ལམ་ལ་ཆས་པ།
ཞིག་རལ་དུ་གྱུར་བའི་གྱང་གོག་ཅིག་གི་ཉམས་ཞན་ལྟར  

ཙོང་ཁའི་སློག་པ་སྔ་ས་ནས་ཕུད་དེ 

ཤིག་དང་སྲོ་མང་ལ་སྐྲག་ཉེས་ཀྱིས  

ད་ནི   སྐྱག་སྦྲང་དང་འབུ་ནག་གིས་ཟས་ཚར་བའི་ཁྱོད་ཀྱི་ཡོད་ཚད 

ལྗན་ལྗིན་གྱི་ཆུ་བོ་ཞིག་གིས   

རྣམ་ཤེས་ཀྱི་གློ་སྙིང་རྦད་དེ་བཟུང་ནས་གཉིད་འདུག 

ཐོ་རངས་ཀྱི་བྱ་སྐད་དེས  

ལོ་རྒྱུས་ཀྱི་རྨི་ལམ་གཟིམ་པས 

ན་ཟུག་གི་རྡོག་ཕྲེས་འཁུར་བའི་མུ་ལྟོ་བ་ཁྱོད་རང 

ལམ་ལ་ཆས་རན 

བསམ་གཞིགས་ཀྱི་སྐྲ་ལོར་མདུད་པ་ལན་གསུམ་དཀྲིས་རྗེས 

ཁྱོད་ཀྱིས་རུལ་སུངས་ཀྱི་གཟུགས་གཞི་མངའ་བའི  

སྨད་ཚོང་མའི་བརླ་སྒོར་སྟེང་གི་ངལ་བའི་དུབ་པའི་སྐྱུར་དྲི་དེ་ལ 

ཨུ་ཚུགས་ཀྱིས་གད་དར་ཐེངས་ཤིག་བྱེད་འོས

ཁྱོད་ཀྱིས་འཚོ་བའི་རྨང་རྡོ་ཉིལ་བའི  

གྲྭ་ལྡོམ་དེས་ཚིལ་དྲེག་ཆགས་པའི་ཁུག་མའི་ནང་གི་སྒོར་ལྡོག་དེ་ལ 

བཙན་གཤེར་གྱིས་ཚང་བརྩིས་ཐེངས་ཤིག་བྱེད་འོས  

དེ་ནི་ས་མཚམས་ཤིག་ནས་ཡུལ་ཕྱོགས་གཞན་ཞིག་ལ་ཆས་པའི་སྟ་གོན་དང་པོ་སྟེ 

དངུལ་མདོག་གི་ཉི་མའི་ཁྱོད་ཀྱི་མདུན་ནས་བསུས་ཤིང 

སྔོ་མདོག་གི་གཙང་བོས་ཁྱོད་ཀྱི་རྒྱབ་ནས་དེད་པས

སྐྱེངས་ཟོལ་གྱིས་འཁུམས་པའི་ཟླ་བ་དམར་པོ་དེས་ཀྱང

ཁྱོད་རང་གྲོང་ཁྱེར་ཆེན་པོ་འདིའི་མི་གྲངས་ཀྱི་གྲས་སུ་ཡོད་ནའང 

ཁྱོད་ཀྱི་རྣམ་ཤེས

སྔར་གྱི་ནས་ཡུལ་ཕྱོགས་གཞན་ཞིག་གིས་བདག་གིར་བཟུང་བའི

མནོ་བསམ་གྱི་ཕྱོགས་ལ་ཕྲག་དོག་བྱེད་ཀྱིན་འདུག      ལྷ་ས

                    འགྲུད་བཞུད་ཀྱི་ལམ།

བྱིས་པའི་དྭངས་གཙང་གི་བསམ་བློ་མངའ་བའི་རྟ་རྒན་ཞིག་ལ་ཞོན་ནས 

ལམ་ལ་ཆས་པ་ནས 

རི་བོ་ནི་རླུང་དམར་གྱིས་དེད་པའི་རི་དྭགས་རྨས་མ་ཞིག་བཞིན 

འདུར་བཞིན་འདུར་བཞིན  རྗེས་སུ་རྒྱུག་ལ 

རྒྱང་ཐག་གིས་བཅད་པའི་ནམ་མཁའ་ཧྲིལ་བོ་དེ

རང་དང་ཁ་ཐག་ཇེ་ཉེ་རུ་འགྲོ་བའི་སྣང་བ་སྟེར  

སྐབས་སྐབས་སུ  བྱིས་བློའི་དྲི་མ་ཡལ་བའི་རྟ་རྒན་དེ 

ཚོད་ཚོད་ལ་ལྡོག་བཞུར་གྱི་གཙང་བོའི་མཐའ་ལ་རྒྱུག་པས

ཁྱོད་ཀྱིས་ད་ལྟའི་བར་མཐོང་མ་མྱོང་ལ 

ཕྱིས་འབྱུང་ཅིས་ཀྱང་རིག་དགོས་པའི་སྣང་བརྙན་དག་མཐོང་བྱུང  

སྒམ་བརླིང་གི་ཕྱག་འཚལ་བ་རེ་རེའི་བེམ་པོ་དེ

སྣུམ་ཡུག་ཡུག་གི་རྒྱ་ལམ་ཞིག་དང་དབྱེར་མེད་པར 

ཁྱོད་ཀྱི་མདུན་ཕྱོགས་སུ་མངོན་པའི་དུས་སུ 

ཁྱོད་ཀྱི་བྲེལ་བྲེལ་གྱི་རྐང་མར་ལ་ཟུག་པའི་འཚུབ་ཆ་དེ་དང

གོམ་འགྲོས་དེ་ལ  སྙིང་བོ་ཅི་ཡོད་སྒོམ

དེ་ནི་དུས་བབ་ཀྱི་ཁ་དབུགས་ཁོ་ནས 

འདས་ཤིང་རྨས་པའི་བཙན་པོ་དེས་རུས་པ་དང་ཡང་འདྲ་ལ 

སྲ་མཁྲེགས་ཀྱི་སྲོལ་རྒྱུན་བཙན་པོས 

གཅུན་ཞིང་བརླགས་པའི་སྤྲང་གོག་དེ་ཡི་བྲང་གཞུང་ལའང་ཅིས་མི་གོ 

[ ལྷ་ས་ནི་སྨུག་ལོང་བན་བུན་ཁྲོད་ཀྱི་ཁང་བརྩེགས་དེ་མིན་པར་སྨོན ] 

མདུན་ཕྱོགས་ཀྱི་འོད་སྟོང་འབར་བའི་ཞིང་ཁམས་དེ 

ཁྱོད་རང་གི་ཟུངས་ཁྲག་གིས་བྲིས་པའི་བཙན་རྫོང་ཞིག་ཡིན་ན 

རྐང་རྗེས་ཐ་དག་ལ་འཁྱིལ་བའི་དམག་འཁྲུག་གི་བྱུང་བ་རེ་རེ་ཡང  

ཁྱོད་ཀྱིས་བསླངས་ཤིང་ཁྱོད་ཀྱིས་འདུམས་པས 

ཕུག་རོན་གྱིས་འཁུར་བའི་ལོ་མ་རྐང་གཅིག་གི་དོན་དུ 

ཁྱོད་ཀྱིས་རྐང་སྣམ་བརླ་རྩར་བརྫེས་ཏེ 

ཆུ་གཞུང་དུ་འཐིམ་ཟིན་པའི་དཔྱངས་ཟམ་དེ་ཡོད་མེད་ལ

སྔོགས་གཤེར་བྱེད་དགོས་རྒྱུའི་རྒྱུ་མཚན་ཅི་ལ་ཡོད   ལྷ་ས   

[ ལྷ་ས་ནི་ལྟེ་ཐག་མ་ཆད་པའི་ཁྱེའུ་ཆུང་ཆུང་ཞིག་རེད ]

                     སྒྱུ་འཕྲུལ་གྱི་སེམས་བྱུང༌།

སིང་སིང་གི་དུང་བརྡ་གཅིག་གིས

ལྷ་སའི་མངལ་གྱི་ལྟོ་བ་ནས 

བུ་ཕྲུག་ཅིག་ཨག་སྐད་དང་བཅས་ས་ལ་ལྷུང་སོང

ངལ་རྩོལ་བ་ཐ་དག་གིས་གདོང་བ་དམར་པོ་འགྱུར་གྱིན

ཁྱོད་ཀྱི་ཕྱོགས་ལ་རྒྱང་བལྟ་རེ་བྱས་རྗེས 

ལོ་རྒྱུས་ཀྱི་གསང་བརྒྱ་གཏོར་བའི་སྒམ་ཚུགས་ཀྱིས 

དུར་ཁུང་གི་སྒོ་ལ་འགག་ཟྭ་དམ་པོར་སྦྱར

ཆུ་ཞབས་སུ་ལྷིང་འཇགས་ཀྱིས་འཚོ་བའི་རྡོ་བ་ལྗང་ཁུ་དེས་རིགས 

ཐོའུ་བཏང་བའི་མེ་ཏོག་ཅིག་གི་རང་བཞིན་ལྟར 

ཁྱོད་ཀྱི་ངོ་གདོང་ནས་བཞད་པས 

ཁྱོད་ཀྱི་དྭངས་གཙང་གི་རང་བཞིན་དེ་སུ་ཡིས་ནོག 

ཡིན་ན་ཡང 

ཁ་རས་བརྒྱབ་པའི་བུད་མེད་ཅིག 

ང་རྒྱལ་དང་བཅས་ཁྱོད་ཀྱི་མདུན་ནས་བུད་དེ 

ཁྱོད་ནི་མོའི་དགོས་མཁོའི་ཆེད་དུ་བསྐྲུན་པའི 

རང་དབང་གི་རྩེད་ར་དེ་རེད་ཟེར 

རླུང་འཚུབ་ཅིག་ག་ནས་ཡོང་བའང་མ་ཤེས་པར 

ཡིད་སེམས་ཀྱི་གཙང་བོ་ལྕུགས་ལྕུགས་བསྒུལ་ཅིང 

ལྷོ་རུ་བསྒྲིགས་པའི་ཁྲུང་ཁྲུང་གི་སྟར་ཕྲེང་བཅད་པས

པོ་ཏ་ལ་ཡིས་ར་བཟི་གྱུར་བའི་རྒན་པོ་ཞིག་གི་རང་བཞིན་ལྟར 

བདག་གི་མདུན་ཕྱོགས་ནས་མངོན་ཏེ 

མཐོ་སར་སྙེག་གིན་པའི་མི་ཆེན་ཞིག་ལ་བལྟས་ཀྱིན 

ངའི་ཕོ་བ་ལྟོགས་བྱུང་ཞེས་སྐད་ཅོར་རྒྱག་ལ 

ངའི་མཚན་མ་ན་བྱུང་ཞེས་སྨྲེ་ངག་འདོན

དུག་སྦྲུལ་ཞིག་བཞིན་ལྷ་སར་ནུར་གྱིན་པའི་བདག་གི་སེམས་པ 

གོམ་ཞེང་ཆེན་པོའི་ཁྱོད་སར་བསྙེགས་ཏེ  

ཧམ་སེམས་ཀྱིས་མདུན་ལ་ཐོན་དུས་སུ 

ཁྱེད་ཀྱིས་སེར་ཁ་གས་པའི་ལག་པ་ཆེན་པོ་དེ 

བདག་གི་མདུན་ལ་གཡུགས་ནས 

ཨ་མདོ་བ  སྤ་སེ་ག་རེ་ཟེར  

ང་དངོས་ནས་ཁྱོད་དང་བཅས་པའི་ཡོད་ཚད་ཅིག་ལ་ཡིད་ཆད་སོང 

ཡིད་ཆད་པའི་ཚོར་བ་འདི 

སུ་གང་ཞིག་ལའང་བརྗོད་ཐབས་མི་འདུག   ལྷ་ས

པོ་ཏ་ལའི་འཛུམ་ཞལ།

གླེགས་བམ་རེ་རེ་དང་མཚུངས་པའི 

གཞུང་སྒྲུབ་ཁང་རེ་རེའི་སྒོ་གླེགས་དག

པོ་ཏ་ལའི་མདུན་ངོས་སུ་བཀྲམས་དུས

པོ་ཏ་ལ་ནི་ལོ་ན་ཕྲ་བའི་བཙུན་པ་ཞིག་ཅི་བཞིན  

ཅི་ཞིག་ལ་བློ་རྒྱུགས་སྤྲོད་པའི་འཇིགས་ཉམས་ཀྱིས 

མིག་ཟུང་རིག་རིག་གིས 

འཕོངས་ཚོས་ཕ་བོང་འཁྱགས་པ་ཞིག་གི་སྟེང་ལ་བཞག་སྟེ 

རྒྱ་ཡིག་ཁ་ཤས་བློར་སྐྱོར་གྱིན་འདུག

སྨྲ་བ་ཉུང་བའི་མཇལ་བ་ཚོ 

ཁྱོད་ཀྱི་མདོག་སྣ་ཚོགས་ཀྱི་ངོ་གདོང་ལ་ཡུན་རིང་ཅེར་མཐར 

མགོ་བོ་བསྒུར་ཏེ་གསོལ་བ་འདེབས་ཀྱིན

བདག་གི་བུ་ཕྲུག་འདི་ཡང

ཁྱོད་ལྟ་བུའི  

བློ་གྲོས་དང་དཔའ་སྟོབས་ཀྱིས་ཁེངས་པ་ཞིག་ཡིན་དགོས་ཞེས 

སྙིང་ནས་ཞུ་བ་བྱེད་ནའང 

ཁྱོད་ཀྱིས་ནི རང་གི་ཚོས་ཀྱིས་རྒྱན་པའི་ངོ་གདོང་དེ་སྟོན་གྱིན 

བདག་གི་གདོང་ངོས་ཀྱི་རྨ་ཤུལ་འདི་དག་ལ་ལྟོས་དང 

སྡུག་བསྔལ་གྱི་ཕ་མཐར་གནས་པའི་དག་ཞིང་ནི 

རྟ་རྒོད་ཁྲི་སྟོང་གི་རྨིག་རྗེས་བཟོས་པའི་ལོ་རྒྱུས་ཀྱི་གོད་ཆག་ཙམ་དུ  

ཁྱོད་ལ་དགོས་རྒྱུའི་ནང་དོན་གང་ཡང་མེད 

དེ་བས་ཕར་ཕྱོགས་ཀྱི་སྨུག་པ་སངས་པའི་ཇོ་ཁང་ཆེན་མོར་གཟིགས་དང 

དེ་ནི་ཐར་བའི་ལམ་རེད་ཅེས 

བོད་པ་གཞན་ཞིག་ལའང་བརྗོད་སྲིད་པའི་སྐད་ཆ་དེ་བཤད་བྱུང 

ཡིད་ཆད་དང་སྐྱོ་ངལ་གྱིས་དུབ་པའི་ན་བུན་དེས་ཕྱིར་དུ

གངས་རིའི་རྩེ་མོ་ན་འབར་གྱིན་པའི་མཆོད་མེ་དག་རེ་ཞིག་གཟིམ་པར་ཅི་ལ་སྐྱོན

རྫ་ཁོག་ཏུ་ཆང་སེར་བསྙལ་ནས་ལོ་མང་འགོར་བའི་ད་ལྟ

སུ་ཞིག་བར་སྐོར་ལ་སོང་ནས

ཆང་ཉོའམ་ཞེས་སྐད་བརྒྱབ་ན 

འབོལ་ཁྲིར་སྙེ་བའི་པོ་ཏ་ལས 

ཁྲེལ་དགོད་ལྷང་ལྷང་གིས 

ཀ་ཡེ  མི་བུ་ཐ་ཤལ་བ 

ཁྱོད་ཀྱིས་ལྷ་སའི་སྦི་རག་བཙོང་སའི་བཟོ་གྲྭ་དག་གི་སྒོ་རྒྱག་རྩིས་རེད་པས 

ཆང་གར་གང་ཞབས་བཏེགས་བརྒྱབ་རྗེས 

རང་ཉིད་གང་ནས་འོང་བ་དེ་ལ་ཕྱིར་སོང་ཟེར 

ནམ་གོང་ཐོལ་གྱིས་སད་ནས་ཁྱོད་ཕྱོགས་ལ་བསམ་གཞིགས་རེ་བྱས་ན 

པོ་ཏ་ལའི་མངལ་གྱི་ལྟོ་བ་ན 

ཤི་རྨས་ཐེབས་པའི་ནལ་བུ་ཇི་འདྲའི་མངའང   ལྷ་ས 

                     གྱེས་ཕྱག

གལ་ཏེ   ཁྱོད་རང་ཁོ་ལག་རྫོགས་པའི་མཛེས་མ་ཞིག་ཡིན་ན 

ངས་འཇམ་པོའི་མཆུ་སྒྲོས་ཀྱིས་བརྩེ་བའི་དོད་དུ

ཁྱོད་ལ་འོ་ཞིག་བྱས་ན་འགྲིག་མོད

ཁྱོད་ཀྱི་མཛེས་སྡུག་ནི་ག་རེ 

གལ་ཏེ  ཁྱོད་རང་སྟོབས་ཀྱིས་རྒྱག་པའི་དཔའ་རྒོད་ཅིག་ཡིན་ན 

ངས་སྤྲིན་དཀར་ཐོད་དུ་བཅིངས་ཤིང་ས་གཞི་འདོམས་ཀྱིས་བཅད་ཏེ

ཁྱོད་ལ་རྒྱང་ཕྱག་རིང་མོ་ཞིག་འཚལ་ན་འགྲིག་མོད  

ཁྱོད་ཀྱི་དཔའ་སྟོབས་ནི་ག་རེ  

གལ་ཏེ  ཁྱོད་རང་རྨི་ལམ་གྱི་མཛེས་པ་རྫོགས་པའི་གྲོང་ཁྱེར་ཆེན་པོ་ཞིག་ཡིན་ན 

ངས་ཡིད་སེམས་ཀྱི་བྱ་ལམ་ཡངས་པོ་མདུན་དུ་བསུས་ནས 

ཁྱོད་ཕྱོགས་ལ་གོམ་ཁ་བསྒྱུར་ན་འགྲིག་མོད 

ཁྱོད་ཀྱི་བྱིན་རླབས་ནི་ག་རེ 

སྙིང་དང་དེ་ལས་ཉེ་བ་མེད་པའི་ཉི་མ་ལྷ་ས་ཡ 

ཁྱོད་ཀྱི་རང་དབང་ཐོབ་པའི་ཉི་མ་དེ 

ནམ་ཞིག་གི་ཚེ་ན་སྐུད་པ་ཆད་པའི་དབུགས་ལྒང་བཞིན 

མཁའ་ལ་སྙེགས་དུས་སུ

ཁྱོད་ཀྱིས་བདག་གི་ཕྱོགས་སུ་ཉེན་བརྡ་གཏོང་ངམ 

དེ་ནི 

བདག་གིས་ཁྱོད་ལ་ཕུལ་བའི་གུས་ཕྱག་ཀྱང་དེ་ཡིན   ལྷ་ས  

                                       2006.8.14ཉིན་རྨ་ལྷོ་ནས།

རྩོམ་ཁུངས། ངེད་དྲ་བ།