བདག་ལ་དབུགས་འཚང་བའི་ནད་ལྩི་མོ་ཕོག་ཡོད་པའི་གྲོགས་པོ་ཞིག་ཡོད་པ་ཆབ་སྲིད་ཀྱི་གནད་དོན་སྟེང་ནས་ཁྲིམས་ཐག་བཅད་དེ་ལོ་མང་པོར་བཙོན་དུ་བཅུག   བཙོན་གྲོགས་དེ་ཐ་མག་གིས་ཉིན་མཚན་སྐྱེལ་མཁན་ཞིག་ཡིན་པས་ཁོས་བཙོན་དུ་དཀའ་སྡུག་ཆེན་པོ་མྱངས་ཤིང༌།  དུ་བ་མེད་པའི་བཙོན་ཁང་ཞིག་ཏུ་སྤར་དགོས་ཚུལ་གྱི་བསམ་འཆར་ལའང་ཁ་ཡ་བྱེད་མཁན་མེད་པས།   ཁོའི་བདེ་ཐང་དང་ཐ་ན་ཚེ་སྲོག་ལ་ཉེན་ཁ་ཚབས་ཆེན་བྱུང༌།   ཨ་རིའི་སྐྱེས་མ་ཤིག་གིས་གནས་ཚུལ་དེ་གོ་རྗེས་རོགས་བྱ་འདོད་སྐྱེས་ཏེ།    ངོ་ཤེས་པའི་ཨ་རིའི་ཉིན་རེའི་ཚགས་པར་གལ་ཆེ་བ་ཞིག་གི་རྩོམ་སྒྲིག་པར་ཁ་པར་བཏང་ཤིང༌།    ཁོ་ལ་དེའི་སྐོར་གྱི་རྩོམ་ཞིག་བྲིས་ན་ག་འདྲ་ཡིན་ཚུལ་ལབ་པར།   དེས"མི་དེ་ཚེ་ལས་འདས་སྐབས་ཁོ་བོར་ཁ་པར་ཐོངས"ཞེས་ལན་བཏབ།
   འདི་ནི་མི་རྣམས་ཧ་ལས་བར་བྱེད་པའི་དོན་ཞིག་རེད་མོད།    ཕྱོགས་ཁ་ཤས་ནས་བལྟས་ན་དང་དུ་ལེན་ཆོག་པ་ཞིག་རེད།   ཚགས་པར་ལ་མཁོ་བ་ནི་གཏམ་རྒྱུད་ཅིག་ཡིན་ལ་དབུགས་འཚང་བའི་ནད་གཏམ་རྒྱུད་ཅིག་མ་རེད།   འཆི་བས་དེ་ཉིད་གཏམ་རྒྱུད་ཅིག་ཏུ་བསྒྱུར་ཐུབ་པ་རེད།
    ཕུ་རག་ཏུ་དུས་ཡུན་རིང་བོར་མངག་གཏོང་བྱས་པའི་ནུབ་ཕྱོགས་ཀྱི་བརྡ་འཕྲིན་ས་ཚིགས་གཅིག་མ་གཏོགས་མེད་མོད།   ཅེ་ཁེ་སི་ལོ་ཝ་ཁེ་ལས་ལྡབ་འགྱུར་གྱིས་ཆུང་བའི་རྒྱལ་ཁབ་ལེ་པ་ནོན་དུ་བརྒྱ་ཕྲག་ཁ་ཤས་འདུག   གཅིག་བྱས་ན་འདིའང་དང་དུ་ལེན་ཆོག་པ་ཞིག་སྟེ།   ཁོ་ཚོས་ལབ་པ་ནང་བཞིན"འདི་རུ་གཏམ་རྒྱུད་ཅི་ཡང་མེད"པས་ཡིན་སྲིད།    གཤིབ་བསྡུར་ཞིག་བྱས་ཚེ།    ལེ་པ་ནོན་དུ་གཏམ་རྒྱུད་ཀྱིས་ཁེངས་ཡོད་དེ།   དེ་ནི་ལྐོག་གསོད་དང་དམག་འཁྲུག    འཆི་བའི་རྒྱལ་ཁམས་ཤིག་ཡིན་ལ།   མིའི་ཕྱིར་དྲན་གྱི་སེམས་སུ་འཆར་བ་ཇི་འདྲའི་རྒྱུན་རིང་བ་ནང་བཞིན།   འཆི་བ་ནི་མཐའ་གཅིག་ཏུ་གཏམ་རྒྱུད་རྣལ་མ་དག་གོང་བུར་ཆགས་པའི་ལྟེ་བ་ཡིན།
    འུ་ཅག་གི་གནས་བབ་ནི་བདག་གི་གྲོགས་པོ་ཉིད་དང་འདྲ་བ་སྟེ།   འུ་ཅག་ལ་དོ་སྣང་བྱེད་རིན་མེད་དེ་འུ་ཅག་ལ་གཏམ་རྒྱུད་མེད་ལ་འཆི་བའང་མེད།    འུ་ཅག་ལ་དབུགས་འཚང་བའི་ནད་ཁོ་ན་ལས་ཅི་ཡང་མེད།    འུ་ཅག་གློ་ལུ་བྱེད་པའི་སྒྲ་ལ་མི་ཞིག་ངེས་པར་དུ་སྤྲོ་བ་སྐྱེ་དགོས་དོན་ཅི།
     མི་རྣམས་ཀྱིས་ཀྱང་དུས་ནམ་ཡང་དཀའ་ཚེགས་ཆེ་བའི་དབུགས་ཀྱི་འབྱིན་རྔུབ་འབྲི་བར་མི་སྲིད།
     ས་འདིའི་འཇིགས་སྐུལ་རིང་ལུགས་པ་ཁྲིམས་སྒོར་ཚུད་ཡོད་མེད་དམ།    ཡང་ན་གོང་རིམ་དུ་རུལ་སུངས་ཀྱི་དོན་ངན་གལ་ཆེ་བ་བྱུང་ཡོད་མེད།    ཡང་ན་དྲག་པོའི་ཁྲོམ་སྐོར་རམ་ལས་སྐྱུར་བྱས་ཡོད་མེད་ཀྱི་སྣང་ཚུལ་འདི་རིགས་ཀྱིས་བདག་ལ་སུན་པོར་བཟོས་མི་ཡོང༌།
     བདག་སུན་པོར་བཟོ་བྱེད་ནི་དོན་དག་གཞན་ཁ་ཤས་ཏེ།   གསར་འགྱུར་རིན་ཐང་ལྡན་པའི་གཏམ་རྒྱུད་འདི་རིགས་ཡ་མཚར་ངང་མེད་འགྲོ་བ་ནི་སྤྱི་ཚོགས་འཆམ་མཐུན་མཚོན་པ་མ་ཡིན་པར།    ཉེན་ཁས་ཁེངས་ཤིང་ཚད་ལས་བརྒལ་བའི་གོ་རིམ་ཞིག་གི་ཕྱིའི་འབྲས་བུ་རུ་ངེས་ཏེ།   "གཏམ་རྒྱུད་ཚང་མ་མེད་པར་གྱུར་བ་དེའོ།  །"  ཧ་ལམ་ཉིན་བཞིན་དུ་བདག་གིས་སྤྱི་ཚོགས་འདིའི་གྲག་འགུལ་མེད་པའི་ཞི་འཇགས་དང་གསལ་མི་གསལ་གྱི་དོན་སྙིང་དེའི་ཕྱིར་དུ་བྲེད་ཤ་འདར་འོངས་ལ།   འདི་ནི་དབང་ཆ་གཅིག་བསྡུས་རིང་ལུགས་ཀྱི་ལམ་ལུགས་དང་སྤྱི་ཚོགས་འཚོ་བ་དངོས་བར་གྱི་མི་མངོན་པའི་དམག་འཁྲུག་གི་མཚོན་སྟངས་གསལ་བོ་དེ་ཡིན།
     ཅེ་ཁེ་དམག་འཁྲུག་དང་ལྐོག་གསོད་ལས་ཐར་བར་འདོད་པ་ནི་དོན་དངོས་མ་ཡིན།   དམག་འཁྲུག་དང་དམར་གསོད་ཀྱིས་རྣམ་པ་གཞན་ཞིག་བདམས་ཟིན་ཏེ།    དེ་དག་ཕྱིའི་མངོན་སུམ་གྱི་གསང་བར་མ་སྦས་པའི་སྤྱི་སྒྲོག་གི་དོན་རྐྱེན་དག་ལས་རིམ་གྱིས་རབ་རིབ་ཏུ་གསལ་བོར་མི་མངོན་པའི་ནང་གི་སྙིང་བོ་རྩ་གཏོར་བྱེད་པ་ཞིག་ཏུ་གྱུར།    མི་རྣམས་ཀྱིས་གཏམ་རྒྱུད་དུ་བཀླགས་ནུས་པའི"དཔེ་མཚོན"གྱི་འཆི་བ་རྐྱང་བ་དེ་འདི་རུ་འཆི་བ་གཞན་ཞིག་གིས་ཚབ་བྱས།   དེ་ནི་དལ་བའི་རང་བཞིན་ཅན་དང་སེང་རས་ཀྱིས་གཡོགས་ཤིང༌།   ཁྲག་མི་བཞུར་ལ་རྐྱང་བ་ཙམ་ཡང་མ་ཡིན་པ་སྟེ།   ལས་འགུལ་མེད་ལ་གཏམ་རྒྱུད་ཀྱང་མེད།    དུས་ཚོད་ཀྱི་འཆི་བ་མེད་ལ་ཐུན་མོང་གི་འཆི་བའང་མེད།   ཡང་ན་གསལ་ཁ་ཐག་ཆོད་ཀྱིས་བཤད་ན།    དེ་ནི་གོ་མེད་ཚོར་མེད་ཀྱིས་དབང་བོ་སྦྲིད་པར་གྱུར་ཏེ་སྤྱི་ཚོགས་དང་ལོ་རྒྱུས་དོན་སྟོང་ཅན་དུ་འགྱུར་བའི་གོ་རིམ་ཤིག་ཡིན།    དོན་སྟོང་ཅན་གྱི་གོ་རིམ་དེས་འཆི་བ་མེད་པར་བཟོས་པ་དང་མཉམ་དུ་ཚེ་སྲོག་ཀྱང་མེད་པར་བཟོས་པས།   མི་སྒེར་གྱི་ཚེ་སྲོག་ནི་འཕྲུལ་ཆས་ཆེན་པོ་ཞིག་གི་སྟེང་གི་བྱེད་ལས་གཅིག་རྐྱང་ལས་མེད་ཅིང་གྲ་འགྲིག་གཅིག་གྱུར་གྱི་གྲུབ་ཆ་ཞིག་ལས་ཅི་ཡང་མིན་ལ།   ཁོའི་འཆི་བའང་ལས་འགན་དེ་མེད་པར་བཟོས་པ་ཙམ་ཁོ་ནའོ།  །སྣང་ཚུལ་འདི་རིགས་ནི་འཕེལ་རྒྱས་དང་བརྟན་འཇགས་སུ་ཕྱིན་པའི་དབང་ཆ་གཅིག་བསྡུས་རིང་ལུགས་ལམ་ལུགས་ཀྱི་ནང་གི་བརྗོད་པ་སྟེ་དེའི་ངོ་བོ་ལས་མཆེད་ཡོང་བ་ཡིན་པ་རྟགས་མཚན་འདི་དག་ཐམས་ཅད་ཀྱིས་གསལ་བོར་སྟོན་ནུས།ནུབ་ཕྱོགས་ནས་ཡོང་བའི་ལྟ་སྐོར་བ་དག་རྒྱུན་དུ་ཧ་ལས་དགོས་པ་ཞིག་ལ།   ཁྲེར་ནོ་རྦི་ལིའི་ཉིང་རྡུལ་འཕྲོ་ཐིག་དང་ཨེ་ཙིའི་ནད་དེ་ཅེ་ཁེ་བ་ལ་མཚོན་ན་འཇིགས་སྣང་སྐྱེ་ས་ཞིག་མ་ཡིན་པར་མ་ཟད།    ད་དུང་དགོད་གཏམ་ཞིག་གི་བརྗོད་གཞི་ལྟ་བུར་ཆགས་ཡོད་པ་དེའོ།།
      འདིས་བདག་ཡ་མཚར་སྐྱེ་རུ་འཇུག་མི་སྲིད་དེ།     དབང་ཆ་གཅིག་བསྡུས་རིང་ལུགས་དོན་སྟོང་ཅན་འགྱུར་བ་ནི་གཟུགས་མི་མངོན་པ་ཁོ་ན་ཡིན་ལ།    ཁྲེར་ནོ་རྦི་ལིའི་ཉིང་རྡུལ་འཕྲོ་ཐིག་དང་ཨེ་ཙིའི་ནད་ལས་ཀྱང་མཐོང་དུ་མེད།    ད་སྐབས་ཆེས་ཉེན་ཁ་ཆེ་བ་ནི་དེ་ཨེ་ཙིའི་ནད་དང་ཉིང་རྡུལ་འཕྲོ་ཐིག་ལས་ཀྱང་ནང་དུ་མངོན་ཞིང༌།    སྔར་ལས་ལྷག་པར་རང་ཅག་མི་རེ་རེ་དང་འབྲེལ་བ་ཡོད་པར་གྱུར་བ་སྟེ།    རྒྱུ་མཚན་ནི་འུ་ཅག་གིས་ཉིན་རེ་བཞིན་རང་ཉིད་ཀྱི་ཉམས་མྱོང་ལ་བརྟེན་ཏེ་དེར་གོ་བ་ལེན་པ་ལས་ཚགས་པར་དང་བརྙན་འཕྲིན་ལས་མ་ཡིན་པས།    གཤིབ་བསྡུར་ཞིག་བྱས་ཚེ་འཇིགས་སྣང་ཡལ་གྱིན་འདུག་ལ།    གཡོ་སྒྱུའང་མེད་པར་སྣང་ཤིང་ནང་གི་ཉེན་ཁའང་ཕྱི་རོལ་དུ་མཐར་བསྐྲོད་བཏང་བ་འདྲ་བས།   སྣང་མེད་དུ་གཏོང་བ་ལའང་ཡ་མཚར་རྒྱུ་ཅི་ཡང་མི་འདུག
       གཟུགས་མི་མངོན་པའི་རྒྱལ་ཁ་འདི་ལ་ད་དུང་ཡང་རྒྱུ་རྐྱེན་གཞན་ཞིག་ཡོད་དེ།   གཏམ་རྒྱུད་མེད་པར་སོང་བ་དང་མཉམ་དུ་མིའི་རིགས་ངོས་འཛིན་དང་རང་ཉིད་ངོས་འཛིན་གྱི་རྩ་བའི་ལག་ཆ་ཞིག་མེད་པར་ཆགས།   དབང་ཆ་གཅིག་བསྡུས་རིང་ལུགས་དོན་སྟོང་ཅན་དུ་གྱུར་བ་དེས་མི་རྣམས་ཀྱིས་ཕྱི་རོལ་ནས་ལྟ་ཞིབ་དང་གོ་བ་ལོན་དགོས་པའི་སྒྲུབ་ཚོད་རང་བཞིན་ཁས་ལེན་མི་བྱེད་པས།    རང་ཅག་ལ་གོ་སྐབས་གཉིས་མ་གཏོགས་མི་འདུག་སྟེ།    གཅིག་ནས་དེ་ཐད་ཀར་ཉམས་སུ་མྱོང་རྒྱུ་དང༌།    གཉིས་ནས་ཁྱོད་ཀྱིས་དེའི་སྐོར་ལ་ཏིལ་འབྲུ་ཙམ་ཡང་རྒྱུས་མི་མངའ་བའོ།   །འཇིགས་སྐུལ་རིགས་ཤིག་གིས་སྤྱི་པ་ནས་རྟོག་དཔྱོད་བྱ་རུ་མི་འཇུག
       ཕྱི་རྒྱལ་གྱི་ལྗོངས་རྒྱུ་བར་འདི་ལྟ་བའི་ལུགས་དང་མཐུན་པའི་བག་ཆགས་ཤིག་འཇོག་པར་ངེས་ཏེ།   ཅེ་ཁེ་སི་ལོ་ཝ་ཁེ་སུའུ་ཙེར་ལས་ལྡབ་ཀྱིས་དབུལ་ཞིང་ཐན་པས་བཟུང་ཡོད་པས།   ཚགས་པར་ལས་རིགས་ཀྱིས་ཁོ་ཚོའི་དོན་གཅོད་ཁང་གི་སྒོ་མོ་བརྒྱབ་པ་ལའང་ལུགས་དང་མཐུན་པའི་རྒྱུ་མཚན་ཡོད།    ཁོ་ཚོས་གཏམ་རྒྱུད་ཅིག་སྤེལ་རྒྱུ་མེད་པར་ཇི་ལྟར་རེ་བ་བྱེད་དམ།
                           (ལྡོང་བུས་བསྒྱུར)

རྩོམ་ཁུངས། ངེད་དྲ་བ།