བར་དུ་བརྒྱུད་པའི་སྡུག་བསྔལ་བགྲང་རོགས།
 
                          7

མགོ་བོ་བྲང་ལ་སྨད་ནས་མིག་ཆུ་མི་འཐུང་མ་གསུང་། དྲན་གདུང་གི་གནར་གཅོད་ལ་ཐར་ལམ་དགོས་ན།
        སྐྲངས་འབུར་ཁེངས་པའི་གྲིབ་ནག་ལ་གཡས་སྐྱོར་གཡོན་སྲུང་གི་བསོད་ནམས་ཉམས་དུས།སྐྱབས་འཇུག་ཅིག་སུ་ལ་ཞུ་འོས།
        སྐྱབས་སུ་མཆོད་པའི་ལྷ་དང་ལྷ་མོ་ལགས།
        ཁོ་བོར་སྐྱིད་པའི་ རྨི་ལམ་གནོངས་དང་།  ཁོའི་མཚན་མོ་ནི་སྨག་རུམ་གྱིས་བསྐོར་ཞིང་། ཁོའི་མིག་ཟུང་དུ་འདས་དུས་ཀྱི་གཟུགས་བརྙན་ཞིག་འཆར།
 
                           8

ལོ་གསར་གནམ་དགོང་གི་རྨི་ལམ་དུ་སིམ་པའི་ཁྱོད། བཙོན་ནས་ལྕེབས་པའི་དྭ་ཕྲུག་དེ་མིན་འདོད།
        མར་མེ་ཁྲོམ་སྐོར་ཏུ་ཞེད་སྣང་ཞིག་གམ་སྐྱོ་སྣང་ཞིག་ཁོ་བོར་འཕྲད།
        མུན་པའི་ཚོགས་མར་མར་བཞུར་དུས།  ས་ཆེན་གྱི་པང་དུ་འཐིམས་པའི་རྣམ་ཤེས་དེ་ཁྱོད་མིན་བསམ།  དམྱལ་བ་འདྲ་པའི་བཙོན་ཁང་དུ་མཐའ་མའི་ཁ་ཆེམས་ཤབ་ཤུབ་སུ་ལ་བསྐུར།
        སྙིང་གསེབ་ལ་ཟུག་རྔུ་རྡེབ་ཐེངས་རེར།    འཁྲེང་ཞེན་གྱི་དབུགས་རིང་ ཁྲོད་དུ །   ཞེན་ཆགས་ཀྱི་རྒྱང་མིག་དྲུང་དུ།   ད་དུང་རེ་སྨོན་གྱི་རི་མོ་རུ།
        ཁྱོད་རང་འགྱེལ།   ཁྱོད་རང་གཡོ།  ཁྱོད་རང་འཁྱུག།
                                      
                          9

ཚེ་གཅིག་ལུས་གཅིག་གཞན་ཡུལ་ནས་རྒས་ན། གནོང་འགྱོད་ཀྱིས་བྲན་གཡོག་འགྱུར་སྲིད།
        མི་མངོན་པའི་བར་ཐག་རིང་མོས །ང་ཡང་རང་དབང་མེད་པ་ལྟར། སོང་ཟིན་པའི་རྐང་ལམ་ཕྲ་མོར་ཡང་བསྐྱར་ཞུགས། ལམ་གྱི་དཀྱོག་མཚམས་རེ་ནས་ཁྱོད་གཅིག་པུ་དྲན་རྒྱུ་ནི། གོ་ནོར་ཐེབས་པའི་ལས་དབང་མིན་སྙམ།
         སེམས་ཁོང་དུ་སྨིན་པའི་མཛེས་སྡུག་རེ་རེ་ཨ།  མིག་ཟུང་གིས་མཇལ་བའི་དུས་ཆད་ཚེ་འདི་མེད་པའམ།
         སྐྱེ་བ་རྗེས་མ་ཞེས་ཐོག་མའི་སྨོན་ལམ་དུ་བསྒྲིགས་ནས།   མཐའ་མའི་འཐམ་འཁྱུད་ལ་དུང་སེམས་གྱེར་དགོས་ན།
         ཁྱོད་ཀྱིས་དུས་ཡུན་རིང་པོ་ཞེས་འཁང་ར་མ་བྱེད།
 
                           10

ཡུགས་ས་རུ་ལུས་པའི་བགྲེས་པོ་ཞིག་གི་སྐད་ཆའི་བརྗོད་སྙིང་དུ། དམར་པོ་རི་སྐད་ཅིག་གི་ས་འགུལ་ཁྲོད་དུ་ཉིལ།
        ཡང་ན་ས་རྡུལ་གྱི་ཕུང་པོ་རུ་གྱུར་བའི་དམར་པོ་རི།ཕྱི་མིག་གི་རྒྱབ་ལྗོངས་སུ་མྱོང་དུས། སྨྲ་མི་ཤེས་པའི་སྐྱོ་ངལ་ཞིག་སེམས་ཀྱི་ཟབ་ས་རུ་རྩེན་ལ།
         ཟླ་བོས་བསྐྱུར་བའི་ཡུགས་ས་དེ་ཁ་སང་གི་ཁྲིམས་ཁང་ལ་བརྫང་བསམ།
         གང་ལྟར།  མྱ་ངན་གྱི་ཁ་གཏད་དུ་འགྲེང་དགོས་པས།བཟློག་ཏུ་མེད་པའི་ཚོར་སྣང་དག་དུམ་བུ་གཏུབ་དགོས་ཀྱང་།  ཁྱོད་ཀྱིས་ཅི་ཡང་མི་སྨྲ།
         ཁྱོད་སྲུང་བའི་ལྷ་དམག་རྒྱང་དུ་བྱེར།
                                                                       
                                11            

ཕམ་དམག་ནི་ཕམ་དམག་རེད།  སྔར་ལྟར་གསང་དགོས་པ་གང་་ཡིན།
        རང་ཉིད་ལ་སྐྲག་པའི་ལོ་ཟླ་རུ། རང་ཉིད་ནི་རང་གི་མགོན་དུ་མི་སྒོམ། གཏིང་ཟབ་པའི་ཁ་ཏའི་ཨག་འགྱུར་དུ།གང་ཞིག་ལྷང་ལྷང་དུ་བརྟོལ་སོང་།
        འབོད་པ་ཁ་ཤས་སུ་འཕྱོ་པའི་ཁྱོད་ཉིད། ཐག་རིང་ནས་ཐག་ཉེ་རུ་བོས་འདོད་ཀྱང་།  འཛུམ་དམུལ་ཞིག་མི་ངོམ་ལ། སྐྱོ་གླུ་ཞིག་མི་ལེན།
        ཧ་ཅང་ཁུ་སིམ་མེར་འཚོ་བ་ནི། ཚེ་གང་གི་་ལན་ཆགས་སུ་ཐོར་དུས།  ཁྱོད་ལ་ཅི་ཞིག་བཀའ་འདྲི་ཞུ།
 
                             12

ངུ་ཤེས་པའི་ཁྱོད། ལུས་དྲོད་ཉམས་པ་ལྟར་མི་ཡུལ་ལ་གྱེས་ན། ཕྱི་མིག་མ་ལྟ།
        གྱེས་པ་ལས་སུ་སྨིན་རུང་། སྐྱེལ་མ་རེ་ག་ལེར་བཙལ་ཚེ། མཆི་མ་རེ་སེམས་ཁོང་ལ་འགྲིལ་བཞིན། བཟློག་ཐབས་མེད་པའི་དུས་ཚོད་ལ་ཕྱིར་དྲན་རིང་མོ་ཞིག་བཅོལ་ལམ།
        ངུ་ཤེས་པའི་ཁྱོད་ལྷ་ས་རུ་འབྱོར་ན ། ནང་མ་ཁང་གི་སྦུག་ཏུ་མ་འཛུལ། ལོ་གསར་གྱི་གཏམ་རྒྱུད་ཅིག་ཧོར་དམག་གིས་བརྩམས་པས།
        ལྷ་ས་ནི་དྲན་ཆོག་པའི་ལྷ་ས་ལགས།
 
                           13

མིག་འབྲས་གསེབ་ཏུ་རེ་སྒུག་ཟླུམ་པོ་ཞིག་གབ་ནས། མཚན་མོ་རེ་རེར་ཉུལ། ཁྱི་ཚོགས་ཀྱི་ངུ་ཟུག་གིས་གཉིད་མ་ཁུགས།
         རྨི་ལམ་རྨིས་འཕྲོར་ལུས་པའི་མཚན་མོ་ཞིག་ལ།  དམག་རྟ་ཁྲི་ཕྲག་གིས་ཁྲག་དམར་གྱོན་ནས་རང་ཡུལ་ལ་ལོག
         འཚེར་སྣང་གི་མཚན་མོ་དེར། གཞོབ་དྲི་དང་ཁྲག་དྲི་འཐུལ་བའི་ཁྱོད་ཀྱི་ཉེ་ས་རུ་སུ་ཞིག་འགྲེང་ཡོད།སེམས་གསོ་ཙམ་སྒུག་པའི་ཁྱོད་ནི་ཁྱོད་དེ། ད་ལྟ་རླུང་གི་རྒྱུ་ཕྱོགས་སུ་ཡམ་ཡོམ་དུ་གཡོ།
 
                           14

དྲག་རླུང་གིས་བཅོམ་པའི་ཁྱོད་ལ།  ངས་ཀྱང་སྔ་མོ་ནས་གདུང་སེམས་བྱོ་པའམ་འཇིག་རྟེན་གྱི་དཀར་ངོགས་སུ་ཁྲིད་ནས། མར་མེའི་སྨོན་ལམ་སྒྲུག།
        ཉམས་སུ་མྱོང་བ་ཐམས་ཅད་བརྗེད་འདོད་མེད་པར། ནམ་ཡང་གླུ་བ་ཞིག་གི་གླུ་སྐད་དུ་འབབ་ན། ངས་ཀྱང་ཁྱོད་ལ་དགོས་པའི་དྲོད་འཇམ་གང་ནས་བཙལ།
        གོམ་པ་རེ་རེ་ཤུགས་ཀྱིས་སྤོས། ལན་མེད་པའི་དྲི་བ་རེ་རེ་སེམས་ལ་རུབ་པས།  ང་ངུ་ཆོག་གམ།  ང་ཡང་ཐེངས་མང་པོར་ངུ་རུ་བཅུག་དང་།  དྲག་རླུང་གིས་བཅོམ་པའི་ཁྱོད་ནི་བྲིས་མི་ཚར་བའི་སྙན་ངག་གི་བསླུ་བྲིད་དུ་གཏོགས།
 
                           15

ནམ་ཞིག་སེམས་པ་ལ་ཨ་ཐང་ཆད་ན། འཁྱར་འཁྱོར་ངང་ལྷོ་རུ་ཉུལ་ཞིང་ཤར་རུ་འཁྱམ།
        མིག་ཟུང་ལ་སེར་ཀ་གས་ཏེ།  མཛེས་རིས་ལྟར་འཁྱུག་པའི་ཁྱོད་ཀྱང་རེ་ལྟོས་སུ་དཀྲིས་ནས། སོང་ཟིན་པའི་རྒྱལ་རབས་ཤིག་ཡང་བསྐྱར་འབྱོན་ཏེ།
        ཕོ་བྲང་དེ་མཐོ་རུ་ནས་མཐོ་རུ་བཞེངས་ན་བརྗིད་ཉམས་ལྡན།
        ནམ་ཞིག་ཁ་བ་དང་མཉམ་དུ་ནང་དོན་མི་གཅིག་པའི་ལོ་ཟླ་དེ་ཚོ་དྲན་བཞིན་ཁྱོད་དྲན་དུས།  ཁྱོད་ཀྱིས་ས་རྡུལ་མནབས་པའི་ངོ་གདོང་ང་ལ་སྟོན་སྲིད།
 
                            16

ཚོར་བའི་མཐའ་རུ་འཁྱུད་པའི་ཁྱོད་ལ་མ་ཡུམ་སུ་ཡིས་གཅེས་ཕྲུག་ཏུ་གཉོར།  ངུ་སྐད་དང་ལྷན་དུ་ནར་སོན་རུང་།  དབུལ་ཕོངས་ཀྱི་མིག་ཆུ་ནམ་ཡང་སྐམ་མ་མྱོང་ལ། མིག་ཆུ་རུ་ལུས་པའི་མཇལ་འཛོམས་ཤིག། ཉིན་མཚན་གྱི་བར་ནས་ཟད་ཚར་ན། ལས་དབང་གི་བཀའ་བཀོད་ལ་ཡང་ནས་ཡང་དུ་ཡིད་རྟོན་བྱེད་སྲིད།
         དྲན་ཆོག་པའི་ཁྱོད།  ནམ་ཞིག་འཛུམ་དམུལ་གྱོན་ནས་ཚོར་པའི་ཉེ་ས་རུ་ལྷགས།  དེ་དུས།  གཏམ་གྱི་འགོ་བརྗོད་ཁྱོད་ཡིན།
 
                             17

དམར་མཆོད་དུ་ཕུལ་བའི་རྣམ་ཤེས་རེ་རེ།  དབྱངས་གསལ་སོ་བཞིས་སྐྱོབ་ཐུབ་ན།  སླར་ཡང་ཐག་རིང་ཐག་རིང་ལ་མ་འགྲོ།
        མྱ་ངན་གྱི་ཉིན་ཞིག་དྲན་པའི་ཁྲོད་སླེབས་སྐབས། འཚིག་དྲི་མ་ཡལ་བའི་རུས་རྐང་རེ་རེ། ཤར་ནུབ་ཀྱི་མཆོད་རྟེན་དུ་བཞེངས་པ་ཅིའི་ཕྱིར་བརྗེད།
        རྣམ་ཤེས་རེ་རེ་ཁྱོད་ལ་དུང་བ་ནས། ཁྱོད་ནི་མཛེས་ཤིང་སྡུག་པའི་ལྷ་ཡུལ་བཞིན་རྒྱང་ཐག་རིང་།
 
                           18

ངུ་སྟངས་ཤིག་བོར་སོང་། ཁྱོད་ཀྱིས་གཏན་དུ་གུ་ཡངས་མ་གཏོང་། སྙན་ངག་ཏུ་བྲིས་མྱོང་བའི་ཁྱོད་ནི་སྐུ་དྲག་གི་སྒེའུ་ཁུང་ལས་འཕྲོས་ཤིང་། སྤྲོ་སྣང་རབ་ཏུ་འཕེལ་བའི་གསོལ་སྟོན་དུ་བཤམས།
        ཁྱོད་ཀྱིས་ལྕགས་སྒྲོག་སིལ་སིལ་གྱིས་དཀྲོལ་དང་། འདར་སིག་སིག་གི་སྣང་བརྙན་ཡང་མཇུག་མ་བསྒྲིལ་བའི་ཟློས་གར་དུ་ཟུག་ན། རེ་ཞིག་དྲན་མེད་དུ་འགྱེལ་། ཡུན་རིང་པོར།  དབུགས་རིང་དུ་འཁྱིལ།
 
                            19

མུན་ནག་གིས་ཁྱོད་ཉིད་མཚན་མོ་གཞན་ཞིག་ལ་ཁྲིད་རྗེས།  སྔར་ལས་ཐེངས་གཅིག་མཐོང་ན་འདོད། ཁྱོད་ཉིད་གང་དུ་ཡོད།
        མིག་བཙུམས་ནས་སེམས་ལ་སློང་ཡང་། ཁྱོད་ཉིད་ནག་ཡོར་ཡོར་གྱི་མུན་ནག་ལ་བསྲེས།
        ཟླ་བ། ཟླ་བ།  མུ་མེད་ཀྱི་ནམ་མཁའ་ལས་འཁྱར་སོང་ན། ངས་ཀྱང་མུན་ནག་གོན་ནས། ཁྱོད་ཀྱི་གྲིབ་མ་རྨི་ལམ་དུ་བཅོལ།
        ཤུགས་རིང་ཞིག་གིས་ཁྱོད་ནི་ཁྲག་བཞིན་དམར།
 
                             20

རྒྱང་རིང་ལ་འཕུར་ཟིན་པའི་ཁྲུང་ཁྲུང་། ཁྱོད་ཀྱི་ལྷ་བྱ་ཡིན་པ་དྲན་དང་དྲན་མོད། ན་བུན་ཐོར་བའི་ལོ་ཟླར། མིག་ཟུང་བཀོལ་ནས་བཙལ་བསམ་ཡང་། མིག་ཟུང་དུ་འཛུལ་བ་སུ་ཡིན།  རྒྱང་རིང་རྒྱང་སྨོན་དུ་བསྒྲིགས་ཀྱང་།ཁྲུང་ཁྲུང་དེ་རྒྱང་རིང་ན་མེད།
         རྒྱང་རིང་ལ་འཕུར་ཟིན་པའི་ཁྲུང་ཁྲུང་། དྲན་གླུ་ཞིག་གི་ཁུགས་སུ་འཁོར་རུང་། གཤོག་སྒྲོ་འཇམ་པོ་བྱང་རླུང་གིས་ཁུར་བ་ཨེ་མཐོང་།
         མནར་གཅོད་ཅིག་འདི་ལྟར་ཚོར་སྣང་དུ་སྤུར་ན།  མྱ་ངན་རྫོགས་མེད་ཅིག་འདི་ལྟར་སུ་ལ་བཞག་སྟེ་འགྲོ།

                             21

རེ་བ་རུ་རེ་བ་ལྷག་མ་ཞིག་བཟུང་ན། སྙིང་བཞིན་ལྡིང་བའི་བཙན་པོ་ཚོ་ཕྱིར་འོང་མེད།
        མིག་ཆུ་རུ་མིག་ཆུ་སྐྱུར་མོ་ཞིག་བསྐྱིལ་ན། མིག་བཞིན་འཕགས་པའི་བློན་པོ་ཚོ་ཕྱིར་འོང་མེད།
        ཕམ་ཁའི་རེ་བ་སྲུབ་སྐལ་ལྡན་ན།  སྐྱོ་སྣང་གི་མིག་ཆུ་གཞིབ་ཐབས་རེག་ན །  དྲན་གདུང་གིས་མཉེས་པའི་རྒྱང་ལྟ་རུ་ཁྱོད་རང་བཏུམ་སྲིད།
        ཁྱོད་ཀྱི་མངལ་ལ་བརྫིས་པའི་ཁྲག་རྗེས་རིང་མོ ། དྲན་རྟེན་དུ་གཡེང་དགོས་པའི་ཡ་ཐོག་གི་དམག་འཁྲུག་མིན་པ་ཚོར།
        རྣམ་ཤེས་ཕྲ་མོ་ཁྱོད་ལ་ཕྱོགས་པ་ནས། བཀའ་བཀོད་མེད་པར་ཐོར་སོང་པ་དྲན་ནམ།  ཁྱོད་ཀྱིས་ལན་གཅིག་གི་རྒྱང་འབོད་དུ་བཏུ་རོགས།
        རྣམ་ཤེས་སུ་བརྒྱུས་པའི་ཁྱོད་ཨང་།

                           22

དྲན་གླུའི་མཆོད་པ་རུ་ཁྱོད་གཅིག་པུ་བཤམས་ཀྱང་།  ཡིད་རྟོན་འཕེར་བའི་གྲུ་ཁ་ཞིག་ཏུ་ཁྱོད་རང་མྱུར་བར་མི་མངོན།
        ངུས་ངུས་ངུས་པའི་མིག་འབུར། སུ་ཞིག་གི་བརྩེ་དུང་དུ་བསྟན།  མག་མོག་གི་རུས་ཐལ་ལ་རྣམ་ཤེས་བྲལ་ཡང་། སྔར་བཞིན་སེམས་པ་ཐེངས་ཤིག་གླན།
        ཆག་འཇིག་རེ་རེ་ཁྱོད་དང་བསྡོངས་ཏེ། ངུས་མི་ཚར་བའི་ཁྱོད་ལ་སྦར་འབྲད་བྱེད་བཞིན་གང་དུ་གཏོར།

                            23

ཁྱེད་ཡང་བསྐྱར་མུན་པའི་ཁྲོད་ལ་ལྷུང་སོང།  ངས་ལག་སྙོབ་ཇི་ཙམ་བྱས་ཀྱང་།  རྙེད་པའི་ཚོར་སྣང་དུ།   འདར་སིག་སིག་གིས་འཚོ་དགོས་པ་གཏན་འཁེལ་པས།  ང་བཤད་རྒྱུན་གང་ཞིག་གི་ཀློང་དུ་འགྲེང་ནས།   ཆར་བའམ་ཁ་བའི་ལམ་བུ་ཚུར་ལ་བསུ།
         ལྷ་ས།  ཁྱེད་སུ་ཡི་ཡིན།   ང་ནི་ཁྱེད་ཀྱི་མིག་ཆུ་ཁ་ཤས་མིན་པར་སྨོན།  ཁྱེད་དང་བྲལ་བའི་རྣམ་ཤེས་རེ་རེ།   

                            24

ཡང་གཅིག་བཤད་ན།  མི་མངོན་པའི་ལས་དབང་ལས་ནམ་ཞིག་ལ་ཐར། དྲན་གདུང་སྐྱོང་ཀིན་པའི་སེམས་ཁོང་ཏུ།  ཁྱེད་ནི་གཏན་ཏུ་མཛེས་སྡུག་གིས་བཏུམས་མོད།    ཆག་འཇིག་གི་འཕྲོར་རུ་ཆག་འཇིག་མཐུད་པ་ནས།   ང་ནི་འཇིག་རྟེན་འདི་རུ་གྲགས་འགུལ་མེད་པ་ལྟར་སྣང་། ངའི་དབུགས་རྔུབ་ན།  ད་དུང་ཁྱེད་ཉིད་འགུལ་བཞིན་འགུལ་བཞིན།
                    
                             25

རྨི་ལམ་ནི་རྨི་ལམ་ལ་དབང་རུང་།ཁྱེད་ལ་དབང་བའི་རྨི་ལམ་ཡང་རླུང་འཚུབ་ཀྱིས་ཁུར་བས།  ང་མྱ་ངན་གྱིས་བཟུང་།  ངས་མིག་ཆུའི་ལོ་ཟླ་སུ་ལ་གསང་།
                                       
                                                                  2008/8 འབྲུག་ཡུལ་ཕུན་ཚོགས་གླིང་དུ།
                                                                           2009/2010 བྱང་རྡོ་ལ་ལྡར་རི་འདབས་སུ།   
                                                                           2016_2017/4/7ལ་དག་བཅོས་བྱས།

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)
                                                

རྩོམ་ཁུངས། ངེད་དྲ་བ།