བཞིན་གྱི་གཉེར་མ་བསྡུས་སམ་ལྷོད་ཀྱང་རུང་།།
གྲོགས་སམ་དགྲ་བོ་གང་ཡིན་མངོན་མ་སོང་།།
དགའ་བའི་སྙིང་གཏམ་བཤད་དམ་མ་བཤད་རུང་།།
མགོ་བོ་སྙེ་སའི་མི་དེ་ཡིན་མི་འདུག།

འབྱུང་བཞིའི་ལུས་ནི་བདེ་བདེ་འདྲ་ནའང་།།
ན་ཚའི་ཚོར་བ་འདི་ནི་མི་འཇགས་པས།།
བདག་གི་སེམས་ཀྱི་སྨན་པ་གར་ཡོད་ཅེས།།
རྨི་ལམ་ནང་ནས་གཅེར་བུར་འདུར་དགོས་སོང་།།

སྒོ་མོ་འདི་དག་ཅི་ཙམ་ཆེར་ཕྱེ་ཡང་།།
ལོག་སའི་ཁྱིམ་དེ་རྙེད་པར་དཀའ་བ་ལ།།
གླུ་གཞས་འདི་དག་ཅི་ཙམ་སྙན་ནའང་།།
གླུ་མཁན་འདི་དག་ཅི་འདྲའི་བཙོག་པ་ལ།།

མི་སྡུག་གཟུགས་ཀྱིས་ཚུར་ལ་འབུར་ཡོང་བའི།།
ནད་གདོན་མཚོན་བྱེད་བརླན་གྱི་ཐིགས་པ་གཅིག།
གདོང་ལ་བྱུགས་ནས་སེམས་ལ་སིམ་པའི་ཚེ།།
འཇིག་རྟེན་འདི་ཉིད་གློ་བུར་འཇིག་ན་སྙམ།།

ལག་པ་གློད་ཅིག་སྲིད་པའི་བཙོན་མ་དག།
སྟོང་བའི་དབྱིངས་ན་ཟགས་པའི་ཕུང་བོ་འདིར།།
དུས་ཀྱི་མཚོན་ཆས་ཡང་ཡང་བསྣུན་པ་ལ།།
རྨ་ཁ་མེད་པའི་སྡུག་བསྔལ་ཤུགས་ཀྱིས་འབྱུང་།།

འཁོར་ནས་བྲོས་ཤིང་སླར་ཡང་ཚུར་འོང་སྟེ།།
སྡོད་ཀྱིན་སྡོད་ཀྱིན་ཟུག་རྔུ་མི་བཟོད་པར།།
འོ་དོད་བོས་ཀྱང་སྐད་སྒྲ་མེད་པའི་མཐུས།།
མགོ་བོ་དུད་ནས་འཆི་བར་སྒུག་འཚལ་ལོ།།

མཁྲེགས་ནས་མཁྲེགས་པར་འགྱུར་བའི་བཅུད་འདི་དག།
སྙིང་དང་ཁྲག་རྩ་མེད་པའི་སྣོད་ཀྱིས་བཟུང་།།
སྐད་ཅིག་ཅིག་ལ་འཁྲབ་པའི་གར་འདི་དག།
ཞིབ་ཏུ་བལྟས་ཚེ་ཕྱེ་མའི་སྣོད་བཞིན་འཇིག།

དར་ཆ་འདི་དག་སུ་ཡིས་བཟོས་པ་དང་།།
དར་ཡུ་འདི་ལ་སུ་ཞིག་འཇུས་ཡོད་པ།།
གཙོ་བོ་དེས་ཀྱང་གསལ་བོར་མ་བཤད་པར།།
དཔུང་གི་གྲལ་ནས་འགྲེང་བ་འདིའང་ཅི།།

བཏུལ་བའི་དགྲ་ནི་གྲོགས་ལ་འགྱུར་བྱེད་ཅིང་།།
བོར་བའི་གྲོགས་ཀྱིས་དགྲ་བོའི་ཚུལ་འཆང་སྟེ།།
སྤྲུལ་བའི་རྫས་ཀྱིས་མིད་པ་བཀང་བ་ཡིས།།
འགྲང་ཞིང་བཀྲེས་པའི་ཚོར་བ་ལན་མང་འོང་།།

                                2010/2/2

རྩོམ་ཁུངས། ངེད་དྲ་བ།