དུས་ཚོད་ཀྱི་མིག་ཟུང་བསལ་རྗེས
རྨི་ལམ་གྱི་སྒོ་མོ་རྡུང་ཤིང
སྐྲ་གསེབ་ན་འབུས་ཀྱིན་པའི་རིག་པ་དག་ལ
རྣོ་ལྕགས་ཀྱི་མཆེ་བ་རེ་སྐྱེས་ནས་ཡོད

སྙིང་བོ་མེད་དུས་སུ
སུས་ཀྱང་རང་གི་ལག་ངར་ལས
སྡུག་བསྔལ་གྱི་པགས་པ་རེ་བཤུས་ཏེ
སྟོང་ཉིད་ཀྱི་བུམ་པ་ཞིག་བཟོ་ངེས་ཤིང
ཞེ་སྡང་གི་མཛེར་མ་མང་པོས
སྡིག་སྒྲིབ་ཀྱི་ལྷན་པ་མང་པོ་ཞིག་རྒྱག་ངེས
ཚེར་མའི་མེ་ཏོག་སྙིང་ལ་བཙུགས་རྗེས
རལ་གྲིའི་སོ་ཁ་ནས་ཀྱང་མིག་ཆུ་བཞུར་ཅིང
སྟོང་ཁམས་ཀྱི་ཐག་པ་དེའི་སྣེ་མོ
སྐར་མ་རུལ་བ་དག་གི་མཚོ་ལ་ལྷུང་སོང

སྙིང་བོ་ཡོད་དུས་སུ
རུས་སྒྲོམ་གྱི་ལྭ་བ་ཁ་ཚང་ཞིག་གྱོན་ནས
ཁྲག་གི་ཁང་བཟང་ཞིག་ཏུ
རྣམ་ཤེས་ཀྱི་ཚོགས་གསེར་སྒོར་རེ་རེར་བརྗེ་སྟེ
སྲོག་གི་རྒྱན་པོ་འབྱེད་ཚུལ་དེ་ཡང
བྲང་ཁ་ན་རྦབ་ཆུ་བཞིན་འབབ་པའི་འཚོ་བ་རེད

དེད་དཔོན་གྱི་ལག་པ་ཉི་མས་བཞུ་དུས
རིགས་རྒྱུད་ཀྱི་ནོར་བུ་བཙའ་ཡིས་ཟིན་ཞིང
ཚེར་མའི་ཐག་པ་དག་གི་སྣེ་མོ
འཆི་བའི་མེ་ལྕེས་འཚིག་སོང

སྙིང་བོ་མེད་དུས་སུ ད་གཟོད་སྙིང་བོ་ཡོད་ཅིང
སྙིང་བོ་ཡོད་པ་དེ་ཅི་འདྲའི་སྙིང་བོ་མེད་པ་ལའང
                                                        2011.3.11

རྩོམ་ཁུངས། ངེད་དྲ་བ།