༢༠༠༨ལོར་ངེད་དྲ་བར་བཀོད་པའི་ཁོང་གི་སྐུ་པར་རྙིང་པ་ཞིག

  གཅན་མེ་སྟག་ལགས་ནི་དེ་སྔ་ཟི་ལིང་གི་སྙན་ངག་ཚོགས་པ“གནའ་མཁར་འདྲེ་བཞིའི”གྲས་ཡིན་ལ། དུས་རབས་སྔོན་མའི་ལོ་རབས་དགུ་བཅུ་བའི་སྟོད་དུ་མིང་གྲགས་རྒྱས་ནའང་སྙན་ངག་པའི་གདན་ཐོབ་ནི་འཇུ་སྐལ་བཟང་དང་། ལྗང་བུ། ཨོ་རྒྱན་རྡོ་རྗེ་སོགས་དང་མཉམ་པ་ཞིག་ཡིན།   ཁོང་1970ལོར་མདོ་སྨད་གཅན་ཚ་ས་ཁུལ་གྱི་ལྷ་ས་ཞེས་པའི་གྲོང་ཚོ་རུ་སྐྱེས།  རང་ལོ་ངོ་བདུན་གྱི་སྟེང་ཕ་ཡུལ་གྱི་གྲོང་ཚོའི་ཆ་ཚང་སློབ་གྲྭ་རུ་ཞུགས་པ་དང་།  འཛིན་གྲྭ་གཅིག་རིམ་བརྒལ་གྱིས་ལོ་བཅུ་གཅིག་སྟེང་རྫོང་མི་རིགས་སློབ་འབྲིང་དུ་ཞུགས། 1985ལོར་རྒྱུགས་འབྲས་བཟང་པོ་དང་བཅས་མཚོ་སྔོན་ཞིང་ཆེན་མི་རིགས་དགེ་ཐོན་མཐོ་རིམ་ཆེད་སྦྱོང་སློབ་གྲྭ་རུ་ཞུགས།
  1989ལོར་མཚོ་སྔོན་ཞིང་ཆེན་མི་རིགས་མཐོ་རིམ་དགེ་འོས་ཆེད་སྦྱོང་སློབ་གྲྭ་ནས་མཐར་ཕྱིན།  ལོ་དེར་མགོ་ལོག་ཁུལ་མི་རིགས་དགེ་ཐོན་སློབ་གྲྭར་དགེ་རྒན་གྱི་ཕྱག་ལས་གནང་དུ་ཕེབས།  རྗེས་མར་བྱ་བའི་དགོས་དབང་གིས་མགོ་ལོག་ཁུལ་མི་རིགས་མཐོ་འབྲིང་དང་མགོ་ལོག་ཁུལ་སྐད་ཡིག་ཁྲིད་དཔྱོད་ཁང་གཉིས་སུ་ཕྱག་ལས་གནང་སྟེ། 2022ལོར་ལས་འཁྱུར་ངལ་གསོ་བྱས།
  ཁོང་ལོ་རབས་བརྒྱད་ཅུ་པ་དང་དགུ་བཅུ་པའི་བསྣོལ་མཚམས་སུ་གསར་རྩོམ་གྱི་ལས་ལ་ཞུགས་པ་ནས་བཟུང་། དུས་དེབ་དང་ཚགས་པར་སྣ་ཚོགས་སྟེང་སྙན་ངག་300 ལྷག་དང་ལྷུག་རྩོམ་50ལྷག  གླུ་ཚིག་20ལྷག་རྩོམ་སྤེལ་མཛད། སྙན་དེབ《ལྷོ་བཞུད་ཀྱི་ཆུ་འཛིན》དང《ཚེར་སིལ་སྐྱ་བོ》 ལྷུག་རྩོམ་དེབ《བུ་མོ་གཡུ་ཆུང་ཟླ་བ》བཅས་པར་དུ་བཏབ་ཡོད།  “ཀྲུང་གོའི་གྲངས་ཉུང་མི་རིགས་རྟ་མཆོག་རྩོམ་རིག་བྱ་དགའ”དང་“ཟླ་ཟེར་རྩོམ་རིག་བྱ་དགའ”སོགས་རྩོམ་རིག་གང་མང་ཐོབ། སྙན་རྩོམ་སྟོང་ཕྲག་ལྷག་བྲིས་ཡོད་པ་ལས་འགའ་ཞིག་དབྱིན་ཇི་དང་ཧྥ་རན་སེ། འཇར་མན་དང་ཉི་ཧོང་སོགས་ཀྱི་སྐད་དུ་བསྒྱུར་ཡོད།
  2022ལོའི་ཟླ9པའི་ཚེས20ཉིན་སྙུན་གཞིའི་རྐྱེན་པས་ཟི་ལིང་དུ་སྐུ་གཤེགས།

སྙིང་ཉེའི་སྐྱེལ་ཐུང་།

                             རྫོགས་ཆེན་པདྨ་སྐལ་བཟང་།(རྫོགས་ཆེན)

ཡ་ང་འཇིག་རྟེན་ཕྱི་མའི་རླུང་སྒྲ་ཡིས་བསུས་པའི།།
མ་འདྲིས་གྲོགས་ཀྱི་ངུ་ངག་དབྱངས་རྟ་ཡིས་བསྐུལ་ཏེ།།
གཟན་ཤམ་དམར་པོའི་འོག་གི་སྐྱོ་གདུང་གི་ར་མདའ།།
མི་མངོན་དབྱིངས་ན་བཞུགས་པའི་མཆོག་གསུམ་ལ་སྦྲན་ཡོད།།

ཀྱེ་མ་དབང་མེད་འཇིག་རྟེན་འདིར་སྣང་ལས་བརྒལ་བའི།།
ལས་རླུང་རྗེས་འགྲོ་ཉམ་ཆུང་མགོན་མེད་ཀྱི་བུ་ལ།།
བྱམས་ཆེན་མགོན་གྱི་ཐུགས་རྗེའི་ཕྱག་རིང་ཞིག་བརྐྱངས་ནས།།
འཇིགས་རུང་དུཿ  ཁའིགནས་ལས་ད་ལྟ་རང་སྐྱོབས་ཤིག།

གངས་འདབས་དབེན་པའི་རི་ནས་བསྲིངས་པ་ཡི་ཡིག་ཆུང་།།
བར་དོའི་མུན་ནག་འཐིབས་པའི་གསལ་སྒྲོན་དུ་གྱུར་ཏེ།།
ཐར་ལམ་སྣང་བ་དཀར་པོའི་འཇའ་ཟམ་གྱི་སྟེང་ནས།།
བདེ་ཅན་ཡིད་དགའ་ཆོས་འཛིན་ཞིང་མཆོག་དེར་སྐྱོལ་ཅིག།

སྣང་བ་སྲབ་མོ་འདི་ཡི་ཕར་ངོགས་ཀྱི་ལྗོངས་དེའི།།
སྟོང་པ་ཁས་ལེན་ཀུན་བྲལ་བློ་འདས་ཀྱི་རྫོང་ཆེན།།
ཟུང་འཇུག་ཀ་ནས་དག་པའི་ལྷུན་གྲུབ་ཀྱི་རྒྱལ་ས།།
ཡེ་རྫོགས་གཞི་གྲོལ་ཆེན་པོའི་བདེ་ཀློང་དུ་ཨ་ཨ།།
               པདྨ་སྐལ་བཟང་དེས་སོ།།

ཕེབས་སྐྱེལ་མ།

                           ལྗང་བུ།

ག་པར་སླེབས་ཀྱང་གང་ལ་བསྡད་ཀྱང་ག་འདྲར་གནས་ཀྱང་བདུད་རྩི་དྭངས་མའི་ཉིང་བཅུད་དང་དྲི་བསུང་ལ་བསྟེན་པ་ཞིག

མེ་སྟག་གི་འཕྲོ་འདུ་གསོག་པའི་འབར་ཤེད་ལ་བསྟིམ་པ་ཞིག་དང་འགྱིག་གསོབ་ཀྱི་མེ་ཏོག་བརྫུས་མ་དག་མེ་སྲེག་གཏོང་མཁན་ཞིག

སྙན་ངག་གི་མུ་སྟེགས་པའི་ལྟ་བ་འཁྱེར་མཁན་ཨུ་ཚུགས་ཅན་ཞིག་དང་མི་རྟག་པའི་ཐ་སྙད་དག་ཐེར་ཟུག་གི་དྲན་ཐོ་དང་ཐེལ་ཙེ་རུ་སྦྱང་རྡུང་བྱེད་མཁན་ལྕགས་བཟོ་ཞིག

སྙན་ངག་དང་འཕྲད་དུས་མྱོང་ཚོར་སྣ་ཚོགས་མེ་སྟག་གི་ཚ་ཚས་འཕྲོ་བ་ཞིག་དང་སྙན་ངག་དང་འགྲོགས་དུས་ཁ་ཁོག་མེད་པ་ཞིག་དྲང་པོར་སྨྲ་བ་ཞིག་ཕྱི་ནང་སྒྲིབ་པ་མེད་པ་ཞིག

སྙན་ངག་དང་འཐབ་དུས་བློ་ཁོག་ཆེ་བ་ཞིག་གདེང་ཚོད་ཡོད་པ་ཞིག་ཐ་ན་གདུག་རྩུབ་ཀྱང་ཆེ་བ་ཞིག སྙན་ངག་གི་ཆེད་དུ་གོ་རྟོགས་སད་པ་ཞི་བར་གནས་པ་ཐར་བ་ཐོབ་པ་ཞིང་ཁམས་བརྗེས་པ་ཞིག

མ་སྐྱིད་པའི་སེམས་དང་མི་སྙན་པའི་གཏམ་དེ་མེ་སྟག་དང་མེ་ཏོག་གི་བར་ལ་རེས་སྐྱིད་རེས་སྙན་བཟོ་མཁན་གྱི་སྒྱུ་མ་མཁན་པོ་ཞིག་དང་ངེས་པར་དུ་སྐྱེལ་ཐུང་ཞུ་དགོས་པའི་དུས་ཐུང་གི་ཆང་གྲོགས་ཤིག

འདི་ན་ལྷ་དར་དང་བཅས་པའི་རྫ་ཁོག་སུམ་སྦྲགས་ཤིག་ཕུལ་ཡོད་དེ། གཅིག་དེའི་ནང་ལ་ཁྱེད་རང་དྲན་གྱིན་པའི་བདུད་རྩི་ངར་མས་གཏམས་ཡོད།  
གཅིག་དེའི་ནང་ལ་ཁྱེད་རང་ཕེབས་ལམ་གྱི་ས་བཀྲ་དང་སྐྱོ་རོགས་བཅུག་ཡོད། གཞན་གཅིག་ལ་ནི་སྐྱབས་གནས་བསླུ་མེད་ཀྱིས་སྦར་བའི་མེ་འོད་གང་ཡོད།།

གསུམ་སྒྲོན་མཉེས་དག་ཅིག་གནང་རོགས། སྙན་ངག་གིས་འཚོ་དང་འཚོ་བཞིན་པའི་བོད་པ་ཚོ་ལས་དམིགས་སུ་གར་པའི་ཁྱེད་རང་། ག་ལེར་ཕེབས་དང་།
       *འཆི་བདག་བདུད་ཀྱི་དབང་པོས་བརྩེ་བྲལ་ན་ཚའི་ལག་དམར་བཏང་ངོར་སྙན་ངག་སྨྲ་བའི་དབང་པོ་གཅན་མེ་སྟག་མཆོག་གི་སྐུ་ཚེས་མ་ལྕོགས་ཚུལ་གོ་ནས་གོང་གི་ཚིག་དེ་ལྷོ་ཕྱོགས་སྨོན་འཕེལ་གླིང་ནས་དམ་པ་ཁོང་ལ་སྐྱེལ་ཐུང་གི་ཚུལ་དུ་ཐལ་ཏོ།། ཨོཾམཎིཔདྨེཧཱུཾ།། ༢༠༢༢/༠༩/༢༡ཞོགས་པར་ལྗང་བུ་ནས། ༠༩/༢༢ཉིན་བཅོས་ཏོག་ཙམ་བརྒྱབ་ཡོད།

ངའི་སྙན་ངག་དང་ཁྱེད་ཀྱི་རྣམ་ཤེས།

                                                                                                         ------སྙན་ངག་པ་གཅན་མེ་སྟག་ལ་མྱ་ངན་ཞུ།

                                                                                                              ཁང་སྐྱིད་བསོད་བསྟན།(ལྷ་ས)

གཅིག

ཁང་ཆུང་མགོ་ལ་གྱོན་པའི་ཉིན་མོ་འདི་དག
ཏོག་དབྱིབས་དང་ནད་དུག་ཅེས་པའི་ཐ་སྙད་ཀྱི་གད་སྙིགས་ཁྲོད།
ངའི་སྙན་ངག་གི་ཟབ་ཅིང་གསལ་བའི་མིག་ཟུང་གཉིས་པོ་ཡང་ལོང་སོང་།
ཡིད་ཆེས་དང་དད་པ་མེད་དུས། ང་ཚོ་ནི་སྙན་ངག་གིས་དབེན་པའི་སྤྲང་པོ་ཡིན།

གྲོགས་པོ་ཞིག་གིས་སྐད་འཕྲིན་དུ་སྙན་ངག་ཅིག་བསྐུར་བྱུང་།
དེ་ཡང་དྲ་ལམ་དུ་རླུང་གིས་དེད་པའི་ཐ་སྙད་ཀྱི་གད་སྙིགས་ཅིག་མིན་ནམ་སྙམ་པས།
ངས་རང་ཉིད་ཀྱི་སྙན་ངག་མ་རྙེད་ལ། ཁྱེད་ཀྱི་རྣམ་ཤེས་ཀྱང་རང་གར་བོར་སོང་།
ཐ་ན་མཆོད་མེ་ཀོང་གང་དང་། མ་ཎི་ཚར་གཅིག་ཀྱང་ངའི་ངག་ལས་མ་ཐོན་པས།
འདི་ཡང་ཡིད་ཆེས་དང་དད་འདུན་གྱིས་དབེན་པའི་ངའི་སྟོང་ཟད་ཀྱི་མི་ཚེ་རེད་ལགས།

                                      གཉིས།

སླར་ཡང་། ལྷ་སའི་མཚན་མོའི་སྤྱི་སྤྱོད་རླངས་འཁོར་དང་འདྲ་བའི།
ཉིན་འདི་དག་རིང་གི་ཆེས་བཀྲ་མ་ཤིས་པའི་གཏམ་ངན་གྱི་ལུང་མདོ་ཞིག་ནས།
ངས་གཞི་ནས་ཁྱེད་ཀྱི་རྣམ་ཤེས་ལྷོ་བཞུད་ཀྱི་ཆུ་འཛིན་ཇི་བཞིན་བཞུད་ཟིན་པ་རྟོགས།
ད་ནི། ཁྱེད་ནི་ངའི་ཡིད་ཀྱི་སྨོན་པ་ཡོད་ཚད་འཆོར་སའི་སྙན་ངག་ཅིག་ཏུ་གྲུབ་སོང་།

སྙན་ངག་དེ་ནི།   འཇིགས་པ་དང་རྒུད་པ་མེད་པའི་ཆེས་མཛེས་སྡུག་གི་ལང་ཚོ་ཡིན།
དཔེར་ན། ཁྱེད་ཀྱི་སེམས་དང་ཡིད་ལ་སྒོམ་པའི་ལྷོ་བཞུད་ཀྱི་ཆུ་འཛིན་ཇི་བཞིན།
ཡུལ་དུས་ཀྱི་ལྟོས་པ་ཅི་ཡང་མེད་པར་ང་དང་ང་ཚོའི་སེམས་དབུས་ན་ཡོད་པས།
དུས་དེ་རིང་ནས་བཟུང་སྟེ།   ཁྱེད་ཉིད་ཀྱང་ངའི་སེམས་ཀྱི་སྙན་ངག་ཅིག་ཏུ་གྱུར་སོང་།
སྙན་ངག་ཡོད་པས།   ད་གཟོད་གཞི་ནས་ངའི་མིག་ཟུང་གཉིས་པོ་ཡང་གསལ་བར་གྱུར་ཡོད།

གསུམ།

སླར་ཡང་གྲོགས་པོ་གཞན་ཞིག་གིས། སྙན་ངག་མི་ཤེས་ཀྱང་ཁྱེད་ལ་མྱ་ངན་ཞུ་ཞེས་ཟེར།
དོན་ངོ་མར་ང་ཚོ་ཚང་མར་རང་ཉིད་ལྟ་བུའི་རང་ཉིད་ཀྱི་སྙན་ངག་རེ་རེ་ཡོད།
ཁྱེད་ཀྱི་སྙན་ངག་ཁྱེད་ཀྱིས་རྙེད་ལ་ངས་ཀྱང་ཚོར་ཟིན་པ་འདི་དག་ཡིན་ངེས་ལ།
ངའི་སྙན་ངག་ཁྱེད་ཀྱི་རྣམ་ཤེས་ཀྱིས་བསྩལ་ནས་ད་ལྟ་གཞི་ནས་ག་ལེར་ཚོར་ཡོང་བ་དེ་ཡང་ཡིན།

ཁོང་དང་ཁོང་གི་སྙན་ངག་རྙེད་ནས་བོར་ཟིན་པ་གང་ཞིག་ཡིན་པའང་ངེས་པས།
ང་ཚོ་ཚང་མར་རང་ཉིད་ལྟ་བུའི་རང་ཉིད་ཀྱི་སྙན་ངག་རེ་རེ་ཡོད་པས།
ཁྱེད་ཀྱི་རྣམ་ཤེས་ཤ་རུས་ཀྱི་ཁང་ཆུང་ནས་ཐོན་པའི་སྐད་ཅིག་དེ་ཉིད་ལ།
ང་ཡང་རང་ཉིད་ཀྱི་མགོ་ལ་བཀབ་པའི་ཁང་ཆུང་འདིའི་ཞེན་ཆགས་ལས་ཐར་ཏེ།
ཁྱེད་ཀྱི་རྣམ་ཤེས་འཕུར་ཤུལ་ནས་ངས་རང་ཉིད་ཀྱི་སྙན་ངག་ཅིག་རྙེད་པའང་ཡིན་སྲིད།

བཞི།

ལྷ་སའི་སྟོན་ཀ་ནི། ངའི་སྙན་ངག་གི་ཡིད་ཡུལ་དུ་ལྷུང་པའི་ལོ་མ་སེར་པོ་རྐང་གཅིག་ཡིན།
མིག་ཆུ་རྐང་ཆག་གཅིག་དང་འདྲ་བར་ཁུ་སིམ་པའི་ས་གཞི་ཆེན་པོར་ཐིམས་ངེས་པས།
ངས་མི་ཡུལ་དུ་བཞག་པའི་ཡིད་ཆེས་དང་དད་འདུན་གྱི་དར་ཤིང་ཆེན་པོ་ཞིག་ཀྱང་།
མིག་ཆུ་ལྷུང་ཤུལ་ནས་བསླངས་ཏེ་ཁྱེད་ཀྱི་རྣམ་ཤེས་འཕུར་སའི་ཕྱོགས་སུ་བསྒྲེང་ནས།
ཁྱེད་ཀྱི་དྭ་ཕྲུག་ཏུ་ལུས་པའི་སྙན་ངག་གི་དར་ཆེན་ཞིག་ནམ་ཡང་སྟོན་ཀའི་དྲན་གསོར་བཞག་ན་སྙམ།
     སྤྱི་ལོ༢༠༢༢ལོའི་ཟླ༩ཚེས་༢༠ཉིན་ཏེ།   ལྷ་སར་ནད་རིམས་ཀྱིས་རྐྱེན་པས་བསྟུད་མར་ཉིན་སུམ་ཅུ་ལྷག་ཁྱིམ་དུ་བཀར་སྐྱིལ་བྱས་པའི་ཕྱི་དྲོར།   བོད་ཀྱི་སྙན་ངག་པ་གཅན་མེ་སྟག་མཆོག་གནའ་མཁར་ཟི་ལིང་དུ་ནད་ཀྱིས་རྐྱེན་ནས་མི་ཡུལ་དང་ཞལ་གྱེས་ཞུས་པའི་གཏམ་ངན་ཐོས་རྗེས་སུ་ཡིད་གདུང་དྲག་པོས་བྲིས་པའོ།།

དབྱིངས་སུ་ཡལ་པའི་གླག་རྒོད།

                                                                                                      —སྙན་ངག་པ་གཅན་མེ་སྟག་སྐུ་གཤེགས་པར་མྱ་ངན་ཞུ།
             
                                                                                                                ཀླུ་ཚང་སྨྱུག་རྩེན།(རྩེ་ཁོག)

གླག་རྒོད་དེ་ཇེ་མཐོ་ནས་ཇེ་མཐོར་གྱུར་ཏེ།
ནམ་མཁའི་དབྱིངས་སུ་ཡལ་བར་གྱུར།
གླག་རྒོད་དེས་ཤུལ་དུ་བསྐྱུར་བ་ནི་བྲག་ཐེམ་སྟོང་བ་ཞིག་སྟེ།
བྲག་ཐེམ་དེ་ལ་སྐྱོ་གདུང་གི་རླུང་བུ་ཤུར་ཤུར་ལྡང་།
ཡིན་ནའང་། གླག་རྒོད་དེའི་སྡེར་ཤུལ་དག་ལ།
ཡི་གེ་དང་སྙན་ངག་མཉམ་དུ་བབས་པ།
ལོ་རྒྱུས་ཀྱི་ཡིག་ཚངས་དག་ན་འོད་དུ་འབར།
གླག་རྒོད་དེ་དེ་ལྟར་ནམ་མཁའི་དབྱིངས་སུ་ཡལ་རྗེས།
ང་ཚོས་ས་སྟེང་ནས་མར་མེ་མང་པོ་བཞག་སྟེ།
གླག་རྒོད་ལགས།
མར་མེ་འདི་དག་ཁྱོད་ཀྱིས་མཐོང་གིན་འདུག་གམ་ཞེས་དྲིས།
                         ༢༠༢༢•༩•༢༣ཉིན།

ངས་ཁྱོད་ལ་འོ་ཞིག་ཆད་སོང་།

                དཔལ་མོ།(ལན་ཀྲུ)

ངས་ཁྱོད་ལ་འོ་ཞིག་ཆད་སོང་།
དེ་ནི་སྙན་ངག་གི་རྨ་ཁར་གྱུར་ཚར།
འོན་ཀྱང་ད་ལྟ།
ཚེ་སྲོག་འབར་སའི་གཤིན་ས་ཡང་རྒུད་ན།
གཏམ་རྒྱུད་དེ་འདྲ་གླེང་རིན་མི་འདུག

གནས་འདི་རུ་ལྷོད་ཀྱིས་འདུག་ས་མེད་པས།
ཁྱོད་ཀྱིས་ཚེ་སྲོག་དཔང་དུ་བཞག་ཟིན།
འཆི་བདག་གྲོགས་སུ་བསྟེན་ཟིན།
ཕྱི་མའི་ཡུལ་ལྗོངས་བདམས་ཟིན།
ག་ཅིག་ལ་ཤ་ལེར་འགྱོ་ས་ཡོད་པར་སྨོན།
                    ༢༠༢༢/༩/༢༠

མིང་མེད།

                              —བཀྲ་མི་ཤིས་པའི་སྐད་དེ་ཐོས་མ་ཐག

                                                                                                          རེ་རྐང་གླིང་།(རེབ་ཀོང)

མར་མེའི་ཕྲེང་བ  རྒྱུ་སྐར་གྱི་མེ་ཏོག
ཚིག་དང་ཐ་སྙད་ཀྱི་མེ་ལྕེ
ང་ཡི་གསོན་སྙིང་དཔལ་འབར་བཞིན་སྒྲོན་ཤོག

དྲན་པའི་ཆར་བ  བརྩེ་བའི་ཤ་འོད
དགུ་ཚིགས་ཀྱི་གཙང་པོ
ང་ཡི་སྐྱོ་བ་རྒྱ་མཚོ་བཞིན་སྐྱིལ་ཤོག

ལོ་ཟླའི་མིག་ཁ་ནས་བཟར་བའི་ཟླ་བརྒྱད་པ
ག་ལེར  ས་རུ་ཟགས་དུས
གསེར་ཆུས་བྲན་པའི་ས་གཞིའི་ཐུ་འོག་ནས
བདག་སེམས་ཀྱི་ཆུ་འཛིན་དཀར་པོ་ལྷོ་ཕྱོགས་སུ་བཞུད་སོང་།
              2022.09.20ཉིན་གྱི་ཞོགས་པར།

རལ་པ་གྱེན་ལ་གསིག་པའི་མི་དེ།

             བྱང་འབྲོག་མོ།(ནག་ཆུ)

ནད་ཡམས་དང་དམག་འཁྲུག
མུ་གེ་དང་འཆི་བའི་གཏམ་གྱིས།
ཉིན་མཚན་ཐུན་དྲུག་གི་མགོ་རྔ་སྦྲེལ་བའི་དུས་ཡན་འདིར།
སྲོས་ཀྱི་རླུང་བུའི་ཁོག་ལའང་།
མི་རྟག་པའི་སྲད་བུ་རེ་བརྒྱུས་ཡོད་སྣང་ཤར།
དེ་འདྲའི་མོད་ལ།
སང་ཉིན་གྱི་འདོད་འདུན་མཐའ་དག
ཉག་ཕྲ་བ་ནས་ཆད་ལ་ཁད་དུ་བཏང་།
ཉི་ཟླ་མཐོང་ཚེ།
མགོ་ཡི་ཞྭ་ཕུད་དེ་སྨོན་ལམ་ཞུ་མཁན་གྱི་བྱིས་པ་དེ།
ཉི་ཟླ་རི་བོར་བཅར་དུས།
རྟ་ཁ་གློད་ཅིང་དབུ་འཕང་མཐོ་བར་འདེགས་མཁན་གྱི་སྙན་ངག་པ་དེ།
ད་ནི་ཉི་ཟླའི་གའུ་ཁ་སྦྱོར་སྙིང་ཁའི་སྲུང་འཁོར་ལ་བརྒྱུས་ཏེ།
ཉི་ཟླས་བཏིངས་པའི་འོད་ཀྱི་ལམ་དུ་ཞུགས་སོང་།
ཁྱེད་རང་བཞུད་རྗེས།
ང་ནི་མི་རྟག་པའི་ཆོམ་སྒྲའི་ཁྲོད་ན།
ཐེག་པར་དཀའ་བའི་མ་འོངས་པའི་ལྕི་ཚད་ལ།
མ་རིག་པའི་རྒྱ་མས་འཇལ་ཏེ་སྡོད་དགོས་ཨང་།
           ༢༠༢༢.༩.༢༠ཉིན་སྙན་ངག་པ་གཅན་མེ་སྟག་ལགས་སྐུ་འདས་པར་ཐོས་རྗེས། ༢༠༡༩ལོའི་སྨྱུག་ཚོགས་ཀྱི་སྙན་ངག་པ་གཅན་མེ་སྟག་ལ་རྗེས་དྲན་ཞུས་པའོ།།

གཅན་མེ་སྟག་རྗེས་དྲན་གྱི་མེ་སྟག
                
                       མདའ་བཙན་པོ།(རྨ་ལྷོ་སོག་རྫོང)

མི་ཚེ་སྣ་དབུགས་སྐྱིད་སྡུག་འབྱིན་རྔུབ་རེད
འཚོ་བ་སྔ་དགོང་སྣང་བའི་རྩེད་མོ་རེད
ཁྱོད་ཀྱིས་མདུད་པའི་སྙན་ངག་དགུ་སྒྲིལ་དེ
ཤི་ན་གསོན་ན་གངས་ཀྱི་རྨུ་ཐག་ཡིན

མཐོ་ས་ཞིག་ནས་རྒྱང་ལྟ་བྱས་པ།

                                                                                                   ནག་པོ།(གཙོས)

ཁྲོ་ལྕགས་ཀྱི་གཙང་པོར་བཞུར་བའི་རྣམ་ཤེས་ར་རོའི་སྤྲིས་མ་དེ
དགུན་མགོ་མའི་ཁ་བ་རེད་བསམ་ཡང  ཤེས་པ་འཁྲུལ་བ་ཡིན་འདྲ
གྲང་འདར་ཡང་ཡང་བརྒྱབ་ནས་བོག་ཅིང་བརྒྱལ་ལ་ཁད

ལུས་འཇིག་ན་སེམས་ཀྱི་རྒྱུད་ཀྱང་ཆད་དམ
བཤིགས་ཀྱང་བཞེངས་པའི་འཆི་འཕོའི་དཀྱིལ་འཁོར་གྱི་དབུགས་དང་ཁྲག་རྒྱུན
དེ་མུར་མྱགས་པར་གྱུར་བ་མིན་འགྲོ  དེ་ལ་དུད་པའི་ཡི་གེའི་ང་རོའང
ངའི་འཁྲུལ་སྣང་གི་བྲང་ཁོག་ནས་རྟ་ཁྱུ་ལྟར་ཞོགས་ན

མིག་ཆུའི་ཆག་རོ་གང་དུ་གཏོར་རམ  རླུང་གི་བརྡར་ཟད་དུ་སོང་བའི
གསོབ་གཟུགས་ཀྱི་ཉི་མས་སྐམ་སྲིད་ན
ཉིན་མཚན་རེ་རེར་འབྱོར་ཕྱུག་ལྟར་སྣང་བའི་ཚིག་ཚོགས་ཀྱི་དོན་སྙིང་ནང་དུའང
གངས་རི་དང་རྩྭ་ཐང་གིས  ཆར་ཆུ་ཞིག་ག་ལེར་དྲངས་མི་འགྲོ

མུན་ནག་ཁྲོད་ནས་རྒྱང་ནས་རྒྱང་ལ་ཉན་ཚེ  སྔ་འབྱོར་འཕྱི་འོང་གི
དུས་ཆད་ཅིག་ཡོད་བསམ་མོད  
དུས་ཚོད་ཀྱི་ཐ་ཚིག་ནང་བཞིན  དཔུང་བ་མཉམ་གཤིབ་ཀྱི་ཁ་སང་དེའང
མྱུར་བ་མྱུར་ཏུ་མོག་པོར་གྱུར་འགྲོ་བས
རྨ་ཁར་སིམ་པའི་གསང་བའི་རྩེད་གྲོགས་ཀྱང རྨི་ལམ་གྱི་གཟེབ་ཏུ་ཚུད་འགྲོ

མ་འོངས་པ་དེ་ཟག་ཟད་མཁྱེན་པའི་མངོན་ཤེས་དང་འབྲེལ་བ་ཅི་ཡང་མི་འདུག
ཐག་ཉེ་བ་ཞིག་འཚོལ་བའི་ལམ་ཁར  རེག་ཚོར་མྱོང་དུ་ཡོད་པ་ལྟར
ནམ་མཁའི་ངོས་སུ་སྣག་ཚ་བྱུག་ནས་ཅི་ཞིག་བྲིས་ཆོག་ཨང
                       2022/9/21

ཁྱེད་དེ་ལྟར་བུད་སོང་ན།

                        —སྙན་ངག་གི་རྒྱལ་སྲས་རྗེས་སུ་དྲན་པ།
                     
                            འབྲོང་ཕྲུག(མཚོ་ལྷོ)

                             “མི་རྟག་པར་དངོས་སུ་ཕྲད་ནའང་།
                             ང་རང་མི་རྟག་པར་རློམ་ཐབས་མི་འདུག”
   ཁ་པར་དུ་ཡིག་ཕྲེང་དེ་དག་གཏགས་རྗེས།ང་ཡིད་ལ་གློ་བུར་དུ་འཆར་སྒོ་ཅི་ཡང་མེད་པར་གྱུར།ངས་ངེས་པར་ཁྱེད་ལ་ཅི་ཞིག་འབྲི་དགོས་པ་རེད་མོད།ཅི་ཞིག་འབྲི་དགོས་མིན་ལ་བསམ་བློ་འཁོར་གི་མི་འདུག 
    སྐབས་ལན་རེར།ངའི་དྲན་པར་དེ་ལྟར་མུན་ནག་འཐིབ་ནས་འཆར་སྒོ་ཅི་ཡང་མེད་པར་གྱུར་འགྲོ།
  སྐབས་ལན་རེར།མིག་ཆུ་ནི་སྐམ་ཟིན་པའི་ཆུ་མགོ་ཞིག་དང་འདྲ་བར་འུ་ཐུག་ཐབས་ཟད་ཀྱི་ཚབ་ཀྱང་མི་ཡོང་བར་འདུག

             “ཁྱེད་དེ་ལྟར་བུད་སོང་ན། 
             ཁྱེད་ཀྱིས་ཤུལ་དུ་བསྐྱུར་བའི་དབྱངས་གསལ་གྱི་མཆོད་མེ་རེ་རེ།
             སུ་ཞིག་གི་ཚེ་འབར་དུ་སྒྲོན་དགོས་སམ།”
     ཡིག་ཕྲེང་དེས་ཀྱང་ངས་ཁྱེད་རྗེས་སུ་དྲན་སྟངས་གང་ཡང་མཚོན་ཐབས་མེད་མོད།ཁྱེད་དྲན་པ་ནི་ཁེར་རྐྱང་གི་མཚན་མོར་ཆང་དྲན་པ་ནང་བཞིན།ཆང་གི་མཚན་མོར་སྙན་ངག་དྲན་པ་ནང་བཞིན།སྙན་ངག་གི་མཚན་མོར་ཁྱེད་དྲན་པ་ནང་བཞིན་ཚོད་ཀྱིས་ཐིག་པ་ཞིག་མ་ཡིན།   
    ང་ལ་ཕྱིར་དྲན་མཚོན་བྱེད་ཀྱི༼རི་བོ་ཉི་ཟླ༽ལྷག་ཡོད་ནའང་།ང་ལ་སེམས་གསོ་མཚོན་བྱེད་ཀྱི་༼ཚེར་སིལ་སྐྱ་བོ༽ཐེམས་ཡོད་ནའང་།ངའི་སེམས་པ་ད་དུང་ཅི་ཞིག་གིས་མ་ཚིམ་པར་སྟོང་ལྷང་ལྷང་དུ་ལུས་ཡོད།
             
           “འུ་གཉིས་ཆང་ཁ་ཞིག་ནས་ཐོག་མར་ཕྲད་ཅིང་།   
             འུ་གཉིས་ཆང་ཁ་གང་མང་ནས་ཡང་ཡང་གྱེས་མྱོང་།”
    དུས་ཚོད་ཀྱིས་བདེན་དབང་བྱེད་ཐབས་མེད་ལ་བྱེད་ཀྱང་མི་དགོས་པའི་མཇལ་ཕྲད་རེ་རེ་ནི།ཟི་ལིང་ནས་མགོ་བརྩམས་ཏེ་མགོ་ལོག་ནས་མཇུག་བསྡུ་དགོས་པ་འདྲ་སྟེ།མང་རའི་བྱེ་སྣ་ནི་མི་ཚེའི་ལམ་ཐིག་སྟེང་གི་བསྣོལ་མཚམས་གལ་ཆེན་ཞིག་ལས་དཀྱོག་མཚམས་གཙོ་བོ་ཞིག་ཏུ་ངོས་འཛིན་ཐབས་མེད་ནའང་།འུ་གཉིས་ཀྱི་ཆང་དང་སྙན་ངག་གི་མཚན་མོ་མང་པོ་ཞིག་དེ་ལྟར་བརྩམས་ནའང་།ཁྱེད་ཀྱི་ཁེར་རྐྱང་དུ་སིམ་མ་ཐུབ་པའི་ངའི་ཕངས་སེམས་དག་སྙན་ངག་ཅིག་གིས་མི་ཤོད་པར་འདུག

                    “ངས་འུ་གཉིས་ཀྱི་གྱེས་བྲལ་བཟོད་ཐུབ་ནའང་།
                      ཁྱེད་ཀྱི་སྙན་ངག་གི་ཁེར་རྐྱང་བཟློག་དཀའ།”
    དངོས་གནས་དེ་འདྲ་ཞིག་སྟེ།འཆི་བའི་མདུན་དུ་དཔའ་གདེང་གིས་བསྐྱོད་མྱོང་བའི་ཁྱེད་ཀྱི་མི་ཚེ་ནི།ང་ཡི་མིག་ཆུ་ཙམ་གྱིས་མཚོན་ཐབས་མེད་ནའང་།ཁྱེད་ནི་དེ་ལྟར་ངའི་ནང་སེམས་སུ་འཛུལ་ཞིང་འདི་ལྟར་ཡ་ཆུང་གི་ཅི་ཞིག་དྲུས་ནས་རྒྱང་རིང་ལ་བུད་སོང་། དེ་ནི་སྙན་ངག་ཡིན་ནམ།
  ངས་མང་པོ་ཞིག་འུ་ཚུགས་ཀྱིས་མི་ཕྲིས་དོན།ཁྱེད་ཀྱིས་བཞག་པའི་བག་ཆགས་ཀྱི་གཙང་བོ་ནི་དྭངས་ཤ་ལེར་ངའི་གློ་སྙིང་མཆིན་གསུམ་དུ་ཡོངས་སུ་འཐིམ་ནའང་།  ཁྱེད་རང་བརྒྱུད་པའི་ཁེར་རྐྱང་གི་རྒྱང་རིང་ནི་ཆང་དང་སྙན་ངག་གིས་བཞེངས་པའི་རྡོ་རིང་ཞིག་ལྟར་ང་རང་ནམ་ཡང་སླེབས་མ་ཐུབ་པས་ཡིན།

                      “ཁྱེད་དེ་ལྟར་བུད་སོང་ན།
                      ཁྱེད་ཀྱི་རྒྱང་རིང་དང་གནམ་འོག
                   ཁྱེད་ཀྱི་བདག་མེད་དང་བདག་མེད་གཞན་དག
                      ཁྱི་ཁ་བཙུམ་ནས་བསྡོད་ཚུགས་སམ།”
                             ཞེས་འདས་པོ་གང་དེའི་རྩོམ་གྲོགས་ཀྱི་ཐ་མ་འབྲོང་ཕྲུག་གིས་༢༠༢༢ལོའི་ཟླ་༩བའི་ཚེས་༢༡ཉིན།
 

འཁྲུལ་སྣང་།

                                                                                                        —རྩོམ་གྲོགས་དམ་པ་གཅན་མེ་སྟག་ལ་ཕུལ་བ།

                                                སྐྱབས་ཆེན་བདེ་གྲོལ།(རྨ་ཆུ)

ཁྱེད་སྐུ་གཤེགས་པའི་གཏམ་དེ་ཐོས་པས
ང་རང་ཕྱི་དྲོ་ཧྲིལ་པོ་ཞིག་ལ་སྐྱོ་བར་གྱུར
ཡིན་ཡང སྲོད་ཁའི་གྲིབ་ནག་གིས་སྒེའུ་ཁུང་བཀབ་ཡོང་སྟེ
སྡོད་ཤག་གི་ཆ་ཤས་མ་ལུས་མུན་པས་གང་དུས
ངས་རང་གི་སྐྱོ་སྣང་དེ་འཁྲུལ་བ་ཡིན་པ་ཤེས་ཤིང
སྟོང་པའི་ནང་དུ་ལག་པས་བསྙབས་ཚེ
ཁྱོད་ཀྱིས་བཟོས་པའི་མེ་ཏོག་དཀར་དམར་ལ་རེག་ཐུབ་པར་གྱུར
དེ་ནས་ཕར་ཕར་དེད་ཚེ འོད་སྣང་ཕྲན་བུ་མཐོང་ཞིང
ཇེ་གསལ་ནས་ཇེ་གསལ་དུ་གྱུར་ཏེ
མཐར་སྐྱེད་ཚལ་ཆེན་པོ་ཞིག་མངོན་བྱུང
དོན་དུ འོད་རྣམས་ཉི་མ་ལས་བྱུང་བ་མིན་ཏེ
མེ་ཏོག་དེ་དག འཕྲུལ་གྱི་གཟུངས་སྔགས་ཀྱིས་གྲུབ་ཅིང
ཁྲག་དང་རྩ་རྒྱུས་ལྡན་པ རང་བྱུང་གླུ་ལ་མཁས་པ
དཔེར་ན་མིའི་འགྲོ་བ་མ་བྱུང་སྔོན་གྱི་ལྷའམ་དྲི་ཟ་དང་འདྲ་བས
དེ་ཚོས་རང་ལུས་ནས་འོད་ཟེར་འགྱེད་པ་ཡིན་འདུག
ངས་དེ་དག་ལ་མེ་ཏོག་ཅེས་བཏགས་པའང
དུས་དང་ཡུལ་ལས་འདས་པའི་འཇིག་རྟེན་དེ་རུ
ང་རང་བརྗོད་པས་དབུལ་བས་ཡིན་འདུག

ངའི་སྐྱོ་སྣང་མ་ཟད
ཁྱེད་ཀྱིས་ལག་པ་གཡས་པར་ཆང་དམ་དང
གཡོན་པར་ཁེར་རྐྱང་ཐོགས་ཏེ་བྲང་ཁོག་གི་ནམ་མཁར
དབྱངས་གསལ་གྱི་སྐར་ཕྲན་བྲིས་པ་དེའང་འཁྲུལ་བ་རེད་དེ
ཤ་རུས་ཀྱི་ཁུར་བོ་གངས་རིའི་རྩེ་ལ་གཏོར་ཅིང
བྱ་རྒོད་ཀྱི་མིག་ནས་སྲིད་གསུམ་ཁམས་ལ་ལྟ་དུས
ཁྱེད་ལ་ན་ཟུག་བཏང་མྱོང་བའི་བུད་མེད་དེ་ཚོ
ཁྱེད་ཉིད་བདེ་བར་བྲིད་མྱོང་བའི་དབྱར་གཞུང་དེ་ཚོ
དགུ་ཚིགས་ཀྱི་རྒྱ་མཚོའི་ཀློང་ནས་ཡུལ་གང་ལ་ཐིམ་འདུག

རེད་དེ འཁྲུལ་སྣང་རང་རེད
རང་ལུས་ཙམ་བདེ་བའི་ཕྱིར་དུ
ཁེ་ཚོང་གི་འདུ་འགོད་ལ་མ་བྲེལ་ཀྱང
སྐྱིད་ཉལ་ཙམ་རྒྱག་པའི་ཆེད་དུ
མི་ཆེན་གྱི་ཁ་ངོ་མ་འཚོས་ཀྱང
བརྩི་བཀུར་ཙམ་ཐོབ་པའི་ཕྱིར་དུ
བཟང་མདོག་གི་ཟློས་གར་ནི་མ་འཁྲབ་ཀྱང
ཁྱེད་ཀྱི་ལུས་པོ་རླུང་འཚུབ་དང་བུ་ཡུག་གིས་ཟད་པར་བྱས་ཏེ
མགོ་ལོག་གི་གངས་ཁྲོད་ནས་འགྱེལ་ཅིང
ཟི་ལིང་གི་སྨན་ཁང་ནས་ཡལ་བ་དེའང
འཁྲུལ་སྣང་རང་རེད

འཁྲུལ་སྣང་ཡིན་པ་ཤེས་བཞིན་དུ
ངས་འདུ་བྲལ་གྱི་སྐད་ཅིག་མ་འདི
འུ་གཉིས་ཐོག་མར་འཕྲད་དུས་ཀྱི་
ཕོ་ལོ་ཉི་ཤུའི་དབྱར་གྱི་སྒང་དེར་བསྲེ་བར་བྱ
རྨ་རྒྱལ་སྦོམ་རའི་འདབས་སུ
རྟོག་བཏགས་ཀྱི་རས་གུར་ཞིག་དབུབ་པར་བྱ
ཚོར་ཤུགས་དྲག་པོའི་མེ་འབུད་པར་བྱ
གངས་ཆུ་དག་བདུད་རྩིར་བསྒྱུར་ནས
མགོ་མ་གསུམ་དེ་ཞབས་དག་གནང་རོགས
ཞེས་ཞུ་བར་བྱ
         20/9/2022

 འབྲེལ་བའི་གྲུ་ནང་གི་སྐྱེ་བོ།

                                                ཚྭ།(གཅིག་སྒྲིལ)

སྐྱེ་བོ་འདིས་འབྲེལ་བའི་མུན་པ
མ་ཡུམ་གྱི་དགོངས་གྲངས་གཅིག་གི་ནང་བསྡུས་ཏེ
འཇིག་རྟེན་གྱི་རྒྱལ་མོ་དང་ཤགས་འགྱེད་ཡང་ཡང་གནང

སྐྱེ་བོ་འདིས ཙམ་ཤོག་སྟེང་གི་སྤྱོད་པའི་གྲི
མངོན་སུམ་ཀྱི་འཚོ་བའི་ནང་བརྡུངས

མུན་པའི་གཤོག་རྩལ་རྫོགས་པའི་གྲུར
སྐྱེ་བ་ད་རེས་ཀྱི་བཟོད་དཀའ་བའི་ལས་རྣམ་སྨིན

འཁྱགས་པའི་ནང་གི་འཁྱགས་པ་སྲིད་པ་གྲོང་གི་སྒྱུ་མ

ཁྱོད་ཀྱི་སྐད་ཆའི་ནང་འཁྱུག་པའི་གསེར་ཉ
སྐྱ་ཡ་ཤི་བའི་ཁྲུང་ཁྲུང་གི་གར

ལག་པའི་ནང་སྨིན་པའི་ཟ་འཕྲུག་དེས
ཁྱོད་ཀྱི་ལས་དབང་གི་ལྕགས་རི་སྲུང

སྲིད་པའི་གྲུ་གཟིངས་ནང་གི་ཉི་མ
རང་གི་མི་ཚེའི་གཟེབ་ལ་བཅུག

རྒྱ་ཆེར་བཏང་བའི་ཁེར་རྐྱང་།

                             ____སྙན་ངག་གཅན་མེ་སྟག་ལགས་ལ།

                            ཐོ་ཡོར།(དཀར་མཛེས)

ཡོལ་བ་དེ་ནི་འཆི་བ་ཡིན་ཡང་རུང
ནང་དུ་ལོག་ཕྱིན་པའི་སྐད་ཅིག་མ
སྔར་ནས་གྲུབ་ཚར་བས
ཁྱེད་རང་དེར་འཇིགས་དགོས་དོན་མེད

ཚོགས་པ་གང་དུ་འང་མི་གཏོགས་པའི་ཁྱེད་ཀྱིས
སྒོ་མོ་གཞན་ཞིག་ནས་རྨི་ལམ་གཏོང་ཆོག

གསལ་ལ་མི་གསལ་བའི་སྒོ་ར་རུ
གནས་ཁང་རེའི་སྒོ་མདུན་དུ་སྨུག་པ་དུམ་བུ་རེ་ལྷུང
ཁྱེད་ཀྱིས་ཡང་སྙིང་གང་གི་སྒོ་འབྱེད་དགོས་མ་ཤེས་པར་ལྷགས
སྒོ་ར་དེར་ཁྱེད་རང་ཚེ་གཅིག་ལ་བསྡད

རྣམ་ཤེས་སམ་མུན་པའི་གཏིང་དུ་ནུབ་པ་ནི
བདག་མེད་ཅེས་པའི་སྙན་ངག
མིས་བཟོས་འཁོར་སྐར
དེ་ཡི་ས་རུ་ཐོར་བའི་གྲིབ་གཟུགས
མི་མང་པོའི་དཀྱིལ་དུ་འགྲོ

ཁྱེད་ཀྱི་སྟོན་ཁ་ཐེངས་ང་གཉིས་པས་སྐྱེལ་གྱིན་པ
མི་མངོན་པའི་འཆིང་ཐག
རྒྱ་ཆེར་བཏང་བའི་ཁེར་རྐྱང་།
         ༢༠༢༢་༩་༢༢་ཉིན་བྲིས།

    སྙན་ངག་པ་གཅན་མེ་སྟག་ལགས་ལ་སྐྱེལ་རིང་བྱས་པ།

                   མར་བཟའ་བློ་སྒྲོལ།(ཛམ་ཐང)

དེ་དུས་ནམ་ཟླ་དབྱར་ཁ་ཞིག་ཡིན།
ཡོད་ཚད་རང་དབང་ན་ཡོད་སྙམ་པའི་སྣང་བ་བསོར་དུས་ཤིག་ཡིན།
མེ་ལོང་གི་གས་ཁར་འཇའ་ཚོན་གྱི་ཡུ་བ་འཛུགས་དུས་ཤིག་ཡིན།
ཡང་ན།
མི་ཚེ་ནི་མེ་ཏོག་གི་མགོ་རྒྱན་གཅིག་གིས་མཚོན་ཆོག་དུས་ཤིག་ཀྱང་ཡིན།

ལང་ཚོ་གཡོ་སྐྱོམ་གྱི་རླབས་རིས་འཇགས་པར་གྱུར་བ།
ཚད་མེད་པའི་བདེ་སྐྱིད་ཅིག་ཡིན་ངེས།
ཞེན་ཆགས་དང་འཁང་ར་བསྐྱུར་ཆོག
ལ་རྒྱ་དང་ངོ་སོ་བསྐྱུར་ཆོག
ཐ་ན་ཉལ་ཐ་ལྟ་བུའི་ཆང་རག་དང་སྙན་ངག་ཀྱང་དོར་ཆོག

བདེ་མོ་འཇོག་བྱེད་ཀྱི་ལག་པ་ཡར་མི་ཁྱོག་ན་ཡང་།
སྐྱོ་ཡུས་ཀྱི་མིག་ཀོང་ལ།
ལོ་དེའི་དབྱར་ཁ་དང་དུས་བཞི་མནབས་པའི་རྒྱ་སྟག་ཅིག་མཆོང་གིན་འདུག

ཐིག་ལེ་རེ་ལ་ཆང་མཆོད་རེ་འཕེན་དགོས།
       མར་བཟའ་བློ་སྒྲོལ་ནས་ཤིན་ཏུ་བྲེལ་བ་ཆེ་བའི་བར་སྐབས་ཤིག་ལ་བྲིས།

ཁྱེད་རང་འདི་ལྟར་འཆི་བ་ཡིན་ན།

                                      ___སྙན་ངག་པ་གཅན་མེ་སྟག་སྐུ་གཤེགས་པར་བྲིས།

                                           དོན་འགྲུབ་རྡོ་རྗེ།(རྫོགས་ཆེན)

ཁྱེད་རང་འདི་ལྟར་འཆི་བ་ཡིན་ན།
ལྷོ་བཞུད་ཀྱི་ཆུ་འཛིན་ཕོན་པོར་སྙན་ངག་གི་འཇིག་རྟེན་སུ་ཡིས་བཞེང་།
ཁྱེད་རང་འདི་ལྟར་འཆི་བ་ཡིན་ན།
སྟོན་མཇུག་གི་དུས་ཚིགས་སྐྱ་བོར་དུངས་སེམས་ཀྱི་སྨྲེང་གླུ་སུ་ཡིས་ལེན།
ཁྱེད་རང་འདི་ལྟར་འཆི་བ་ཡིན་ན།
ཞེན་ཆགས་ཀྱི་འཁོར་བ་རྒྱ་མཚོར་ཨ་རག་གི་མཆོད་ཆང་སུ་ལ་འདྲེན།
ཁྱེད་རང་འདི་ལྟར་འཆི་བ་ཡིན་ན།
དབྱངས་གསལ་གྱི་རྨི་ལམ་རིང་མོར་དགའ་སྡུག་གི་སྙིང་གཏམ་སུ་ཡིས་བཤད།

སྙན་ངག་པ།
ཁྱོད་ཀྱིས་མཁྱེན་པ་ཇི་བཞིན།
ད་ནི་སྐྱེ་འཆི་འཁོར་བའི་ཆོས་ཉིད་ལ་ལེ་བདའ་མེད་ལ།
འགྲོ་མིའི་རྣམ་རྟོག་གི་འཕྲོ་འདུ་ལ་མཐའ་མེད་པས།
དགའ་དུས་དགོད་པ་དང་སྐྱོ་དུས་ཀྱི་ངུ་བའང་ཆོས་ཉིད་ཅིག་སྟེ།
མི་རྟག་དྲན་པ་ཁྲ་མོས་ང་ཚོ་བསླུས་པ་གྲངས་མེད་ལ་མྱོང་བའང་གྲངས་མེད་ཅིག

འཆི་བ་ནི་གྲོལ་བ་ཞིག་སྟེ།
གྲོལ་བའང་ཐར་བ་ཞིག་སྟེ།
ཁྱོད་ཀྱི་ལང་ཚོའི་ཞབས་རྗེས་སུ་གསལ་བའི་སྙན་ངག་གི་ཡིག་འབྲུ་དེ་དག
ཁྱོད་ཀྱི་རྣམ་ཤེས་གསོན་པོ་ཡིས་བཞེངས་པའི་སྐྱིད་སྡུག་གི་གླེགས་བམ་དེ་དག
ཁྱོད་ཀྱིས་ཉི་ཟླ་རི་བོ་ནས་བྲིས་པའི་དྲན་གདུང་གི་སྤྱན་ཆབ་དེ་དག
ཁྱོད་ཀྱིས་སྲིད་པའི་ཐང་ཆེན་ནས་བཞེས་པའི་ཁེར་རྐྱང་གི་ཆང་དཀར་དེ་དག
སྣང་སྲིད་ཀྱི་དག་ཞིང་ཞིག་ནས།
རང་དབང་གི་ནམ་མཁའ་ཞིག་ནས།
འགྲོ་འོང་དང་སྐྱེ་འཆི་མེད་པའི་དེ་གར།

སྔངས་སྐྲག་གི་དབྱངས་རྟ་མི་དགོས་པར་དལ་གྱིས་གྱེར་བར་ཞུ།
རྗེས་ཆགས་ཀྱི་སྤྱན་ཆབ་མི་དགོས་པར་ག་ལེར་བཞུགས་པར་ཞུ།
མི་ཡུལ་གྱི་ཆགས་སྡང་མི་དགོས་པར་ལྷོད་ལྷོད་ངང་བཞུགས་པར་ཞུ།
སྡུག་བསྔལ་གྱི་སེམས་ཁྲལ་མི་དགོས་པར་ལྷ་ཡུལ་གྱི་བདུད་རྩི་བཞེས་བར་ཞུ།
རྨི་ལམ་གྱི་མཁའ་དབྱིངས་ཤིག་ནས་ང་ཚོའང་མཉམ་དུ་གྲོལ་བར་ཞུའོ། །
            ༢༠༢༢ལོའི་ཟླ་༩པའི་ཚེས་༢༠ཉིན་གྱི་དགོང་མོར་བྲིས།

བློ་གྲོས་ཀྱི་སྒྲོན་མེ་ཞིག་གཟིམས་སོང་།

            བདེན་པའི་མྱུ་གུ(ལྷོ་ཁ)

མུན་པ་ལ་སྡང་མིག་བགྲད་མི་ནུས་པ་ཚོ།
འོད་ཟེར་ལ་འཛུམ་ཆུང་སྟོན་མི་ཐུབ་པ་ཚོ།
བདེ་སྐྱིད་ཀྱི་གླུ་ངག་སྙན་འཇེབས་ཀྱི་དབྱངས་རྟར་མ་དྲངས།
ཞི་བདེ་ཡི་མེ་ཏོག་སྙན་ངག་གི་ཚིག་ལ་མ་བརྒྱུས།
རང་ལ་དབང་བའི་སྨྲ་ལྕེ་ལ་ལྕགས་ཟྭ་རྒྱག་དོན་ཅི།
རང་ལ་དབང་བའི་རྐང་ཟུང་དེ་འདམ་གྱིས་སྦགས་དོན་གང་།

རེ་བའི་མིག་ཟུང་དེ་ཆེ་རུ་བགྲོད་དང་།
རྣམ་དཔྱོད་གསེར་གྱི་འོད་སྣང་དེ་འཚོལ་དགོས།
རིགས་ཀྱི་རྨུ་ཐག་དེ་རིང་དུ་བསྲིངས་ཤིག
བླ་སྲོག་ཁྲག་གི་དྭངས་མ་དེ་གཞིབས་དགོས།
ཤིན་ཏུ་གསལ་བའི་བློ་གྲོས་ཀྱི་སྒྲོན་མེ་ཞིག་ཞི་ཞིང་།
ཇི་འདྲའི་རླབས་ཆེ་བའི་སྙིང་ཁམས་ཤིག་གི་ལྡིང་མཚམས་བཞག
ཕངས་སེམས་གསོན་པོ་འདི་ཇི་འདྲའི་སྙིང་ལ་ལྕི་ཨང་།
དྲན་སེམས་དམར་པོ་འདི་དེ་འདྲའི་ཡིད་དུ་སྐྱོ་ཨང་།

མི་ལོ་ང་གཉིས་ཀྱི་མཛད་འཕྲིན་དཀར་པོ།
མི་ལོ་ང་གཉིས་ཀྱི་འདས་དོན་རིང་མོ།
གླེང་ཡོང་དུས།
ཞབས་རྗེས་གངས་ལ་བཞག་པའི་རྟོགས་བརྗོད་རེ་རེ།

དྲན་པའི་ཚེ།
དུས་གསུམ་སྨྲ་ལྕེ་རྒོད་པའི་རིག་པ་རེ་རེ།

ཁྱོད་ནི་ལ་རྒྱ་ཡི་བླ་སྲོག
ཁྱོད་ནི་རིགས་ཞེན་གྱི་ཁྲག་དྲོན།
ཁྱོད་ནི་དར་ཆ་རེད།
ཁྱོད་ནི་རུ་འདྲེན་རེད།

སད་མ་ནུས་པའི་མི་འདི་དག
གཉིད་ལས་བསླངས་པར་སྐྱ་རེངས་ཀྱི་འབོད་བརྡ་ཡང་ཡང་བཏང་མོད།
འོད་འཚེར་བའི་ལམ་དུ་མི་སྤོ་བར།
སྨག་གིས་ཟིན་པའི་ཡུལ་དེར་ལོག་ནས།
འཁང་ར་དང་སྡུག་ཡུས་ཁོ་ནའི་ས་བོན་རང་གི་སྙིང་ལ་བཏབས།
“འདྲ་མཉམ་དང་དབང་ཐང་ཁྱེར་ཤོག
མི་གཞི་དང་རྩིས་ཐང་ཁྱེར་ཤོག”

གསོན་པོའི་ནང་གི་གཤིན་པོ་འདི་ཚོ།
ཁ་ཕོ་མཐོ་ཨང་།
འཇག་མ་ལྟ་བུའི་རྩྭ་མི་འདི་ཚོ།
ཁ་ལབ་ཆེ་ཨང་།

ཁྱོད་ཡོད་པའི་ལོ་དང་ཟླ་བ།
ཁྱོད་གནས་པའི་ཉིན་དང་མཚན་མོ།
གངས་དཀར་པོར་ཉི་མ་འཆར་བའི་སེམས་འདུན་གྱི་མཆོད་པ་ཡོད།
ས་དོག་མོ་འདོམས་པར་འཇལ་བའི་ལ་རྒྱ་ཡི་བླ་སྲོག་མཆིས།

ངས་སྡུག་གཏམ་སྡེ་ལ་མི་གླེང་།
སྡེ་ཆེན་པོ་འདི་ལ་ཕ་འདང་ཞིག
ངས་མིག་ཆུ་ཆུ་ལ་མི་བསྲེ།
ནང་ན་ཟླ་འདི་ཚོར་མ་འདང་ཞིག
ཤིན་ཏུ་གསལ་བའི་བློ་གྲོས་ཀྱི་སྒྲོན་མེ་ཞིག་ཞི་ཞིང་།
ཇི་འདྲའི་རླབས་ཆེ་བའི་སྙིང་ཁམས་ཤིག་གི་ལྡིང་མཚམས་བཞག
སྡུག་ཡུས་ཀྱི་ན་ཟུག་འདི་ཇི་འདྲའི་འདེགས་མི་ནུས་པའི་ཕ་བོང་ཆེན་པོ་ཞིག
སེམས་ངོགས་ཀྱི་མིག་ཆུ་འདི་དེ་ལྟར་བཞུར་མི་ཚར་བའི་ལྟག་ཆུའི་རྫིང་བུ་ཞིག
        བོད་ཀྱི་སྙན་ངག་པ་གྲགས་ཅན་གཅན་མེ་སྟག་ལགས་སྐུ་གཤེགས་པར་སེམས་གདུང་ཆེན་པོས་མྱ་ངན་ཞུ་ཆེད་ལྷོ་ཁ་བ་བདེན་པའི་མྱུ་གུས་༢༠༢༢/ ༩༢༡ཉིན་བགྱིས་པའོ།།

༄༅། །ངག་རིག་ཐོལ་བྱུང་སེམས་ཀྱི་མགུར་དབྱངས།
 
                                _＿སྙན་ངག་པ་གཅན་མེ་སྟག་ལགས་ལ་རྗེས་དྲན་ཞུ།
 
                   རིག་རྩེན།(མཚོ་ལྷོ)

བསོད་ནམས་དཔལ་ཡོན་རབ་བརྟན་པ།།
ངག་རིག་དབྱངས་ཀྱི་ལྗོན་པ་མཆོག།
གཅན་སྐྱེས་མེ་སྟག་འབོད་པའི་བུ།།
གངས་རིའི་མྱི་རྒོད་མཆོག་ཏུ་བསྔགས།།
 
ཆོས་ཉིད་རྒྱལ་མོའི་བཀའ་ལུང་བཅས།།
འབོད་པའི་བརྡ་ཡིག་འབྱོར་བ་འདི།།
ངེད་ཅག་སྙིང་ལ་གཟན་ན་ཡང་།།
བྱས་བསག་ལས་འབྲས་སུ་ཡིས་དཔོག།
 
མི་ཚེའི་ལམ་གྱི་འགྲུལ་བཞུད་ཙམ།།
ལེགས་ན་གངས་རིའི་ཚེ་ནོམ་ཡིན།།
རྟོན་མེད་འཁོར་བའི་གཞི་ཁྱིམ་ལས།།
གཞལ་མེད་སྙིང་པོ་སུ་ཡིས་བཙལ།།
 
མྱི་ཕོ་ཁྱེད་ཀྱི་རང་གཤིས་དང་།།
བློ་སྤོབས་དགའ་ཞེན་དགོད་སྒྲ་སོགས།།
སྒམ་བརླིང་བག་ཡོད་རང་ཚུགས་བཅས།།
མདོར་ན་ཡོད་ཚད་སྙན་ངག་ཡིན།།
 
སྐྲ་ལོ་དེ་ཡང་སྙན་ངག་ཡིན།།
ངོ་གདོང་དེ་ཡང་སྙན་ངག་ཡིན།།
སྤྱན་ཤེལ་དེ་ཡང་སྙན་ངག་ཡིན།།
མདོར་ན་ཡོད་ཚད་སྙན་ངག་ཡིན།།
 
གསེར་སྨྱུག་དེ་ཡང་སྙན་ངག་ཡིན།།
ཁྲུང་ཕོར་དེ་ཡང་སྙན་ངག་ཡིན།།
བཞེས་དུད་དེ་ཡང་སྙན་ངག་ཡིན།།
མདོར་ན་ཡོད་ཚད་སྙན་ངག་ཡིན།།
 
ཁྲེལ་ཡོད་ལྷ་དེ་ཁྱེད་རང་ཡིན།།
རིགས་ཞེན་མྱི་དེ་ཁྱེད་རང་ཡིན།།
གནའ་མཁར་འདྲེ་དེ་ཁྱེད་རང་ཡིན།།
མདོར་ན་ཡོད་ཚད་སྙན་ངག་ཡིན།།
 
ཅི་ཙམ་བསྟད་ཀྱང་བསྟོད་པར་འོས།།
སྨད་པའི་ཆ་ཡང་མེད་མི་སྲིད།།
བསྟོད་སྨད་རྣམ་བཤད་སྣ་ཚོགས་པ།།
འགྲོ་བ་མྱི་ལ་ཐུན་མོང་ཉིད།།
 
ཀ་ཁའི་རྫི་བོ་ཁྱེད་རང་བྱས།།
གསེར་གྱི་པི་ཝང་ཁྱེད་ཀྱིས་དཀྲོལ།།
སྤོབས་པའི་རྒྱང་གླུ་ཁྱེད་ཀྱིས་གྱེར།།
ཁྱེད་ནི་གངས་རིའི་གླུ་བ་ཡིན།།
 
ཁྲེལ་གཞུངས་ཕྱི་ཐག་རྒྱང་ལ་སྲིངས།།
རང་ཚུགས་དགུ་མདུད་སྙིང་ལ་བཏབས།།
དཔྱོད་ཡངས་བོད་པའི་སྙན་ངག་པ།།
ཁྱེད་དང་ཁྱོད་འདྲ་རེ་གཉིས་ཙམ།།
 
རྨ་རྒྱལ་གངས་རིའི་འདབས་རོལ་ན།།
ཁྱེད་ཀྱི་རྐང་རྗེས་འོད་དུ་འབར།།
རྨ་ཀློང་སྔོན་མོའི་རླབས་ངོགས་སུ།།
ཁྱེད་ཀྱི་དབྱངས་བདུན་སྙན་རྒུར་འཇོ།།
 
ཁྲི་ཤོག་རྒྱལ་མོའི་རླབས་རྩེ་ནས།།
ཁྱེད་ཀྱི་སྙན་པ་རྒྱང་ལ་ཆས།།
གངས་རྒྱན་མེ་ཏོག་དཀར་པོའི་ཚོམས།།
ཁྱེད་ཀྱི་འགྲུལ་བཞུད་ཟིན་ཐོ་ཡིན།།
 
ཉི་ཟླ་རི་བོའི་ལྗོངས་ཁུལ་ནས།།
ཁྱེད་ཀྱིས་རྟ་ཁ་ལྷོད་པར་མཛད།།
གློ་བ་རི་བོའི་འདབས་རོལ་ནས།།
ལྡོག་འབབ་གཙང་པོའི་དྲན་པ་བཏུས།།
 
ལྷོ་བཞུད་ཆུ་འཛིན་རྒྱང་ལ་འཕུར།།
ཚེར་སིལ་སྐྱ་བོའི་ཞིམ་ཤ་མངར།།
གཡུ་ཆུང་ཟླ་བའི་དགོད་སྒྲ་སྙན།།
གང་གང་ཁྱེད་ཀྱི་མཛད་འཕྲིན་ཡིན།།
 
སྙན་ངག་རིང་ཐུང་སྟོང་ལྷག་བྲིས།།
འགའ་རེ་ཕྱི་གླིང་སྐད་དུ་བསྒྱུར།།
རེ་འགའ་བསླབ་གཞིའི་དེབ་དུ་བཀོད།།
རྟ་མཆོག་གསེར་རྟགས་ཁྱེད་ཀྱིས་བཞེས།།
 
ཀ་ཁའི་ཐོབ་ཐང་རྒྱུན་སྲུང་མཛད།།
དབྱངས་བཞིའི་ང་རོ་ལྷོད་ཀྱིས་སྒྲོག།
ཚེག་ཤད་ཙམ་ཡང་ཞིབ་བུར་འགྲེལ།།
ཁྱེད་ནི་བརྡ་སྤྲོད་ཚིག་མཛད་ཅིག།
 
འཆར་ཡན་ངག་རིག་སྒྱུ་མའི་རྩལ།།
རང་མོས་སྙན་འགྱུར་ངག་ལ་བཟློ།།
སྡེ་བཞི་གཏམ་གྱི་སྲོག་དང་བཅས།།
གངས་དཀར་བདེ་སྡུག་ཤུབ་བུར་གླེང་།།
 
མི་རྟག་སྒྱུ་མའི་ཆོས་ཉིད་བཞིན།།
ཁྱེད་རང་རྒྱང་དུ་བཞུད་ན་ཡང་།།
ངག་རིག་དབྱངས་ཀྱི་སྙན་འགྱུར་གླུ།།
གངས་རྒྱུད་ནམ་མཁར་རང་སྒྲ་མཆེད།།
 
མཆོག་གསུམ་བདེན་པའི་བྱིན་མཐུ་དང་།།
དམ་ལྡན་བླ་མའི་བསྔོ་སྨོན་བཅས།།
ཉིད་ཀྱི་ས་ལམ་འོད་དཀར་ཅན།།
བདེ་ལྡན་ཞིང་དུ་བཞུད་པར་མཛོད།།
 
གངས་རྒྱུད་སྨྱུག་འཛིན་དཔུང་ཚོགས་ཀྱིས།།
ངག་རིག་སྐྱེལ་མ་རྒྱ་ཆེར་མཛད།།
བུ་སློབ་གཉེན་སོགས་འཁོར་བཅས་ཀྱིས།།
མ་ཎི་དབྱངས་ཀྱིས་ལམ་སྣ་འདྲེན།།
 
ཚེ་རབས་ཕྱི་མར་བོད་ནས་སྐྱེས།།
ཀ་ཁའི་དབྱངས་རྟའི་བདག་པོ་མཛོད།།
མྱི་ཆོས་རིག་པའི་ལོངས་ལ་སྤྱོད།།
ལེགས་ཚོགས་དཔལ་གྱིས་འཚོ་བར་ཤོག།
   ཅེས་ཉེར་གཅིག་རྒྱལ་ཡུམ་ལྷ་མོའི་སྐུ་གྲངས་དང་མཐུན་པའི་ཐོལ་བྱུང་སྙན་ངག་འདི་ནི་བོད་རིགས་རང་མོས་སྙན་ངག་པ་གང་ཉིད་ཞིང་གཞན་དུ་ཆས་པར་སྐྱེལ་ཆང་ཙམ་དུ་ཐ་སྙད་ལས་གཉེར་པ་རིག་རྩེན་དུ་འབོད་པས་མཚོ་ཆེན་ཁྲི་ཤོག་རྒྱལ་མོའི་འགྲམ་ངོགས་ནས་ཤར་མར་བྲིས་ཏེ་ཕུལ་པའོ།།   ༢༠༢༢.༩.༢༢
 

སྙན་ངག་པའི་འཆི་བ་ནི་སྐྱེ་བ་ཡིན།
                     
                    སྲིན་པོ།(ཁྱུང་མཆུ)

སྐད་ཆ་དག་རླུང་ལ་བཤད་ཀྱང
རླུང་གིས་དྲི་ལན་མི་འདེབས
ཕངས་སེམས་དག་ཁང་པར་བརྩིགས་ཀྱང
ཁང་པས་བདག་ཉར་མི་བྱེད
ངས་ཅི་ལ་ཡང་སྒུག་འདོད་མེད་མོད
ང་རང་མི་རེ་རེ་ལ་ཐུག་འཕྲད་བྱུང
ང་རང་འགུལ་ཙམ་ཡང་མ་བྱས་མོད
ང་ནི་ཐག་རིང་གི་རི་ཟོམ་དུ་འབྱོར
ཟམ་པ་དེ་ཇེ་རིང་དུ་གྱུར་ནས
ཁོའི་སྐེ་ལ་འཐམ་འཁྱུད་གཏོང
ཁོས་རང་ལ་འཆི་བའི་ལྷ་ཁང་བཞེངས
བར་སྣང་དུ་བཀལ་བའི་མེ་ལོང་དེ
དེའི་ནང་ནས་མཐོང་ཐུབ་པའི་ནམ་མཁའ་དེ
དེ་ནི་སུ་ཞིག་གི་བྱིས་དུས་ཀྱི་ནེའུ་གསིང་ཡིན
ཁྱེད་ལ་མཐིང་མདོག་གི་ལྭ་བ་ཞིག་ཡོད
དེ་ནི་ཡུལ་འདི་ཡི་ནམ་མཁའ་དང་མཚུངས
ཁྱེད་ལ་དཀར་གསལ་གྱི་མིག་འབྲས་ཤིག་ཡོད
དེ་ནི་ས་མཐོའི་ཟླ་བ་དང་མཚུངས
སྟོན་ཁ་སླེབས་ནས་ཡུན་རིང་སོང་རྗེས
ཁོའི་སྙིང་གི་འཕར་ལྡིང་གྲོང་གསེབ་ཅིག་ནས་གྲགས་འོང
ཁོ་རང་སླར་ཡང་གཉིད་ལས་སད་དེ
ཆུ་ཤེལ་ལྟ་བུའི་ཚེ་སྲོག་མང་པོ་སྦྲུམ
 

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།