༄༅།།མཛེས་པའི་གངས་ལ་ཟླ་བའི་དབུ་རྒྱན་བཞིན།།
བཞིན་ལེགས་ལང་ཚོའི་ཆ་བྱད་ཀུན་རྫོགས་ཤིང་།།
ཤིང་སྐམ་ལྟ་བུའི་སེམས་པ་འདུལ་བྱེད་ལ།།
ལ་མོར་བརྩེ་བ་སྦྱིན་མཛད་བྱང་ཆུབ་མ།།
མ་ཐུལ་འདོད་པའི་མེ་ཀླུང་འཁྲིགས་པའི་རླབས།།
རླབས་ཆེན་བསོད་ནམས་འཇོམས་པའི་མཐུ་ཡིན་ན།།
ན་ཆུང་ཁྱོད་ཀྱི་དྲི་མེད་ཆུ་སྐྱེས་སྒོ།
སྒོ་གསུམ་བག་མེད་བྱེད་པའི་རྒྱུ་མིན་ནམ།།
ནམ་མཁའི་ཁྱོན་ཀུན་བསླད་པའི་མྱོས་བྱེད་ཆུ།།
ཆུ་ཤིང་དྲན་པ་བཟི་བའི་བདུད་རྩི་ཡིན།།
ཡིན་ལུགས་དེ་འདྲ་སྐད་ཅིག་དྲན་པའི་ཚེ།།
ཚེ་ཡི་རྟེན་ཡང་ཁྱོད་ཀྱི་མངལ་དུ་འཇུག།
འཇུག་སྒོ་མ་ནོར་དུར་ཁྲོད་བསིལ་བའི་ཚལ།།
ཚལ་བར་བཀས་པའི་ཆགས་པ་མྱོང་དྲགས་ཏེ།།
ཏེ་པོར་ལུས་ཀྱི་ས་གཞི་བསྒུལ་བ་འདི།།
འདི་ཕྱི་སྦྲེལ་བའི་ཟམ་དུ་གོ་ཡང་ཆོག།
ཆོག་ཤེས་མེད་པར་ཡང་ཡང་བརྒྱལ་བའི་ཚུལ།།
ཚུལ་ལྡན་རྣམས་ཀྱིས་སྙིང་ནས་བཟོད་དཀའ་ཡང་།།
ཡང་དག་ཆོས་ཀྱི་སྙིང་བོ་རྟོགས་པའི་མི།།
མི་ཆོས་གཙང་མར་སྤྱོད་ལ་སུ་ཞིག་ཁྲེལ།།
ཁྲེལ་བའི་གད་མོ་འཛིན་པའི་གཤིས་དོར་ནས།།
ནས་འབྲུ་བཞིན་གས་སེམས་ཀྱི་འཆར་སྒོ་ཀུན།།
ཀུན་རྟོག་ཡོལ་བའི་ངོས་ནས་བསུབ་པའི་དཔལ།།
དཔལ་ཆེན་སྟོང་བའི་གནས་ལུགས་མཐོང་བའི་རྒྱུ།།
རྒྱུ་དང་ས་བོན་དྲོད་ཀྱིས་བསྐྱེད་པ་དག།
དག་པ་གསུམ་ལྡན་རྡོ་རྗེའི་ཕོ་བྲང་དུ།།
དུ་བའི་རླབས་བཞིན་འཕྱུར་བའི་བདེ་བ་མཆོག།
མཆོག་གི་ནོར་ལྟར་སྲིད་པའི་རྒྱན་དུ་གཅེས།།
གཅེས་ཤིང་ཕན་པའི་མཆུ་དང་ལྕེ་ཡི་མེ།།
མེ་ཏོག་སྐྱ་བོའི་ཟེའུ་འབྲུ་བཞིན་དུ་གཙུབས།།
གཙུབས་ཤིང་ལྟ་བུའི་ནུ་མའི་རྩེ་མོ་ན།།
ན་ཟུག་སྟེར་བྱེད་དུག་གི་རླངས་པ་འཕྱུར།།
འཕྱུར་བའི་རླུང་ལ་འགོག་ཐབས་མ་བྱུང་ཞིང་།།
ཞིང་ཁམས་ཐམས་ཅད་སིད་སྒྲས་རབ་ཏུ་ཁྱབ།།
ཁྱབ་བདག་དབང་ཕྱུག་གཞོན་ནུའི་ལུས་ཅན་ལ།།
ལ་ལུང་མེད་པར་ཚོགས་ཀྱི་འཁོར་ལོ་ཕུལ།།
ཕུལ་བྱུང་གཅེར་བུའི་ལུས་ཀྱི་མཚན་མ་གང་།།
གང་བའི་མཚོ་ལ་གློག་གི་རོལ་རྩེད་ལྟར།།
ལྟར་མི་མངོན་པར་ཕན་ཚུན་བསྣུན་པ་ཡི།།
ཡི་གར་འོངས་པའི་ལོངས་སྤྱོད་འདི་རྨད་བྱུང་།།
བྱུང་བའི་ངོ་མཚར་སུ་ཡིས་མི་ཤེས་མོད།།
མོད་ཅིང་འཕེལ་བའི་ཐིག་ལེའི་དཀྱིལ་འཁོར་དབུས།།
དབུས་ཕྱོགས་ཉི་མའི་འོད་སྟོང་བསྡུས་འདྲ་བར།།
བར་མཚམས་མེད་པར་ཆུང་དུ་བསྐྱེད་པ་མཚར།།
མཚར་སྡུག་མིག་གི་བུང་བ་འདར་བའི་སྒྲ།
སྒྲ་འཛིན་བརྟོལ་ནས་སྙིང་གི་འདབ་མར་ཟུག།
ཟུག་རྔུས་མནར་ཅིང་སྐྱོབ་ཏུ་མེད་པའི་སེམས།།
སེམས་བྱུང་གཞན་གྱིས་བཀོལ་བའི་དུས་མ་རིག།
རིག་པ་ཐག་པ་གྲིམས་ནས་ཆད་མ་ཐག།
ཐག་ཉེར་བསླེབས་པའི་ནམ་མཁའ་ཆེན་པོའི་མདངས།།
མདངས་ལྡན་བདེ་བའི་ངོ་བོར་སྒྱུར་བའི་རྩལ།།
རྩལ་གྱི་རྩེ་མོ་མིན་ནམ་རིག་འཛིན་མ།།
མ་འགག་དབྱངས་ཀྱི་ང་རོ་སྒྲོག་པའི་ངག།
ངག་གི་དབང་བོར་སྒྲུབ་པའི་རྟེན་གྱི་ནོར།།
ནོར་བུའི་མཛོད་ལས་བླངས་པའི་སྙན་ངག་མཁན།།
མཁན་པོའི་མཆོག་བཞིན་ཁྱོད་ཀྱི་ལུས་ལ་མཛེས།།

           ༢༠༠༡ལོའི་ཟླ་༨པའི་ཚེས་༧ཉིན་བྲིས་པ་དགེའོ།།
 

རྩོམ་ཁུངས། ངེད་དྲ་བ།