རྩོམ་པ་པོ་ནོར་དཔལ་རྒྱལ་ལགས་ནི། མཚོ་སྔོན་པོ་རྐང་ཚའི་ཡག་མོ་ཞེས་པའི་འབྲོག་སྡེ་ཞིག་ཏུ་སྐྱེས།ཆུང་དུས་ནས་གནག་རྫི་བྱས་ཏེ་རྒས་པའི་འབྲོག་པ་དཀྱུས་མ་ཞིག་ཡིན།རང་ལོ་བཅུ་ཡས་མས་ནས་བཟུང་སྡེ་བའི་རྒན་པ་རེ་ཟུང་གི་མདུན་ནས་ཡི་གེ་འདོན་ཀློག་དང་འབྲི་སྦྱོང་བསླབས་ཤིང་རིམ་གྱིས་དགའ་མོས་ཤིན་ཏུ་བྱུང་སྟབས་རང་སྦྱོང་གིས་རྩོམ་ཡིག་གསར་རྩོམ་སོགས་ཀྱི་ལས་སུ་ཞུགས།ད་ལྟའི་བར་འབྲོག་པའི་འཚོ་བ་དང་རང་སའི་ཡུལ་སྲོལ།རང་གི་མི་ཚེའི་ཉམས་མྱོང་བཅས་ཀྱིས་གཙོས་པའི་རྩོམ་ཡིག་བཅད་ལྷུག་སྤེལ་གསུམ་མང་པོ་བྲིས་ལ།མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཚོགས་མི་ཡིན།《བོད་ཀྱི་རྩོམ་རིག་སྒྱུ་རྩལ》དང་།《གངས་རྒྱན་མེ་ཏོག》《ལྷོ་ཁའི་སྒྱུ་རྩལ》《མཚོ་སྔོན་པོའི་རྩོམ་རིག་སྒྱུ་རྩལ》《མཚོ་སྔོན་ཁྲིམས་ལུགས་ཚགས་པར》སོགས་སུ་སྙན་རྩོམ་མང་པོ་སྤེལ།སྔ་རྗེས་སུ《ཕྱུགས་རྫིའི་རང་གཏམ》དང་།《སྨུག་ཀློང་གི་རྫི་གླུ་གཉོམ་པོ》ཞེས་པ་གཉིས་དཔེ་སྐྲུན་འགྲེམ་སྤེལ་བྱས།

　　ཐེངས་འདིར་ཁོང་གི་བརྩམས་དེབ《མཚོ་སྔོན་པོ་རྐང་ཚའི་ཡུལ་སྲོལ་ཆེན་པོ་གསུམ་ཡན་ལག་འཕྲོས་བཅས་སུ་བཤད་པ》(དེབ་དང་པོ)དང་།《མཚོ་འཁོར་འབྲོག་པའི་ཕལ་སྐད་འགའི་གསལ་བཤད་ཁ་མཚར་འཁོར་ལོ》(དེབ་གཉིས་པ)སི་ཁྲོན་མི་རིགས་དཔེ་སྐྲུན་ཁང་གིས་དངོས་སུ་པར་དུ་བསྐྲུན། དེབ་དེ་གཉིས་ནི་ཁོང་གིས་སྤྱི་ལོ2010ནས་རིམ་གྱིས་བྲིས་ཤིང་། དེབ་དང་པོའི་ནང་དོན་ནི་མདོ་སྨད་རྐང་ཚའི་ཡུལ་གྱི་བྱིས་པའི་མནོལ་སྟོན་དང་། གྱ་སྟོན་གྱི་རིམ་པ། ལོ་སར་རོལ་སྟངས། གཤིན་ནམ་འདས་མཆོད་ཀྱི་སྐོར་བཅས་བྲིས་ཡོད། བྱེ་བྲག་གིས་བཤད་པ་དང་། ཤགས་དང་དམངས་གླུ། ལ་གཞས། ཁ་མཚར་སོགས་ཀྱི་ངག་རྩོམ་གྱི་རིགས་ལེན་སྟངས་དང་། སྟོན་མོའི་གྲ་སྒྲིག་གི་བྱ་བ། འདས་མཆོད་ཀྱི་ལུགས་སྲོལ་སྣ་ཚོགས་བཅས་འཁོད། དེབ་གཉིས་པར་མདོ་སྨད་རྐང་ཚའི་ཕྱོགས་ཀྱི་ཡུལ་སྐད་རྙིང་པའི་རིགས་བསྡུས་ཤིང་། དེ་དག་གི་འགྲེལ་བཤད་དམ་དོན་གྱི་བཤད་པ་མདོར་བསྡུས་བཅས་བཀོད་ཡོད།
 

རྩོམ་སྒྲིག་པ། དབང་མོ།

རྩོམ་ཁུངས། 《མཚོ་སྔོན་བོད་ཡིག་གསར་འགྱུར》