ངའི་མིང་ལ་དུང་བུ་ཆོས་འབུམ་རྒྱལ་དུ་འབོད། མདོ་སྨད་རྩེ་ཁོག་གི་གོ་རབས་པ་ཞིག་ཡིན། མིའི་རྒྱུད་ཀྱི་གོམས་གཤིས་ཉོག་པའི་དུས་འདི་ལ་འཚོ་བའི་ཟང་ཟིང་གི་ཀློང་ནས་རང་གི་བདེ་སྡུག་ལ་གདོང་གཏོད་སྟངས་ནི་དཔེ་དེབ་ལྟ་ཀློག་དང་རྩོམ་ཡིག་འབྲི་སྦྱོང་དུ་བསམས་ན། ལར་ཕྱི་དངོས་པོའི་བསླུ་བྲིད་བཟློག་དཀའ་ཡང་ནང་སེམས་པའི་ནོར་བུ་དོན་ཆེ་བར་དྲན་སྐུལ་གྱི་ཅོང་བརྡ་རྒྱུན་མི་ཆད། དེ་ལྟ་ན་རྩོམ་རིག་ལ་འཇུག་པའི་ལས་འདི་ཡིས་ཆུང་ནས་བོར་བའི་བག་ཆགས་རིགས་ཤིག་ཕྱིར་རྙེད་པའི་འདུ་ཤེས་ཟབ་མོ་རྒྱུན་དུ་སྟེར་བས།ཡི་གེའི་སྨྱན་པ་འདིའི་དབང་གིས་ཤ་ཁྲག་གི་བརྩེ་བ་གཉེན་གྱིས་སྐྱོང་བ་ཡིད་དུ་འོང་ཨང་། ང་ཚོར་མཛེས་སྡུག་ཅེས་གླེང་སྐལ་ལྡན་པའང་། དེའི་རྐྱེན་གྱིས་ཅི་ལ་མིན།

རྫོང་ཐོག་ལ་སོང་རྗེས།

　　ཆུང་དུས་རྫོང་མཐར་ཐོན་ཙ་ན་དྲི་མ་ཁྱད་པར་བ་ཞིག་རླུང་ལ་ལྡང་ནས་སྐབས་དང་སྐབས་ཀྱིས་སྣ་ལ་མཆེད་ཡོང་།དེ་ལ་རྫོང་གི་དྲི་མ་ཞེས་བོས་མྱོང་།དྲི་མ་དེ་ནི་རྫོང་དང་རྫོང་མཐའ་ཁོ་ན་ལས་ཚོར་བ་ཞིག་ཡིན།སྔོ་ཚལ་གཡོས་སྦྱོར་དང་བྲོ་རྫས་སྣ་འདུས་ལས་འཐུལ་བ་ཙམ་ཡིན་མོད།སྣ་ལ་ཞག་ནས་སེམས་ལ་ཁྱབ་པ་དེས།འགོག་མེད་ཀྱི་སྤྲོ་སྣང་ཞིག་ཨི་ཙི་ལུ་གུ་བསླངས་པ་ལྟར་ཡ་ཆུང་ཧྲིལ་བོར་རྒྱས་པར་བྱེད།དེ་དུས་ཀྱི་རྫོང་མཁར་ནི་འཕྲེད་གཞུང་དུ་བརྐྱངས་པའི་ལམ་ཕྲན་གཉིས་ཀྱི་བསྣོལ་མཚམས་ལ་འདུས་པའི་གྱོ་ཁང་དམར་པོ་སྐོར་ཞིག་དང་ཐོག་ཁང་བསྟར་མ་རེ་འགའ་ལས་མ་འདས།ལམ་ཕྲན་གྱི་སྣེ་མོ་སྐྱ་ཤ་ལེར་ལ་རིང་ལ་ཐུང་བརྒལ་ཞིང་ཐང་ཆེན་ཐང་ཆུང་གཤགས་ཏེ་ཉག་ཁ་དང་ལུང་ཁུག་ཏུ་གྱེས་ཤིང་།སྦྲ་སྒོ་དང་ལྷས་འདབས་ལ་ཐིམ་ཡོད།གསལ་ལ་མི་གསལ་བའི་ལམ་ལག་རེ་རེ་ས་རྡུལ་གྱིས་སྒུལ་ནས་ལམ་ཕྲན་ལ་འདྲེས་ཐེངས་རེར།སྐྱ་མི་ཁེར་འགྲོ་ཞིག་གམ་རྒད་པོ་མཛོ་ཞོན་ཞིག རྐང་ཐང་བུ་ཁྲིད་ཅིག་སོགས་ཕྱོགས་བཞི་མཚམས་བརྒྱད་ནས་ཆས་ཏེ་ཚུར་ལ་ཕེབས་ཡོང་།ཁོ་ཚོ་དགུན་དུས་རླུང་ཆེན་དང་ཁངས་རྫུབས་བརྟོལ་ནས་ཕར་ཕར་ཆས་འགྲོ།དབྱར་དུས་ཟིལ་ཆབ་དང་མེ་ཏོག་གཏོར་ནས་ཚུར་ཚུར་བཅར་ཡོང་།

　　ཁོད་ཡངས་པའི་ཐང་དཀྱིལ་དུ་རྫོང་མཁར་ཆུང་ཆུང་དེ་ནི་མིག་གི་མཐོང་རྒྱ་ལ་བཏབ་པའི་ས་རྟགས་ཤིག་གམ།ས་ཡི་དཀྱིལ་སྙིང་ལ་འཕངས་པའི་ཐོ་ཡོར་ཞིག་ལྟར་ལྷང་ངེར་ཡོད་ལ།མི་ཕྱུགས་ཀྱི་སྐར་ཚོགས་འཐོར་བའི་ནམ་མཁའི་འོག་ཏུ་མ་འདུས་རང་འདུས་ཀྱི་ཁང་བ་དེ་དག་གློག་འོད་ཀྱི་མིག་ཟུང་ཀེམ་ཀེམ་དུ་འཚེར་ནས་རྒྱང་ལ་སྣང་དུས།ཡོད་ཚད་ནི་དེ་འདྲའི་བབ་ཆགས་པ་ཞིག རི་ལུང་ཐང་གསུམ་དང་ན་སྤང་རྫ་གསུམ་ན་འཚོ་བའི་ཡུལ་མི་ཚོས་ཐབ་མེ་དམར་ཆེམ་ཆེམ་དེའི་ངོགས་སུ་སང་ཉིན་རྫོང་ལ་འགྲོ་རྩིས་དང་།རྫོང་ནས་ཉོ་ཆ་བརྒྱག་རབས་གླེང་།དེ་དུས་རྫོང་མཁར་ཆུང་ཆུང་འདི་ལ་ཚང་མས་ཞན་ཐོག་ཅེས་འབོད་ལ།འགྲེལ་བཤད་དང་རྒྱུས་ལོན་ཅི་ཡང་མེད་པར་ཞན་ཐོག་ཅེས་འབོད།ཞན་ཞེས་པའི་ཟུར་ཆག་གི་སྐད་སྒྲ་འདི་རང་རྡོ་ཞེས་པའི་འདོད་རྒྱལ་གྱི་མིང་བརྡ་དེ་ལྟར་རྒྱུ་མཚན་དང་གནས་ལུགས་ཅི་ཡང་མེད་པར་མི་དག་གི་སེམས་ལ་བབས་ནས་ངག་ལ་ཐོགས་ཐེངས་རེར།ཁ་འཐོར་དུ་འབྲེལ་བའི་འཚོ་གནས་ཀྱི་བག་ཆགས་རིགས་ཤིག་འདུ་ཚོགས་ཀྱི་ལྟད་མོ་ཡིས་དཀྲོགས་ཏེ།རྒྱུད་ལ་ལྷུང་བའི་གོམས་སྲོལ་དང་གཤིས་ལུགས་རེ་རེ་དལ་བ་དལ་བུར་རྒྱང་ལ་དྲངས།

　　ལྷིང་འཇགས་ཀྱི་གཟུགས་བརྙན་ལ་འཆར་སྒོ་གཞན་ཞིག་ཐོགས་པས་སམ།གྱོ་ཁང་གི་འདུ་འཛོམས་དེའི་རྗེས་ནས་ཡོད་ཚད་ལ་གྲོས་འཆམ་ཞིང་ཁ་མཐུན་པ་ལྟར།མི་དག་ཇ་དང་ཚྭ་ཁུའི་དགོས་མཁོ་ཙམ་ལ་གཡེང་ཞོར་རྫོང་ལ་ཕྱོགས་ནས་ཟས་གོས་ཡོ་བྱད་དང་བྱ་དངོས་གསར་པ་ལ་ལྟ་འདོད་ཐོས་འདོད་བྱེད།ནམ་མཁའ་ཐོད་ལ་འཛིན་དུས་དང་ས་གཞི་གོམ་པས་འཇལ་དུས་སུ་མཐའ་ཡས་པའི་རྩྭ་ཐང་རྒྱབ་ཏུ་བསྐྱུར་ནས།རྒྱང་ལ་ཆས་སྙམ་གྱིས་རྫོང་དུ་འབྱོར་ཐེངས་རེར།རེ་སྙེག་གི་འདུན་པ་ཟབ་མོར་ནི་སྤྲོ་སྣང་གི་མཁའ་དབུགས་གསར་པ་ཞིག་བཅོས་མེད་དུ་སྐྱེ།སྤྲོ་སྣང་དེ་རིགས་སྤྲིན་གསེབ་ཀྱི་ཉི་འོད་འཚེར་བ་ལྟར་ཧ་ཅང་རྣོ་ལ་ཧ་ཅང་གསལ།སྤྲོ་སྣང་དེ་ཡིས་སྔར་བཞིན་ཅི་ཡང་མ་བརྒལ་བར་ས་ཆེན་དང་རི་རབ་ཀྱི་ཕང་བ་ནས་ཕྱིར་ལ་ལོག་ནའང་།རེ་ལྟོས་ནན་མོ་ཞིག་དང་སྐེ་སོ་གཉོམ་པོ་ཞིག་ཡང་ཡང་ཁྱེར་བ་ནི།འགྱུར་ལྡོག་རིགས་ཤིག་གི་མགོ་བརྩམས་པས་ཡིན་ཡང་སྲིད།

　　དེ་དུས་ཀྱི་རྫོང་མཁར་ཧ་ཅང་ཆུང་ནའང་།མི་མང་པོ་ཞིག་གི་མཚར་སྣང་དང་དགའ་སྤྲོ་ཤོང་ཡོད།གདོང་གཏད་པའི་ཁང་མིག་དག་གི་བར་དུ་མགོ་རལ་བ་དང་ལུས་སློག་པ་བྱས་པའི་ངོ་གདོང་དམར་སྨུག་ཅན་གྱི་ཡུལ་མི་མང་པོ་གཅིག་ཏུ་འདུས་ཡོད།ཁོ་ཚོས་རླུང་ཆེན་གཡུག་ཕྱོགས་དང་ཁ་བ་འབབ་སྟངས་ཀྱི་ཚོད་བགམ་ཞོར་སྟོད་ཀྱི་དཔོན་པོའི་དར་རབས་རྒུད་རབས་དང་སྨད་ཀྱི་དཔའ་བོའི་སྐྱེ་རབས་འཆི་ཚུལ་གླེང་།འུར་ཟིང་ཆུང་ཆུང་དེའི་དཀྱིལ་ནས་ལྷིང་འཇགས་ཀྱིས་བསྙལ་བའི་རྣམ་ཤེས་རྒྱང་ལ་ཕྱོགས་པས།ལྐོག་གྱུར་གྱིས་བཀྲ་བའི་དངོས་རྫས་ཐར་ཐོར་གྱི་སྣང་བ་ལྟ་ན་སྡུག་ལ།རྫོང་ནས་རླངས་འཁོར་རིག་ཚུལ་དང་རྒྱང་ན་གནམ་གྲུ་འཕུར་ཚུལ་གྱིས།མིག་ཟུང་ཅེ་རེར།ལྟོས་དང་།ཕ་གིའི་རྡུལ་འཚུབ་ཁྲིད་པའི་ནག་ཐིག་གན་ནི་ཆི་ཁྲེ༼རླངས་འཁོར༽ཞིག་ཡིན་པ་འདྲ་ཟེར།དེ་དུས།རྟ་ཕོ་གོམ་པ་ཅན་དེ་དང་གཡག་རྒན་སྣ་ཐིག་ཅན་དེས་ཀྱང་ཐང་ཆེན་ཐང་ཆུང་བརྒྱུད་ནས་བྱིས་པ་ཚོའི་རེ་ལྟོས་ལ་འཇགས་པའི་ཉག་ག་ཕྲ་མོ་དལ་བ་དལ་བུར་སྒུལ་བར་བྱེད།ཁྱིམ་མི་ཚོའི་རེ་སྒུག་ལ་འཕོས་པའི་གཟུགས་བརྙན་མག་མོག་ཡུན་གྱིས་ཡུན་གྱིས་གསལ་བར་བྱེད།སྔུན་བསུར་རྒྱུག་འོང་བའི་བྱིས་པ་དག་གི་རེ་བཅོལ་ལ་ཀ་ར་རིལ་རིལ་ཙམ་རེའི་བགོ་སྐལ་ལས་མེད་ནའང།སྐད་ཅིག་མའི་མངར་ཁ་དེ་ཡིས་ཉིན་གཅིག་གི་སྐོམ་པ་སེལ་འགྲོ།རྫོང་གིས་བྱིན་པའི་སྤྲོ་སྣང་གི་ལོངས་སྤྱོད་དེ་ནི་དེ་འདྲའི་བག་ཡོད་ཚུལ་ལྡན་ཞིག་རེད་ཨང་།དེ་དུས།རྫོང་ཐོག་ལ་སོང་བ་ནི་རྫོང་ཐོག་ནས་ཕྱིར་ལོག་པ་རྐྱང་རྐྱང་ལ་གོ རི་དང་གཙང་བོས་ཆོད་པའི་རྒྱང་རིང་ཞིག་ན་རྫོང་མཁར་ནི་རེ་སྨོན་ཆུང་ཆུང་ལྟར་ཆགས་ཡོད་ལ།མི་རྣམས་ནི་རེ་སྨོན་དེའི་ཁུག་ན་ཕར་འགྲུལ་ཚུར་ལོག་ངང་འཚོ་བཞིན་ཡོད།

　　འགྲོ་འོང་གི་རྡང་ལ་ཆགས་པའི་ཁང་མིག་ཇེ་མང་དུ་སོང་བ་ནས།ཡུལ་མི་ཚོ་སྔར་བཞིན་ཐག་རིང་གི་ཤ་ཉེར་སྐོར་རྒྱག་པ་ལྟར་སྐབས་དང་སྐབས་ཀྱིས་རྫོང་ལ་ཡོང་ནས་ཕྱིར་ལོག་འགྲོ་ནའང་།ལམ་ཕྲན་ལ་ཐོགས་པའི་མི་སྣ་སྐོར་ཞིག་ནི་རླུང་གིས་དེད་དེ་སྲང་མདོ་འདི་ནས་སིལ་ཏོག་སྨིན་པ་ལྟར་གཏན་དུ་ལུས་མགོ་ཚུགས།རླངས་འཁོར་ལྗང་ཁུ་རེའི་འཚམས་འདྲི་ཐར་ཐོར་གྱིས་གྱོ་ཁང་གི་འདུ་འཛོམས་ལ་མཁའ་དབུགས་གསར་པ་ཞིག་གམ་མི་སྣ་མང་པོ་ཞིག་བསྡུས་ཤིང་།འདྲུད་འཁོར་གཅིག་གཉིས་རེའི་སྦག་སྒྲ་དང་ལྷན་དུ་རྒྱ་རྒན་ཐང་བཙོང་འགའ་ཡང་གཅིག་འཕྲོར་གཅིག་གིས་སླེབས།བློ་ཁ་འདྲེན་པའི་མི་དང་བྱ་དངོས་ཇེ་མང་དུ་གྱུར་བ་ནས་འདུ་འཛོམས་ཀྱི་ཡོ་ལང་ལ་སྤྲོ་སྣང་གི་འགུག་ཤུགས་གཞན་ཞིག་རྒྱས།དེ་ནི་འབར་ཞུན་དང་མགོ་སྐོར།སྔོ་དུད་དང་དཀར་ཐོ།ངོ་ལྟ་དང་ངོ་འཕུར།པུས་འབོལ་ཤ་འབྱར་དང་ཚི་ལེན་ཐར་རྐྱང་སོགས་ལ་འབྲེལ་བའི་རེ་སྙེག་གི་འབོད་པ་ཞིག་ཡིན།འབོད་པ་དེ་ཡིས་ལོ་ཆུང་དག་སློབ་གྲྭ་ཞེས་པའི་ས་ཁང་སྒལ་ཟུར་དག་གི་གསེབ་ལ་དྲིལ་ཞིང་།རྒན་པོ་དག་སྲིད་གཞུང་ཞེས་པའི་གྱོ་ཁང་དམར་མདུང་དག་གི་ནང་ལ་བོས།དེ་ནས་བཟུང་མི་དག་གི་རྣམ་ཤེས་རྫོང་ལ་གཏད་ཡོད།རྫོང་གི་བཀོད་པ་ལ་གཏད་ཡོད།རྫོང་གི་ལམ་ཕྱོགས་ལ་གཏད་ཡོད།དེ་ལྟར་ཡོད་ཚད་ལམ་བྱུང་བ་ནས་མགོ་བརྩམས་ཏེ་ལམ་དང་འགྲོགས་ནས་འགྱུར་ལྡོག་བྱུང་།

　　ལམ་གྱིས་ཁྱེར་ཡོང་བའི་ཤིང་རྟ་འཁོར་ལོ་དྲུད་པའི་རྒྱ་རྒན་ཐང་བཤམས་དེ་དག་གིས་ཕར་མཁོ་ཚུར་ནས་ཉོས་ཤིང་ཚུར་མཁོ་ཕར་ལ་བཙོངས་ཏེ་མཁོ་དངོས་ཙག་ཙིག་གི་འདོད་པ་ཐང་དུ་བརྡལ།ཁོ་ཚོ་གང་ནས་ཡོང་བ་སུས་ཀྱང་མི་ཤེས་མོད།ཁོ་ཚོ་རྫོང་ལ་ཐོན་པ་ནས་བཟུང་།ཁོ་ཚོའི་ཉམ་ཆུང་བའི་ཚུགས་ཀར་ཡུལ་མི་ཚོ་རྟག་པར་སྙིང་རྗེ་སྐྱེ་ལ།ཁོ་ཚོའི་ལུས་ནས་དུས་འགྱུར་གྱིས་ཐེབས་པའི་གདུང་སེམས་རིགས་ཤིག་ལ་མཉམ་སྐྱེད་ཐོབ་པ་དང་།མི་རྟག་ཆོས་ཀྱི་རང་བཞིན་ཞིག་དྲན་ཏུ་བཅུག་པ་གང་ཡིན་ཆ་མ་འཚལ།དེ་ནི་སྙིང་རྗེ་ཁོ་ན་ཞིག་ཀྱང་མིན་པ་འདྲ་སྟེ།ལས་ཀ་དང་བྱ་སྤྱོད་ལ་རྩེད་སྡུག་བྱེད་པའི་པྲ་ཆལ་གྱི་རྣམ་འགྱུར་རེ་རེས་ཁོ་ཚོའི་འདོད་འདུན་དང་བཟོད་བསྲན་ལ་ཚོད་དཔག་བྱེད་པ་ནི།མཉམ་གནས་ཀྱི་བརྒྱུད་རིམ་ཞིག་དང་འབྲེལ་འདྲིས་ཀྱི་གོ་བརྡ་ཞིག་ཀྱང་ཡིན་སྲིད།

　　ཡུལ་མི་ཚོ་རྫོང་གིས་བྱིན་པའི་རེ་སྨོན་གྱི་སྣེ་གཉིས་སུ་ཕར་འགྲོ་ཚུར་འོང་གིས་བསྡད་པ་ལྟར།ཕྱོགས་ཕྱོགས་ནས་ཡོང་བའི་རྒྱ་རྒན་ཨོང་འཐུ་དང་ཧེ་རྒན་ལུག་ཉོ།ལས་བྱེད་ལག་དཀར་སོགས་ཀྱང་རྫོང་འདིར་བཅངས་པའི་རེ་སྨོན་གྱི་ཁུག་པ་ནས་ཕར་ལྟ་ཚུར་ལྟའི་ངང་གཞིས་ཆགས།ཁོ་ཚོའི་འཚོ་གནས་ཀྱི་རྣམ་འགྱུར་རེ་རེ་ནི་ལེ་བདའ་དང་འཁང་ར་མེད་པར་ལས་དབང་གི་བཀོད་སྒྲིག་དང་དུ་ལེན་པ་ལྟར་ས་ཆ་འདིའི་ཁོར་ཡུག་དང་མི་རྣམས་ལ་རྒྱུས་ལོན་བབ་བསྟུན་བྱེད།ཁོ་ཚོས་འབྲོག་པ་ཚོའི་ལག་བརྡ་རེ་རེ་དང་སྐད་གདངས་རེ་རེ་བརྒྱུད་རྒྱུན་སྤྱོད་ཀྱི་བོད་སྐད་ཐར་ཐོར་ཐོགས་མེད་དུ་ཤེས།དེ་ལྟར་ཡུལ་ལུང་འདིའི་གོམས་སྲོལ་དང་ཁྱད་ཆོས་ལ་དང་དོད་སྒོས་འཚོ་ཚིས་ཀྱི་ཉེར་ལེན་ལ་མཁོ་བའི་ཚོང་ཟོང་གི་བརྗེ་རེས་ཅི་རིགས་དགོས་འདོད་ལྟར་བྱེད།

　　སྐབས་ཐོག་དེའི་རྫོང་མཁར་ནི་གྱོ་ཁང་དམར་ཐར་རེར་འཐོར་བའི་དུས་ཤིག་སྟེ།མི་དག་ཡུན་གྱིས་འདྲེས་པ་ན་ཁང་བའང་ས་ནས་སྐྱེས་པ་ལྟར་ཇེ་མང་ནས་ཇེ་མང་དུ་སོང་ཞིང་།ལམ་ཕྲན་ཡང་ས་ཁར་བུད་པ་ལྟར་ལོ་རེ་ནས་ལོ་རེར་སྐྱ་ཤ་ལེར་མིག་ལ་གསལ།ལམ་གསལ་བའི་འགྲོ་འོང་ནི་མཁོ་ཆས་གསར་པ་དང་ཟ་སྣ་འཆའ་རིགས་ཀྱི་སྣེ་འདྲེན་དུ་གྱུར་བས།ཡུལ་མི་ཚོ་སྔར་བཞིན་གཡག་རྒན་ཚ་སྣ་བླངས་ནས་རྫོང་ལ་འགྲོ་ཞིང་།རྟ་རྒན་འཕོངས་ཞོན་བྱས་ཏེ་རྫོང་ལ་འགྲོ།རྫོང་ཐོག་ན་མཚར་སྣང་གི་སྤོད་ཡར་ཟ་ཁང་གི་ཟས་བཅུད་དང་ཚོང་ཁང་གི་ལྟད་མོ་ཡོད་པས།ཨ་ཕས་ཞི་ལུར་ལུག་ལ་ལྟོས་དང་གཞུག་ནས་རྫོང་ལ་འཁྲིད་ཟེར།ཨ་མས་ཞི་མོར་ནོར་ལ་སོང་དང་རྫོང་ནས་ཟ་ཁང་ལྡུད་ཟེར།དེ་ལྟར་དང་ཐོག་གི་སྤྲོ་སྣང་རྐྱང་རྐྱང་ལ་ལོངས་སྤྱོད་ཀྱི་འགུག་ཤུགས་འཕར་མས་ལྡོག་མེད་ཀྱི་བསླུ་བྲིད་ཐེབས་པས།ཨ་ཁུ་ཚེ་རིང་ཟླ་བ་རེ་རེར་རྫོང་ཐོག་ལ་ཐེངས་རེ་འགྲོ་ཞིང་།ཨ་ཞང་དོན་འགྲུབ་དུས་ཚིགས་རེ་ལ་རྫོང་ཐོག་ཏུ་ཐེངས་རེ་འགྲོ།དེ་དུས་རྫོང་ཐོག་ལ་སོང་རྗེས་འདས་སོང་ལ་དྲན་གདུང་དང་མ་འོངས་པར་བསམ་གཞིག་མེད་པར་ལུས་གཙང་སེམས་གཙང་ངང་ཕྱིར་ལོག་འགྲོ།དེ་དུས།ཕྱིར་ལ་ལོག་ན་རེ་ལྟོས་ཀྱི་བསུ་མ་ཆེན་པོ་དབེན་ནའང་།རུ་བ་དང་ནོར་ལུག་གིས་ཁེངས་པའི་འབྲོག་ཐང་དེ་ན་ནང་མི་དག་སྔར་བཞིན་ངོ་གདོང་སྣུམ་ཆིལ་ལེར་བསྡད་ཡོད།

　　ལམ་ཕྲན་གྱི་ཁ་ཞེང་ཇེ་ཆེར་གྱུར་ནས་རི་ལུང་གི་བར་ཐག་ཉེ་བར་བསྟུངས་པས།མི་རྣམས་ལྗིད་འཁོར་གྱི་ཨོང་གཞོང་དང་མགོ་ཐོག་ཏུ་རུབ་ནས་སྨད་ཀྱི་རོང་ཁོག་ཏུ་སྨོན་ལམ་ལ་འགྲོ་ཞིང་སྟོད་ཀྱི་ལྷ་ས་ལ་མཆོད་མཇལ་དུ་སོང་།དམ་པ་དང་མཁས་པ་དག་གིས་དཀའ་ངལ་ཁྱད་དུ་བསད་ཅིང་།དཔོན་པོ་དང་ཕྱུག་པོ་དག་གིས་ཁལ་འདེད་རུ་འགེལ་བྱས་པའི་ལོ་ཐོག་ལོ་བརྩེགས་ཀྱི་འགྲུལ་བཞུད་རིང་མོ་ནི་འཕྲུལ་ཆས་ཀྱི་སྒལ་བ་ནས་ཟླ་ལམ་འགའ་ཡིས་གཅོད་དུས།མི་དག་གི་སེམས་ལ་བསྐལ་བཟང་གི་དགའ་སྟོན་རྒྱས།ཁོ་ཚོས་སྐུད་མེད་ཀྱི་གློག་རླབས་བརྒྱུད་ནས་བཟའ་མི་ཡོངས་བདེ་ལེགས་ངང་ལྷ་སར་འབྱོར་ནས་ད་ལྟ་ཕྱིར་ལོག་གིན་ཡོད་ལ།ཚེས་བཅོ་ལྔའི་ཉིན་ལུང་ནག་མདོ་ལ་ཁལ་མ་བཅུ་དེད་ནས་སྔུན་ལ་ཤོག་ཅེས་སྐད་བསྐུར་ལ།སྐད་དེ་འང་རུ་ཁ་ཁྱིམ་མཚེས་དང་མི་ཁ་རྟ་ཐོག་བརྒྱུད་ནང་མི་རེ་རེའི་རྣ་བའི་དཔྱིད་དུ་ཤར་ཞིང་སེམས་ཀྱི་དྲོད་དུ་བབས་ཡོང་།དེ་ལྟར་འཕྲེད་གཞུང་དུ་བརྐྱངས་པའི་ལམ་ཕྲན་གཉིས་ཀྱིས་མི་དག་གི་དྲན་པ་རྫོང་ལ་བསྡུས་ནས་རྒྱང་ལ་བསྲིངས།ཁོ་ཚོས་ཡོད་ཚད་ཀྱི་ཡོད་ཚད་སྒྲ་སྡུད་འཕྲུལ་ཆས་ལྟར་ཕྱི་རོལ་ཕྱི་རོལ་ཞིག་ན་ཡོད་པར་འདོད།

　　ས་བབ་ཁོར་ཡུག་གི་དབང་བཙན་པའི་ཡུལ་ལུང་འདིའི་མི་རྣམས་ཀྱིས་ཡོད་ཚད་ས་ཆེན་གྱི་བྱམས་བརྩེ་དང་སེམས་ཅན་༼ཟོག༽གྱི་བཀའ་དྲིན་གྱིས་འཚོ་བར་བསམས་མོད།རྫོང་ཐོག་ལ་འགྲོ་རྒྱུ་ཇེ་མང་དུ་གྱུར་བ་ནས།རྫོང་ཐོག་ལས་ཐོབ་པའི་ཡིད་ཆེས་རིགས་ཤིག་ཁད་ཀྱིས་ཁད་ཀྱིས་གསེང་དང་གཏིང་ལ་རླུང་ལྟར་ལྡང་།རྒྱང་དུ་འཐེན་པའི་ལམ་ཕྲན་རིང་མོ་ཇེ་མཐོ་ཇེ་བཀན་ངང་ས་ལ་ཟུག་པ་ནས་རྫོང་མཁར་ནི་འདབ་གཤོག་བརྐྱངས་པའི་བྱ་རྒོད་ཅིག་ལྟར།རི་ལུང་འདིའི་ཕར་ནང་ལ་འཕུར་བར་རེ་སྐུལ་གྱི་གཤོག་འགྱུར་ལྷུར་དུ་ལེན།རྒྱུན་རིང་བའི་ཕར་འགྲོ་ཚུར་འོང་ནི་རྫོང་ལ་འགྲོ་བ་ཙམ་མ་ཡིན་པར་གནའ་རིང་ད་ཐོག་ཏུ་ས་ཆེན་གྱིས་སྤྲད་པའི་འཚོ་གནས་ཀྱི་བཀའ་བཀོད་དུ་རྟོགས་ནའང་།སྤྱི་ས་གཞུང་ལ་བླངས་ཤིང་།གཞུང་ས་སྒེར་ལ་བགོས་པ་ནས་བཟུང་མི་རྣམས་ཀྱིས་གཞི་ནས་རྩྭ་ཐང་དང་རི་ལུང་ལ་ཕྱིར་བདག་རྒྱག་མགོ་ཚུགས།

　　དེ་ལྟར་གནས་གཅིག་ཏུ་བསྡད་པ་ནས་འགྲོ་འོང་ནི་རྩྭ་ཐང་དང་རི་ལུང་ལ་འབྲེལ་བ་མེད་པར་རྫོང་ཁོ་ནར་དམིགས་སུ་བྱེད་པ་བཞིན་ཡང་དང་བསྐྱར་དུ་དེ་ལ་ཤོར།རྫོང་ལ་འགྲོ་ཐེངས་ཇེ་མང་དུ་གྱུར་བ་ན་རྫོང་ལས་ཐོབ་པའི་བྱ་དངོས་མང་པོས་ཀྱང་འཚོ་བའི་ཟ་ཟུར་ཟིན་ཏེ།སྦྲ་ཡི་རེ་ལྡེ་རས་གཞི་ཡིས་ལྷན་ཞིང་ཁྱིམ་གྱི་འོ་ཟོ་འཕྲུལ་འཁོར་གྱིས་ཚབ།རྟ་གཡག་གི་སྐྱེལ་འདྲེན་ལ་འདྲུད་འཁོར་གྱི་མཐུན་རྐྱེན་བྱུང་ཞིང་ཤ་མར་གྱི་བཟའ་བཅའ་ལ་སྔོ་ཚལ་གྱི་བྲོ་བ་བུད།རང་ས་གྲུ་བཞི་རེའི་སྟེང་ནས་རི་ལུང་ཐང་གསུམ་ལ་རྫོང་ལྟར་ཆགས་ཏེ་རང་གི་ཕྱུགས་ཟོག་ལ་ལྟ་ཞོར་རྫོང་དང་རྫོང་གི་འགྱུར་ལྡོག་ལས་ཕན་ཐོགས་པའི་ཡོ་བྱད་ཅི་ཡོད་ལ་རྣ་བ་གཡེང་ཞིང་སྟབས་བདེ་བའི་འཕྲུལ་ཆས་གང་ཡོད་ལ་སེམས་པ་གཏད།

　　སྐབས་ཤིག་རྫོང་གི་ཆགས་སྲོལ་ལྟར་ཁྱིམ་ཚང་རེ་རེས་རང་གི་ས་ཐོག་ཏུ་གྲོང་གི་རྒྱ་མིའི་ལག་ནས་ཤིང་ཉོས་ཤིང་སྨད་ཀྱི་རོང་བ་བཅོལ་ཏེ་གྱང་བརྡུངས་ནས་ཁང་མིག་གྲུ་བཞི་རེ་མགོ་སྦྲ་སྨུག་པོ་དེའི་ཚབ་ཏུ་ཕུབ་ཅིང་།རང་ཉིད་ལ་ཐེམས་པའི་ས་ཆུ་སྤྱད་དེ་གཏན་དུ་འདུག་ཚུགས་བཟུང་།ཁང་པ་དྲོ་རབས་བདེ་རབས་དང་འཚོ་བ་སྐྱིད་རབས་རྒྱས་རབས་ཀྱིས་ལོ་རྒྱུས་ཞེས་པ་ལ་ལྟ་སྟངས་གསར་པ་ཞིག་དང་མ་འོངས་ཞེས་པ་ལ་རེ་འདུན་སོ་མ་ཞིག་བཅངས།སྐབས་འདིར་དགུན་གྱི་ཁ་བ་དང་དབྱར་གྱི་ཆར་ཆུ་ལ་འཐབ་པའི་འདས་སོང་གི་མྱོང་བ་རེ་རེ་དྲན་འཛིན་གྱི་ཞིང་ས་ན་རང་བྱུང་ལྷུན་ཆགས་སུ་སྨིན་ཡོད་ནའང་།བསམ་གཞིག་གིས་བསྐྱེད་པའི་གོ་རྟོགས་ཤིག་གིས་དཀའ་སྡུག་དང་དབུལ་ཕོངས་སུ་མཐོང་ཞིང་།དུས་རབས་ཀྱིས་བསླུས་པའི་རྨོངས་ཚོད་ཅིག་གིས་རྗེས་ལུས་དང་ཀླ་ཀློ་ཞེས་པའང་ཡིན་ན་ཐང་སྙམ།

　　བབ་ཆགས་ཀྱི་ལད་མོ་དེ་ལས་བློ་རིག་གི་སྒོ་མོ་རྫོང་ལ་ཕྱེས།རུ་ནང་ནས་རྫོང་ལ་ཕྱོགས་ནའང་སློབ་གྲྭ་ནས་རི་ལ་འབྲོ་བའི་འབྲོག་ཕྲུག་རིག་པའི་ནེའུ་ལྡང་དག་གཅིག་རྗེས་གཉིས་ལོབས་ངང་སློབ་གྲྭར་སོང་བ་ན།མི་རྣམས་ཀྱི་ཡིད་སྨོན་ལ་སྤྲད་པའི་ལེགས་སྐྱེས་མང་པོའང་ཆར་རྗེས་ཀྱི་ཤ་མོ་ལྟར་གཅིག་ལས་གཅིག་མགྱོགས་ངང་བརྡོལ།འཕྲེད་གཞུང་དུ་བརྐྱངས་པའི་ལམ་ཕྲན་ལམ་ཆེན་དུ་གྱུར།ཐང་དཀྱིལ་དང་རི་སྐེད།ན་འདབས་དང་ལུང་ཁུག་ཏུ་འཐེན་པའི་ལམ་ལག་རེ་རེ་ཇེ་གསལ་ཇེ་གསལ་ངང་སྤང་ལམ་ནས་ས་ལམ་དང་།ས་ལམ་ནས་རྡོ་ལམ་དུ་གྱུར།དེ་དུས།རྒྱ་སྲང་གི་གློག་སྡོང་ལ་བཏགས་པའི་རྟ་གཡག་གི་གྲངས་ཀ་ཇེ་ཉུང་དུ་གྱུར།མགོ་ཡི་རལ་བ་དང་ལུས་ཀྱི་སློག་པའང་ཇེ་ཉུང་དུ་གྱུར།འཕྲུལ་རྟ་གསེག་ཞོན་གྱི་སྣང་བ་རླུང་ལ་སྤུར་ནས་རྫོང་ལ་ཆས་དུས།རྫོང་ཐོག་ན་སྟེགས་ལྒང་གི་རྩེད་མོ་དང་ཝུ་ཆང་གི་སྐྱུར་ཁ་ཡོད།གློག་བརྙན་གྱི་སྒྱུ་འཕྲུལ་དང་ཚོང་ཟོང་གི་བཀྲག་མདངས་ཡོད།དེ་དུས།རྒན་མོ་ཚོས་འོ་མ་དང་ཨོང་བ་བཙོངས་ནས་སྐེ་དཀྲིས་ཉོ་ལ།རྒད་པོ་ཚོས་མར་ཆུར་དང་ཀོ་བ་སྲུང་ཞོར་ཁུ་ནག་འབྱོང་།ཡང་དང་བསྐྱར་གྱི་ཉོ་ཚོང་བརྗེ་རེས་ལས་རྩྭ་ས་དང་ནོར་ལུག་ཁོ་ན་འཚོ་ཚིས་ཀྱི་ཐོན་ཁུངས་གཅིག་པུ་མིན་པར་བསམས་ཏེ།ལ་ལ་རྫོང་ལ་སོང་ནས་རྫོང་ནས་ལུས་ཤིང་།ལ་ལ་རྫོང་ལ་འཁྱམས་ནས་རྫོང་ནས་ཡལ།

　　དེ་ལྟར།ཧྲི་ཁྲང་༼ཁྲོམ་ར༽གི་ཟིང་ལོང་ཇེ་ཆེར་གྱུར།རྫོང་ཐོག་ལ་བཅངས་པའི་རེ་སྨོན་གཙང་མའང་འདོད་པ་ཚ་པོ་ལྟར་སེམས་ལ་རྒྱས།རྒྱ་སྲང་ན་བོད་སྐད་བརྙན་འཕྲིན་གྱི་སྐད་སྒྲ་ལྡིར་ཞིང་སྤང་ཐང་ལ་བདུད་བྷེའི་རྡུང་ལེན་གྱི་འགྱུར་ཁུགས་མཆེད་པའི་སྣང་བརྙན་དེ་ཧ་ཅང་ཡག་ནའང་།དེ་དུས།རྫོང་ཐོག་ལ་སོང་བ་ནི་ཡོང་སྒོ་དང་བརྗེ་རེས་རྐྱང་རྐྱང་གི་དོན་ཏེ།ཁོ་ཚོས་ཧེ་རྒན་ཚོས་རྒྱ་གྲངས་སྣོག་པ་ལྟར་ཅི་ཞིག་ཐོབ་འདོད་ཀྱི་མིག་ཟུང་རིག་རིག་འགུལ་ནས་རྐུ་ཐུབ་པར་རྐུན་དང་བསླུ་ཐུབ་པར་རྫུན་གྱིས་བསྐོར་ལ།ཕྱི་སྡེ་བའི་འཁོན་འཛིན་བརྗེད་ནས་ཁྱིམ་རུ་ཁར་རྩོད་གླེང་བྱེད།དེ་དུས།མི་རྣམས་ཅི་ཞིག་ཐོབ་འདོད་ཀྱི་འདོད་པས་གཟེར་ཏེ་སྔ་ཕྱི་བྱས་ནས་རྫོང་ལ་འགྲོ།རྒད་པོ་ཚོས་མར་ཕྱུར་བཙོངས་རྗེས་ཉིན་ཞག་ཉི་མ་རྫོང་ནས་གཏོང་ལ།གསར་བུ་ཚོས་སྲང་བར་ཉུལ་ནས་ཉིན་དཀར་ཉི་མ་རྫོང་ནས་འཕུད།འདུ་འཛི་དང་འུར་ཟིང་གི་གསེབ་ནས་དཔག་ཏུ་མེད་པའི་མ་འོངས་པ་ཞིག་མངོན་ཙམ་མངོན་ཙམ་བྱེད་པ་ལྟར།མི་དག་གིས་ས་གཤིས་ཡུལ་ཁམས་དང་སྒོ་ཕྱུགས་གསོ་སྐྱོང་ལས་ཐོབ་པའི་རང་བྱུང་གི་དྲན་ལུགས་འཚོ་ལུགས་དང་།ཡུལ་སྲོལ་གོམས་གཤིས་དང་ཆོས་ལུགས་རིག་གནས་ཀྱིས་བསྐྱེད་པའི་ལྷན་སྐྱེས་ཀྱི་འགྲོ་འདུག་སྤྱོད་ལམ་ལས་ལྷག་པའི་སྒྲིག་ལམ་ཞིག་དང་འགྲོ་སྟངས་ཤིག་གསར་དུ་ཆགས་ཀྱིན་པ་ཚོར།འགྲོ་སྟངས་དེ་ཡིས་ཡོད་ཚད་མཐའ་ལ་འདེད་པ་ལྟར།ཁོ་ཚོས་རང་ཉིད་ཀྱི་ལུས་ཐོག་ནས་རྗེས་ལུས་དང་བླུན་རྨོངས་ཞེས་པའི་སྐད་ཆ་གསར་བ་ཞིག་ལ་ངོས་འཛིན་བྱེད།ཁོ་ཚོས་བྱིས་པ་དག་ལ་སློབ་སྦྱོང་ཡག་པོ་བྱོས་དང་།ཁྱོད་ཚོ་ནི་ང་ཚོ་ལྟ་བུའི་གླེན་པ་ཞིག་ཡིན་མི་སྲིད་ཟེར།ཁོ་ཚོས་དང་ཐོག་རྫོང་ལ་ཡོང་བའི་རྒྱ་རྒན་དག་གི་ལུས་སྟེང་ནས་མཐོང་བའི་ཉམ་ཆུང་གི་ཚོར་བ་དེ་རིགས་དལ་བ་དལ་བུར་རང་གི་ལུས་ལ་འཁོར་བ་ཤེས།

　　དེ་ལྟ་ནའང་།བྱ་དངོས་གསར་བའི་རླབས་རྒྱུན་ནི་ཡུལ་ལུང་གི་ཕྱོགས་རིས་དང་དབུལ་ཕྱུག་གི་ཁྱད་པར་མེད་པར་ཀུན་ལ་ཁྱབ་འགྲོ།འབྲོག་གི་ཐལ་སྤུངས་འདབས་ཀྱི་གློག་གཡིས་གཅིར་རོ་དག་ཇེ་ཉུང་ཇེ་ཉུང་ངང་ས་འོག་ཏུ་ནུབ་ནས་ཡར་སྒྱེད་ཀྱི་པྲ་ཚུལ་སྒྲོན་མེ་ཉི་གློག་གིས་ཚབ་ཅིང་།གྲོང་གི་ལམ་ཆེན་འགྲམ་གྱི་གློག་སྡོང་ནག་པོ་དག་ཇེ་མང་ཇེ་མང་ངང་རྒྱང་རིང་ལ་བསྒྲིགས་ནས་རྫོང་ཐོག་གི་སྲང་མཐའ་གློག་འོད་ཀྱིས་བརྒྱན་དུས།མི་དག་ལམ་དང་རྫོང་གིས་ཁྲིད་པའི་གཟུགས་མེད་ཀྱི་སྟོབས་ཤུགས་དེ་ལ་ཡིད་ཆེས་དང་དད་འདུན་སྐྱེས།ཁོ་ཚོས་གཟུགས་མེད་ཀྱི་སྟོབས་ཤུགས་དེར་ཚན་རིག་ཅེས་བསྙད་ལ།ཚན་རིག་ནི་ངོ་མ་ཡ་མཚན་རེད་བསམས།ཁོ་ཚོས་གཅིག་འཕྲོར་གཅིག་གིས་སློབ་གྲྭར་སོང་བའི་བྱིས་པ་དག་ཚན་རིག་གིས་ཁྲིད་ནས་རྒྱང་ལ་བུད་འགྲོ་ཞིང་།སྒྲ་སྡུད་སྐུད་ལམ་ནས་གོ་བའི་ལྐོག་གྱུར་གྱི་གནས་དེ་དང་བརྙན་འཕྲིན་གློག་ལམ་ནས་མཐོང་བའི་ངོ་མཚར་གྱི་གནས་དེ་ལ་སོང་ནས་ཕྱིར་ལོག་མི་སྲིད་སྙམ།

　　བྱིས་པ་དག་སྐོར་དང་སྐོར་གྱིས་སློབ་མཐར་ཕྱིན་ཏེ་རྫོང་ཐོག་ནས་ཁུལ་ཐོག་དང་ཁུལ་ཐོག་ནས་ཞིང་ཆེན་ཏུ་འགྲོ་དུས།ཡུལ་མི་ཚོས་ད་གཟོད་གསལ་ལེར་བཏོད་པའི་ལམ་ཕྲན་འདི་དག་གི་སྣེ་མོ་ནི་གྲོང་ཁྱེར་ཞེས་པ་དེ་དང་འབྱོར་ཕྱུག་ཅེས་པ་དེ་ཡིན་པ་རྟོགས་ལ།ཁོ་ཚོས་བརྙན་འཕྲིན་ལས་མཐོང་བའི་ལྟད་མོ་རེ་རེ་སང་ཉིན་གྱི་རྨི་ལམ་དུ་སྒོམ་ནས་རྫོང་ལ་འགྲོ།རྫོང་དང་ལམ་གྱིས་བསྟན་པའི་ཁ་ཕྱོགས་དེ་ན་བདེ་སྐྱིད་ཀྱི་འཚོ་བ་ཟེར་བ་ཞིག་ཡོད་སྣང་སྐྱེས།སྔོན་ཆད་བདེ་སྐྱིད་ཅེས་པར་འདང་བརྒྱབ་མ་མྱོང་ནའང་ད་ལྟ་དེ་ཡིས་བསླུས་པའི་སེམས་པ་ཞིག་གིས་རྒྱང་ནས་རྒྱང་ལ་དབང་མེད་ཁྲིད་པས།རྫོང་ཐོག་གིས་ཅི་ཞིག་སྟེར་ནུས་པ་སུས་ཀྱང་མི་ཤེས་ནའང་།ཁོ་ཚོས་རྩྭ་ཐང་དང་ནོར་ལུག་བསྐྱུར་ནས་རྫོང་ལ་སོང་།དེ་དུས།སྟོད་ཀྱི་བཀྲ་ཤིས་སྔོ་རིང་ཚང་རྫོང་ཐོག་ལ་བུད་སོང་ཟེར་ལ།སྨད་ཀྱི་རབ་བརྟན་ཉ་མགོ་ཚང་ཡང་རྫོང་ཐོག་ལ་བུད་སོང་ཟེར།དེ་དུས།རྫོང་ཐོག་ལ་སོང་བ་ནི་རྩྭ་ཐང་དང་ཁ་བྲལ་བར་གོ་ལ་རྫོང་ཐོག་ནས་གཏན་དུ་བསྡད་པར་ཡང་གོ

　　ཡུན་གྱིས་རི་བོའི་ལྟེབ་གཉེར་དུ་ལུས་པའི་རྐང་རྗེས་ལམ་གྱིས་བསུས་ཤིང་ཆུ་བོའི་འགག་འཕྲང་གིས་བཅད་པའི་གོམ་པ་ཟམ་གྱིས་དྲངས་རྗེས།རྫོང་ནི་ས་ཆ་འདིའི་རྫ་ལུང་རི་ལུང་དང་སྟོད་སྨད་བར་གསུམ་དུ་ཁྱབ་པའི་ཁྲག་རྒྱུན་དྲོན་མོ་ལྟར།མི་དག་གི་བསམ་པའི་ཡུལ་དང་འཚོ་བའི་གཞི་རུ་གྱུར།ཡུལ་མི་ཚོས་རང་བྱུང་དང་ས་གཞི་ལ་བཅངས་པའི་གུས་བཀུར་ཟབ་མོའང་རྫོང་ལ་ཕུལ་བ་ནས།རང་གི་ལུས་སྟེང་ནས་མེད་མུག་དང་དབུལ་ཕོངས་ཞེས་པ་རྙེད་ཅིང་།རྫོང་གི་བཀོད་པ་དང་ལྷན་དུ་དུས་ཚོད་ཀྱིས་བསྐྱུར་བའི་སྙིགས་རོ་དེ་དག་རྒྱང་དུ་འདོར་མགོ་བརྩམས།དེ་དུས།ཡུལ་མི་ཚོས་རྩྭ་སའི་ཆེ་ཆུང་དང་ཕྱུགས་ཀྱི་མང་ཉུང་གླེང་།བཟའ་མིའི་ཁ་གྲངས་དང་ཁྱིམ་ཐོའི་ཁྱད་པར་གླེང་།དེ་དུས།སྲིད་ཇུས་ཞེས་པའི་འགྲོ་ཕྱོགས་ཤིག་ཡོད་པ་རྟོགས་ལ།དབུལ་ཐར་ཞེས་པའི་རེ་བ་ཞིག་ཡོད་པའང་ཤེས།

　　མཐའ་ཡས་པའི་རྩྭ་ཐང་ནི་རྫོང་གི་ཕྲ་རྒྱན་གྱིས་སྤུད་དེ།འོད་ལམ་ལམ་རྒྱང་ལ་སྣང་བ་ནི།བར་སྣང་གི་སྐར་ཚོགས་གཅིག་ཏུ་འདུས་པ་དང་འདྲ།དུས་ཡུན་རིང་མོ་ཞིག་འགོར་རྗེས།གློ་བུར་དུ་འཚར་བའི་བྱིས་པ་དག་བརྙན་འཕྲིན་གྱི་ནང་ལ་འདྲེས་ནས་རྒྱ་སྐད་ཐར་ཐོར་ཐོགས་མེད་དུ་བཤད་ཅིང་།རྒྱང་རིང་གི་གྲོང་ཁྱེར་འགྲིམས་པའི་སློབ་མ་རེ་རེའང་སློབ་མཐར་ཕྱིན་སོང་ཟེར་ནས་ཕྱིར་ལ་ལོག ཡུལ་མི་ཚོས་རིག་གནས་ཤེས་བྱ་སྦྱང་མཁན་དག་གི་ལུས་ནས་ནོར་ལུག་འཚོ་སྐྱོང་དང་འཚོ་ཚིས་མཁོ་གཉེར་ཙམ་ཡང་མི་ནུས་པའི་གླེན་ཞད་ཅིག་མཐོང་ལ།རྒྱང་དུ་བུད་འགྲོ་སྙམ་པའི་བུ་ཕྲུག་དག་ཀྱང་འགྲོ་ས་ཅི་ཡང་མེད་པར་ཕྱིར་ལ་ལོག་སྟེ་ཡོང་སྒོ་ཞན་པའི་གཡོག་ལས་ལ་འབད་པ་དེས་རེ་སྨོན་གྱི་མིག་ཁ་ཐ་ཡིས་བཅད།

　　གློག་སྐུད་ཀྱི་དྲྭ་ཚགས་སུ་རླུང་དམར་གྱི་འུར་སྒྲ་འཚག་པ་ལྟར།རླུང་ཆེན་སྨྱོ་བའི་དགུན་གཞུང་འདི་ལ།ཁོ་ཚོ་རྫོང་ཐོག་ལ་ཡོང་ནས་ལོ་བཅུ་ལྷག་འགོར་ཡོད།ཁོ་ཚོས་ཐག་རིང་བའི་རི་ལུང་ལ་རྒྱང་ལྟ་བྱེད་ཞོར་ཕྱིར་རུ་ནང་ལ་ལོག་ན་སྙམ།ཁོ་ཚོས་རང་གི་བུ་ཕྲུག་ལ་ཅེར་ཏེ།འདི་ཚོས་ཕྱུགས་ཟོག་འཚོ་ཤེས་སམ་སྙམ།

　　རླུང་ནི་མི་རབས་ནས་མི་རབས་བར་དྲན་རྒྱུ་ཅི་ཡང་མེད་པ་ལྟར།ཕར་ལ་འུར་འུར་གཡུགས།ཚུར་ལ་འུར་འུར་གཡུགས།སྤྲིན་དཀར་གྱི་འགྱུ་བ་རྒོད་པའི་ནམ་མཁའ་ཡང་སྔར་བཞིན་སྔོ་ཐིང་ངེར་ཡོད་ཚད་རུམ་ལ་ལྷུང་ཡོད་པ་ལྟར་ཡུལ་མི་དག་ལ་བལྟས་ཡོད།ཡུལ་མི་དག་རྫོང་ཐོག་ལ་སོང་ནས་ཕྱིར་ཡོང་བར་བལྟས་ཡོད།

ངའི་སློབ་ཆུང་གི་འཚོ་བ།

　                                                      　༼༢༠༠༦ལོར་རྩེ་ཁོག་རྫོང་མཁར་ཞོལ་སློབ་ཆུང་དུ་བླངས།༽

　　ས་གྱང་གིས་བསྐོར་བའི་གྱོ་ཁང་དམར་མདུང་དེ་དག་ལས་ལྕགས་ཐབ་ལོང་རལ་ཞིག་ཏུ་རུབ་ནས་ཁ་ལག་ཙམ་བསྲེས་ཡུན་ལ།ཐོག་ཁང་སྔོ་ལྡང་གིས་སློབ་ཁང་རྒྱབ་ཀྱི་གཞའ་ས་སྐུང་ས་མང་པོ་ཞིག་གླུམ་སྟེ་ས་རྒྱ་ཆེ་ཙམ་བཟུང་ནས་སྔོ་ལྷིང་ངེར་ལངས་ཙ་ན།ངའི་སློབ་ཆུང་གི་འཚོ་བའི་མགོ་བརྩམས་པ་རེད།དེ་དུས།ཏག་ཏག སྟོང་ལོ་གཉིས་པ་ཚེས་མ་ཐག་སྟེ།དུས་རབས་ཉེར་གཅིག་པའི་འབོད་པ་རྣ་ལ་ལྷུང་དུས་ཤིག་མིན་འགྲོ།འཕྲེལ་གཞུང་དུ་བསྣོལ་བའི་ས་ལམ་གཉིས་ཀྱི་ཁུག་པ་རུ་ཐོག་ཁང་བསྟར་ཆགས་འགའ་ཁ་གཏད་དུ་བསྡད་ནས་སྲང་ཞེས་པའི་འགྲོ་འདུག་གི་གནས་མལ་ཞིག་གྲུབ་པས།འདྲུད་འཐེན་འཁོར་ལོ་དག་ཕྱོགས་དང་ཕྱོགས་ནས་དུ་བ་སྔོ་བརྒྱངས་བརྒྱངས་ཕར་ལ་ཆས་ཤིང་ས་རྡུལ་སྐྱ་འཚུབ་འཚུབ་ཚུར་ལ་སླེབས་ཡོང་།ཐག་རིང་ནས་བལྟས་ན་རྫོང་ཞེས་པའི་ལམ་ཐིག་གི་རི་མོ་དེ་རུ་ལྷང་ངེར་བབས་པ་ནི་ཐོག་ཁང་མཐོན་པོ་གཉིས་ཏེ།ང་ཚོའི་སློབ་ཁྲིད་ཐོག་ཁང་དང་སྲིད་གཞུང་གི་ཐོག་ཁང་གཉིས་ལས་མ་འདས།

　　ཁ་ཤོ་སྣ་རྡིབ་ཀྱི་གྱང་ཆག་དེ་དག་གཅིག་འཕྲོར་གཅིག་གིས་ཕྲ་བུག་རུབ་བེར་ས་ལ་ཐིམ་པ་ལྟར་ཇེ་ཉུང་ནས་ཇེ་ཉུང་།སློབ་གྲྭའི་ས་གྱང་གི་ར་སྐོར་ཆད་པོ་དེའང་ཨར་འདམ་གྱིས་བརྩིགས་ནས་གྲུ་བཞི་གླིང་བཞི་རུ་གྱུར་བས།གཟུགས་མེད་ཀྱི་སྒྲིག་ལམ་རིགས་ཤིག་གཟུགས་ཅན་དུ་སྣང་བ་ལྟར།ང་ཚོ་སློབ་གྲྭར་སོང་བ་ནས་སློབ་གྲྭ་ནི་འབྲོ་མཁན་ལས་འགྲོ་མཁན་མང་པའི་གནས་ཤིག་ཏུ་འགྱུར་མགོ་བརྩམས་པ་འདྲ།ཡང་ན་ཁ་ཡ་ན་ཟླ་དག་རུ་ནང་ལ་བྲོས་ཤུལ་དུ།ང་ཚོ་ནི་འབྲོ་སའང་མེད་པར་གྲོང་མཐའ་འདིར་ལུས་ནས་ཉིན་ལ་སྔ་དགོང་གིས་སློབ་གྲྭ་ལ་འགྲོ་ཞིང་སློབ་གྲྭ་ནས་ཡོང་མཁན་དེ་དག་ཏུ་གྱུར།

　　སློབ་གྲྭ་ཞེས་པ་ནི་ར་སྐོར་དེ་དང་ཐོག་ཁང་དེའང་མིན་པར།ཆེས་ཐོག་མའི་ཁྲ་རིག་རིག་གི་མིག་ཟུང་དེ་དག་དང་འཛུམ་དམུལ་དམུལ་གྱི་ངོ་གདོང་དེ་དག་མ་ཡིན་ནམ།ཐེངས་དང་པོར་སློབ་ཁང་དུ་འཛུལ་བའི་ཉིན་མོ་དེ་ནི་བརྗེད་པར་དཀའ།གཅིག་ཏུ་རུབ་པའི་རྣམ་རིག་རྒོད་པོས་ངོ་གདོང་མང་པོ་ཞིག་གི་བག་ཆགས་བསྲུངས་པ་ནས།ང་ཚོས་གཅིག་གཅིག་ལ་མིག་གིས་འཚོས་ཤིང་།ཕན་ཚུན་བར་རྩེད་ཅིང་དགོད།སྲང་བར་རེ་ནས་ཕན་ཚུན་ལ་འགྲོགས་ཤིང་།སྲང་མདོ་རེ་ནས་གཅིག་གཅིག་ལ་བསྒུགས་ཏེ་ནངས་སྔ་ལངས་ཀྱི་གོམ་ཁ་སློབ་གྲྭར་གཏད་ཅིང་།དགོང་ཕྱི་དྲོ་ཡི་ལོག་མལ་རང་ཁྱིམ་ལ་བཅོལ།གྱང་སྣེ་རེ་རེ་རྩྭ་ཐང་ལ་འདྲེས་ཤིང་།ལམ་ལག་རེ་རེ་སྒོ་ཁ་ལ་ཐིམ་པའི་རྫོང་མཁར་ཆུང་ཆུང་དེ་ནས་ང་ཚོ་ནི་སྡོང་མགོ་གཅིག་ལ་བབས་པའི་བྱ་ཁྱུ་དེ་ཡིན།ཉི་འོད་ལམ་ལམ་གྱི་ཁྲོད་ནས་ཕར་ལ་འཕུར།རླུང་དམར་འུར་འུར་གྱི་ཀློང་ནས་ཚུར་ལ་བབས།ལག་ཆུང་ཁ་རླངས་ཀྱིས་བསྲོས་ནས་ཚུར་ལ་ཡོང་།གོམ་ཆུང་རྡོག་སྒྲ་ལ་གཙུབ་ནས་ཕར་ལ་སོང་།

　　མི་ཚེའི་ནང་གི་ཆེས་དལ་དྲགས་པའི་དུས་ཚོད་དེའི་རིང་རྐང་ལྷམ་གྱི་སག་སྒྲ་རྩེད་འཇོ་ལ་གཡེང་སྟེ་ཉི་མ་རེ་རེར་སློབ་གྲྭར་སོང་བ་ནས་བཟུང་སྟེ་འགྲུལ་བཞུད་ཡོད་ཚད་ཀྱི་མགོ་བརྩམས་པ་ཡིན་ནམ།ཡང་ན་གཏམ་རྒྱུད་མང་པོ་ཞིག་གི་བློས་བསླང་བརྙན་རིས་ལས་བབས་ཉིན་ནས་སུ་ཞིག་གི་བློ་ཁ་བདེ་མྱོང་།ཕྱིར་འདང་རེ་བརྒྱབ་ན་བརྗེད་པར་དཀའ་བའི་སྣང་བརྙན་ཐར་ཐོར་ནི་སློབ་ཁྲིད་ཚོགས་དུས་ཀྱི་ཀ་ཁ་ག་ང་སོགས་མ་ཡིན་པར་སློབ་ཐུན་གྲོལ་སྐབས་ཀྱི་རྩེ་དགའི་ཡོ་ལང་དེ་ཡིན་པ་ད་ལྟ་ད་དུང་ཚང་མ་འུར་གྱིས་ཞོགས་པ་ལྟར་དྲན་འཛིན་གྱི་ཡོལ་རིས་ཀུན་ལ་འདས་དོན་གྱི་རི་མོ་སྣ་ཚོགས་ཁྲ་ལམ་མེར།དལ་དྲགས་པའི་ལོ་ཟླ་དེ་ལ་འཆར་སྣང་གི་དྲན་པ་རྒོད་པོའང་ཨ་མཚར་གྱི་འདྲེན་བྱེད་དུ་ལྷོད་ནས་དར་ཅིག་ལ་འཇིག་རྟེན་འདི་རང་དཀག་ནས་བསྡད་པ་ལྟར།ཤེལ་སྒོ་ལ་ཤེལ་སྒོ་བརྒྱུད་ནས་སྤྲེལ་རྒྱལ་གྱི་སྒྱུ་འཕྲུལ་མཐོང་ཐེངས་དེ་དེ་འདྲའི་གསལ་ཨང་།

　　དེ་ནི་སྲང་མདོ་ཞིག་ཡིན།ཉིན་གུང་ཉི་མ་སྤྱི་གཙུག་ན་ཤར་དུས་ཀྱི་སྲང་མདོའི་ཟ་ཁང་ཞིག་གི་སྒོ་ཁ་ཡིན།སྒོ་མོ་དེར་བཅར་ནས་ལག་ཟུང་ཐོད་དུ་བཞག་སྟེ་ཤེལ་སྒོའི་ངོས་ཀྱི་གཟུགས་བརྙན་ལུས་སུ་བསྡུས་ཐེངས་ལ་བརྙན་འཕྲིན་གྱི་ལྟད་མོ་མིག་ལམ་དུ་མཆེད་པ་ནི་དྲན་སྣང་ཟབ་མོ་འདི་རུ་ལུས་ཏེ་ཡུན་རིང་ཕྱིན།བརྙན་རིས་ཀྱིས་བསླངས་པའི་མཚར་སྣང་རྒོད་པོ་དེ་རུ་སེང་བདུད་གཡུ་རལ་སེར་ལམ་མེར་གཟེངས་པ་ཞིག་གིས་སྤྲེལ་རྒྱལ་ལེགས་མཛེས་ཁོག་ཏུ་མིད་པའི་གཟུགས་འགྱུར་གྱི་རྣམ་པ་དེ་ད་དུང་མཐོང་ལམ་དུ་འཆར་ཐུབ།སེང་གེའི་གཟུགས་ཀྱི་བདུད་རྒན་དེའི་ངོ་མདངས་ལྗང་ནག་གེ་བ་དང་བདུད་སྤུན་གླང་མགོ་ཅན་དེའི་གདོང་གི་སྣ་ཞགས་ཆུང་ཆུང་སྐད་སྒྲ་དང་འགྲོགས་ནས་ལྷེམ་ལྷེམ་ལྷེམ་ལྷེམ་འགུལ་ཚུལ་ནི་ཅི་འདྲའི་མིག་ལ་འཚེར་བ་ཞིག་རེད་ཨང་།གཏམ་རྒྱུད་ཀྱི་གོ་བ་གཅིག་ཀྱང་མེད་པར་དེ་ལྟ་བུའི་མིག་འཕྲུལ་གྱི་མཛེས་པ་དེ་ལས་མཚར་འཛིན་གྱི་བློ་སྒོ་ཡངས་པོར་ཕྱེས་པས།ཉིན་མོ་དེར།སྒོ་ཁ་དེ་ནས་ཧད་དེ་ཕྱི་དྲོའི་སློབ་ཁྲིད་ཚོགས་པའང་མ་ཤེས།

　　རྗེས་སུ་ངས་རང་གིས་མཐོང་བའི་བརྙན་དུམ་དེ་ནི་སློབ་གྲོགས་ཚོས་གླེང་བའི་སྤྲེའུ་མགོ་ཅན་ཡིན་པ་ཤེས་དུས།གཏམ་རྒྱུད་ཀྱི་གོ་རྟོགས་ཟབ་མོ་དལ་བ་དལ་བུར་ཐིག་རིས་སུ་བབས་ཤིང་བསམ་གཞིག་གི་བཟོ་བཀོད་ཆེན་པོ་ཡུན་གྱིས་ཡུན་གྱིས་བློ་ངོས་སུ་གྲུབ་པས་ན།སྐབས་ཤིག་རུས་དཀར་བདུད་མོ་ཞིང་པ་བཟའ་མི་གསུམ་གྱི་ཁོག་ཏུ་ཞུགས་ནས་སྤྲེའུ་མགོ་དགེ་སློབ་གཉིས་ཀ་འགལ་དུ་འཇུག་དུས།སྐྱོ་ཤས་ཕྲན་བུ་ཞིག་གིས་བསྐུལ་ཏེ་མིག་ཟུང་དུ་ཆུ་རིས་འཁོར་བའི་མྱོང་བ་ཟབ་མོ།སླར་ཡང་རྒྱབ་ལྗོངས་ཀྱི་དབྱངས་རྟ་དང་ལྷན་དུ་ལྷོད་ཀྱིས་ལྷོད་ཀྱིས་ཚོར་ཐུབ།ཚེ་སྲོག་གི་གཏིང་ལ་སིམ་པའི་མཉེན་གཤིས་དེ་རིགས་གཏམ་རྒྱུད་ཀྱིས་དྲངས་པ་ནི་ཐེངས་དང་པོ་ཡིན་སྲིད།དེ་ནི་བྱིས་པའི་དུས་ཀྱི་ཨ་ཕའི་རྗེས་བསྙེགས་ཏེ་རུ་ནང་ལ་འགྲོ་འདོད་ཀྱི་འདུན་པ་ཟབ་མོ་འབྲས་མེད་དུ་གྱུར་བའི་ངུ་ངག་ཐར་ཐོར་དང་ཨ་ནེ་ལགས་ཀྱི་མཛུབ་སྟོན་གྱི་སྡིགས་ར་ཡིས་བསླངས་པའི་སྨྲེ་སྔགས་ཐན་ཐུན་དང་ཡེ་ནས་མི་འདྲ་བར།ངའི་འཚར་ལོངས་ཀྱི་སེམས་རྒྱུད་ཀུན་ལ་ཆུ་ལུད་ལྟར་ཐིམ་ནས་ནར་སོན་གྱི་འགྱུར་བག་རྒོད་པོ་རུས་རྐང་ལ་ཆགས་སུ་འཇུག་པའི་ལྡོག་མེད་ཀྱི་སྒུལ་ཤུགས་ཤིག་ཅི་ལ་མིན།

　　སྐབས་ཐོག་དེ་ག་ཙམ་ལ་ཏག་ཏག་ཐོག་མའི་དུས་ཀྱི་གཅུན་སྡོམ་གྱི་སུན་སྣང་ཅི་རིགས་རང་ཞིག་ཏུ་གྱུར་ཏེ་སྤྲོ་སྣང་གི་མིག་མདངས་ལ་རྩེན་པའི་ལྐོག་གྱུར་གྱི་བྱ་དངོས་མང་པོ་འཚོ་བའི་གྲ་གྲུ་རེ་རེ་ནས་སྟབས་དང་སྟབས་ཀས་འཇུར་ཡོང་བས།སྔོ་སེར་དཀར་དམར་གྱི་ཐིག་ལེ་མིག་ལ་བཀྲག་པའི་ཆུ་ཤེལ་གྱི་རིལ་བུ་གློ་ཁུག་ཏུ་བཅུག་ནས་ས་ཐོག་སེན་མོས་བྲད་དེ་རྩེ་ར་བསྒྲུགས་ཤིང་།རྡོ་ཐོག་རྡེའུས་གཙུབ་ནས་རྩེད་འགྲོས་ལྷོད་ཐེངས་གཅིག་དང་བཅུ་ཡིས་ག་ལ་ཚད།བརྒྱ་དང་སྟོང་དུ་ལོངས་པ་ལྟར།སྐར་མ་འགའི་རིང་གི་ཅོང་སྒྲ་སིང་སིང་གོམ་སྟབས་སུ་བླངས་ནས་ཤུར་ཤུར་སྒོ་ལ་རྒྱུག་པའི་རྣ་ཅོར་མགོ་རིལ་དེ་ངས་ངོ་ཤེས་ཀྱི་འདུག འཚུབ་འཚུབ་ནང་ལ་ལྷོད་པའི་མ་རབས་པྲ་ཆལ་དེ་ངས་དྲན་ཐུབ་ཀྱི་འདུག འགོག་མེད་ཀྱི་སེམས་ཤུགས་རྒོད་པོ་རླུང་གིས་བརྟས་ནས་འཕྱོ་ཙམ་འཕྱོ་ཙམ་གྱིས་སློབ་གྲྭར་ཡན་ཞིང་ལྡེམ་ཙམ་ལྡེམ་ཙམ་གྱིས་ཡུལ་ལ་འབྱོར་བའི་བྱིས་པ་རྐང་བདེ་ལག་བདེ་དེ་སུ་ཡིན་ནམ།ལོ་རིམ་གཉིས་པའི་སློབ་མ་ཞིག་ཡིན་ནམ།ལོ་རིམ་གསུམ་པའི་སློབ་མ་དེ་ཡིན་སྲིད།

　　དྲན་ཚད་ཅིག་ལ་དགེ་རྒན་ཚོན་པོ་དེའི་སོར་རྩེ་ན་ཡང་བའི་སྨྱུག་ལྕག་རེ་རེ་ཚ་བེར་བེར་ལག་མཐིལ་ལ་ཟུག་པ་དང་བསྟུན།ཁ་བུབ་ཏུ་ཉལ་བའི་ཨང་ཀི་གསུམ་པ་ལས་བྱའི་ཤོག་ངོས་ནས་ཡར་ལངས་ཤིང་།སེམས་ཁུར་གྱིས་མནན་པའི་དཔེ་ཁུག་ལྕི་མོ་འགྲོ་འདུག་གང་མང་ཁྲོད་ཐང་ལ་ཕོག ལག་མགོར་སྨྱུག་ཕྲན་གྱིས་གཞུ་དུས་ལ་སྐྲག་སྣང་གིས་ཁེངས་པའི་མིག་ཟུང་དགེ་རྒན་ཚོན་པོ་དེར་ཡང་ཡང་ཅེར་ནས།ཁོའི་མཛུབ་མོ་འགུལ་བ་ཙམ་གྱིས་ཆོག་པའི་སྣང་མེད་ཀྱི་ཉམས་འགྱུར་བརྗིད་པོ་བརྟན་ལྷིང་ངེར་མཚར་འདོད་དུ་ལྷུང་སྟེ།དགེ་རྒན་བཀྲ་ཤིས་ལ་ཅི་འདྲའི་ཤེད་ཆེན་པོ་ཞིག་ཡོད་ཨང་བསམས་མྱོང་།ད་དུང་།ཕྱི་ལ་རྩེ་རུ་ཡོང་རྒྱུར་སྐྲག་པའི་སློབ་གྲོགས་དེ་ཕ་མ་གཉིས་ལ་དེ་འདྲ་ཞིག་སྐྲག་དོན་ཅི་ཡིན་ནམ་འདོད་ནས་ཡང་དང་ཡང་དུ་རྩེད་རོགས་སུ་བོས་ཤིང་།སྐད་ཀྱི་གདངས་ལ་ཡུལ་གྱི་གཤིས་དྲགས་པའི་དགེ་རྒན་རོང་པ་དེའི་སྐད་སྒྲ་སང་སང་ལ་ཧད་དེ།སློབ་ཁྲིད་ཀྱི་སྔ་རྗེས་ཀུན་ན་ཆག་མེད་དུ་གྲགས་པའི་སློབ་ཁང་བར་ཁྱམས་ཀྱི་དྲིལ་བརྡ་སྒོར་མོ་ལ་གློག་སྐུད་ཕྲ་མོའི་ཚོད་འཛིན་ཅི་ཡང་མེད་པའི་རང་འགུལ་དེ་སོགས་ཨ་མཚར་རོ་སྙམ།

　　དེ་དུས།རྫོང་མཁར་ཆུང་ཆུང་དེ་ན་ཁ་ཡ་དཔུང་ཡ་རུ་གཤིབ་ཆོག་པའི་སློབ་གྲྭ་གཞན་གཅིག་ཡོད་པ་ནི་ཞག་སྡོད་སློབ་ཆུང་ཞིག་ཡིན་ཞིང་།ངའི་ཕ་ཡུལ་གྱི་ན་ཟླ་ཚང་མ་དེ་རུ་སོང་ནས་ཕྱིར་ལ་ལོག་ཚར་དུས་ཤིག་ལ།ཕལ་ཆེར་ང་དང་བཅས་པའི་སློབ་གྲོགས་མང་ཤས་སློབ་གྲྭ་ཞེས་པའི་ར་སྐོར་གྲུ་བཞི་དེ་ལ་གོམས་ལོབས་སུ་གྱུར་ནས་ཉིན་རྒྱུན་དཔེ་ཁུག་ཁུར་ནས་ཕར་ཕར་འགྲོ་ཞིང་ཚུར་ཚུར་ཡོང་བ་ནི་ལྟོགས་སྐོམ་དང་སུན་གཙེར་མེད་པའི་ཁྱད་པར་གྱིས་ཀྱང་ཡིན་ངེས།དེ་ལྟར་མིན་ཚེ་ངའང་སྔ་མོ་སྔ་མོ་ཞིག་ནས་སློབ་སྦྱོང་ལ་བྱོལ་ཏེ་རུ་ནང་ན་ལུས་ཡོད་སྲིད།ང་ལ་མཚོན་ན་སློབ་གྲྭ་ནི་གཏན་འཇགས་ཀྱི་འདུག་ས་ཞིག་མ་ཡིན་པར་འཆར་ཅན་གྱི་འགྲོ་ས་རུ་གྱུར་བས་ན།དགེ་རྒན་ཚོས་སློབ་ཁྲིད་ཇི་ལྟར་བྱས་པའི་བག་ཆགས་ཏིལ་འབྲུ་ཙམ་ཡང་མེད་པར་སློབ་གྲོགས་ཚོ་སློབ་གྲྭར་གང་ནས་ཡོང་བའི་སྣང་བརྙན་མག་མོག་ད་ལྟ་ད་དུང་དྲན་པའི་གཏིང་རིང་ན་གཅིག་འཕྲོར་གཅིག་ཏུ་ལུས་པ་སུ་ལ་བཤད།

　　ས་གྱང་སྐྱ་ལོག་གེ་བ་རེའི་སྣེ་ནས་ནག་ཚུབ་བེར་ཕར་ལ་ལྡིང་ཞིང་རྡུལ་ལྷོག་གེར་ཚུར་ལ་མཆོངས་ཐེངས་རེར།ར་སྐོར་སྟོང་བ་ཞིག་ཏུ་འཛོམས་ཏེ་ས་ཐོག་ཐིག་གིས་བཏབ་ནས་རྐང་རྩེད་དང་རྡོ་ཐོག་རི་མོ་བཙལ་ཏེ་ལག་རྩེད་བྱས།ད་དུང་གང་འདོད་དུ་ཤོར་བའི་ལག་རྡོ་ཆུང་ཆུང་སིལ་དིར་རེར་ཁང་སྟོང་དག་གི་ཤེལ་སྒོར་ཕོག་དུས་སུ་རྒྱང་ལ་འབྲོས་པའི་གོམ་སྟབས་མྱུར་མོ་སྐྲག་སྣང་ལ་འཕྱོ།ཤེལ་སྒོ་གསལ་ལ་དྭངས་པ་དག་ཅི་འདྲའི་གཅོག་ན་འདོད་པ་ཞིག སིལ་སྒྲ་དིར་དིར་གྲགས་པ་ནི་དེ་འདྲའི་རྣ་བར་འཚེར་བ་ཞིག དེ་དུས་བསམ་པའི་རྒྱུད་ན་མ་རབས་ཐ་ཤལ་ཟེར་བ་ཞིག་མེད་པར་དེ་ལྟར་འདོད་འདུན་ཕྲན་བུ་ཡིས་འཕག་ནས་ཤེལ་ཆག་དམ་དུམ་དང་འགྱིག་སྣོད་འདྲ་མིན་ལ་བརྩེས་ནས་ཀྱང་དཔྱིད་ཉི་རིང་གི་ས་སྲོས་སྨག་ལ་བསྲེས་ཤིང་།ཉིན་གདུགས་ཚོད་ཀྱི་གྲིབ་མ་གམ་དུ་བསླངས་ཏེ་ཡོང་བའི་ལམ་བར་ནས་ཕར་གཞའ་ཚུར་སྐུང་བྱས།སློབ་གྲྭའི་ཐང་ཆེན་ནས་ཡར་བདའ་མར་བདའ་བྱས།

　　སློབ་སྦྱོང་ལ་དགའ་རྒྱུ་ཞིག་ག་ནས་སྲིད་མོད།ཐུན་གསུམ་གྱི་ཚ་མ་ཆད་མེད་དུ་ཟོས་རྗེས་སློབ་གྲྭའི་སྒོ་ལ་རྔམ་སྟབས་ཀྱིས་ཕྱིན་ཏེ་སྐས་སྟེགས་གཅིག་ཏུ་བསྣར་ནས་ལས་བྱ་འབྲི་སྲོལ་དེ་ནི་ཧ་ཅང་བབ་ཆགས་པོ་ཞིག་ཡིན།ང་ཚོ་གཅིག་གཉིས་རེ་ཁ་འཆམས་ཤིང་གཉིས་གསུམ་ངང་དཔུང་བསྡེབས་ནས་ཤོག་བྱང་ལེབ་མོ་དག་ཐལ་ལྕག་གིས་སྒུལ་བར་དགའ།བྱེ་ཕད་ཁྲ་ཁྲ་རེར་རྡོག་ཐོ་ཡིས་རྩེན་པར་སྤྲོ།ད་དུང་།ཁང་རྙིང་གི་བྱ་འདབ་འོག་ནས་སྨྱུག་མདའ་སྨྱུག་གཞུ་ལེན་པ་དང་གད་ཁུང་གི་གཡས་དང་གཡོན་ནས་འབར་རྡེའུ་རིལ་རིལ་འཚོལ་བ་ལ་ཇི་འདྲའི་བདེ་སྐྱིད་ཀྱི་དགྱེས་འཛུམ་ཤིག་ཤིག་ཅིག་ཡོད་ཨང་།

　　སོང་ས་རྩེད་ར་དང་བསྡད་ས་རྩེད་ཁང་ཡིན་དུས་ཀྱི་སྐབས་ཐོག་དེ་ལ་སྣང་ཆུང་བག་ཡངས་སུ་གྱུར་ནས་ཡི་གེ་ཇི་ལྟར་ཤེས་ཚུལ་དང་ཨང་ཀི་གང་ལྟར་བརྩིས་སྲོལ་ནི་དྲན་རྒྱུ་ཅང་མེད་མོད།རས་ལྷམ་དཀར་སེར་གྱི་མགོ་ལ་བརྡོལ་བའི་བུ་ག་རེ་རེ་ཡུན་གྱིས་གཉིད་ལ་ཡུར་བའི་མིག་ཁུང་ཞིག་ལྟར་མཐེ་བོང་གི་སྐེ་སོ་གང་མང་དང་ལྷན་ཅིག་གཏན་དུ་གཟིམས་པ་ན།ང་ཚོ་རྨི་ལམ་གྱིས་འབོད་པའི་སྐད་སྒྲ་རེ་རེ་རྣ་བར་ཉར་ནས་ཕྱི་ལ་འབུད་མགོ་ཚུགས།ཕྱིའི་ཚོང་ཁང་གི་ཁྲ་ཆིལ་དགུ་ཆིལ་བརྒྱུད་དེ་བརྙན་འཕྲིན་གྱིས་བསྟན་པའི་འཇིག་རྟེན་གསར་པ་དེ་ལ་འབུད་མགོ་ཚུགས།དེ་དུས།གུང་སེང་ལས་རྙེད་པའི་དོ་སྣང་ཅི་རིགས་ལ་རྩེད་ཆས་སྣ་ཚོགས་ཀྱི་འགུག་ཤུགས་ལྡན་ཞིང་།དགོད་སྒྲ་ལ་འཁོར་བའི་འདོད་བློ་གང་མང་ལ་ཟ་སྣ་འཆའ་རིགས་ཀྱི་ཞིམ་མངར་ཡོད་པས།སྒོར་མོ་སིལ་མ་འགས་དྲངས་པའི་སེམས་པ་དེ་རང་ཚོང་ཁང་དུ་ཕྱོགས་ནས་ཁ་ཚ་ལེབ་མོ་རེ་ཟོས་ཏེ་ངོ་གདོང་ཧྲིལ་བོ་རྔུལ་ཞམ་མེ་བར་གཏོང་ལ།སིལ་སྐམ་རྡོག་པོ་རེ་མུར་ནས་ཁ་ལྕེ་ནེམ་པོ་སྐྱུར་ཉེར་ཉེར་བཟོས་མྱོང་།མངར་སྐྱུར་ཁ་གསུམ་གྱི་བྲོ་བ་ཟབ་མོས་ལུས་ཟུངས་ཀྱི་དྭངས་མ་བསྐྱར་དུ་སྡེབ་པ་ལྟར།དེ་དུས་ཀྱི་རོ་མཆོག་ལྕེ་ཡི་ལོངས་སྤྱོད་དག་གིས་ལུས་གསེང་ན་གཉིད་པའི་འདོད་པ་ཆུང་ཆུང་ཡང་དང་ཡང་དུ་ཡར་ལ་བསླངས་ཏེ།ནར་སོན་གྱི་ལོ་ཟླ་རིང་མོ་རྒྱང་ནས་རྒྱང་ལ་འཐེན།འབྱུང་འགྱུར་གྱི་འཁྲེང་ཞེན་རྒོད་པོ་ཕྱི་ནས་ཕྱི་ལ་བཏང་།དེ་དུས།སློབ་གྲྭ་འགྲིམས་ཏེ་ལན་རེར་ཕྱིར་ལ་ལོག་པའི་ཕུ་བོ་དེ་སྐབས་དང་སྐབས་ཀྱིས་མཐོང་ཐེངས་ལ་མྱུར་དུ་ནར་སོན་ན་ཅི་མ་རུང་འདོད་མྱོང་།ཁོ་ནང་བཞིན་རང་མགོ་རང་ཐོན་གྱིས་ལྕགས་རྟ་བསྐོར་ཏེ་ཐང་ལ་འཁོར་དུས་ནམ་ཞིག་ཡིན་ནམ་སྙམ།

　　ང་ཚོ་དབུགས་ཧལ་ཧལ་ངང་ཚོང་ཁང་ལ་བརྒྱུགས་ཏེ་མངག་བཅོལ་བྱས་པའི་ཚྭ་ཁུ་དང་འབར་ཞུན་སོགས་ཉོས་རྗེས་ཤུལ་དུ་ལུས་པའི་སྒོར་མོ་གཅིག་གཉིས་སམ་སྒོར་ཟུར་ལྔ་དྲུག་པོ་རང་ལ་སྟེར་འདོད་ཀྱིས་རྔམ་ནས་སྲང་སྣེ་རེ་ན་རླུང་ལྟར་མགྱོགས།ང་ཚོ་དུ་བ་དང་འདག་བྱེ།ཞོག་ཁོག་དང་སྐྱུར་ཁུ་སོགས་ཉོ་དུས་ཀྱི་འུར་འདྲོགས་དེ་ཡིས་གང་ལ་ཁྲིད་སོང་ངམ།རང་སེམས་ཀྱི་གད་པ་ཀློང་ཡངས་དེ་ལ་ཁྲིད་སོང་ངམ།རང་གི་རྒྱུ་འབྱོར་གྱིས་མི་གང་བའི་འདོད་འདུན་གྱི་ཚོང་ཟོག་སྤུངས་པའི་གད་པ་ཀློང་ཡངས་འདི་ལ་ཁྲིད་ཡོང་བ་ལོས་ཡིན།དེ་དུས།དར་སོབ་ལ་ཐིམ་པའི་བྲོ་བ་མངར་ཙམ་པ་རེ་དལ་བ་དལ་བུར་འཇིབ་རྗེས།རེ་བ་ཡོད་ཚད་ཐང་ལ་ཕོག་ཚར།དེ་དུས།ཐང་སིན་བླ་མའི་ཤ་ཞེས་པའི་ཁ་ཚ་ལེབ་མོ་དེ་ཟོས་པས་གཞི་ནས་འཆི་མེད་རྒས་མེད་ཅིག་བྱུང་བ་ལྟར་བློ་བདེ་བག་ཕེབས་ངང་དཔེ་ཆ་ནི་དཔེ་ཁུག་ལ་མ་གཏོགས་འབྲེལ་བ་ཅི་ཡང་མི་འདུག་བསམས།དེ་དུས།རི་མོ་དང་རྩལ་སྦྱོང་གི་སློབ་ཁྲིད་ནི་ཆེས་སྐྱིད་དུས་ཡིན་ཞིང་།དམིགས་བསལ་གྱི་འཆར་གཞི་ཅི་ཡང་མེད་པར་གང་འདོད་དུ་རྩེད་ཅིང་དགོད་པའི་ཕན་ན་བདེ་སྐྱིད་ཟེར་བ་ཞིག་ག་ལ་ཡོད།དེ་ལས་ལྷག་པའི་དྲན་པ་ཞིག་ཡོད་ན་སློབ་ཁྲིད་ཀྱི་བར་གསེང་དག་ནས་སློབ་གྲོགས་བུད་མེད་སྐོར་ཞིག་བདའ་བདའ་ལ་བསྡད་འཇོག་པའི་གྲོགས་པོ་དེ་དང་།འཕྲུལ་རྟའི་གཟུགས་ཀྱི་རྩེད་ཆས་ཆུང་ཆུང་དེ་ཞོན་ནས་ཤིང་ཅོག་སེར་པོ་དེའི་ཐོག་ནས་ཐག་རིང་ལ་བུད་འགྲོ་བའི་སློབ་གྲོགས་དེ་གཉིས་ཡིན།ད་དུང་།བྱ་སྒོང་ཟ་འདོད་ཀྱིས་འདའ་སྟེ་ནངས་མོ་རེ་རེར་འབྲས་ཐང་དང་སྒོ་ང་འཚོང་བའི་དགེ་རྒན་དེ་ལ་བལྟས་ནས་བསྡད།སྐབས་དང་སྐབས་ཀྱི་ནངས་ཇ་ཡུལ་ནས་མ་འཐུང་བར་སློབ་གྲྭ་ལས་འཐུང་དགོས་བྱུང་དུས་ཀྱི་བསོད་བདེ་དེ་རང་སུ་ལ་བཤད།

　　གཤིས་རྒྱུད་དུ་སད་པའི་བག་ཆགས་འདྲ་མིན་སློབ་གྲོགས་ཚོའི་ནར་སོན་དང་འདྲེས་ནས་མིག་ལ་མངོན་དུས་ལ།རྩེད་འཇོ་ཡིས་བསྲུབས་པའི་འདོད་དོན་རེ་རེ་ལས་དགའ་ཁ་འཁྱེར་ཕྱོགས་དང་རང་གཤིས་སྟོན་སྟངས་ཤིག་ཡུན་གྱིས་ཆགས་པས།སྐབས་ཤིག་བུ་དག་གིས་དཔུང་གཏུག་བྱས་ཏེ་སྙིང་གི་འཕར་ལྡིང་ལ་ཉན་པ་དང་།བུ་མོ་ཚོས་ཁ་འཛིང་བྱེད་ཞོར་སྒེར་གྱི་བཟང་ངན་ལ་དཔྱད་པ་ནི་སློབ་སྦྱོང་གི་ཆ་ཤས་ཤིག་ཏུ་གྱུར།འཇིགས་སྐྲག་ལ་བརྩེས་པའི་ཤ་ཁྲག་གི་འགྱུར་བ་རྒོད་པོ་དེ་ལས་རང་གཞན་གྱི་ཞེ་འཛིན་ཞིག་ཤུགས་ཀྱིས་གྲུབ་པ་ནས་འགྱུར་མེད་རྣམ་རྒྱལ་ལ་ངོ་ཡ་བྱེད་པ་དང་ཀུན་བཟང་ཚེ་རིང་ལ་ཐུབ་ཚོད་གཏོང་བའང་འགྲོ་ཞོར་ལམ་བུའི་བྱ་སྤྱོད་ཅིག་ཅི་ལ་མིན།དེ་ལ་དེ་བསྟུན་གྱིས་སློབ་སྦྱོང་གིས་བྱིན་པའི་བཟང་ངན་མཐོ་དམན་གྱི་རིམ་པ་དེ་ལས་ཚེ་རིང་སྒྲོལ་མ་དང་པོ་ཡིན་ཚུལ་དང་བཀྲ་ཤིས་དོན་འགྲུབ་མཐའ་མ་ཡིན་ལུགས་ལ་བསྐྱར་དུ་ངོས་འཛིན་ཟབ་མོ་རེ་བྱས་པས།འགྲན་རྩོད་ཅེས་པའི་གཟུགས་མེད་ཀྱི་མཁའ་དབུགས་རིགས་ཤིག་ཡ་ཆུང་ལ་ཁྱབ་ནས་སྒུལ་ཤུགས་ཞེས་པའི་འཛིན་མེད་ཀྱི་སྤོབས་པ་རིགས་ཤིག་གཤིས་ཀ་རུ་བབས་ཡོད།

　　ས་ནང་ལ་བྲིས་པའི་ཐ་སྙད་རེ་རེ་ལག་ཏུ་བཟུང་བའི་ཤིང་ཐུར་དེའི་སྣེ་ནས་མི་ཚེ་ཞེས་པའི་རྒྱང་བཞུད་ཀྱི་ལམ་བུ་འདི་ལ་འདྲེས་ནས་ཡོད་ཚད་ཇེ་གསལ་ཇེ་གསལ་དུ་འགྱུར་བའི་བརྒྱུད་རིམ་དེ་རུ།བསམ་གཞིག་གི་བར་སྟོང་ཡངས་པོ་རུ་སྐད་ཆ་ཡི་ལྷུ་ལག་རྒྱས་པས་ན།བརྙན་འཕྲིན་གྱི་བསླུ་བྲིད་དེ་རུ་སྤྲེའུ་མགོ་ཅན་གྱི་སྤྲུལ་བསྒྱུར་འཕོས་པ་དང་།དྲག་རྩལ་ཁང་གི་ཁྲིན་ཀྲིན་རྒྱལ་བ་ནས།འགྲོ་ཞོར་དུ་རྐང་ལག་གི་སྟངས་སྟབས་ལ་ཁ་ནང་གི་ཤུགས་སྒྲ་བསྡེབས་ནས་རྡུང་རྡེག་གི་འགྲན་སྡུར་བྱས་ཤིང་།རང་རྒྱལ་གཞན་ཕམ་གྱི་ཕྱོགས་ཁག་ཅིག་བཏོད་པ་ཁོ་ཐག་ཡིན་ངེས།ལྭ་བ་སོ་མ་གོན་ན་ངོ་སོ་སྟེར་བ་དང་རྩེད་ཆས་གསར་པ་རྩེ་དུས་མཛའ་སེམས་བཅངས་མཁན་དེས་མི་རེ་ལ་མཐུན་པའི་རྣམ་འགྱུར་དང་ཚུགས་ཀ་ཞིག་ཤེས་པར་གྱུར་ཡོད།

　　ཕྱིའི་ཟ་ཁང་ན་མ་གཏོགས་པའི་མེད་པའི་བརྙན་འཕྲིན་གྱི་ལྟད་མོ་སྣ་ཚོགས་ཁྱིམ་ཚང་ཀུན་ལ་ཁྱབ་པ་ན།སྲང་མདོ་དང་སྲང་ཤུར་དུ་གཡུ་འབྲུག་གློག་བརྙན་ཁང་ངམ་འོད་ཟེར་བརྙན་ཕབ་ཁང་དུ་སྐད་པའི་བརྙན་འཕྲིན་ཆེན་པོ་ཡི་སྔུན་ལ་རྐུབ་སྟེགས་ནར་མོ་འགའ་བསྟར་བའི་སྣང་བརྙན་དེར་སུབ་ཐབས་ཅི་ཡོད།ཁང་བར་བསྐྱིལ་བའི་མུན་ནག་གི་འཇིགས་དངངས་ཁོ་ནས་ཀྱང་མིག་འཕྲུལ་གྱི་ཟིལ་ཤུགས་དང་ལྷན་དུ་བླ་ཁྱེར་ཧོན་ཐོར་དུ་མི་གཏོང་བའི་ངེས་པ་ག་ལ་ཡོད་ཀྱང་།ང་རང་ཨ་ཕ་ལ་འགྲོགས་ནས་སྐྲག་མ་མྱོང་།ཨ་ཕ་རྫོང་ལ་ཡོང་ཐེངས་རེར་དགོང་མོ་ང་རང་ཁྲིད་ནས་དེ་གར་འགྲོ་ཞིང་།ཨ་ཕའི་ཕུ་རུང་ལ་འཇུས་ཏེ་གཏམ་རྒྱུད་ཀྱི་གོ་བ་ཅི་ཡང་མེད་པར་འོ་མའི་དར་སོབ་ལེབ་མོ་ཞིག་འཇིབ་ནས་བསྡད་པའི་མཚན་ལམ་དེ་ཧ་ཅང་སྐྱིད།ཨ་ཕས་དམ་བེ་ལྗང་ལམ་མེ་བ་རེ་མཆུ་ཟུར་ལ་བཏེགས་ནས་ཝུ་ཆང་གི་སྐྱུར་ཁ་ཅུང་ཙམ་གྱི་སྤོད་དུ་བརྙན་རིས་ཀྱི་སྒྱུ་རྩལ་ལོངས་སུ་སྤྱད་རྗེས།སྨྲ་བ་མེད་པར་ཀྲོང་ཀྲོང་དུ་ལངས་ནས་ངོ་གནག་སྟེ་འགྲོ་སྟངས་ནི་བརྗེད་ཐབས་ཤིག་མི་འདུག ཕོ་ལོ་སུམ་ཅུའི་སྒང་ནས་ཨ་རག་གི་བཟི་ཁར་རྩེན་པའི་རང་གི་མིག་མདངས་གཉོམ་པོ་དེ་རིག་ན་ཨ་ཕ་ལགས་ཀྱི་ཆང་འཐུང་རྗེས་ཀྱི་བཟོ་ལྟ་ནན་མོ་དེ་ཡང་བསྐྱར་མཐོང་ལམ་དུ་སྣང་ཡོང་།

　　ཨ་ཕས་ང་རང་གློག་བརྙན་ཁང་དུ་ཁྲིད་ནས་སྒོའི་ཕྱི་ལ་འབུད་དབང་ཡང་མ་བྱིན་པ་ལྟར།གློ་བུར་དུ་འོད་སྡེར་གྱི་དར་སྲོལ་དགུང་ལ་འཕྱུར།ངའི་སེམས་ནང་གི་བྱུང་རིམ་རེ་རེ་རྒྱུ་རྐྱེན་དང་བཅས་ཏེ་གཏམ་རྒྱུད་དུ་གྲུབ་པར་སློབ་གྲོགས་ཚོའི་ཁ་བརྡ་ནི་མེད་དུ་མི་རུང་བ་ཞིག་ལོས་ཡིན།ང་ཚོས་མི་སྣའི་འབྲེལ་བ་དང་འགལ་བའི་བརྒྱུད་རིམ་ཁ་བརྡ་ལས་གཅོམ་སྟེ་ལྷ་ལ་བསྐོས་པའི་སྒྲུང་ལ་བལྟས་མྱོང་།རི་དྭགས་རྒྱལ་པོ་སེང་གེ་ཞེས་པའི་འགུལ་རིས་གློག་བརྙན་གྱི་འོད་སྡེར་ཟད་པོ་དེ་ཆུ་རྡོ་ལག་རྒྱུད་ཀྱི་ཚུལ་དུ་གཅིག་གིས་གཅིག་ལ་གཡར་ཏེ་ཚལ་བར་གས་པའི་བརྙན་རིས་ཀྱི་ཧྲག་སྒྲ་ཡི་ཀློང་ནས་རྒྱལ་པོ་ཞིག་གི་དཀའ་སྡུག་གི་མཛད་པ་རེ་རེ་སེམས་ལ་བླངས།དེ་ཙམ་གྱིས་ཀྱང་ག་ལ་ཚད།མིང་མི་ཐོགས་པའི་གྲི་གཡུག་མདུང་འཕེན་བྱེད་མཁན་དང་མེ་མདའ་ཐག་ཐག་རྒྱག་མཁན་གྱི་བརྙན་རིས་མང་པོ་གཅིག་འཕྲོར་གཅིག་ཡིན།པེ་ཅིན་ཐུག་སྐམ་རེ་སྐམ་ཟ་བྱེད་ཞོར་གློག་བརྙན་ནང་གི་དཔའ་བོ་ཞིག་ཡིན་ཁུལ་གྱིས་ངས་ཁོ་དེད་ནས་ཐང་ལ་སོང་མྱོང་ལ།ཁོས་ང་བཟུང་ནས་ཕུགས་ལ་བཅུག་མྱོང་།

　　ཐོག་མར་སྟོད་སྨད་དུ་བསྣར་བའི་སྐས་ཀ་གཉིས་ལས་ཡར་ལ་འཛེག་དུས།འཚང་ཁ་ཤིག་ཤིག་ངང་རེས་མི་ཐེམ་པར་མཐའ་ནས་ལུས་འགྲོ་སྐབས་དེར།སློབ་གྲྭ་གྲོལ་རྗེས་ཁ་རོག་གེར་ཕྱིར་ལ་ཡོང་སྟེ་གཡས་གཡོན་དུ་བརྐྱངས་པའི་ལྕགས་གཞོང་གཉིས་སུ་ཤ་རེ་ཤ་རེར་ཤུད་ཡོང་བའི་སྣང་བ་དེ་ནི་རླུང་ལས་རྒོད་ཨང་།ཨར་འདམ་གྱི་གདན་དཀར་བཏིངས་པའི་ཐོག་ཁང་སྔོ་ལྡང་མདུན་གྱི་ཐང་ཆེན་དེའི་མཐའ་ན་ལྕགས་ཀྱི་གཞོང་པ་དེའི་ངོ་ནི་བྱིས་པ་མང་པོའི་ལུས་ལ་བརྡར་ནས་འོད་ལམ་ལམ་འོད་ལམ་ལམ་ཡོད་ཅིང་།ལན་རེར་ད་ལྟའི་རང་ལུས་ཀྱི་རིང་ཐུང་ལས་བརྒལ་ཙམ་པའི་གཞོང་ནང་དེ་རུ་རྒྱང་ལ་འཕུར་བ་ལྟར་ལྷོད་སེར་ཤུད་དུས་ཉི་འོད་ཀྱི་དྲོལ་ཁོལ་འཇམ་པོ་གཞོང་ངོས་ཀྱི་གཙུབ་བརྡར་བརྒྱུད་དེ་འཕོངས་ངོས་ཧྲིལ་བོ་ཚ་ལམ་ལམ་ཚ་ལམ་ལམ་བྱེད་པ་བརྗེད་རྒྱུ་ཞིག་མི་འདུག རྗེས་སུ་ལྕགས་གཞོང་དེའི་ཚབ་ཏུ་ཐག་པ་དང་རྐུབ་སྟེགས་དཔྱངས་པའི་ལྕགས་སྡོང་སྔོན་པོ་ཞིག་བཙུགས་པ་ན།ང་ཡང་ནར་སོན་ཏེ་མཐའ་ནས་འདུག་མཁན་མ་ཡིན་པར་གདོང་ལེན་བྱེད་གྲས་སུ་ཚུད།ཕར་ཕར་ལ་དེད་པའི་ལུས་ཟོར་ཡང་མོ་དང་ཚུར་ཚུར་ལ་བསྐྱོད་པའི་ལྡེམ་འཕྲུལ་སྐྱེན་པོ་ནི་རླུང་གི་གཤོག་ཡ་ལྟར།སློབ་ར་ཡི་བར་སྣང་དུ་འཕྱང་ཐག་ལ་གཡེང་ནས་ནེམ་འཕར་དང་བསྡེབས་པའི་དགྱེ་སྒུར་རེ་རེ་དགུང་ལ་བསྟད་པ་ནི་ཇི་འདྲའི་མིག་རྒྱང་ཡངས་མོ་དང་སྣང་བ་སྐྱིད་པོ་ཞིག་ཡིན་ཨང་།

　　དེ་ལས་ཀྱང་ཡ་ཆུང་གི་དགའ་སྤྲོ་འཕག་པའི་བདེ་སྐྱིད་ཀྱི་དུས་ཚིགས་ཤིག་ཡོད་པ་ནི་དཔྱིད་དཔལ་གྱི་གོམ་སྟབས་དང་འགྲོགས་པའི་དྲུག་གཅིག་བྱིས་པའི་དུས་ཆེན་ཡིན།རས་ལྷམ་དཀར་ལེབ་བ་རེ་གོན་ཏེ་སྐབས་ཐོག་གཅིག་པུ་དེར་གྲགས་པའི་དབྱངས་རྟ་དེའི་འདེགས་འཇོག་དང་བསྟུན་ནས་གྲལ་འགྲིག་པའི་རུ་དཔུང་ཞིག་མདུན་དུ་བསྐྱོད།སློབ་སྦྱོང་བཟང་བོ་བྱས་ནས།ཉིན་རེར་ཡར་ཐོན་ཡོང་དགོས་ཞེས་པའི་ཁ་གཡང་ལྷང་ལྷང་མཐོ་རུ་བསྒྲགས།ཉིན་མོ་དེ་ནི་ལོ་གཅིག་ལས་ཆེས་སྤྲོ་སྣང་ལྡན་པ་ཞིག་ཡིན་དོན།ཉིན་མོ་དེ་ལ་བྱིས་པ་ཆུང་ཆུང་ང་ཚོར་བསྔགས་བརྗོད་ཀྱི་རྟགས་མ་གནང་ནས་མཐོང་སྤྲད་ཅིང་གཅེས་སྐྱོང་གི་ལེགས་སྐྱེས་བྱིན་ཏེ་འདང་ཕུལ་བས་ཡིན་སྲིད།ཉིན་མོ་དེ་སྡིགས་མོ་དང་བཙན་སྐུལ་མེད་པར་རང་དབང་གིས་བསྐྱལ་ཡོད།ལོ་རིམ་གསུམ་པའི་སྐབས་སུ་ཞབས་བྲོ་བརྩེས་ནས་ཨང་རིམ་མཐའ་མ་བླངས་པ་ནས་ང་ཚོ་འཛིན་གྲྭའི་སློབ་གྲོགས་བུ་དག་ལ་ཞབས་བྲོ་ནི་འབྲེལ་མེད་དུ་གྱུར་ནའང་།ལོ་རེའི་འཆར་ཅན་གྱི་དུས་ཆེན་སྐབས་སུ་དེ་ལས་གཞན་པའི་འགྲན་སྡུར་ཅི་རིགས་ཀྱིས་སྤྲོ་བས་ཚིམས་ཡོད་པ་སྨྲས་མ་དགོས།

　　གཞུག་གཞུག་ཅིག་ལ་འགྱིག་ལྒང་སེར་པོ་ཞིག་ཉོ་འདོད་ཞེ་ལ་ཐོགས་ཏེ་སྲང་ལམ་ཀུན་ལ་ཡང་ཡང་ཉུལ་ཞིང་།སློབ་གྲྭའི་ར་སྐོར་གྱི་མཐའ་རུ་བསླངས་པའི་སྒྲོམ་གཞི་ལྕགས་སྦུག་དང་ལྒང་པང་ཤིང་ལེབ་ཡིན་པའི་གཟེབ་དྲ་གོར་གོར་དེ་ལ་ཅེར་ནས་ཡུན་རིང་འགོར།གཞན་གྱིས་ལྒང་ལི་རྩེ་རུ་མ་བཅུག་པའི་གདུང་བ་དེ་ཡིས་སམ།རང་གི་ཨུ་ཚུགས་ཀྱིས་ཉོ་རུ་བཅུག་པའི་འགྱིག་ལྒང་སེར་པོ་དེ་ཕྱི་དྲོ་མང་པོར་འདོད་འདོད་དུ་བརྩེས་མཐར།སྐྲངས་སྦོས་སུ་གྱུར་ནས་འཇོང་འཇོང་དུ་སྣང་དུས་ལ།དེའི་ཐོག་གི་ལྦ་བ་རེ་རེའི་དཀར་ཤ་རྫོགས་ཚུལ་ལ་ཞིབ་ཀྱིས་བལྟས་ཏེ་ནམ་ཞིག་ལ་འགད་འགྲོ་བར་སྙམ་སྟེ་འཆུམས་ནས་བསྡད།

　　དེ་དུས་ད་དུང་བརྙན་འཕྲིན་གྱི་བསླུ་བྲིད་ཟབ་མོ་གློག་ཀླད་ལ་བཅོལ་དུས་ཤིག་རེད།ལྒང་ལི་རྩེ་བའི་ཕན་ན་སློབ་གྲོགས་ཤེར་བྷའི་ལྕགས་རྟ་ཡི་རྗེས་བསྙེགས་ནས་བསྐོར་རེས་ཤིག་ཨེ་སྟེར་དུ་འབད་པ་དང་།སྒོར་མོ་གཅིག་གཉིས་རེ་བསོགས་ནས་དྲྭ་ཁང་ནང་གི་མེ་མདའ་ཡི་རོལ་རྩེད་ལ་ཞུགས་རྒྱུ་ཚང་མའི་དགའ་ཕྱོགས་ཡིན།ནངས་སྦྱོང་དང་དགོང་སྦྱོང་ཟེར་བ་ངོ་མི་ཤེས་པའི་སློབ་མ་ང་ཚོ་ལ་མཚོན་ན།དྲྭ་ཁང་དུ་འཛུལ་བའི་དུས་ཚོད་དེ་དག་ལ་སེམས་ཁུར་ཞིག་ཡོད་པ་ནི།སྒོར་རྡོག་གསུམ་བཞི་རེ་ཁྱེར་ནས་རང་ཉིད་གཅིག་པུ་སོང་ཚེ།ལོ་ན་ཆེ་བའི་ཕུ་བོ་ཞིག་གིས་གསེར་ལས་དཀོན་པའི་དུས་ཚོད་དེ་བཙན་འཕྲོག་བྱེད་པ་དང་།གྲོགས་པོ་འགའ་དང་ལྷན་དུ་རེས་བསྐོར་བའི་ལོངས་སྤྱོད་དེ་རང་དེ་འདྲའི་མཁོས་སུ་མ་བབས་པ་ཞིག་ཏུ་འགྱུར་བས།མེ་མདའ་ཡི་རོལ་རྩེད་ལ་ཆགས་པའི་སེམས་འགྱུ་རྒོད་པོས་ཡང་དང་ཡང་དུ་སྲང་ལ་ཁྲིད་པ་ཐེངས་གཅིག་ག་ལ་ཡིན།ད་ལྟ་ད་དུང་དེ་ལྟར་བརྩེས་ནི་མ་རེད།འདི་ལྟར་བརྩིས་ནི་རེད་ཅེས་ཁ་ཡག་ལ་བསྐོར་ནས་མགོ་འོག་ཏུ་སྡུད་མཁས་ཀྱི་ཕུ་བོ་དེ་དག་གིས་རང་སྐལ་གྱི་དུས་ཚོད་ཡག་པོ་སེར་སྣ་ཡིས་འཁུམས་སུ་བཅུག་ནས་ཆུད་ཟོས་སུ་བཏང་བ་དྲན་སོས་ཀྱི་འདུག

　　གློ་བུར་བའི་ཚོར་སྣང་ཞིག་གིས་སམ།ཡང་ན་ཡུན་གྱིས་འཚར་བའི་གཤིས་ལུགས་དེ་དང་བསྟུན།ཧྲོ་ལིན་ལྷོ་མའི་གཏམ་རྒྱུད་ཅེས་པའི་མུ་འབྲེལ་བརྙན་འཕྲིན་ཟློས་གར་དེ་ལ་ལྟ་སྐབས་སུ།ང་ཚོའི་ཕོ་མོ་ཡི་འདུ་ཤེས་འཛིན་སྟངས་ཇེ་གསལ་དུ་གྱུར་ནས་བཟང་ངན་ཡག་བཙོག་གི་སྒོ་ནས་འཇིག་རྟེན་གྱི་སྣང་ཚུལ་དང་ཁོར་ཡུག་གི་མཐོང་ཐོས་ལ་རང་གི་མྱོང་བ་བཤད་ཤེས་ཀྱིན་འདུག གྲྭ་པ་བསྟན་འཛིན་དང་བུ་མོ་ཞོ་ཉེ་གཉིས་ཀྱི་བར་དུ་བཤད་མི་ཤེས་པའི་འབྲེལ་བ་ཞིག་བསྐུངས་ཡོད་པ་ཅི་ཞིག་ཡིན་ནམ་འདོད་ནས་ཡང་དང་འོར་གྱིས་སེམས་ལ་ལྷུང་བ་ལྟར།རང་གི་ཡ་ཆུང་གི་མཚར་སྣང་འདྲེས་པའི་འདོད་པ་ཙག་ཙིག་ཡིག་རྡོག་འགའ་ལ་བཅོལ་ཏེ་སྒོ་ཡི་སྤྱོད་ཁང་གི་གྱང་ངོས་ལ་ང་དང་ཁྱོད།དགའ་དང་དུངས་སོགས་བྲིས་པའི་བསྟན་བཤིག་ཚ་པོ་སྙིང་ལ་རྒྱས་པས།སེམས་ཀྱི་འཁྱེར་སོ་དེ་ལ་ཐལ་ནས་སྒྲོལ་མ་དང་བཀྲ་ཤིས་དགའ་རོགས་ཡིན་ཚུལ་དང་།ཚེ་རིང་གིས་ལྷ་མོ་ཐང་ལ་ཁྲིད་ཚུལ་སོགས་ཀྱི་བབ་ཅོལ་མང་པོར་ཉམས་འཇོག་ཤོར་ནས།ཁུ་སིམ་མེར་གསང་བ་གཞན་ཞིག་གི་འཁྲུལ་སྣང་ཐེབས་པ་ལྟར་ཕན་ཚུན་གྱི་གཟུགས་བྱད་ལ་ནན་གྱིས་བལྟས་ཙམ་རིང་།དུས་ཚོད་ཅེས་པའི་གཟུགས་མེད་ཀྱི་ཞགས་པ་ཕྲ་མོ་འདིས་འཇིག་རྟེན་གཞན་ཞིག་གི་སྒོ་མོ་ཕྱེས་ཏེ་སློབ་གྲོགས་ཚང་མ་རང་རང་གི་ལས་ཀྱི་ལམ་ལ་ཆས་སོང་།

　　ལོ་དེ་ལ་ང་ཚོ་མཐར་ཕྱིན་སོང་།༢༠༠༦ལོའི་དབྱར་གཞུང་གི་ངལ་གསོ་དྲོན་མོ་དེའི་རྗེས་སུ་སླར་ཡང་འཚོ་བ་གཞན་ཞིག་གི་མགོ་བརྩམས་པ་ཁྱོད་ཀྱིས་དྲན་སྲིད།

ནར་སོན།

　　༼༢༠༠༩ལོར་རེབ་གོང་ཟམ་ཆེན་དུ་བླངས།༽

　　ཆུང་དུས་བྱིས་པ་ཟེར་བ་ལ་ངོས་འཛིན་དང་དཔེ་འཇོག་བྱས་པའི་ཚ་བོ་ཚ་མོ་དང་སློབ་ཆུང་སློབ་མ་དེ་དག་ཀྱང་།ད་ནི་ལོ་ན་བཅུ་ཡས་མས་ཀྱི་ཧེ་བག་ཙམ་བརྒལ་ཏེ་འཇིག་རྟེན་མཐུན་འཇུག་གི་ལས་ལ་རེམ་དུས་འདིར།ལང་ཚོ་དང་རྨི་ལམ་གྱིས་བསླུས་པའི་ང་ཡི་ཁ་ཡ་ན་ཟླ་ཚོ་ཏག་ཏག་ལོ་ན་སུམ་ཅུར་སོན་ཡོད།ལོ་ན་སུམ་ཅུའི་སྒང་ན་ཁྱོད་རང་དུ་བ་འཐེན་པ་དང་གཞས་ལ་ཉན་པ་ཡི་ཁེར་རྐྱང་གི་སྟོང་འཇགས་དེ་ཡིས་བསྐོར་ཡོད་ཀྱང་སྲིད།ཡང་ན་བྱིས་པ་སྙོར་བ་དང་ཁྱིམ་ལས་བྱེད་པ་ཡི་ཟང་ཟིང་གི་འུར་སྒྲ་དེ་ལ་འཐོམ་ཡོད་ཀྱང་ཆོག གང་ལྟར་ཆུང་དུས་ཡིད་སྨོན་དང་རེ་སྒུག་བྱས་པའི་ཤ་དར་ཁྲག་དར་གྱི་ན་ཚོད་དེའང་ད་ལྟ་གཟུགས་བྱད་ཀྱི་འགྱུར་བ་ཕྲ་ཞིང་ཕྲ་བ་ལས་གཏིང་ལ་ནུབ་ཀྱིན་པ་ཚོར་སྲིད།

　　མི་ཚེ་ནི་ཆེས་ཐོག་མའི་རང་རྟོགས་དེ་ནས་མགོ་བརྩམས་པ་ལྟར།ང་ཚོ་ཨ་མའི་མངལ་ནས་ལྷུང་བའི་སྐད་ཅིག་དེ་ཡི་བག་ཆགས་ཕྲ་མོ་དག་བརྗེད་པར་གྱུར་ནས།འཇིག་རྟེན་འདི་རུ་གསར་དུ་སྐད་ཆ་བཤད་ཤེས་པ་དང་མཐོང་སྣང་ངེས་ཐུབ་དུས་ཀྱི་ན་ཚོད་དེ་ནས་ལམ་ལ་ཆས་ཤིང་འཚར་ལོངས་བྱུང་།ན་ཚོད་དེ་རང་ཏག་ཏག་སློབ་གྲྭ་ཟེར་བ་ནས་མགོ་བརྩམས་ཤིང་མཇུག་བསྡུས་ནས་ཡུལ་ན་འཚོ་དུས་འདིར།རང་རྟོགས་ཀྱི་བསམ་པ་དེ་ཡིས་གཏམ་རྒྱུད་མང་པོ་ཞིག་གི་མཁའ་དབུགས་དཀྲིགས་ནས་ད་གཟོད་རང་ཉིད་ཟེར་བའི་ཚོར་བ་དེ་བསྙལ་ཡོད།

　　རང་ཉིད་ནི་ཐོག་མར་ཕ་མ་དང་དེ་ནས་ཤ་ཉེ།རིམ་གྱིས་རྩེད་གྲོགས་ལས་ངོ་ཤེས་ཏེ་ངོས་བཟུང་བ་ཞིག་ཏུ་སྣང་ན།ལོ་ན་བདུན་བརྒྱད་གཡས་གཡོན་གྱི་དྲན་པ་དེ་རང་ནས་དུས་ཚིགས་ཀྱི་འགྱུར་བ་ཐེབས་པ་ལྟར།ཕྱིར་དྲན་གྱི་སྣང་བརྙན་མག་མོག་ཅིག ད་ལྟ་ད་དུང་ཡང་སེམས་ན་ཡོད་ཅིང་།སེམས་ཀྱི་གཏིང་ནས་རླུང་ལྟར་ལྡང་བ་ལ་མི་ཚེ་འདི་ཡི་དཔྱིད་དུ་འབོད་དགོས་སམ།དེ་ནས་བཟུང་།ད་ལྟའི་རེ་འབྲས་འདི་ལ་སྨོན་པ་སྐྱེས་ཏེ་མྱུར་དུ་ནར་སོན་ན་འདོད།དེ་ནས་བཟུང་།ང་ནར་སོན་ན་ཚན་རིག་པ་བྱ་རྒྱུ་ཡིན་ཞེས་བཤད་པ་དྲན་ནམ།

　　དེ་དུས།ཡོད་ཚད་ཆེ་ཆུང་ཡག་བཙོག་དང་བཟང་ངན་འགྲིག་མིན་གྱི་ལྟོས་འཇོག་ཙམ་ལས་ཚུར་ནས་ཚུར་ལ་བསྐྱེད་དེ་ང་ཚོའི་ཨ་མཚར་གྱི་མིག་ཟུང་སྒོར་དུ་འཇུག་ལ།ཡིད་ཚིམ་པའི་ཞལ་རས་འཛུམ་དུ་བཅུག ལྟོས་འཇོག་གི་བར་སྟོང་དེ་གསབ་པའི་བརྒྱུད་རིམ་དུ་མིག་མདུན་གྱི་འཚོ་བ་གནའ་གཏམ་གྱི་འཕྲུལ་སྣང་ལས་ཚུར་འཕོས་ཤིང་།གནས་ལུགས་དང་རྒྱུ་མཚན་ཐོར་བུས་མཚར་འཛིན་གྱི་སེམས་པ་ལྷོད་ལ་ཕབ་པས།ང་ཚོས་ཐེངས་དང་པོར་སྒྲིག་ལམ་ལ་བདེན་ཁ་བྱིན།སྒྲིག་ལམ་དེ་ཡིས་སམ།དུས་ཚོད་ཅིག་གིས་སམ།སྐབས་ཤིག ཕ་ཡུལ་གྱི་རི་ཆེན་དེའང་དེ་འདྲའི་ཆེ་རྒྱུ་མེད་པར་འདོད་ལ།ཉི་ཐིག་གི་ས་རྡུལ་དག་ཀྱང་དེ་འདྲའི་ཆུང་རྒྱུ་མེད་པ་ཤེས།ཐག་རིང་གི་ཡུལ་གྲུ་དང་ངོ་མཚར་བའི་ལྟད་མོ་ཡིས་ན་ཚོད་ལ་བཅོལ་བའི་རེ་སྨོན་རྒྱང་ལ་ཁྲིད།དེ་ལྟར་དྲན་ཚུལ་སྣ་ཚོགས་ཀྱིས་གཙེ་བའི་དུས་སྐབས་དེ་ལ།ང་ཚོས་ཚེ་རབས་སྔོན་མའི་དན་རྟགས་ཤིག་གམ་མི་རབས་བརྒྱུད་པའི་གོམས་སྲོལ་ཞིག་གིས་མི་རེ་ལ་གཤིས་ཀ་རེ་དང་དགའ་ཕྱོགས་རེ་ཡོད་པ་ཤེས་ལ།རང་གི་གཤིས་ཀ་དང་དགའ་ཕྱོགས་དེའི་དབང་གིས་རང་ཉིད་རང་གི་མགོན་དུ་བརྩིས།རང་གི་རང་ཚུགས་རང་གིས་བཟུང་།

　　དེ་ནས་ཚུར་འཕོས་པའི་མཐོང་སྣང་གི་འཚོ་བ་ལས་བརྒལ་ཏེ་ཕར་འགྱེད་པའི་ནང་སེམས་ཀྱི་འཇིག་རྟེན་ཟེར་བ་ཞིག་མཐོང་།དེ་དུས།དགའ་འགྱུར་སྡུག་སྐྱེན་གྱི་ཚོར་བ་དྲག་པོ་ཞིག་གིས་ཡར་ནས་ཆུང་འདྲིས་བྱམས་པ་དང་མར་ནས་ཞེ་མཐུན་གྲོགས་པོ་རྙེད།དེ་དུས་ཀྱི་ཚོར་བ་དྲག་པོ་དེ་རུ་གནས་ལུགས་དང་རྒྱུ་མཚན་གྱིས་བོར་བའི་འགྲེལ་བཤད་ལྷག་མ་རེ་ཡོད་ལ།འཚོ་གནས་དང་ཁོར་ཡུག་གིས་བསྐྱུར་བའི་སྐད་ཆ་གསར་བ་རེ་ཡོད།སྐབས་ཤིག ཚོར་བ་དྲག་པོ་དེའི་དབང་གིས་ཕྱི་རོལ་གྱི་ཁོར་ཡུག་གཏན་བརྗེད་དུ་གྱུར་བ་ལྟར།ཁྱོད་རང་མི་ཞིག་གི་ནང་སེམས་ལ་གཡེང་ཞིང་།ནང་སེམས་ཀྱི་འཇིག་རྟེན་ལ་གཡེང་།འཇིག་རྟེན་གྱི་ལྟད་མོ་ཡིས་བཟི།ཁྱོད་ཀྱིས་སྙིང་ཆུང་གི་འཕར་སྒྲ་ཡིས་དཀྲོགས་པའི་དགའ་བ་རེ་རེ་དང་དུ་བླངས་ལ།མིག་ཟུང་གི་མཆི་མ་རུ་འབབ་པའི་ན་ཟུག་རེ་རེ་སེམས་ལ་ཉར།དེ་ལྟར།བརྩེ་དུང་གི་བཟི་ཁ་ཐེངས་མང་ཐེབས་ཤིང་།མཛའ་གཅུགས་ཀྱི་ལག་འཇུ་རྒྱུན་མ་ཆད།

　　དེ་དུས།མཐོང་སྣང་གི་འགྱུར་བ་རབ་ཏུ་རྒོད་ནའང་ང་ཚོས་རང་གི་གཟུགས་བརྙན་གྱི་གཅེས་སྤྲས་ལས་མྱངས་པའི་དུས་ཚོད་རེ་རེ་ཡུན་གྱིས་བསྐྱལ་བས།བབ་ཆགས་པའི་ངོ་གདོང་རེ་རེ་དང་གྲལ་དག་པའི་གཟུགས་གཞི་རེ་རེ་ནི་ཚེ་སྲོག་གི་གསོན་ཤུགས་དབྱར་ཁ་ནས་བསྡད་པ་ལྟར་དལ་བ་དལ་བུར་ཡིད་ལ་བབས།ཡིད་ཀྱི་མེ་ལོང་གསལ་ལེར་བབས།དེ་དུས།ཏག་ཏག དབྱར་ཁ་ཡིན་པ་འདྲ།རླུང་བུའི་བསིལ་འཇམ་དང་ཉི་མའི་དྲོད་ཁོལ་གྱི་འོག་ནས་འགྲོས་ཡང་བའི་གོམ་པ་རེ་རེ་གནས་གཅིག་ཏུ་སྤོས་ཀྱང་རྒྱང་ལ་སྤོས་འདང་གིས་ཁྱོད་ལ་ཕྱོགས།དགའ་བའི་དགོད་སྒྲ་དང་སྐྱིད་པའི་འཛུམ་མདངས་ཀྱི་ཀློང་ནས་གཏིང་ཟབ་པའི་གནས་ལུགས་རེ་རེ་གཞན་ལ་བཤད་ཀྱང་སྤོབས་པས་བཏེགས་ཏེ་རང་ལ་ཕུལ།སྐབས་དེར།གློ་བུར་དུ་ཁྱོད་ཀྱི་གཟུགས་པོ་ཇེ་རིང་དང་སྐད་གདངས་ཇེ་སྦོམ་དུ་གྱུར།ལྐོག་གྱུར་གྱིས་འཚུབ་པའི་འཇིག་རྟེན་དེའང་ཤེས་བྱ་ཐར་ཐོར་གྱི་སྐྱུར་རྩི་དང་བསྡོངས་ནས་ལྷོད་ལ་བབས།དལ་དྲགས་པའི་དུས་ཚོད་ཀྱི་གོམ་པའང་སེམས་ཤོར་བའི་བུད་མེད་དག་གི་བྲང་ཁ་ནས་འབུས།སྙིང་ཉེ་བའི་གསར་བུ་དག་གི་གཟུགས་བརྙན་ལས་བུད།

　　༼༢༠༡༡ལོར་རྨོ་ལྷོ་ཁུལ་མི་རིགས་སློབ་འབྲིང་དུ་བླངས།༽

　　དེ་ལྟར།འགྱུར་ལྡོག་གི་འཕྲུལ་སྣང་མངོན་སུམ་དུ་སྣང་བ་ནས།ཕྱུགས་ཆུང་མ་ཉམས་པའི་དྭངས་གཙང་རིགས་ཤིག་ཤོག་དཀར་དུ་གཅུད་པའི་ཡིག་འབྲུ་རེ་རེའི་འཚེར་སྣང་ལ་འདྲེས་ཡོད།སྟོང་འདང་དུ་ཡན་པའི་བསམ་གཞིག་རེ་རེའི་མཁའ་དབུགས་ལ་སིམ་ཡོད།མི་གཅིག་གི་སྐད་ཆ་དང་རྣམ་འགྱུར་གྱིས་གང་བའི་འཇིག་རྟེན་དེ་རུ།གཟུགས་ཕྲ་མོ་དལ་བུར་ལྡེམ་པའི་གོམ་འགྲོས་གར་གྱི་སྟབས་ཀྱིས་སེམས་ལ་ཤོར།སྒྲ་དྲག་ཞན་སྙིང་ལ་ལྡིང་བའི་རོལ་མོ་དགའ་སྐྱོའི་འགྱུར་གྱིས་རྣ་ལ་འཁྱིལ།ལུས་འཇམ་རྩུབ་ལྕེ་ཡིས་བསླུ་བའི་འཐམ་འཁྱུད་འདྲིས་པའི་ཚུལ་གྱིས་ཁྲག་ལ་ལྡང་།དྲི་སྤོས་ཆུ་སྣ་ལ་བདུགས་པའི་བག་ཆགས་སྐབས་དང་སྐབས་ཀྱིས་ཡིད་ལ་ཞག རོ་མཆོག་ལྡན་བྲོ་བ་ཟབ་པའི་མྱོང་བ་ཡང་དང་ཡང་གིས་མཉམ་དུ་རོལ།

　　འཇིག་རྟེན་ནི་སློབ་ར་ཆུང་ཆུང་དེའི་སློབ་ཁང་དང་ཇ་ཁང་གི་གྲུ་ག་རེ་ནས་འབུད་དུས་ཀྱི་རྣམ་རིག་གསལ་པོ་དང་དོ་སྣང་ཟབ་མོ་དེེར་རག་ལས་པ་ལྟར།དེ་དུས།འདང་རྒྱག་ལྷག་མ་ཞིག་ཡོད་ན་ནི་ལྭ་བ་དཔེ་གསར་རེ་ཉོ་འདུན་དང་སྐྲ་ཚུགས་ཡན་གར་བ་འཇོག་འདོད་དོ།།དེ་དུས།ཨ་ལན་མེད་པའི་འཕྲིན་ཡིག་ཅིག་ལ་ཡང་ཡང་བསྒུགས་ནས་བརྩེ་བས་འབར་བའི་ཡིག་འབྲུ་རེ་རེ་མི་ཞིག་གི་རྒྱབ་གཟུགས་ལས་འཁྱགས།དེ་དུས།ཁང་བ་བདག་མེད་རེའི་ཕུགས་ནས་བཟའ་ཚང་གི་བྲོ་བ་རེད་བསམས་པའི་འཁྲུལ་སྣང་གི་ཚོར་བ་སྐད་ཅིག་མ་སྐྱེས།དེ་དུས།མིང་གིས་འབོད་མ་ནུས་པའི་མི་ཞིག་གི་གཟུགས་བརྙན་ནི་འོད་ཀྱིས་ཁེངས་པ་ལྟར་འགྲོ་ཞོར་མིག་ལ་ལྷུང་བ་ལྟ་ན་སྡུག འདུག་ཞོར་ཞེ་ལ་བབས་པ་བརྗེད་པར་དཀའ།དེ་དུས།ངས་ཁྱོད་ལ་སྐྱེས་ཕོ་རབ་ཅིག་གི་ཚུལ་དང་ཁྱིམ་ཆུང་མ་ཞིག་གི་འདང་གིས་ཆུང་མ་ཞེས་བོས།ཡ་རུར་མ་སླེབས་གོང་གི་མཛོ་འགྲོས་རྒྱག་སྟངས་དེ་རང་དེ་ལྟར་འཛེམ་དོགས་མེད་པར་གཞན་ལ་བསྟན་པ་ནས་བཟུང་།ང་ཚོས་འཇིག་རྟེན་འདིར་བརྩེ་དུང་ཁོ་ན་ལས་ཅི་ཡང་མི་འདུག་སྙམ།

　　དགའ་ཕྱོགས་དང་གཤིས་ཀ་ཟེར་བ་དེ་ཡིན་ནམ།རྒྱུ་མཚན་མི་ཤེས་པའི་མཐུན་ཕྱོགས་ཤིག་གིས་ང་ཚོ་སྐོར་དང་སྐོར་གྱིས་གྲོགས་པོར་གྱུར།དེ་དུས།འགྲོ་རོགས་འདུག་རོགས་ཙམ་གྱི་རེ་བ་ཆུང་ངུ་དང་ཟ་རོགས་འཐུང་རོགས་ཙམ་གྱི་ལོངས་སྤྱོད་ཙག་ཙིག་ནི་འཚོ་བའི་ཁྲོད་ཀྱི་ཡོད་ཚད་ཀྱི་ཡོད་ཚད་ཡིན།གཟའ་མཇུག་གི་བར་སྟོང་ཆུང་ཆུང་དེ་རུ་ལྷན་དུ་སྲང་ལ་སོང་ནས་གོན་པ་ཉོས།མཉམ་དུ་མགྲོན་ཁང་གླས་ནས་ཆང་རག་མྱངས།བཟི་སྣང་བན་བུན་དེའི་ཆེད་དུ་ཝུ་ཆང་གི་བྲོ་བ་རྟ་རྫིང་དུ་བསམས་ཀྱང་བཙན་གྱིས་མིད།སྙིང་གཏམ་དམར་དམར་པོ་ལ་སྐད་ཆ་ཉག་ཉོག་རྡུལ་ལྟར་འཚུབ་ཀྱང་ཆུ་ལྟར་དྭངས།ཆུ་ལྟར་དྭངས་པའི་འདུན་པ་དེའི་ཀླུང་ནས་ང་ཁྱོད་ལ་དགའ་ཞེས་པའི་སྐད་སྒྲ་རེ་རེ་དང་ཡིག་འབྲུ་རེ་རེ་འོད་ཀྲིག་ཀྲིག་རྒྱང་ལ་ཁུར།རྒྱང་རིང་གི་སེམས་པའི་གཏིང་ལ་ཁུར།ད་ལྟ་ད་དུང་ཡང་ཕྱིར་དྲན་གྱི་སྣང་བ་མག་མོག་དེ་ན་ལྷམ་མེར་ལྷང་ངེར་འཚེར་ཡོད་ཨང་།དུས་བཏབ་པའི་ཁ་བརྡ་ཐན་ཐུན་སྙིང་གི་འཕར་ལྡིང་གིས་དཀྲོལ་བ་ལྟར་འབྲུ་མེད་པའི་ཚོར་བའི་དབྱངས་རྟ།ང་དང་ཁྱོད་ཀྱི་སེམས་ཁོང་ལ་ཁྱབ།ང་ཚོ་བཤད་རྒྱུ་ཅི་ཡང་མེད་པར་ཕན་ཚུན་ལ་ཅེར།

　　ཁུ་སིམ་པའི་བཞུར་རྒྱུན་རིགས་ཤིག་ཁ་པར་གྱི་སྐུད་ལམ་བརྒྱུད་ནས་ཕར་ལ་ཆས།གཟུགས་མེད་ཀྱི་འཕྱོ་འཇགས་རིགས་ཤིག་QQཡི་འཕྲིན་ལམ་བརྒྱུད་ནས་ཚུར་ལ་མཆེད།འདྲ་པར་གཅིག་གཉིས་རེ་དང་ཚིག་འབྲུ་ཐར་ཐོར་རེའི་གསེང་དུ་ཅི་ཡང་ཤོང་བ་ལྟར།ང་ཚོའི་སེམས་པ་དྲ་བར་ཚུད་ཅིང་།སེམས་པའི་སྒོ་མོ་དྲ་བར་ཐོགས་པས།རང་ལ་དབང་བའི་དྲ་ཐོག་གི་བར་སྟོང་དེ་རུ་སྙིང་ཉེ་བའི་སྐད་ཆ་དང་རྣམ་འགྱུར་གྲངས་མེད་ཁྱོད་ལ་བཞག ཁྱོད་ཀྱི་གསང་བའི་སྐུད་སྣེ་རུ་བཞག སྣང་བའི་ནམ་མཁའ་ལ་བཏབ།སྐད་ཆ་དེ་དག་སུ་ལ་གསལ་བ་སེམས་ལ་དྲིས་ན་འཆུག་པ་མེད་ཨང་།དྲ་ཁང་ལས་མཐོང་བའི་འཇིག་རྟེན་དེ་ནི་དེ་ལྟར་ཚོར་འདུ་དྲག་པོ་དང་ཡིད་འགུག་སྐྱེན་པོ་ཡིས་ཁེངས་བར་གྱུར་བས།ཞག་མལ་གཅིག་གཉིས་རེ་དྲ་ཁང་ནས་བསྐྱལ་བ་དྲན་ནམ།རོལ་རྩེད་སྣ་གཅིག་ཞག་གང་བོར་བརྩེས་པ་དྲན་ནམ།གླུ་དབྱངས་གཅིག་ལ་ཐེངས་བརྒྱ་རུ་ཉན་པ་དྲན་ནམ།

　　ལོ་དེ་ལ།གཅིག་གྱུར་གྱི་སློབ་ལྭ་སྔོ་ཁྲ་དེའི་འོག་ནས།ང་ཚོས་མེ་ལོང་ནང་གི་རང་ཉིད་ཀྱི་གཟུགས་བརྙན་གཅིག་པུ་དང་།གཟུགས་བརྙན་དེའི་དགའ་སྐྱོ་ཁོ་ན་སྙོར།མིང་ཡིག་རྐྱང་རྐྱང་བྲིས་པའི་འབྲི་དེབ་དེ་རུ་ང་ཚོ་ནི་གཅིག་གིས་ཀྱང་ཚབ་བྱེད་མི་རུང་བའི་མི་སྣ་རེ་རེ་ཡིན།ལུས་རྩལ་དྲུག་གི་ལང་ཚོ་རྩེད་མོས་རྫོགས་ནས་ཁྱོད་རང་ལྒང་ལི་འཕེན་པར་ཧ་ཅང་དགའ།སེམས་གངས་དཀར་གྱི་སྙན་ཚིག་སྤོབས་པས་གྱེར་ནས་ང་རང་རྩོམ་ཡིག་འབྲི་རྒྱུར་ལྷག་ཏུ་དུངས།ལོ་དེ་ལ།ང་ཡིས་ཚོན་མདངས་ཀྱི་སྡེབ་ཁའི་བར་ནས་རི་མོ་བ་ཞེས་པའི་རྒྱང་རིང་གི་འབོད་པ་ཞིག་ཐོས་ལ།ཁྱོད་ཀྱིས་སྐད་ངག་གི་འགྱུར་ཁུགས་བར་ནས་རོལ་མོ་བ་ཞེས་པའི་འབྱུང་འགྱུར་གྱི་རྒྱལ་ཁམས་ཤིག་མཐོང་།ལོ་དེ་ལ།རྡུང་རེས་ཀྱི་མུ་ལ་གཅར་རེས་ཀྱིས་མི་ཞུམ་པའི་ང་ཡི་ང་རྒྱལ་དེ་རང་མེ་ལྟར་འབར་ཞིང་།གོ་བསྐོན་གྱི་རྗེས་ལ་བློ་འགུག་གིས་མ་ནུས་པའི་ཁྱོད་ཀྱི་ཨུ་ཚུགས་དེ་ཡང་རྡོ་ལྟར་མཁྲེགས་པས།སྐབས་ཤིག་གི་སློབ་བྱོལ་དེ་དང་སློབ་བྱོལ་དེའི་གྱེས་བྲལ་དེའང་འཇའ་ལྟར་ཡལ་བ་བརྗེད་དུ་མེད་ཨང་།

　　དེ་ལྟར།ང་ཚོས་དཔེ་དེབ་ཀྱི་ཤོག་ངོས་རེ་རེ་ནས་ཆུང་ནས་འཚོས་པའི་ཤེས་བྱའི་ཆུ་རྒྱུན་ཇེ་ཆེ་ནས་ཇེ་ཆེ་ཡིན་པ་ཤེས།ནམ་ཞིག་གོམ་འགྲོས་དང་ལོ་ཟླ་རྒྱང་ལ་འཁུར་བར་ཚོད་བགམ་བྱས།རིག་གནས་སྣ་མང་གི་གོ་ཐོས་དེ་དང་རྒྱུགས་འབྲས་འདྲ་མིན་གྱི་སྐར་གྲངས་དེ་ལས་ང་ཚོའི་ཕུགས་བསམ་གྱི་གཤོག་སྣེ་སོམ་ཉི་ལ་དཔྱངས།བགད་བགད་ལ་བརྩེས་འཇོག་པའི་གྲལ་མཚེས་དེ་དང་གཉིད་གཉིད་ལ་བསྡད་འཇོག་པའི་ཤག་རོགས་དག་དང་ལྷན་དུ་བསྐྱལ་བའི་དགའ་སྐྱོ་འདྲེས་མའི་འཚོ་བ་དེ་རང་།ཁ་གྲག་རྒྱུར་མི་དགའ་བའི་སློབ་གྲོགས་དེ་ཡིས་ཁུ་སིམ་མེར་རྒྱང་ལ་བསྐྱལ་བ་ལྟར།དྲན་ཤེས་ཀྱི་གཞུ་མོ་ནང་དུ་བཀུག་དུས།ལོ་ཟླ་བའི་མདའ་མོ་རིང་དུ་ཤོར་ཟིན།སྐབས་དེར།ང་ཚོ་གཞི་ནས་ཤེས་མེད་ཚོར་མེད་ངང་སེམས་ཁྲལ་ལ་གཡེང་བའི་དགེ་རྒན་དག་གི་བསམ་པའི་ནང་ལ་སླེབས་པ་ལྟར།ལོ་ངོ་གསུམ་ལ་བསྒུགས་པའི་མཐོ་རྒྱུགས་ཀྱི་རྒྱུགས་ར་ལ་ཆས།ང་ཚོས་གཅིག་མཐུན་གྱི་ལས་དབང་དང་དུ་བླངས་པ་ནས་གྱེས་བྲལ་གྱི་ཆོས་ཉིད་སྔུན་ལ་བསུས་པས་ན།ལོ་ངོ་གསུམ་གྱི་དགའ་སྐྱོ་ཆགས་སྡང་ལ་མཛེས་སྡུག་གི་རྫོགས་ཚིག་བཀོད།

　　སྐབས་ཤིག ང་ཚོ་རང་རང་ལས་ཀྱི་བསྐོས་ཐང་ལྟར་སློབ་ཆེན་གྱི་སྒོ་ཐེམ་འགྲིམས།སློབ་གྲྭ་དང་དགེ་རྒན།སློབ་གྲོགས་དང་ཤེས་བྱ་ཟེར་བ་ལ་སླར་ཡང་གོ་བ་གསར་པ་རེ་ཆགས་ཤིང་།རྒྱུས་མེད་པའི་ཁོར་ཡུག་ཅིག་ནས་ཡོད་ཚད་རྒྱུས་ཡོད་དུ་འགྱུར་བའི་གོ་རིམ་དེ་ནི།བསྒྲིགས་དྲགས་པའི་ལམ་བུ་ཇེ་ཡངས་སུ་གྱུར་བའི་རང་དབང་གི་བདེ་སྣང་དེ་ཡིན་ལ།བསྡམས་དྲགས་པའི་གོམས་གཤིས་རང་ཆགས་སུ་འབད་པའི་མོས་འདུན་གྱི་བགྱི་བ་དེ་ཡིན།ང་ཚོས་སོས་དལ་བོས་དུ་བ་འཐེན་ཆོག་ལ་བག་ལྷོད་པོས་སྐྲ་ལོ་བཞག་ཆོག ཁམས་དྭངས་མོས་ལྭ་གསར་གོན་ཆོག་ལ་སེམས་སྐྱིད་པོས་དགའ་རོགས་བཙལ་ཆོག ང་ཚོའི་སྤོབས་པ་དང་ངར་ཤུགས་འདྲེས་མའི་སྣང་བ་རླབས་ལྟར་འཕྱོ།ང་ཚོའི་བསམ་གཞིག་དང་དཔྱོད་ཤེས་རྒོད་པའི་རྟོག་པ་རླུང་ལྟར་འགྱུ།གློ་བུར་བའི་འགྱུར་ལྡོག་དེ་ལས་འཚོ་བ་ལ་ངོས་འཛིན་ཟབ་མོ་དང་སྤྱི་ཚོགས་ལ་ལྟ་སྟངས་ཡག་པོ་ཡིས་ཁྱོད་ཀྱིས་རང་གི་ཕུགས་བསམ་གྱི་ལམ་སྣེ་ཟིན་ཡོད་ཀྱང་སྲིད།འཆར་གཞི་རེ་རེ་ལྷོད་མེད་དུ་བསྲིངས་བ་ནས་ཁྱོད་ནི་རང་ལམ་རང་གིས་སྙེག་པའི་ཁེར་རྐྱང་གི་དཔའ་བོ་དེ་ཡིན།ཡང་ན།ཁྱོད་ཀྱིས་རང་དབང་གི་ཁོར་ཡུག་དེ་རུ་དུས་ཚོད་ཀྱི་ལོངས་སྤྱོད་བག་མེད་དུ་རོལ་ནས་གཉིད་འདོད་དུས་མལ་ཁང་དང་རྩེ་འདོད་དུས་དྲ་ཁང་དུ་བསྡད་དེ།རོལ་རྩེད་ཀྱི་བསླུ་བྲིད་དང་ཨ་རག་གི་བཟི་ཁ་ལ་འཐོམ་ཡོད།གང་ལྟར།ཉི་མ་སྤྱི་གཙུག་ན་ཤར་བ་ལྟ་བུའི་དུས་སྐབས་དེ་ནི་ཡོད་ཚད་གསོན་ཤུགས་ཀྱིས་བརྟས་པའི་དབྱར་གཞུང་ཞིག་ལྟར།ང་ཚོས་ནམ་ཡང་བརྗེད་པར་དཀའ་ལ་དྲན་པར་སླ།ལོ་ངོ་བཞི་ཙམ་གྱི་དུས་ཡུན་དེ་ལ།སྐྱེ་བ་འདིའི་ངལ་གསོ་མཛད་པ་ལྟར།ཁོམ་ལོང་དང་སོས་དལ་གྱི་བར་ནས་བརྩོན་འགྲུས་དང་སྡུག་རུས་ཞེས་པ་གོམས་གཤིས་སུ་བརྩིས་ཤིང་།འུར་ཟིང་དང་རྩེད་འཇོ་ཡི་ཀློང་ནས་རྣམ་གཡེང་དང་སྒྱིད་ལུག་ཅེས་པ་ལོངས་སྤྱོད་དུ་བསམས།

　　ཏག་ཏག སྐབས་ཐོག་དེར་མགོ་ཐོག་ན་གནམ་མ་གཏོགས་མེད།དཔེ་ཀློག་གི་དྲི་བསུང་གིས་བསྐྱེད་པའི་བསམ་གཞིག་གི་སྒོ་མོ་དལ་གྱིས་ཕྱེས་པས།ཉི་འོད་ལམ་ལམ་གྱི་མཐོང་སྣང་ཡག་པོ་ལས་རྒྱུ་མ་ཕུ་འདེད་ཀྱི་བློ་རིག་གསལ་བོ་ནི་རི་མོ་སྐྱ་ཐིག་ལ་བབས་པ་དང་རྩ་ཚིག་སྤྱི་ཆིངས་སུ་ཆགས་པ་ལྟར་ང་ཚོའི་ཡིད་ལ་ཐོལ་གྱིས་བརྡོལ་ཏེ་ཡུན་གྱིས་ངེས།ཡི་གེའི་སྨྱན་པ་ལས་ཐོབ་པའི་སྤྲོ་སྣང་དེ་རིགས་ནི་ཆུང་དུས་ནས་སློབ་གྲྭ་བརྒྱུད་པའི་གྲུབ་འབྲས་ཉག་གཅིག་ཏུ་བརྩིས་ན།ང་ཚོ་གཞི་ནས་གྲུབ་འབྲས་དེ་ཡི་སྤྲོ་སྐྱིད་དུ་འཁོར་ཡོད།འཚོ་གནས་ཁོར་ཡུག་དང་རིག་གནས་ཤེས་བྱ་ཡིས་བྱིན་པའི་བསམ་བློའི་ཁོག་དབུབ་དེ་ལྟར་ཆགས་པ་ནས།ང་ཚོས་ཡང་ཡང་བཀླགས་པའི་དཔེ་དེབ་ཅིག་སེམས་ལ་ཉར།ཡིད་ལ་སིམ་པའི་གཏམ་རྒྱུད་ཅིག་མིག་ཆུས་མྱངས།ལྷན་དུ་བལྟས་པའི་གློག་བརྙན་ཞིག་བསྐྱར་དུ་གླེང་།དེ་དུས།འགྲོས་དལ་བའི་དུས་ཚོད་ཀྱི་དབྱངས་རྟའི་བར་ནས་འཆམ་འཆམ་དུ་སོང་བའི་སྡོང་གསེང་དེར་ཉི་འོད་འཁྱིལ་ཡོད།མིག་ལ་འཚེར་བའི་ཉི་འོད་ཀྱི་ཀློང་དུ་གཞོན་ཤ་དོད་པའི་ངོ་གདོང་རེ་རེ་འཛུམ་གྱིས་ཁེངས།ཁྱོད་ཀྱིས་སོ་དཀར་པགས་འཛུམ་གྱི་ཟུར་མིག་རྣོན་པོ་སུ་ལ་འཕངས།དཀར་འཇམ་མཁྲང་ཟླུམ་གྱི་བྲང་ཁ་སྒོར་མོ་སུ་ལ་གླན།རང་ལུས་ཀྱི་རྒྱ་མཚོ་ལས་རྙེད་པའི་རྦ་རླབས་མཉེན་མོས་སུ་ལ་བརྡབས།རླབས་སྒྲ་གཉོམ་པོ་གང་ལ་འཁོར།འཛེམ་དོགས་མཐུག་པོ་དེ་དང་དངངས་སྐྲག་ཟབ་མོ་དེ་བཤུས་རྗེས།ང་ཚོ་གཞི་ནས་འཇིག་རྟེན་གྱི་དགའ་བདེའི་དཔལ་ལ་གོམས་མགོ་བརྩམས།ང་ཚོས་གཞི་ནས་འཇིག་རྟེན་འདིའི་འདོད་དགུའི་རྩེེད་མོ་རོལ་མགོ་བརྩམས།

　　ལོ་ན་ཉི་ཤུའི་སྒང་གི་ཉི་མ་དེ་དག་རང་ཉིད་ཁོ་ནར་དབང་བ་ལྟར།ཚེ་གང་བོར་ཕྱིར་དྲན་གྱི་མཚེར་ས་རུ་ལྗང་མདོག་གིས་སྨིན་འདུག་པ་ནི་ཚོར་འདུ་དྲག་པོ་ཞིག་དང་བརྩེ་དུང་ཟབ་མོ་ཞིག་གིས་ལོས་ཡིན།སྐབས་ཐོག་དེའི་ལུས་ལང་ཚོ་ཡི་མཛེས་སྡུག་དང་སེམས་གངས་དཀར་གྱི་རང་མདངས་བབ་ཆགས་ལྷུན་གྲུབ་ངང་ཡོད།དེ་དུས།དགའ་སྐྱོ་ཆགས་སྡང་གི་རྣམ་འགྱུར་རེ་རེ་དང་བཟང་ངན་དགེ་སྡུག་གི་ལྟ་ཚུལ་རེ་རེ་སྐད་འཕྲིན་གྱི་བར་སྟོང་དུ་བཤམས་ཏེ།རང་སྣང་གི་བྲོ་བ་ཟབ་པའི་སྐད་ཆ་རེ་རེ་རང་གི་མཚོན་བྱེད་དུ་བཀོལ་ཞིང་།རང་འདོད་ཀྱི་རྣམ་པ་དོད་པའི་པར་རིས་རེ་རེ་རང་གི་རྒྱབ་ལྗོངས་སུ་བཞག དེ་དུས།རབ་རིབ་ཀྱི་བཟི་ཁ་ལྡན་པའི་མ་འོངས་དང་ཕུགས་བསམ་དངོས་ཡོད་ལ་འདྲེས།དངོས་ཡོད་ཀྱི་གསོན་ཤུགས་དང་སྤོབས་པ་ལ་འདྲེས།སྙིང་སྟོབས་དང་རང་ཚུགས་ལ་འདྲེས།དེ་ལྟར་བློ་འགྱོད་དང་ནོངས་པ་མེད་པའི་ལོ་ཟླ་དེ་མཛེས་སྡུག་གི་བསླུ་བྲིད་བཟློག་མ་ནུས་པར་དལ་བུར་སྐྱེལ་དུས།གདོང་གཏད་པའི་འབྱུང་འགྱུར་ལ་རྨི་ལམ་གྱི་ཟིལ་ཤུགས་དང་སྟོང་བསམ་གྱི་འཆར་གཞི་གསལ།སེམས་ཁུར་དང་གནོན་ཤུགས་མེད་པར་ཆེས་སྐྱིད་པའི་དུས་སྐབས་ཤིག་གློ་བུར་ཡལ་བ་ནི།རྩི་ཤིང་གི་ཁ་དོག་གསེར་མདངས་ལ་འདྲེས་པ་ལྟར།ཏག་ཏག སློབ་མཐར་ཕྱིན་མ་ཐག ནམ་ཟླ་སྟོན་ལ་སླེབས།

　　ལྷིང་འཇགས་ཀྱི་དུས་ཚོད་དེ་རུ་ཡོད་ཚད་བསྐྱར་དུ་ངོས་ཟིན་པ་ལྟར།སྨྲ་བ་མེད་པའི་ལྟད་མོ་གང་མང་ཞིག་བརྒྱུད།རྒྱུགས་འབྲས་ཀྱི་རེ་སྒུག་ལ་ཉན་པའི་སྐད་ཆ་ཐན་ཐུན་སེམས་གསོ་རུ་གྱུར་བས།རྫུན་གཏམ་པའི་ལམ་བུ་ཁོ་ན་རང་སེམས་ཀྱི་སྐྱེད་ཚལ་དུ་འཐེན།གྲིབ་རིས་ཀྱི་ཨ་ལན་ཉོག་པའི་གར་སྟབས་དེའི་རྗེས་སུ།ཡོད་ཚད་སྤྲིན་དཀར་གྱི་འགྱུ་བ་དང་གནམ་གཤིས་ཀྱི་འགྱུར་ལྡོག་གིས་ལན་པ་ལྟར།ང་ཚོ་ལས་དབང་གི་རླུང་བུས་སྒུལ་ཡུན་ལ།ངལ་དུབ་ཀྱི་སྐད་སྒྲ་ཁོག་ཏུ་ལྷུང་།ང་ཚོས་ཡོད་འོས་པའི་ལེ་བདའ་དང་ཁག་འཇོག་སུ་ལའང་མ་བཤད།ང་ཚོས་བཤད་འདོད་པའི་གཏམ་རྒྱུད་དང་རེ་བ་སུ་ལའང་མ་གླེང་།རང་གི་མཚར་སྣང་རྒོད་པོ་དང་དགའ་སྡུག་སྐྱེན་པོ་དེ་དལ་བུར་བསྐམས་ནས།ཕུགས་བསམ་གྱི་ཁ་རླངས་རླུང་ལ་བསྲེས་པས། ཁྱོད་ནར་སོན་རྗེས་ཚན་རིག་པ་བྱེད་ས་ཡང་མེད་ལ།ཁྱོད་ནར་རྗེས་ཚན་རིག་པ་བྱེད་འདོད་ཀྱང་མེད།ཞིབ་ཏུ་བསམས་ན་ཁྱོད་ཀྱིས་ངོའང་མ་ཤེས་པ་ལྟ་བུའི་མི་མང་པོ་ཞིག་ངོ་ཤེས་ཤིང་། འདང་རེ་བརྒྱབ་ན་ཁྱོད་ཀྱིས་རྒྱུས་ཀྱང་བླངས་ཡོད་པ་ལྟ་བུའི་མི་རེ་འགའ་བརྗེད་ཡོད་ངེས།

　　དུ་བས་བཅིལ་བའི་ཡ་ཆུང་གི་མེ་ལྕེ་ཇེ་གཉོམ་དུ་གྱུར་བ་ནས།བསམ་གཞིག་རུམ་པའི་མཚན་གཞུང་རེ་རེ་ཁེར་རྐྱང་ངང་བསྐྱལ།འཁྱག་པ་ཐེབས་པའི་གྲང་རླུང་ཐོར་བུ་སྐབས་སྐབས་ཀྱིས་ལྡང་བ།མོ་ཡི་བྲང་གཞུང་ནེམ་པོས་སྲོ་ཙམ་བྱས་ཀྱང་།བརྩེ་དུང་གི་ས་ཚིགས་རྗེས་མ་དེ་རུ་ཁྱོད་རང་གཉེན་སྒྲིག་ཅེས་པའི་རྩེད་ར་མཚར་པོ་ཞིག་ལ་ཐུག ཁྱོད་ཀྱིས་དྲན་པ་མང་པོའི་འགྱེད་འཕྲོ་ཡིས་གསལ་མ་ནུས་པའི་མུན་པ་དེའི་ནང་དུ་གཉིད་མི་འདོད་པ་མང་པོ་ཞིག་མཐོང་ཡོད་ངེས།ཁྱོད་ཀྱིས་བསྐྱར་བཟློས་ཀྱི་ལས་ཀ་ཞིག་ལས་དུས་ཚོད་ཀྱི་སོ་ཁ་ཟད་ནས་གཏམ་རྒྱུད་ཀྱི་ཡོ་ལང་རླུང་ལ་འཇགས་པ་ཐོས་ཡོད་ངེས།དྲན་པ་གཅོད་པའི་ཕ་ཡུལ་གྱི་མི་དང་དངོས་པོས་ང་ཚོ་ཡང་ནས་ཡང་དུ་རང་རང་ས་ནས་ཁ་རོག་གེར་འདུག་ཏུ་བཅུག གོམ་ཁ་འདོགས་པའི་ས་གནས་དེའི་ལམ་དང་ཁང་བས་ང་ཚོ་ལོ་ནས་ལོ་ལ་སྙན་ངག་དང་རྒྱང་རིང་ལས་སད་དུ་བཅུག བསྒུགས་ནས་ཡུན་རིང་འགོར་བའི་འབྱུང་འགྱུར་དེའི་ཁངས་ཤུལ་ནས་འདར་སིག་སིག་ལུས་པ་ལྟར།སྐབས་ཤིག ཁྱོད་ལ་དགའ་ཕྱོགས་ཅི་ཡང་མེད་པ་འདྲ།ཁྱོད་ཀྱིས་གོམས་དྲགས་པའི་མི་དག་གི་གཟུགས་བརྙན་ལས་རང་དོན་ཞེས་པའི་འཚོ་ཚིས་ཙག་ཙིག་ལ་ཉམས་སད་པ་ལྟར།བྱིས་པ་ཞིག་གི་ངུ་སྐད་དང་ལྷན་དུ་འཇིག་རྟེན་གྱི་དོན་དག་ཡོད་ཚད་གསར་དུ་མགོ་བརྩམས་པར་འདོད།

　　ད་ནི་གསེར་མདངས་ཀྱིས་ལྷུང་བའི་ལོ་མ་རླུང་ལ་འཕྱོ་བ་ལྟར།མི་དག་སྒམ་ཞིང་བརླིང་བའི་ངང་ལྷོད་ཀྱིས་འཚོ་དུས་ལ།ཁྱོད་ཀྱིས་འདང་མ་ཕོག་པ་མང་པོ་ཞིག་ལ་བསམ་ཤེས་བྱེད་ཅིང་།ང་ཡིས་སྒྲུབ་མི་འདོད་པ་མང་པོ་ཞིག་ལ་བཟོད་བསྲན་བྱས་པས།ནར་མ་སོན་པའི་འཛུམ་མདངས་དེའི་གཏིང་ནས་རྒྱང་རིང་བའི་དགུན་ཁ་ཞིག་ཚུར་ནས་ཚུར་ལ་བཅར།ད་ནི་གཞི་ནས་ཁྱོད་རང་ནར་སོན་ཡོད་ངེས།

སློབ་གྲྭ

　　ད་ལྟ་ཕྱིར་འདང་རེ་བརྒྱབ་ན་མི་ཚེའི་ནང་གི་ཆེས་ཐོག་མའི་སློབ་ཁང་ནི་ཕ་ཡུལ་གྱི་སྤང་སྟོད་དུ་ཕུབ་པའི་སྦྲ་གུར་ཞིག་རེད།ངའི་སྣང་བ་ཞིག་ལ།ཏག་ཏག མེ་ཏོག་གི་ཐང་མ་བརྡལ་བའི་དབྱར་གཞུང་ཞིག་ལ་སྦྲ་གུར་དེའི་ནང་དུ་ཐེངས་དང་པོར་འཛུལ།རྒྱབ་ཁུག་ཏུ་འགྱིག་དམ་ཞིག་བཅུག་ཡོད་པ་ལས་དཔེ་ཆ་ཞིག་བཟུང་ཡོད་པ་དྲན་པར་དཀའ་ཡང་།དེ་ནི་ང་རང་སློབ་གྲྭར་སོང་བའི་ཉིན་དང་པོ་དེ་ཡིན་ངེས།འགྱིག་དམ་དུ་བཅུག་པའི་འོ་ཇ་གོམ་སྟབས་ཀྱིས་དཀྲོགས་ནས་རྩྭ་ལྗང་གི་ནེམ་ཤ་རྐང་བས་གླན་ཐེངས་དེར་དྲན་པ་ཉག་གཅིག་ལུས་ཡོད་པ་ནི་ཀ་ཁའི་འགྱུར་ཁུགས་དང་སློབ་མའི་རྩེད་འཇོ་སོགས་མ་ཡིན་པར་འགྱིག་དམ་གྱི་ཁ་ལ་ཆགས་པའི་མར་ལོ་སེར་རིལ་རིལ་དེ་རེད།མར་ལོ་སེར་རིལ་རིལ་ཞིག་རྙེད་པའི་སྤྲོ་སྣང་དེ་རང་ད་ལྟ་ད་དུང་ཡིད་ལ་དགའ་བ་འདི་སློབ་གྲྭར་སོང་བའི་སྐྱེས་ཀྱི་མཆོག་ཅིག་ཏུ་བསམས་ན།སློབ་གྲྭ་ནི་ལས་ཀྱི་རི་མོ་ལ་བསྐོས་པའི་ལྡོག་མེད་ཀྱི་ལམ་བུ་ཞིག་ལྟར།ངའི་ནར་སོན་གྱི་ལོ་ཟླ་རེ་རེ་རྒྱང་ནས་རྒྱང་ལ་ཁྲིད།

　　དྲན་ཚུལ་ཞིག་ལ་ཕར་ལ་སོང་བའི་མར་ལོ་སེར་ཀྲིག་གེར་མིག་ལམ་དུ་ལྷུང་བ་དེས་འགོག་མེད་ཀྱི་སྤྲོ་སྣང་ཞིག་ཡ་ཆུང་དུ་རྒྱས་པར་བྱས་ཀྱང་།ཚུར་ལ་ཡོང་ཁའི་ཐོང་ག་ཁུ་ཚུར་གྱིས་བསྒགས་པའི་སྙིང་ཆུང་གི་ལྟིག་སྒྲ་བྲང་ཁོག་ན་ལྡིང་བའི་འགྲོ་འོང་ཐེངས་གཅིག་ལས་ཅི་ཡང་མེད་ནའང་།ཨ་ཕས་བཤད་ན་ང་རང་སྦྲ་གུར་སློབ་གྲྭར་ཉིན་བཅུ་ཙམ་ལ་སོང་མྱོང་ཟེར།ཉིན་བཅུ་ཙམ་གྱི་སྣང་བ་ཡོངས་རྫོགས་རྩྭ་ལྗང་ལ་ནུབ་ནས་གཏན་དུ་བརྗེད་པའི་སྟོན་ཁ་ཐེངས་ཤིག་རྒྱང་ལ་བསྐྱལ་མོད།ཉིན་གཅིག་གི་དྲན་པ་ཙམ་དེ་དངོས་ཡོད་ཀྱི་འཁྲུལ་སྣང་གིས་བསླུས་ནས་ད་ལྟ་ད་དུང་ཚུར་ལ་འབོད་པས།དེ་ནས་བཟུང་།ངས་རང་ཉིད་གང་ཞིག་ལ་ཆས་སམ།ཞེས་ཡང་དང་ཡང་དུ་སུ་ལ་འདྲི།ངོ་མ་བཤད་ན།ཁྱོད་ཀྱང་ང་དང་འདྲ་བར་སློབ་གྲྭར་ཆས་པ་ནས་བརྩིས་ཏེ།ཡོད་ཚད་ཀྱི་མགོ་བརྩམས་པ་ཡིན་སྲིད།

　　ཨ་ཕས་བཤད་ན་ང་ནི་སྐྱས་འདེགས་པའི་སྐབས་ཤིག་གི་ཁྱིམ་ཚེགས་ཇེ་ཡང་དུ་གཏོང་ཕྱིར་ཟླ་ངོ་འགའ་ལ་རྫོང་ན་ཡོད་པའི་ཨ་ནེ་ལགས་ཀྱི་གམ་ནས་བཞག་ཅིང་།ཨ་ནེ་དགེ་རྒན་ཡིན་པའི་སྟབས་ཀྱིས་ང་རང་སློབ་གྲྭ་རུ་ཚུད།དྲན་པར་ནུབ་པའི་སྣང་བརྙན་དེ་དག་ཏུ་རྒྱུ་རྐྱེན་མང་པོ་ག་ལ་ཤོང་ཡང་།སློབ་གྲྭར་ལུས་པའམ་སློབ་གྲྭར་སོང་བའི་མཐུན་འགྱུར་ཅི་རིགས་དེ་ག་ཙམ་ལས་མ་འདས།ཕལ་ཆེར་དེ་ཙམ་གྱིས་ཡིན་སྲིད།མཐོང་སྣང་གི་འཇིག་རྟེན་འདི་ཉིད་ཀྱང་ཧ་ཅང་གཟབ་ནན་བབ་ཆགས་དང་འགྱུར་མེད་རྟག་བརྟན་ཞིག་གི་ཚུལ་གྱིས་དོན་དག་ཕྲ་ཞིང་ཕྲ་བ་རེ་ཡི་ལྷིང་འཇགས་དང་སྣང་མེད་དེའི་ཕག་ནས་དལ་བ་དལ་བུར་རྨང་ནས་འགྱུར་འགྲོ་བ་ཞིག་ཡིན་པས།ངའི་དྲན་སྣང་དུ་ལུས་པའི་ངུ་འབོད་རེ་རེ་ཨ་ཕའི་རྗེས་ལ་ཤུགས་ཀྱིས་འཕྱོ་ཡང་།མི་གཅིག་གི་སེམས་པའང་སྒུལ་མ་ཐུབ་པའི་སྟོབས་ཤུགས་དེའི་དཔུང་དུ་ལས་དབང་ཟེར་བ་ཞིག་གམ།དུས་ཚོད་ཟེར་བ་ཞིག་གིས་ཨ་ཕའི་གོམ་ཁ་ཡང་དང་ཡང་དུ་སྲང་ལམ་དང་གྱེས་ནས་སྤང་ཐང་ལ་འདྲེས་སུ་བཅུག་རྗེས།ངའང་ཡུན་གྱིས་ཡུན་གྱིས་སློབ་གྲྭ་ནས་ལུས་ཤིང་།ཨ་ནེ་ལགས་ཀྱིས་འཕྲལ་མར་ནང་ལ་བཅུག་པའི་དུས་ཐུང་དེའི་རྗེས་སུ་མི་ཚེ་ཡི་ལམ་ཁ་སློབ་གྲྭ་ལ་ལྷོད།ནར་སོན་གྱི་ལོ་ཟླ་སློབ་གྲྭ་ལ་བསྐྱལ།

　　སྟབས་འཁེལ་གྱིས་ཨ་ཕ་སྒོ་ལ་བུད་མ་ཐག་ཨ་ནེས་ནང་ལྕགས་དྲངས་པ་ཡི་སྐད་ཅིག་དེའི་རིང་།དེ་འདྲའི་ངུ་སྙིང་དྲག་པོ་ཞིག་ལྷོག་གེར་འཕྱུར་བ་ཅི་ཡིས་ཡིན་ནམ།དྲན་གདུང་གི་རྦ་རླབས་སེམས་ལ་བསྙལ་བའི་ལོ་ཟླ་རིང་མོ་ཞིག་གིས་ངའི་ཡ་ཆུང་གངས་དཀར་གྱི་ར་བ་དེ་ལ་ཤེས་མེད་ཚོར་མེད་ངང་ཅི་འདྲའི་སྟོབས་ཤུགས་ཆེན་པོ་ཞིག་བསྩལ་ཡོད་ཨང་།ཕ་མའི་པང་གི་བརྩེ་བ་དྲོན་མོ་དེར་དེ་ལྟར་ངུ་ངག་གི་འགྱུར་བག་ཕྲན་བུ་ཞིག་ཐེབས་པས།ཡང་དང་ཡང་དུ་ཨ་ཕའི་རྗེས་ལ་ཤོར་བའི་སྣང་བརྙན་འགའ་རེ་སེམས་ཀྱི་གཏིང་རིམ་ཞིག་ན་ལྷོད་ཀྱིས་ཆགས་འདུག ཨ་ཕའི་ཨུ་ཚུགས་ཀྱིས་བདས་པའི་གོམ་ཁ་རེ་རེ་ཕྱིར་ལ་དཀྲིས་པ་ནས་ང་རང་དཔེ་ཁུག་ཁུར་བའི་སློབ་མ་ཞིག་ཏུ་གྱུར་ཚར།ཨ་ཕའི་རྣམ་འགྱུར་དེའི་ཕུགས་སུ་ང་རང་ཅི་ལྟ་བུ་ཞིག་ཏུ་རེ་བ་ངས་ཀྱང་བཤད་དཀའ་མོད།ཕལ་ཆེར་དཔེ་ཁུག་ཁུར་བའི་སློབ་མ་ཞིག་གི་ཚུགས་ཀར་ཡིན་སྲིད།ཀ་ཁ་ངག་ལ་གྱེར་བའི་བྱིས་པ་ཞིག་གི་གཟུགས་བརྙན་དེ་ལས།རེ་ལྟོས་གཉོམ་པོ་ལ་འཚར་ལོངས་རྒོད་པོ་ཞིག་དྲག་ཏུ་འཚུབ་པས།དེ་ནས་བཟུང་།ང་རང་ཨ་ཕའི་འདོད་འདུན་དང་བྲལ་བའི་མི་གཞན་ཞིག་ཏུ་གྱུར་སོང་ངམ།

　　ངའི་རྣམ་སྟངས་ཞིག་ལ་ང་རང་སློབ་གྲྭར་སོང་བ་ནས་བརྩམས་ཏེ་ཡོད་ཚད་དུས་ཚོད་ཀྱི་དབའ་ཀློང་ཞིག་ཏུ་ཚུད་ནས་འཇིག་རྟེན་གཞན་ཞིག་གི་བཀོད་པ་དེ་རུ་ཆགས་མགོ་ཚུགས།ང་རང་སུ་ཞིག་གི་འདོད་བློ་ལྟར་ཡང་མ་ཡིན་པར།རང་ཉིད་ཀྱི་ལས་དབང་ཞིག་གིས་སློབ་གྲྭ་ལ་ཆས་ཤིང་།སློབ་མ་རུ་གྱུར་ནས་སློབ་མ་ལྟར་འཚོ་དུས་འདིར།ལུས་སེམས་ལ་ཟུག་པའི་ལྡོག་མེད་ཀྱི་དབང་ཤུགས་ཤིག་གིས་མ་འོངས་པ་ཟེར་བའི་ད་ལྟ་བའི་འཚོ་གནས་འདི་ཡང་གཏན་ལ་ཕབ་ཡོད་པ་བསམས་ན།དེ་དུས།སློབ་གྲྭ་ལ་གོམས་པ་ནས་ང་ཡི་རང་ཁྱིམ་ཡང་རྒྱང་ལ་གྱེས་པ་འདྲ།

　　དེ་ས་ཁང་སྒལ་ཟུར་ཞིག་མིན་འགྲོ དཀྱིལ་ན་ལྕགས་ཐབ་ཅིག་ལས་ནང་ན་དགེ་རྒན་ཞིག་ཡོད་པ་དྲན་པར་དཀའ་ཡང་།ཞོགས་པར་སློབ་ཁང་ནང་གི་ལྕགས་ཐབ་ཀྱི་ཕོ་བ་དམར་ཆེམ་མེ་བ་དེའི་མཐའ་ལ་རུབ་ནས་ལག་པ་སྲོ་ཨེ་ཐུབ་ལ་འབད་པའི་རེ་འདོད་ཅིག་གི་ལྷག་པའི་བསམ་པ་ན་ཚོད་འདིར་ཡང་རྒྱུད་ན་ལུས་ཡོད་པ་ལྟར།ཐེངས་དང་པོར་མཐོང་བའི་དམར་སྨུག་གི་ངོ་གདོང་རེ་རེ་གང་ན་ཡོད།ཡིད་འོང་གི་འཛུམ་ཆུང་ཤིག་གེར་ཅི་ཞིག་བྱས།གཉོམ་དུང་བའི་མིག་ཟུང་སྒོར་རེར་གང་ལ་ཅེར།གཅིག་ཀྱང་མི་འདུག དངོས་གནས་གཅིག་ཀྱང་མི་འདུག དྲན་པ་འདིའི་སྒོ་མོ་རླུང་ལ་བཅོལ་ཡང་།ས་རྡུལ་ལས་སོས་པའི་རི་མོ་ཞིག་མཐོང་ཐབས་མི་འདུག ངས་ད་དུང་ལག་པ་སྲོ་འདོད་ལྟ་བུའི་ན་ཟུག་ཅིག་སྙོར་ནས་ཅི་ཞིག་བྱེད་ཀྱིན་ཡོད་དམ།དེ་དུས།ཅི་ཞིག་བྱས་པ་ག་ལ་དྲན།དགེ་རྒན་ཞེས་པར་ངོས་འཛིན་བྱེད་མ་ཤེས་པས་སམ།ཐེངས་དང་པོར་སློབ་ཁང་དུ་འཛུལ་བའི་གཟུགས་བརྙན་དེ་དག་ཆུ་ལ་འདྲེས་སོང་།སློབ་གྲོགས་དྲན་རྒྱུ་མི་འདུག སློབ་ཁང་གང་ཡིན་མི་ཤེས།ངའི་ཡིད་ལ་དྲན་པ་ཉག་གཅིག་ནི་ལྕགས་ཐབ་ཀྱི་གམ་ལ་བཅར་འདོད་པ་དེ་རེད།ང་ལྕགས་ཐབ་གམ་ལ་བཅར་ཐུབ་ཡོད་དམ།ངས་ཀྱང་མི་ཤེས།

　　དེ་ལྟར།རེ་འདོད་ཆུང་ངུ་ཙམ་གྱིས་བསླངས་ཏེ་སློབ་གྲྭས་ང་རང་རྒྱང་ནས་རྒྱང་ལ་བསྐྱལ།མི་ཚེ་ཞེས་པའི་ཟློས་གར་རིང་མོ་དེའི་ནང་ལ་བསྐྱལ།འཚོ་བ་ཞེས་པའི་དགའ་སྡུག་སྐྱེན་པོ་དེའི་མཐའ་ལ་བསྐྱལ།རང་ཁྱིམ་དྲན་པའི་གདུང་བ་ཟབ་མོའི་འཕར་ཆག་རེ་རེ་ཇི་ལྟར་འཇགས་ཚུལ་སུ་ཡིས་ཤེས་ཨང་།ཨ་ཕའི་ཕུ་ཐུང་ལ་འཇུས་ནས་ཡང་བསྐྱར་ཕྱིར་ལ་སླེབས་ཐེངས་གཅིག་གཉིས་ཤིག་ལ་ང་རང་གཞི་ནས་སློབ་གྲྭའི་མི་ཡིན་པ་ཞིག་ཏུ་གྱུར།ཡང་ན་སློབ་མ་ཞིག་ཏུ་གྱུར།དྲན་སྟངས་ཤིག་ལ་སྤྱི་ལེ་དྲུག་བདུན་ཙམ་གྱི་ལམ་ཐག་དེ་ནི་དེ་ལྟར་རིང་དོན་ཅི་ཡིན་ནམ།ང་རང་སློབ་གྲྭ་ལ་སོང་བས་ཡིན་སྲིད།ད་ལྟ་བསམས་ན།སྤང་ཐང་དུ་ལུས་པའི་གྱང་ཆག་དེ་ང་ཡིས་ཐོག་ཁང་གི་སྒེའུ་ཁུང་བརྒྱུད་ནས་མཐོང་ཐུབ་ཀྱི་འདུག གྱང་ཆག་དེའི་རྒྱ་ཡིས་མ་ཟིན་པའི་རྐང་རྗེས་རེ་རེ་དྲོད་ཀྱིས་ཁྱབ་ནས་སླར་ཡང་ཕ་མའི་བརྩེ་བ་སེམས་ལ་རྒྱས་ཡོད་ཀྱང་།ངས་དེ་དུས་ཀྱི་ལམ་ཐག་རིང་བོ་དེ་ལ་འདང་རྒྱག་གིན་འདུག ཨར་འདམ་གྱིས་བསབས་པའི་བར་ཐག་དེ་རང་དེ་དུས་དེ་ལྟར་ཡངས་ཤིང་རྒྱ་ཆེ་བ་ཞིག་ཡིན་པ་ཁོ་ཐག་རེད།མཚམས་རེར་ང་ངོ་མ་ས་ཆུ་བསྐུམས་ནས་ཡོད་ཚད་ཇེ་ཆུང་དུ་འགྲོ་བཞིན་པར་ཡིད་ཆེས་ཀྱི་ཡོད།ཡོད་ཚད་ཇེ་ཆུང་དུ་གྱུར་བས།ད་ལྟ་ང་ཡང་ཕ་ཡུལ་གྱི་ཆག་གྲུམ་ཞིག་ཏུ་གྱུར་སོང་བ་འདྲ།སློབ་གྲྭ་ཡི་ཆག་དུམ་ཞིག་ཏུ་འགྱུར་བཞིན་པ་འདྲ།ཡང་གཅིག་བཤད་ན།དེ་ལྟ་བུའི་འདོད་འདུན་ཕྲན་བུ་རེའི་ཤུགས་ཀྱིས་དེད་ནས་ང་རང་ནར་སོན་པས།སློབ་གྲྭ་ཐག་རིང་ཞིག་ཡིན་པའི་སྣང་བ་དེའང་རྒྱང་ལ་ཡལ།

　　སྐབས་ཤིག་གི་ཨོང་སྟེགས་མ་ཐེམ་པའི་འུ་ཐུག་དེའི་རྗེས་སུ།ག་ཁ་གཉིས་དང་ཇ་ཟ་གཉིས་ཕན་ཚུན་གོ་ནོར་དུ་བསྡེབས་པའི་ཡང་ཡང་བྲིས་པའི་ཡི་གེ་ནག་ཆུང་ཅི་ལྟར་ཤེས་སོང་ངམ།དེ་ནི་དགེ་རྒན་གྱི་བྱམས་སྐྱོང་ཡིན་པ་ག་ལ་བཤད་དགོས།ད་དུང་ཨ་ནེ་ལགས་ཀྱི་ལྟ་རྟོག་བཙན་པོ་ཞིག་གིས་བསླངས་པའི་ངུ་སྐད་གཉོམ་པོ་ཞིག་བརྗེད་ཐབས་མེད་དེ།མ་མོ་ཆེ།ལུ་གུ་ཆུང་ཞེས་པའི་ངུ་ཞོར་འདོན་ཞོར་གྱི་སྐྱོར་ཀློག་ཐེངས་ཤིག་སེམས་ལ་ཁྱབ་ཡོང་།མ་ཤེས་པ་ཞིག་ཤེས་པའི་བརྒྱུད་རིམ་དེ་ནི་ཅི་འདྲའི་སྐྱུར་བོ་ཞིག་ཨང་།ཤེས་པ་ཞིག་མ་ཤེས་པར་འགྱུར་བའི་གོ་རིམ་འདི་ལ་བྲོ་བ་ཞིག་མེད་པ་ལྟར།ང་རང་ཆུང་དུས་ཀྱི་སྣང་བ་དེ་ལ་དགའ་བོ་ཡོད།འདི་ནི་སློབ་གྲྭ་ཡིས་སྦྱིན་པའི་དངོས་གྲུབ་ཅིག་ཡིན་སྲིད་མོད།ང་རང་ཅི་ལྟ་བུ་ཞིག་ཏུ་བསྒྱུར་ཡོད་པའི་དོན་དངོས་ཤིག་སུ་ཡིས་དཔོག མདོར་ན།སློབ་གྲྭས་དྲིས་ལན་ཡོད་ཚད་ང་ལ་ཕུལ་ཚར།

　　མིང་འགྲེལ་མང་པོ་བློར་འཛིན་དགོས་པའི་དུས་ཤིག་ནས་དྲན་ངོགས་ཀྱི་སློབ་གྲྭའང་ར་སྐོར་གྲུ་བཞི་ཙམ་མ་ཡིན་པར་གཅིག་འཕྲོར་གཅིག་གིས་ཆེ་འབྲིང་ཆུང་གསུམ་དུ་ཆགས་འདུག དེ་དུས།སྔར་ལས་ལྡོག་སྟེ་སློབ་གྲྭ་འགྲོ་འདོད་ཅིག་སེམས་ལ་བརྟས་པ་ཅིའི་ཕྱིར་ཡིན་ནམ།སློབ་གྲྭ་ཞེས་པའི་ཟོ་ཆུན་འཁྱུད་མོ་འདི་དལ་བུར་འཁོར་ནས་ང་རང་རྒྱང་ལ་ཁྲིད་སྙམ་གྱིས་ངས་ཀྱང་སྟ་གོན་ཡོད་ཚད་ཚགས་སུ་ཆུད་ཀྱང་།མཐའ་མཇུག་གི་བསྟི་གནས་འདི་ཡིས་ཕུགས་བསམ་གྱི་འགྲེལ་བ་དོན་མེད་དུ་བཏང་བ་ནས།ཡོད་ཚད་ལ་བསྐྱར་དུ་ངོས་འཛིན་པ་ལྟར།ཆུང་དུས་ལས་དབང་ཞེས་པ་དང་བག་ཆགས་ཞེས་པ་ཡི་འགྲེལ་བཤད་ཇི་ལྟར་བཏོན་པ་རྨང་ནས་བརྗེད་ཟིན།ཐེངས་གྲངས་མང་པོར་བྲིས་ནས་མ་རྙེད་པའི་བརྗེད་དཀའ་བའི་འདས་དོན་དེ་དངོས་སུ་རྙེད་དུས།ལས་བྱ་བྲིས་པའི་སྣང་ཚུལ་དག་གིས་དྲན་པའི་ནང་ན་སྐོར་བ་རྒྱག་གི་འདུག དར་དམར་གྱི་སྐས་གདང་ལ་ཁ་བུབ་དུ་བསྣར་ནས་སྨྱུག་རྩེ་སག་སག་ཅི་ཞིག་བྲིས་སམ།ཤིང་ཅོག་གི་ཟུར་ཁ་ཀུན་གཞོག་གྲི་ཡིས་གཙབས་པའི་ཐིག་རིས་མང་པོར་ཅི་ཞིག་ཕབ་བམ།ལས་བྱ་ཡི་དྲན་སྐུལ་དེ་ཡིས་ཉིན་མོ་རེ་རེ་ནི་ལས་བྱ་རེ་རེ་ཡིན་པ་ལྟར་ཕར་ལ་བསྐྱར་རྗེས།དུས་ཚོད་ལ་འབྲེལ་བ་མེད་པའི་དབྱར་གནང་དགུན་གནང་ཞེས་པ་ཞིག་ཡོད་པ་དེའི་སྐྱིད་དེ་ཨང་།སློབ་གྲྭ་ལ་འབྲེལ་བ་མེད་པའི་དབྱར་གནང་དགུན་གནང་ནི་ཉིན་མཚན་གྱི་རིང་ཐུང་ལ་ཧེ་བག་ཤོར་བའི་སྟོང་ཁམས་གཞན་ཞིག་གི་སྣང་བ་རེད་ཅེ་ན་སུ་ཡིས་བསྙོན་ཐུབ།

　　ལས་བྱ་དང་འགྲོགས་པའི་དངངས་སྐྲག་རིགས་ཤིག་རྒྱུད་ལ་འགོས་པ་ནི་དགེ་རྒན་ཞེས་པའི་ཐ་སྙད་འདིའི་སྤྲུལ་བསྒྱུར་རམ་དངོས་གྲུབ་ཅིག་ཏུ་ཚང་མས་རློམ་ཆོག འདུག་མི་ཐུབ་ན་དགེ་རྒན་གྱི་ལག་ལ་སྤྲད་འཇོག་ཅེས་པའི་ཁ་དཔེ་ཞིག་གི་སྣ་ཐག་རིང་མོ་སློབ་གྲྭས་བསྟུངས་ནས་ར་ལ་བཅུག་རྗེས།གཡུང་ལ་ཕབ་པའི་རི་དྭགས་དེ་སུ་ཡིན་ནམ།འདུ་ཤེས་སུ་ཐིམ་པའི་སྐྲག་སྣང་ཅི་ཅོག་བརླན་གཤེར་ལྟར་སིམ་ནས་རུས་ལ་ཟུག་པའི་བརྒྱུད་རིམ་དེ་ལས་ང་ནི་གཞི་ནས་མི་བསམ་ཤེས་ཚུལ་མཐུན་ཞིག་ཏུ་ཆགས་སོང་།དེ་ལྟར་མིན་ཚེ།ངས་སློབ་སྦྱོང་གི་གོ་རིམ་ཧྲིལ་བོར་མིང་འགྲེལ་གྱིས་མ་ཟིན་པའི་ཐ་སྙད་དག་གི་བྲོ་བ་མྱོང་བ་ལྟར།ངའི་བསམ་ཚུལ་དྲན་ཚུལ་ལ་ཅི་ཞིག་བྱ།ད་ལྟ་ཉམས་རྟོགས་ཀྱིས་ཐེག་པའི་སེམས་ཁམས་ཤིག་ཏུ་རྒྱུ་མཚན་མི་ཤེས་པའི་དངངས་སྐྲག་ཅིག་འདྲེས་ཡོད་པར་གནས་ལུགས་ཅི།

　　ཡོད་ཚད་ལས་བྱ་ལ་ཤོར་བའི་དང་དང་དོད་དོད་དེའི་དབང་གིས་ང་རང་གཟབ་ནན་བབ་ཆགས་ཤིག་ཏུ་གྱུར་ནས་འཇིག་རྟེན་འདི་ན་འཚོ་བ་རོལ་གྱི་ཡོད།ད་ལྟ་ཕྱིར་འདང་རེ་བརྒྱབ་ན།ང་སློབ་གྲྭར་སོང་བ་ནི་སློབ་གྲྭར་མ་སོང་བ་དང་འདྲ་བར།དྲན་པའི་ཐིག་ལེ་ལ་བསྒོས་པའི་ཚོན་མདངས་དག་ཡལ་ནས་ཐམས་ཅད་སྐྱ་ཟད་སྔོ་གཏུགས་ཀྱི་རྣམ་པ་དེ་ཕྱིར་མངོན་པས་ན།སློབ་གྲྭར་སོང་བ་ནས་གང་ལ་སོང་བ་རེད་ཅེས་ཚེ་སྲོག་གི་གཏིང་རིམ་དེ་ལ་ཐེངས་གཅིག་སྙོབ་དུས།བུ་མོའི་རྒྱབ་གཟུགས་ལ་བཀལ་བའི་དཔེ་ཁུག་དེ་ལས་ཕྱིར་ལ་མི་བུད་པ་འདྲ།ང་འདི་གང་ན་ཡོད་དམ།སློབ་གྲྭ་ན་ཡོད་དམ།

　　ང་ནི་མི་ཚེ་གང་བོར་སློབ་གྲྭར་སོང་བ་ལས་གང་ལའང་མ་སོང་བ་འདྲ།

གྲིབ་མ།

　　ཞིབ་ཏུ་བསམས་ན།ངས་རང་གི་གྲིབ་མ་མ་མཐོང་བར་ལོ་མང་འགོར་ཡང་སྲིད།གློ་བུར་དེ་ལྟར་འདོད་དུས་ཀྱི་ནང་དུ་ཡོད་པའི་མི་དེ་ལ་གྲིབ་མ་ཞིག་ག་ལ་ཡོད།ཁེར་རྐྱང་གི་སྒོ་མོ་མུན་ནག་གི་མཐའ་ལ་འདྲེས་པའི་གྲིབ་མ་རིང་བོ་ཞིག་གིས་ཕྱེས་ནས་ཚུར་ལ་ཅེར་བས།གློག་འོད་ཀྱིས་བསྲིངས་པའི་རྒྱང་རིང་དེ་ནི་ཕ་ཡུལ་ཡིན་སྣང་གིས།དོན་ངོ་མར།ང་རང་གི་གྲིབ་མ་ལའང་སྐྲག་གི་འདུག ས་རུབ་ལ་ཉེ་བས་ཡིན་ནམ།ངས་སུ་ལ་འདྲི་དགོས།

　　ཡང་གཅིག་བཤད་ན།ངའི་མཐོང་སྣང་གི་གཟུགས་བརྙན་འདི་ནི་ང་རང་གི་གྲིབ་མ་ཡིན་ཡང་སྲིད་པས།ཡང་བསྐྱར་མེ་ལོང་གི་ཁ་གཏད་དུ་ལངས་པའི་དུ་བ་གྱ་གྱུ་མཁའ་ལ་འཐེན་པ་ལས།རྒྱུས་མེད་པའི་ངོ་གདོང་རྒྱུས་ཡོད་ལྟར་མཐོང་བ་ནི།གཟབ་ནན་རིགས་ཤིག་གིས་སམ།རང་གིས་རང་གི་མིང་ནས་བོས་པའི་སྐད་ཅིག་དེའི་རིང་།ཇེ་ཆེར་རྒྱས་པའི་བར་སྟོང་དེ་རང་ཅི་འདྲ་ཆེ་ནའང་།འདུག་བཟོད་མེད་པའི་ངོ་གདོང་དེ་ཕར་ལ་གཡོལ་ཙམ་བྱས།ཚུར་ལ་མངོན་ཙམ་བྱུང་།

　　གྲིབ་མར་ལྟ་རྒྱུ་མང་དྲགས་ན་གཉིད་སྒང་ལ་སྔངས་ལོག་བྱས་ནས་སད་ཡོང་བ་ཞིག་དྲན་ཐུབ་པ་འདི།བྱིས་དུས་ཀྱི་སྣང་བ་ཞིག་མིན་འགྲོ དེ་ག་ཙམ་ལ་མུན་པར་ཞེད་པའི་སྣང་བ་ཞིག་རང་ཤུགས་ཀྱིས་རྒྱུད་ལ་འགོས་ཡོད་པ།ཕ་མའི་རུམ་ཁོང་ནས་ཉལ་བའི་ལོ་ཟླ་རིང་མོ་དེས་རྒྱང་ལ་འཚར་དུ་བཅུག་པ་ནས་བཟུང་།ཡོད་ཚད་རླུང་ལྟར་ཡལ་ནས་ཞི་ཞིང་འཇགས་པ་ཞིག་ཏུ་ཚོར་ནའང་།ཉི་འོད་དང་མུན་པ་ཡི་རེས་སུ་འཁོར་བའི་འཇིག་རྟེན་འདི་རུ་དངངས་སྐྲག་རིགས་ཤིག་ཉིན་མཚན་ལ་ལྟོས་པ་མེད་པར་སྐབས་དང་སྐབས་ཀྱིས་གློ་བུར་དུ་སེམས་ལ་འཇབས་ནས་ཐོལ་གྱིས་སྣང་དུས་ལ།ངས་ཨ་ཕའི་བྲང་གཞུང་གི་བུས་པ་རློན་པ་དེ་དྲན་ཞོར།ཆུང་མའི་རུམ་གྱི་མིག་མདངས་དྭངས་མོ་དེའི་ཐད་ལ་སེམས་ཁུར་ཙམ་བྱ་ཨེ་ཤེས་སུ་འབད་པ་ལྟར།ཡང་བསྐྱར་གྲིབ་མ་དང་འདྲེས་པའི་མུན་ནག་གི་དཀྱིལ་ལ་ཆས་ཏེ།སྒྱུ་འཕྲུལ་ལ་འབར་བའི་མཚན་མོ་རེ་རེ་གང་དུ་བསྐྱལ་ལམ།ཇི་ལྟར་བསྐྱལ་ལམ།ཞེས་ཡང་དང་ཡང་དུ་མཁའ་ལ་འབོད་པ་ལས་བྱ་ཐབས་ཅི་ཨང་།

　　སྟབས་ལེགས་ཀྱིས་རང་གིས་བཏབ་པའི་འདྲ་པར་ཞིག་ཏུ་ལུས་པའི་གྲིབ་མ་དེ་ནི་ལོ་གསུམ་ཙམ་གྱི་སྔོན་རེད།ཡང་ན་ལོ་ལྔ་ལྷག་གི་གོང་རེད།གང་ལྟར།གྲིབ་མ་དེ་རང་གི་ཡིན་འདོད་ལ་ཉར་ནས་ཡུན་རིང་འགོར་བས་ན།ང་ལ་དེ་ལས་ལྷག་པའི་སྣང་བ་ཅི་ཡང་མེད་པར་གྲིབ་མ་མ་མཐོང་བར་ལོ་མང་འདས་སོང་བསམས།ཡོད་ཚད་གོམས་ལོབས་སུ་གྱུར་ནས་འཇིག་རྟེན་འདི་རང་གཏན་བརྗེད་དུ་འགྱུར་བ་མིན་ན།རང་གི་གྲིབ་མ་མི་ཚོར་བ་ཞིག་ག་ལ་དཔེ།འགྲོ་ཞོར་གོམ་པའི་སྣེ་ལ་ནག་ཡོར་ཡོར་ཐོགས་ཏེ་གང་ནས་གང་ཏུ་ཟགས་ཚར་རམ།ལུས་ལ་སིམ་པའི་བརླན་གཤེར་ཅི་རིགས་སམ།ཁ་ཆར་གྲངས་མེད་ལྟར།ཉི་མ་དཀར་ངོགས་རེ་རེ་ལ་ང་རང་གྲིབ་མས་མ་འགྲོགས་པ་ཞིག་ཡོད་མི་སྲིད།ཡིན་ཡང་།ངས་དངོས་གནས་ཅི་ཡང་མ་ཚོར་བ་འདྲ།དོན་ངོ་མ།ང་ཚོ་ལ་གྲིབ་མ་ཞིག་ཡོད་དམ།

　　གཉིད་དུ་ཡུར་བའི་དུས།རང་གི་ལུས་པོ་འདིའི་རྣམ་པ་ལ་སྣང་བ་ཅི་ཡང་མི་ཤོར་བ་ལྟར།ངས་རང་གི་གྲིབ་མའི་ཐད་ལ་དོ་སྣང་ཆེན་པོ་མ་བྱས་པ་འདྲ།དགའ་ནས་ལག་པ་གཡུག་དུས་རེ་རེ་ལ་གྲིབ་མའི་བྲོ་གར་ལ་ཉམས་མ་བཞག་ཅིང་།སྡུག་ནས་མགོ་བོ་སྨད་དུས་གང་མང་ལ་གྲིབ་མའི་སོ་སྲུང་ལ་སེམས་མ་ཤོར།མི་དང་བྱ་དངོས་རེ་རེའི་རྣམ་པ་འགྱུར་ནས་ངའི་དྲན་པའི་ནང་གི་པར་རིས་མག་མོག་གི་ཚོན་མདོག་ལ་ལུད་ཡོད་པ་ཚང་མ་གྲིབ་མ་ཡིན་པས་སམ།ཉི་མ་ཕར་ཕར་འགྲོ་དུས་ཀྱི་ཚུར་ཚུར་བཅར་ཡོང་བའི་རི་བོ་ཆེན་པོ་ཞིག་གི་གྲིབ་སོ་རིང་མོ་དེ་ཀུག་ནས་དྲན་པའི་གཞུ་རྒྱུད་རྒྱང་ལ་འཐེན་ཐེངས་རེར།རྒྱང་རིང་གི་བྱིས་པའི་དུས་ཀྱི་ངོ་གདོང་མང་པོ་བྱུང་རིམ་མེད་པའི་དུས་ཚོད་ཅིག་ལ་བབས་ནས་མཛེས་སྡུག་གི་ཕྱིར་དྲན་ཞིག་འཆར་བར་བྱེད་པ་ནི་ཅི་ཞིག་ཡིན་ནམ།གྲིབ་མའི་ཁ་དོག་ཚོན་མདོག་སྣ་མང་དུ་འགྱུར་ནས་པར་རིས་མང་པོའི་ཟློས་གར་ལ་རྩེན་པ་ནས་བཟུང་།ཡོད་ཚད་གྲིབ་མ་ལན་པ་ཡིན་ཡང་སྲིད།ནར་སོན་པ་དང་ལྷན་དུ་ཐང་ལ་ལྷུང་བའི་གྲིབ་མ་རྒྱུད་ལ་འཕོས་པ་ཇི་ལྟར་དཔོག་ཨང་།

　　མུན་པ་ལ་གོམས་དྲགས་པས་ཡིན་སྲིད།གྲིབ་མ་ནི་རང་ལ་འབྲེལ་བ་མེད་པ་ལྟར་བརྗེད་ཟིན་ནམ།ཤེས་མེད་ཚོར་མེད་དུ་གྱུར་ནས་དུས་སྐབས་ཇི་འདྲ་ཞིག་རྒྱང་ལ་བདས་ཟིན།བརྗེད་ལ་ཉེ་བའི་མི་དག་ཀྱང་དྲན་པའི་ནང་གི་རུས་མིང་གི་བྲག་ཅ་དེ་ཁོ་ནར་ཐོགས་པ་ལས་གཟུགས་སུ་སྣང་བ་ཞིག་ཡེ་ནས་མིན་པ།གྲིབ་མ་ཞེས་པའི་ཐ་སྙད་འདིའི་བག་ཆགས་དང་འདྲ་ཨང་།རེ་ཞིག ཡོད་ཚད་གྲིབ་མའི་བློས་བསླངས་ཤིག་ཏུ་ལྷོད་ཀྱིས་ཆགས་ཡོད་པར་བསམས་ན།འཚོ་གཞིས་ཀྱི་གཏན་འཇགས་འདིའི་ཐམ་ཀ་རུ་ལས་དབང་ཞེས་པ་ཞིག་གིས་འདི་ལྟར་འཚོ་རུ་བཅུག་པ་ལྟར།མི་དག་གིས་མི་དེའི་ལས་ངོ་མ་བཙོག་གི་ཞེས་བཤད་དུས།ངས་ལས་དབང་ནི་རང་གི་ལུས་ལ་གཟུགས་ཅན་གཟུགས་མེད་ཀྱི་སྤྲུལ་བསྒྱུར་དང་ལྷན་དུ་འདྲེས་པའི་གྲིབ་མ་དེ་དང་མཚུངས་པར།ཆ་བྱད་རེ་རེའི་གསེང་ལ་ཐིམ་ཡོད་སྣང་གིས།རྣམ་འགྱུར་དང་ལྟ་སྟངས་ཅི་ཡང་མེད་པར་མགོ་བོ་སྒུར་དགོས་བྱུང་།ཕྲག་པ་ལྷོད་དགོས་བྱུང་།

　　དེ་ཡང་མིན་པར།ང་གྲིབ་མ་ཡི་གཟུགས་བརྙན་སྨིན་ཐག་ཆོད་པ་ཙམ་གྱིས་ཁྱོད་ཀྱི་མིག་ལ་མངོན་པ་ནས་བཟུང་།ང་ལ་ངོས་འཛིན་གསལ་བོ་ཞིག་ཡོད་ཀྱང་ཆོག་ལ་མེད་ཀྱང་འོས་མོད།དུས་ཚོད་ལྟར་གཉིད་ལས་སད་ཡོང་བ་དང་།གོམས་གཤིས་ལྟར་མལ་ལས་ལངས་ཡོང་བའི་གཏམ་རྒྱུད་འདི་རུ།ང་ནི་གནས་གཅིག་ཏུ་བསྡད་ནས་མཇུག་འབྲས་ཡོད་ཚད་ཀྱི་ཀི་ཏོ་ལ་བརྩི་སྲུང་བྱེད་པ་ལྟར།སུ་ཞིག་ལ་སྒུག་ཡོད་པ་ནི།ཉིན་རྗེས་ལ་མཚན་དང་མཚན་རྗེས་ལ་ཉིན་མཐུད་པའི་བསྐྱར་ཟློས་འདི་ཡིན་ན།གྲིབ་མར་ཐིམ་ཚར་བའི་འཇིགས་སྐྲག་རིགས་ཤིག་སེམས་ལ་མཆེད་ནས།དྲན་པར་བངས་པའི་མེ་ཏོག་དཀར་དམར་ལ་ཁྱད་པར་ཅི་ཡང་མེད་སྙམ།རྣམ་ཤེས་ལ་འཕྱོ་བའི་དབྱར་གཞུང་དྲོན་མོ་དང་དགུན་ཟླ་འཁྱག་པོ་དེ་གཉིས་ཀྱང་ཁ་རླངས་གཅིག་གི་གཟུགས་སུ་ལྡང་ནས་མི་ལོ་སུམ་ཅུ་ཙམ་རེད།མི་ལོ་སུམ་ཅུའི་རིང་ལ་བདག་འཛིན་དུ་རུང་མིན་མི་ཤེས་པའི་གྲིབ་མ་རིགས་ཤིག་གཞི་ནས་གྲུབ་ཚར།ངས་རང་གི་གྲིབ་མ་མི་མཐོང་བར་རྒྱུ་མཚན་ལོས་ཡོད།

　　ཡུན་གྱིས།འོད་སྣང་ལ་གོམས་པ་ལྟར།མེ་ལོང་ལ་གཡེང་བའི་བརྙན་དུམ་དེ་རང་ཁྱོད་ཀྱི་མིག་ཟུང་གི་མཚེའུ་ལ་བབས་པའི་ཟླ་གཟུགས་ཀྱི་ཚུལ་གྱིས་ཧ་ཅང་བག་ཡངས་ལྷོད་ཤིག་གི་སྐད་ཅིག་རེ་རེ་གང་ལ་ཡལ།ངོ་མ་བཤད་ན།ཁྱོད་རང་མཐོང་སྣང་ལས་ནུབ་པའི་མཚན་མོ་རེ་རེར་ཡང་།ཡང་ཡང་ཞེ་ལ་བསམ་པའི་རི་མོ་མག་མོག་སྣང་བར་འཁྱུག་པའི་དུས་ཚོད་དེ་ལ་ཁྱོད་ཀྱི་གྲིབ་མ་ཚུར་ལ་ཕེབས་བྱུང་།དེ་འདྲའི་མུན་ནག་སྟུག་པོ་ཞིག་ལས་ཀྱང་ངས་ཁྱོད་གསལ་བོར་མཐོང་ཡོང་།ཁྱོད་ཀྱི་རུས་མིང་སེམས་ལ་བཟློོས་ཙམ་གྱིས་འོད་སྣང་གིས་བསྩལ་བའི་ལོངས་སྤྱོད་ཅིག་རྒྱུད་ལ་འཕོས་ཡོང་བས།ངས་ཐོག་མར་རིག་པའི་བག་ཆགས་དེའི་གྲིབ་མ་གློ་བུར་གློ་བུར་དུ་ཚོར་ཡོང་།བར་ཐག་མེད་པའི་འགྱུ་ཤུགས་རྒོད་པོ་སྲོག་ལ་ཞུགས་པའི་གྲིབ་མ་ལེབ་མོ་ཨང་།མུན་པ་འཇམ་པོ་ཨང་།ང་ལ་དངོས་གནས་འབྲལ་ཐབས་ཅི་ཡོད།

　　ཚ་གདུག་གིས་གཙེ་བའི་ཉིན་གུང་ཞིག་ལ་གྲིབ་ནག་བསིལ་པོ་ནག་སྒོར་རེར་ཡོད་པ་ཞིག་ལས་ངལ་གསོས་ཚུལ་བསམས་ན།སྐྱིད་སྡུག་གི་རི་མོ་གཅིག་ཏུ་བབས་པའི་མི་མང་པོ་ཞིག་གི་ངོ་གདོང་ལས་ཐོབ་པའི་དབུགས་དབྱུང་ལྷོད་པོ་རེ་རེས་འཚོ་གནས་ཀྱི་སྙིང་པོ་གཅིག་ཏུ་བསྡུས་པས་ན།ང་ཚོའི་རྒྱུད་གཅིག་ཏུ་འགོས་པའི་གྲིབ་མ་ནག་པོ་དེ་དངོས་འབྲེལ་རྒྱ་ཆེན་པོ་འདུག ངས་རང་གི་གྲིབ་རིས་བོར་བའི་གཟུགས་བརྙན་དེའི་མངའ་ཐང་དེ་ལྟར་མི་མང་པོ་ཞིག་གི་ལོངས་སྤྱོད་དུ་ཚུད་པ་ཤེས་ཡོད།སྲིབ་ལ་ཆགས་པའི་ཁ་བ་ཞུ་ནས་དབྱར་གཞུང་གི་ལྗང་མདོག་རྣམ་པར་བཀྲ་དུས་སུ།ཧ་ཅང་སྐྱིད་པའི་མེ་ཏོག་གི་བཀྲག་མདངས་དེ་རུ་ཁྱོད་ཀྱི་དགོད་སྒྲ་དང་ཁོ་ཡི་འཛུམ་ཟེར་མཆིས་པས།རྫུབས་སྟུག་པའི་ཡུལ་ལྗོངས་འདིར་ཕྱེ་ལེབ་ཁྲ་ཁྲ་ཁྲ་ལམ་མེར་གང་ལ་འཕུར།ངས་རང་གི་གྲིབ་མ་འདིའི་འཁྲུལ་སྣང་ཆེན་པོ་རུ་གཞན་གྱི་གྲིབ་མའང་འཇིབས་ནས་མཚན་སྨག་གི་དུམ་བུ་སེམས་ལ་བསྲེས་པས།འོད་སྣང་ལ་གོམས་པ་ནས་བརྩམས་ཏེ།ཐམས་ཅད་མུན་ནག་གཞན་ཞིག་གི་འཇིག་རྟེན་ལ་རྒྱས་ཤིང་།ཤ་ཁྲག་གི་གདོས་བཅས་རེ་རེ་བབས་པའི་གྲིབ་མ་འདི་མཐོང་རེག་ཏུ་མེད་པ་མ་གཏོགས་ཧ་ཅང་ཇེ་གསལ་ཡིན་པ་མེ་ལོང་དུ་བཤད་དགོས་སམ།

　　མ་གཞི་འཇིག་རྟེན་ཧྲིལ་བོ་གྲིབ་མའི་རང་བཞིན་དུ་ཆགས་ནས།ང་ཚོ་གནས་ལུགས་མང་པོ་ཞིག་གི་གཟུགས་བརྙན་དུ་འཚོ་བ་མ་གཏོགས།ཡོད་ཚད་རི་མོར་སྣང་བ་དང་པར་རིས་སུ་འབབ་པ་ཙམ་ལ་འབྲེལ་བ་མེད་པ་འདྲ།ངའི་སྙིང་ཉེ་བའི་བྱིས་དུས་ཀྱི་ངོ་ཚུགས་ཟབ་མོའང་རྒས་དུས་ཀྱི་གོམ་འགྲོས་འཁྱར་འཁྱོར་དེའི་ཤུགས་ལ་ཡུན་གྱིས་འདྲེས་ཀྱིན་མེད་པར་སུ་ཡིས་ཁ་ཚོན་གཅོད་ནུས།གྲིབ་མའི་ཐད་ཀྱི་བསམ་གཞིག་དག་གིས་ང་རང་ཉིད་ཀྱི་མིག་ལའང་ཡིད་མི་ཆེས་པ་ཞིག་བཟོས་པས།ང་འདི་ལྟར་མགོ་འཁོར་བའི་དུས་ཚོད་དེའི་མཐའ་རུ་ཅི་ཞིག་ཡོད་དམ།ཁ་ཕྱོགས་གཞན་ཞིག་གི་མཐོང་སྣང་དུ་སླར་ཡང་ཕྱིར་ཆགས་ཚུལ་གྱི་བློས་བསླངས་ཤིག་སྒྲུང་དུ་ཕབ་ན།གྲིབ་མ་འཁོར་བའི་རི་རྒན་ཞིག་གིས་སྔར་བཞིན་ངའི་ཚེ་སྲོག་གི་ཆུ་ཕྲན་ཤག་ཤག་བཞུར་བ་ཐོས་སྲིད།

　　གྲིབ་མ་ནི་མི་གཞན་གྱི་ཡིན་པའི་སྣང་བ་ཞིག་གིས་དེ་ལ་བལྟས་པའི་ཐེངས་གྲངས་རེ་རེ་དཔག་པར་དཀའ་ཡང་།ཡིད་ལ་འོང་བའི་སྣང་བརྙན་དག་གི་མཁའ་དབུགས་སུ་ཁ་དོག་ཅི་ཡང་མེད་པའི་ངོ་གདོང་དག་ཤར་ཚེ།མིག་ཤེས་ཀྱིས་བྲིད་པའི་གོ་དོན་ཞིག་བསྐྱར་དུ་ཆགས་ཡོང་།སྐབས་འདིར།ཁྱོད་གཞན་གྱི་གྲིབ་མ་ཡིན་ནི་མིན་ན་ཞེས་སྐད་ཆེན་པོས་བསྡིགས་ཀྱང་ཆོག རང་ཉིད་མི་གཞན་གྱི་གྲིབ་མ་ཡིན་སྣང་གིས་ཡོད་ཚད་འཁྲུལ་ཏེ་རབ་རིབ་མག་མོག་ཏུ་གྱུར་སོང་།

　　ཁྱོད་ཀྱིས་ངའི་གྲིབ་མ་མཐོང་མྱོང་ངམ།ངས་ཀྱང་དེ་ལྟ་བུའི་སྣང་ཚུལ་ཞིག་ལ་ཚོད་དཔག་བྱེད་ཐུབ་ཀྱི་འདུག

ཡུལ་མི།

　　རང་ཉིད་གང་དུ་སྐྱེས་པའི་ཡུལ་དང་ཡུལ་དེའི་གཞི་ལ་འདྲེས་པའི་མི་དག་ནི་ནར་སོན་གྱི་གོ་རིམ་ཞིག་ལས་ཡུན་གྱིས་ཞེ་ལ་ཐོགས་ཤིང་སེམས་ལ་སྨིན་པ་ཞིག་ཏུ་བསམས་ན།གཏན་དུ་འདུག་མི་འདོད་ཀྱང་སྐབས་སུ་བྲལ་མི་བདེ་བའི་ས་ཆ་དེ་ནས་དེ་ལྟར་ལམ་ལ་ཆས་པ་ནས།དྲན་པའི་གཏིང་རིང་དུ་ལྷུང་བའི་སྐད་ཆ་ཐར་ཐོར་རླུང་ལ་འཕྱོ་བ་ཕ་ཡུལ་གྱི་འགྱུར་ལྡོག་དང་ཡུལ་མི་ཡི་བདེ་སྡུག་མིན་པ་ཅི་ཡོད།ང་ཚོས་གླེང་མི་ཚར་བའི་མཚར་སྣང་གི་སྒོ་མོ་དེ་ནས་ཕྱེ་པས།འཇིག་རྟེན་གྱི་ལྟད་མོ་མ་རྫོགས་བར་དུ་ཕ་ཡུལ་གྱི་གཟུགས་བརྙན་འཇགས་པོ་ག་ལ་འགུལ་སྲིད།ང་ཚོའི་ཆེས་ཐོག་མའི་གོམ་འགྲོས་ཀྱི་སྟངས་སྟབས་དེ་ནས་ཡན་པ།ལོ་ཟླ་བའི་ལམ་བུ་མ་ཟད་བར་དུ་ཡུལ་མི་རེའི་ངོ་གདོང་དྲོན་མོ་ག་ལ་འཁྱག་སྲིད།

　　ས་ཆ་ཞིག་གིས་བསྐྱངས་པའི་གཏམ་རྒྱུད་ཀྱི་དཀྱིལ་འཁོར་དེ་རུ་ཆགས་པ་ནི།ཕ་མེས་ཀྱི་ངོ་གདོང་སྨུག་ཆིལ་ལི་བ་དག་ཡིན་ན།མི་མང་པོ་ཞིག་འདས་ཤིང་བཞུད་ཅིང་།མི་མང་པོ་ཞིག་སྐྱེ་ཞིང་འཚར་བའི་བརྒྱུད་རིམ་དེའི་ནང་དུ།ང་ཚོའི་རིགས་རྒྱུད་ཀྱི་ཡལ་འདབ་རིང་དུ་སྐྱེད་པའི་བུ་ཚ་རྣམས་ངུ་སྐད་གཉོམ་པོ་དང་འགྲོགས་ནས་སྙིང་རྗེ་སྐྱེས་ཡུན་ཙམ་ལ་ལག་ཆགས།བྱིལ་བྱིལ་གཏོང་ཐེངས་ཤིག་ལ་ནར་སོན།ནར་སོན་གྱི་ངོ་གདོང་རེ་རེ་ལས་རྒྱུས་ཡོད་པའི་གཟུགས་བརྙན་མིག་ལ་མངོན་དུས།ང་ཚོས་སྡེ་བ་ཚོ་བ་དང་དང་ཁྱིམ་ཁ་རུ་སྐོར་དྲན་ཡོང་ལ།ཤ་ཁྲག་ལ་བཏབ་པའི་དན་རྟགས་དེའི་དབང་གིས་ང་ཚོ་གཅིག་ལ་གཉིས་འབྲེལ་ངང་རི་ཁུག་ལུང་གཤོང་དང་རྫ་མཐའ་སྤང་དཀྱིལ་དུ་ཁྱིམ་ནས་ཁྱིམ་བཀར་ཏེ་འཚོ་བཞིན་ཡོད།

　　གློ་བུར་བའི་ཐུག་འཕྲད་རེ་རེ་ལས་ཁྱོད་ཀྱིས་བྱིས་པ་དེ་ཁྱིམ་ཚང་དེ་ཡི་ཡིན་ཨང་སྙམ་པའི་གདེང་ཞིག་རྙེད་ངེས་ལ།བག་ཆགས་ལ་སྨིན་པའི་ས་བོན་དེའི་གསེང་དུ་ཤ་ཁྲག་གི་རི་མོ་གསལ་ལ་བཀྲ་བ་ཞིག་སེམས་ལ་ཞག་ཡོད་པ་ནི་ང་ཚོའི་ལུས་རྟེན་ལ་འབྲེལ་བའི་ཕ་ཡི་ཞལ་རས་དང་ཡུལ་གྱི་རི་ཆུ་དེ་ཡིན།བུ་རབས་ཚ་རྒྱུད་རིང་ས་ཆ་ཡུལ་ལུང་ཞིག་གི་རྐང་རྗེས་ཀྱི་རི་མོ་རྐང་རྗེས་ཀྱིས་བསབས་ཤིང་འཚོ་གནས་ཀྱི་ཆུ་རྒྱུན་ཆུ་བོ་ལ་བསྲེས་ཀྱང་མི་རྣམས་གང་དུའང་མ་སོང་བར་ལུས་ཡོད།རྒྱང་དུ་ཁུར་བའི་བྲག་ཅ་དེ་རང་ཁང་བས་ཕུད་པའི་སྦྲ་ནག་གི་ཕྱི་ཤུན་རལ་བོ་དང་།འཕྲུལ་གྱིས་ཚབ་པའི་རྟ་གཡག་གི་གོམ་ཁ་ལྷོད་པོ་དེ་ཡིན་ཡང་།གཏན་དུ་འཁུར་མ་ཐུབ་པར་ལུས་པའི་དྲོད་ཁོལ་རིགས་ཤིག་རླུང་ལ་འདྲེས་ནས་ཞེ་ལ་སིམ་ཡོང་།

　　འཚོ་གནས་དང་ཕུགས་བསམ་གྱིས་བསླུས་པའི་གོམ་པ་རེ་རེ་རྒྱང་ལ་བཀྱེད་པ་ནས།མི་རེའི་སེམས་ལ་ཕ་ཡུལ་རེ་དང་ཡུལ་མི་རེ་ནི་གཟུགས་མེད་ཀྱི་གློག་རླབས་ལྟར་ཉལ་ཡོད།ཕ་ཡུལ་ནི་འགྲུལ་བཞུད་ཡོད་ཚད་ཀྱི་ལོག་མལ་དང་ཡུལ་མི་ནི་གཏམ་རྒྱུད་ཡོད་ཚད་ཀྱི་རྣ་བ་དེ་ཡིན།གནས་གཅིག་ཏུ་བསྡད་དེ་ལས་གཅིག་གི་འཚོ་ཐབས་བསྐྱངས་པ་ནས་ཡུལ་མི་ཚོར་རྟག་པར་བློ་བདེ་བབ་ཆགས་ཀྱི་རྣམ་འགྱུར་ཟབ་མོ་ཞིག་ཡོད།ཁོ་ཚོས་ཕ་མེས་རིང་གི་འཚོ་ཐབས་ཤིག་དང་དུ་བླངས་ཤིང་རྗེས་སུ་བཟུང་བ་ནས་ཡུལ་སྲོལ་ཕྲན་ཚེགས་དང་གོམས་གཤིས་ཙག་ཙིག་ནས་བརྩམས་པའི་བགྱི་བ་རེ་རེས་ཡང་དང་བསྐྱར་གྱིས་ལོ་དང་ཟླ་ལ་བག་ཕེབས་པའི་ཐུགས་རྒྱུད་དང་ཡིད་གཞུང་བའི་ལྟ་སྟངས་རེ་སེམས་ཀྱི་གཏིང་ལ་ཆགས་པར་བྱས་ཡོད།མི་དག་གིས་རྐང་རྗེས་ཀྱི་རི་མོ་ཕྱོགས་བཞིར་བཀོད་ནས་སྟོད་ཀྱི་འབྲོག་ཐང་དང་སྨད་ཀྱི་གྲོང་ཁྱེར་བར།ལས་སྣ་མང་གི་གླ་གཡོག་གང་འདོད་རྒྱུག་དུས།ཚེ་སྲོག་ལ་ཆད་པའི་བདེ་སྣང་ཞིག་ཕ་ཡུལ་ན་ལུས་ཤིང་།ཡུལ་མི་ཡིས་བཟུང་ཡོད་པ་ཤེས་པས།ཡ་ཆུང་གི་རྟོད་ཐག་ཕྲ་མོ་དེས་ཡུན་གྱིས་བསྟུངས་ནས།ཁྱོད་རང་ཡང་ནས་ཡང་དུ་ཕ་ཡུལ་ལ་ལོག་སྲིད།

　　ཕ་ཡུལ་ནི་སྤང་མེ་ཏོག་གི་མགོ་ལྕོག་རླུང་ལ་རྩེན་ཞིང་།ཕྱུགས་དཀར་ནག་གི་རྒྱུ་བ་སྤྲིན་ལ་འདྲེས་པའི་ས་ཆ་ཞིག་རེད།རིའི་མུ་ཁྱུད་ཀྱི་དཔུང་བ་ཁངས་ལ་ཆགས་ཤིང་།ཆུའི་རྩ་རྒྱུས་ཀྱི་ཟུངས་ཁྲག་ལ་ཕུ་ན་འཕྱོ་བའི་རི་ལུང་ཞིག་རེད།ནར་སོན་པ་དང་ལྷན་དུ།ཕ་ཡུལ་ཞེས་པའི་ཡུལ་ལྗོངས་དེ་རང་ཡུལ་མི་ཞེས་པའི་ཐིག་རྩ་རེ་རེ་དང་འགྲོགས་ནས་དལ་བ་དལ་བུར་ཞེ་ལ་ཆགས་ཚུལ་ནི།སྣང་བརྙན་ཡག་པོ་ཞིག་སེམས་ལ་འཆར་སྟངས་ཤིག་ཅི་ལ་མིན།ཡུལ་མི་ཚོ་དེ་ལྟར་ཕ་ཡུལ་གྱི་སྲོག་ཤིང་དུ་གྱུར་བ་ནས།ཁོ་ཚོས་ཕ་ས་མ་མོའི་བྲང་མགོ་འདྲ་བོ་ཞེས་རང་ས་རང་ཡུལ་གསེར་དུ་བརྩི་ལ།རང་སྡེ་རང་མྱི་སྲོག་ཏུ་བཀུར།ས་ཆ་ཞིག་ནས་འཚར་ཞིང་རི་ལུང་ཞིག་གིས་བསྐྱངས་པའི་མི་རེ་རེས།འཇིག་རྟེན་ནི་རྒྱང་ནས་རྒྱང་ལ་ཆགས་པ་དང་།མི་ཚེ་ནི་རིང་ནས་རིང་ལ་འཕུར་བ་ཞིག་ཏུ་བསམས་ནས་ལམ་ལ་ཆས་པས།སྐབས་ཤིག་ཕ་ཡུལ་དང་ཡུལ་མི་བརྗེད་པར་གྱུར་ཡང་།གོམ་འགྲོས་ཀྱི་སྣེ་མོ་ཕྱིར་ལ་དཀྱུ་ཞིང་ལས་དབང་གི་ལམ་ཁ་རླུང་ལ་བཅོལ་དུས།ད་གཟོད།ཕ་ཡུལ་ནི་ཚེ་གང་གི་ལོག་མལ་དང་།ཡུལ་མི་ནི་ཚེ་གཅིག་གི་ལས་སྐལ་རེད་སྙམ་སྲིད།

　　ཡུལ་མི་རེ་རེ་ས་ཆ་ཞིག་དང་རི་ལུང་ཞིག་གིས་བསྐྱངས་ནས།ཡུལ་མི་རེ་རེས་ས་ཆ་ཞིག་དང་རི་ལུང་ཞིག་བདག་ཏུ་གཉེར་བ་ནས།འཇིག་རྟེན་ཁོ་རང་ཉིད་ཆེ་ནའང་།ཁོ་ཚོ་ཕ་ཡུལ་ལས་གང་ལ་འགྲོ ཡུལ་མི་དག་དེ་ལྟར་ས་ཆ་ཞིག་གི་བདག་པོ་དང་།རི་ལུང་ཞིག་གི་རྫི་བོ་རུ་གྱུར་བས།ཁོ་ཚོ་ཐོབ་འདོད་ཀྱི་འདུན་པ་དྲགས་པོས་མནར་གྱིན་མེད་ལ།སྙེག་འདོད་ཀྱི་ཧམ་པ་ཆེན་པོས་གཟེར་གྱིན་མེད།ཁོ་ཚོ་རང་ལ་བདག་པའི་ཁོར་ཡུག་དེ་ན་རང་མགོ་རང་ཐོན་ངང་ཡོད།དེ་བས།ཡུལ་མི་ནི་རི་ཆུ་ནགས་གསུམ་གྱི་བརྩེ་བ་ཆེན་པོས་འཚོ་བཞིན་ཡོད།ཁོ་ཚོས་ས་ཆ་ཡུལ་ལུང་དེའི་གནམ་གཤིས་ཀྱི་འགྱུར་བ་སྐྱེན་པོ་དང་དུས་ཚིགས་ཀྱི་བརྗེ་རེས་རེ་རེ་ལས་རང་བྱུང་གི་མཛེས་པ་ལོངས་སུ་སྤྱོད་ཅིང་ཉམས་སུ་མྱོང་ལ།རི་རྒྱུད་ཀྱི་ལུས་ན་སྐྱེ་བའི་རྩྭ་སྣ་ཤིང་སྣ་དང་སྤང་ཐང་གི་གཞོང་ལ་འཐོར་བའི་རྩི་ཏོག་ཤིང་ཏོག་སོགས་སྐྱེ་དངོས་སྣ་མང་གི་གནས་ལུགས་རེ་རེ་ལས་འཚོ་ཐབས་རེ་རེ་རྙེད་ཡོད།དེ་ལྟར་འཚོ་རྟེན་གྱི་གཞི་མ་རང་བྱུང་ལ་བཅོལ་བས།ཁ་ཆར་བུ་ཡུག་གིས་རྗེས་ནས་དེད་ཅིང་སད་སེར་བཙའ་ཐན་གྱིས་སྔུན་ནས་བསུས་ཀྱང་དཀའ་སྡུག་གི་ལོ་ཟླ་སྤོབས་པས་སྐྱེལ་ནུས།འཁང་ར་དང་ལེ་བདའ་མེད་པར་ལྷོད་ཀྱིས་འཚོ་ནུས།ཨ་ཆད་དང་ཨུ་ཐུག་མེད་པར་སྲལ་ལེན་བྱེད་ངེས།

　　མི་དག་གིས་གནའ་རིང་ད་ཐོག་གི་འཚོ་བའི་རིག་པ་རྒྱབ་ཏུ་བསྐྱུར་ནས་ཕུགས་བསམ་དང་རེ་བ་སེམས་ལ་བསུས་པས།རྒྱང་རིང་དང་སྙན་ངག་ཡུལ་ན་ལུས་པ་ག་ལ་ཤེས།ཁོ་ཚོས་འཚོ་གནས་ཀྱི་རྐང་མ་ཚུགས་པར་ཡར་གྱི་ལས་བྱེད་པའི་གྲས་ལ་མ་ཐེ་ཞིང་།མར་གྱི་རོང་འབྲོག་གི་ནང་ལ་མ་འདྲེས་པར།སྐྱིག་སྡུག་གི་རི་མོ་བརྡབ་གསིག་གིས་གཡོ་དུས་ཤིག་ལ་ཕ་ཡུལ་དྲན་སྲིད།ཡུལ་མིར་དུངས་སྲིད།དེ་དུས།ས་ཆ་རི་ལུང་ཞིག་སྔར་བཞིན་ཁུ་སིམ་མེར་རླུང་ངོགས་ན་ལུས་ཤིང་།རུ་ཁ་ཁྱིམ་ཁ་དག་སྔར་ལྟར་ཁ་རོག་གེར་ཕ་ཡུལ་ན་ཡོད་པར།ལྷིང་འཇགས་ཀྱི་ཟབ་སར་འཁྱིལ་བའི་གོ་བ་ཟབ་མོ་ཞིག་ཅི་ལ་མི་རྙེད།

　　སྡུག་གི་འདུན་མ་གཅིག་ཏུ་རུབ་ནས་གཤིན་ལ་ཆོས་བྱེད་དུས་དང་།སྐྱིད་ཀྱི་རྟ་ཁ་གཅིག་ཏུ་གཏད་ནས་གཉེན་ལ་སྟོན་བཤམ་དུས་སུ་ཡུལ་མི་ཚོ་མཉམ་དུ་ཡོད་ལ།ལབ་བསྟོད་གཏེར་རྒྱག་དང་།རིམ་གྲོ་དུས་མཆོད་སོགས་གཟའ་སྐར་འཕྲོད་སྦྱོར་ལ་འབྲེལ་བའི་ཆོ་ག་ཕྱག་ལེན་གྱིས་ཡུལ་མི་ཚོ་ཁ་ཐོར་གྱིས་འཚོ་ཡང་གཅིག་སྡུད་ངང་སྦྲེལ་ཡོད།དེ་ལྟར་གོམས་པའི་གཤིས་ལུགས་ཟབ་མོ་ཞིག་གིས་འཇིག་རྟེན་གྱི་ངོ་བོ་རང་བཞིན་དལ་བ་དལ་བུར་སེམས་ལ་བསྲེས་པས།ཡུལ་མི་ཚོར་རང་རྒྱུད་ལ་ཐིམ་ཞིང་རང་འཇགས་སུ་གྱུར་བའི་གོམས་གཤིས་རེ་ཡོད་པ་ནི།ནངས་སྔ་ལངས་ཀྱི་བསམ་པ་ཆོས་ལ་གཏད་ཅིང་དགོང་འཕྱི་ཉལ་གྱི་སྨོན་ལམ་ཕྱི་མར་བཅོལ་ནས་ལས་གང་བསྐོས་ཀྱི་དབང་འོག་ཆོག་པར་ཤེས་པ་དེ་ཡིན།ཁོ་ཚོར་རྒྱུན་ཆགས་སུ་གྱུར་བའི་བྱ་བ་རེ་ལས་མི་ཚེའི་ལྟ་བ་ཞེས་པའི་ཆེན་པོ་ཞིག་གླེང་རྒྱུ་མེད་ལ།ཁོ་ཚོར་འཆར་ཅན་དུ་སྤེལ་བའི་སྤྱོད་པ་རེ་ལས་རིན་ཐང་ལྟ་བ་ཞེས་པའི་ཟབ་མོ་ཞིག་བཤད་རྒྱུ་མེད།ཁོ་ཚོས་ཚན་རིག་ཅེས་པའི་བཤད་ཕྱོགས་དེ་ལ་རྣ་བ་མི་གཡེང་ལ།དེང་རབས་ཞེས་པའི་ལྟ་སྟངས་དེ་ལ་ཁ་ཡ་མི་བྱེད།ཁོ་ཚོ་རང་རང་ས་ན་ཁ་རོག་གེར་འཚོ་བཞིན་ཡོད།ཁོ་ཚོ་རང་རང་ས་ནས་ཁ་རོག་གེར་འཚོ་བས་ན།སེམས་གངས་དཀར་གྱི་རྩེ་མོ་སྨུག་པས་བཏུམས་རུང་མགོ་མ་འཁོར་བར་ཡོད།ཞེ་སྤང་ཐང་གི་གཞི་མ་སད་ཀྱིས་བཅོམ་ཡང་ལུས་མ་འཁུམ་པར་ཡོད།ཁོ་ཚོར་བག་ཆགས་དང་དད་པས་བསྐྲུན་པའི་རང་བྱུང་ལྷུན་གྲུབ་ཀྱི་གཤིས་ཀ་ཞིག་ཡོད།

　　རང་ཉིད་ཡུལ་དང་བྲལ་ནས་ནར་སོན་ཞིང་།ཡུལ་མི་རྒྱབ་ཏུ་བསྐྱུར་ནས་འཚོ་དུས་ལ།མི་དག་གིས་ཕ་གཞིས་སྲུང་བའི་ཡུལ་མི་ཚོའི་བབ་ཆགས་ཀྱི་ཚུགས་ཀ་མཐོང་ཐེངས་རེར།ཚེ་གཅིག་གི་ལང་ཚོ་ཕངས་མེད་དུ་བསྟིམས་པའི་བཙལ་འཚོལ་གྱི་ལོ་ཟླ་རིང་མོ་དེ་ཅི་ཞིག་ཡིན་ནམ་འདོད་སྲིད།འདྲིས་མི་བདེ་བའི་སྟོང་ཆ་ཞིག་ལས་ཡང་ཡང་འཇུམས་དུས།མིད་ཐག་ཏུ་ལུས་པའི་སྐད་ཆ་ཐན་ཐུན་རྡོ་བ་ལྟར་མུར་ནས་བཤད་འདོད་པའི་སྙིང་གཏམ་སེམས་ལ་ཉར་དགོས་སམ།ང་ཚོ་ལོ་ཟླ་དང་ནར་སོན་གྱིས་རྨང་ནས་བསླུས་པས་ན།ཡུལ་མི་ཞིག་གི་གཟུགས་བརྙན་ནི་བཟུང་ཡང་།བློ་ཁོག་ནི་ཅི་བྱ།ད་ནི་ཁོག་མ་ལ་མེད་པ་ཞིག་ཟ་རུ་ལ་གང་ནས་ཡོང་།ལོ་ན་ཚོད་ཀྱི་གཉེར་མས་རི་མོ་འབྲི་དུས།ང་ཚོ་ལ་ཡུལ་མི་ཞེས་འབོད་མཁན་ཞིག་ཡོད་དམ།

　　སྐྱེ་བ་འདིར་ཡུལ་མི་ཕལ་བ་ཞིག་གི་ལས་དབང་ལས་ཅི་ཞིག་ཡོད་སྲིད། ཅི་ཡང་ཡོད་མི་སྲིད།

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།